المساعد الشخصي الرقمي

مشاهدة النسخة كاملة : ورشة سوافي



باب ساير
12/10/2011, 03:00 PM
السلام عليكم ورحمة الله وبركاته ،،

اخواني ابي موقع ورشة سوافي ولا عليكم امر ضروري تكفون ؟

عبون الجواء
12/10/2011, 03:04 PM
هلا اخوي
مخرج 18 وانت متجه شرق بعد نهاية المحلات الا على اليمين تاخذ معه يمين وجهك جنوب ثالث لفه يمين لف وبعدين اول لفه يسار لف والورشه امامك

باب ساير
12/10/2011, 03:43 PM
حياك الله يااخوي ومشكور وما قصرت ،

ولكن وش تقصد بــ مخرج ١٨ وانت متجه شرق ، اخبر ان مخرج ١٨ فيه اثنين واحد يروح للخرج وواحد يروح للدائري الجنوبي ، ودي توضح لي وانا ماشي على الدائري الشرقي ومتجه جنوب وين اروح ؟؟

وآسف على ازعاجك

باب ساير
12/10/2011, 04:20 PM
يا اخوان اي احد يفيدني وله الدعاء ؟؟

يوكن2000
12/10/2011, 04:31 PM
اخوي باب ساير
اذا وصلت لمخرج 18 ادخل من تحته وخلك ماسك اقصى اليسار اول ما تدخل للنفق ييجيك مخرج يسار اطلع معه لا تروح قدام للخرج اطلع يسار يصير وجهك شرق كنك راح للخط الجديد حق التريلات اللي يوديك على خشم العان وبعدها امش على وصف عيون جواء ( بعد نهاية المحلات اللي على اليمين تاخذ معه يمين وجهك جنوب ثالث لفه يمين لف وبعدين اول لفه يسار لف والورشه امامك )

:cool::cool: مع التحيه

معشوقتي نجد
12/10/2011, 04:32 PM
وش تختص فيه ورشة سوافي

منكم نستفيد يااخوان بارك الله فيكم

يوكن2000
12/10/2011, 04:42 PM
والله مدري وش هي تختص فيه اخوي معشوقتي :D
بس انا حبيت اوضح الوصف للاخ باب ساير لانه ما فهم على عيون جواء فقط

:cool::cool:

باب ساير
12/10/2011, 04:48 PM
بيض الله وجهك وحرّمه عن النار يا اخوي "يوكن2000"

وضحت الصوره وشكراً لك ، وبالنسبه للورشه يا اخوي "معشوقتي نجد" يمدحون شغلهم الكهربائي والبطاريات الاضافيه.

صب لي فنجال
13/10/2011, 12:45 AM
وش تختص فيه ورشة سوافي

منكم نستفيد يااخوان بارك الله فيكم

تختص وانا اخوك في الترهيم للسيارات مثل تركيب بطاريه اضافيه للسياره وانوار اضافيه للكشتات واشياء كثيره عندهم

أبو عقيل النجدي
13/10/2011, 12:54 AM
الله يعينك على أسعارهم

tariq2100
13/10/2011, 01:17 AM
الله يعينك على أسعارهم

اضف عليها الله يعينك على نفسياتهم وخلقهم الضيق
وتكبرهم على الزبائن
وقد قرأت في اكثر من منتدى رحلات انهم صاروا يستعملون قطع تجارية وانا ما ادري عن صحة المعلومة ولكن القطع التجارية يتكرر ذكرها من الذين ركبوا لديهم والله اعلم بالصحيح

ونظرا لكبر سني (مرحلة كهولة) وعدم تحملي لاي شخص يتعامل معي باسوب تكبر او اهانة او استغلال او يتعامل معي كأني جاهل في اساسيات الاعمال التقنية الكهربائية(انا معي ثانوية من معهد الاتصالات في الكهرباء وبعدها ثانوية عامة درست بعدها بكالوريوس وماجستير الحاسب الآلي وهندسته بالولايات المتحدة الامريكية) فبعد هذه المكانة العلمية لا ارضي ان اكون حقل تجارب لشخص قد يكون خريج دورة كهرباء مدتها ستة أشهر من معهد مهني (دورات ما بعد الابتدائية بالمعاهد المهنية وبعضها يتم التسجيل فيه بشهادة رابع ابتدائي على ما اذكر)، وانا عن نفسي اذا بغيت اسوي اي شيء بالسيارة امشي من الرياض للقصيم فيه فنيين سعوديين اصحاب مؤهلات تقنية وخريجي معاهد وكليات تقنية وهم اصحاب ورش هناك يقدرون جيتك من الرياض ويحترمون زبائنهم واخلاقهم طيبة واسعارهم رخيصة (بالنسبة لاسعار الرياض يعتبرون ارخص واجد) وقطعهم اصلية وشغلهم مضمون بإذن الله وكلهم عنواينهم اخذتها من هذا المنتدى المبارك .
وانت صاحب القرار النهائي اختر اي ورشة في العالم وتوكل على الله وركب فيها ما شئت.

بدراان
13/10/2011, 03:29 AM
كانك في سدير كلمهم قبل لاني قد جيته وقال عقب اسبوع !

ولا ازيد علي كلام الاخ طارق . .

الصراحه تعامل صاحب الورشة مع العميل يرفع الضغط

ابحث في المنتدي ترا البديل موجود وفرق في السعر

V 8
13/10/2011, 03:39 AM
الله يعينك على شين التعامل ورفعة الخشم

نصيحتي مر ورشة الصبي

شغل مضبوط وتعامل راقي

في شارع اربعين الربوة

وانت على الدايري الشرقي جاك مخرج 15 امسكه واتجه غرب وابتل في الخدمة وأول اشارة خذ معها يمين امش شوي تجيك الورشة يسار

قنوع
14/10/2011, 09:01 PM
سبق وان اشتغلو في موترين لي وشغلهم ممتاز

والآن اتعامل مع الصبي

سعر اقل وجوده أعلى

ولا لي مصلحه في مدح الأثنين

تحياتي

أبوهشام2
15/10/2011, 03:39 AM
نصيحة محب
مر على الورشتين قبل لا تشتغل على موترك عشان ما تتحسف بعدين

أنت إذا مريت راح تشوف الفرق في المعامله والسعر والشغل

بالنسبه لي أرشح ورشة الصبي وبدون منازع
وأقول هالكلام عن تجربه
وسبق لي إني مريت على كل الورشتين قبل لا أسوي شي على موتري


بالتوفيق

كثير السؤال
15/10/2011, 01:30 PM
باب ساير اذا انت بعنيزه مايحتاج تروح للرياض عندك ببريده ورشة العثيم والدفع الرباعي وعروق الشمال وورش واجد يزبطون امورك

باب ساير
15/10/2011, 05:07 PM
بيّض الله وجيهكم جميع ما قصّرتو ،

فعلاً سمعت عن ورشة الصبي وبمرّهم قريب بإذن الله ، وسمعت عن سوء معاملة ورشة سوافي ولكن ما صدّقت إلا يوم لقيت رقم صاحب الورشه (ابو عبدالله) وكلمته وكان ردّه الله يهديه مثل وجهه "محنب فاضين لـ هل الاشياء"

مع العلم اني ما طلبت شي غريب ، ابي بطاريه اضافيه بس أبيها بشنطه موب بالسياره ، يعني نفس الشغل ولكن بشنطه متنقلة .

للفائده :// الشنطه هذي تلقونه بالرمايه بس غاليه وانا قلت اسوي لي وحده ارخص لي وأضمن ان المواد زينه بإذن الله.

باب ساير
15/10/2011, 05:13 PM
باب ساير اذا انت بعنيزه مايحتاج تروح للرياض عندك ببريده ورشة العثيم والدفع الرباعي وعروق الشمال وورش واجد يزبطون امورك

ما لك لوا ياخوي أنا بالرياض
كثّر الله خيرك وعسى الله يوفقك ويسعدك ، مشكوور على مرورك واثرائك للموضوع