المساعد الشخصي الرقمي

مشاهدة النسخة كاملة : طلب مساعده ومشوره يا اخوان في فكره تركيب تانكي ماء وشنطه عفش



T-Tamimi
18/10/2011, 06:26 PM
السلام عليكم ورحمة الله ..

اقترب موسم الرحلات وبدا التفكير في تجهيز بعض الامور المهمه للرحلات ..

الحقيقه يا اخوان بودي تجهيز بعض الامور الاساسيه والسهله

ومثل ما تعرفون وجود شنطه للعزبه واغراض القهوه والشاهي والطبخ وتانكي الماء من الاساسيات.

وسيارتي دفع رباعي عائليه "فورد اكسبلور" استخدمها للمدينه
وطلعاتي للبر خفيفه وعلى قدر معتدل

المهم ابي طريقه تكون سيارتي من الداخل مافيها قراشيع واجد.
وتكون اغراضي خارج السياره وممكن استغني عنها في الصيف بسهوله
وفي نفس الوقت ما تكون الاغراض والثقل على خلفيه السياره ..

طرى في بالي اركب شنطه فيبرجلاس فوق التنده "على السله"
وتكون مقدمه الشنطه عباره عن تانكي مويه 100 لتر تقريبا . والباقي شنطه اغراض. وكذا يكون الثقل موزع على كامل السياره .وكامل الاغراض من عزب وحطب وخلافه خارج السياره . يعني اقدر استخدم داخل السياره بالكامل للعائله او الربع ولو دخل الصيف افك الشنطه بالي فيها واطربلها في الحوش .

حاولت اوضح في الصوره الفكره واتمنى تساعدوني بمشورتكم عن عيوب هذه الفكره
ومن وين اقدر افصل شنطه مثل هذي .
وهل السله وتنده السياره تتحمل الثقل خصوصا اذا صارت السياره تمشي والهوا ييضرب في الشنطه اخاف تنقلع .! ..

http://www.aqarcity.org/aqarup2011/di-0ON7.jpg

انتظر فزعتكم بالمشوره والراي السديد ..
ولا ادري هي تمام ولا فيها عيوب

يكفيني نظرة
18/10/2011, 06:51 PM
السلام عليكم ..
اخوي التميمي انشاء الله انك طيب..
بالنسبه للشنطه العلويه ما انصحك فيهاللاسباب التاليه:
1- ترد الهواء وتضعف ممشى الموتر بالخط.
2- محصوره بحجمها ولاتقدر تحط الاغراض على كيفك لأنها بتحدك على حجمها وبيكون هناك فراغات ماتستفيد منها..
3- السعر بيكلفك ..
رأييي:
تفصل شراع تنزاني وله سحاب يسكره عن المطر والغبارعلى مقاس التنده او اصغر شوي..
وتفصل طربال على ارضية وجوانب الموتر بالمساحه الخلفيه وتحط فوقه طبق وتكون الاغراض تحت الطبق وممكن تحط فيه ادراج تحط فيها اغراضك الخفيفه..
والتانكي يوجد عند الوطني احجام مر عليهم وشف اللي يناسبك.

عاشق السيل
18/10/2011, 08:09 PM
وعليكم السلام ورحمة الله وبركاته ،،

وضع العفش فوق التندة متعب جدا جدا جدا مايصلح إلا للسفريات لأنك تركب العفش مرة وحدة وتشيله مرة وحدة !!

أما بالرحلات كل شوي ناط فوق التندة علشان تاخذ غرض أو تحط غرض لأنك مستحيل تنزل كل عفشك وأنت ماتحتاجه !!

وبالليل يلزمك لمبة تكون أعلى من التندة ،، أما تانكي الماء إذا صار فوق والماء على النص يبدأ يلعب بالموتر مع اللفات لأنك ناوي على 100 لتر وإذا صار مليان بيكون ثقيل ويضغط على التندة !!!

بالإضافة للسلبيات اللي ذكرها أخوي ( يكفيني نظرة ) ،،

باقي عاد النصيحة : شنطة الإكسبلورر بدون المرتبة الثالثة تكون واسعة ومعقولة وتقدر تحط فيها تانكي ماء مسدوح بارتفاع 10سم وشنطة العزبة فوقه والحطب والفرش والمراكي ويبقى لك نص الشنطة فاضي !!!!!

الله يوفقك ويمتعك بحلك وترحالك ....

(((.ابوتميم .))))
18/10/2011, 09:42 PM
والله انا اقول يابناخي فصل طبق وتانكي ماء الفيبر وراء المراتب الي وراء
والمراتب الاخيره فكها
مواضيع بتفيدك وسامحنا على القصور
http://www.mekshat.com/vb/showthread.php?t=253261
http://www.mekshat.com/vb/showthread.php?t=216190

T-Tamimi
19/10/2011, 09:17 AM
السلام عليكم ..
اخوي التميمي انشاء الله انك طيب..
بالنسبه للشنطه العلويه ما انصحك فيهاللاسباب التاليه:
1- ترد الهواء وتضعف ممشى الموتر بالخط.
2- محصوره بحجمها ولاتقدر تحط الاغراض على كيفك لأنها بتحدك على حجمها وبيكون هناك فراغات ماتستفيد منها..
3- السعر بيكلفك ..
رأييي:
تفصل شراع تنزاني وله سحاب يسكره عن المطر والغبارعلى مقاس التنده او اصغر شوي..
وتفصل طربال على ارضية وجوانب الموتر بالمساحه الخلفيه وتحط فوقه طبق وتكون الاغراض تحت الطبق وممكن تحط فيه ادراج تحط فيها اغراضك الخفيفه..
والتانكي يوجد عند الوطني احجام مر عليهم وشف اللي يناسبك.


وعليكم السلام ورحمة الله وبركاته ،،

وضع العفش فوق التندة متعب جدا جدا جدا مايصلح إلا للسفريات لأنك تركب العفش مرة وحدة وتشيله مرة وحدة !!

أما بالرحلات كل شوي ناط فوق التندة علشان تاخذ غرض أو تحط غرض لأنك مستحيل تنزل كل عفشك وأنت ماتحتاجه !!

وبالليل يلزمك لمبة تكون أعلى من التندة ،، أما تانكي الماء إذا صار فوق والماء على النص يبدأ يلعب بالموتر مع اللفات لأنك ناوي على 100 لتر وإذا صار مليان بيكون ثقيل ويضغط على التندة !!!

بالإضافة للسلبيات اللي ذكرها أخوي ( يكفيني نظرة ) ،،

باقي عاد النصيحة : شنطة الإكسبلورر بدون المرتبة الثالثة تكون واسعة ومعقولة وتقدر تحط فيها تانكي ماء مسدوح بارتفاع 10سم وشنطة العزبة فوقه والحطب والفرش والمراكي ويبقى لك نص الشنطة فاضي !!!!!

الله يوفقك ويمتعك بحلك وترحالك ....


والله انا اقول يابناخي فصل طبق وتانكي ماء الفيبر وراء المراتب الي وراء
والمراتب الاخيره فكها
مواضيع بتفيدك وسامحنا على القصور
http://www.mekshat.com/vb/showthread.php?t=253261
http://www.mekshat.com/vb/showthread.php?t=216190

ياجعل وجيهكم تحرم عن النار ويكتب لكم عند ربي عن كل حرف مليون حسنه ياكريم ..

بالفعل التانكي في هذا المكان خطر جدا على توازن السياره وممشاها
و وضع العزب والفرش الحطب فوق التنده بعد غثيث في التحميل والتنزيل خصوصا وقت المسرا.
ونقطه اللمبه اخوي عاشق السيل عز الله انها تنبيه طيب وماقصرت .

الفكره اني ما ابي استغني عن المرتبه الثالثه
وفي نفس الوقت ودي يكون الثقل موزع على السياره وما يكون على المساعدات الخلفيه وبس.
ولكن يبدو انها مستحيله انك تكسب كل شي "مرتبه ثالثه وعفش وتانكي مرتب ومضبوط.

جيزك جيز غيرك ..
طربال مبطن على ارضيه وجوانب المساحه الخلفيه
وفوقه تانكي راقد او مسدوح 10 سم
وفوقه شنطه عزبه الطبخ وشنيطه القهوه والدافور والقز وخيشه الحطب
وفوقه عدد اثنين مراكي وفرشه والرواق نربطه فوق التنده على السله وصل الله وبارك
والجيد من الصغار يفزع لبوه ويدور له محل بين المراكي ههههههههه
اذكر منول نتطاق من يتمدد على الطبلون الخلفي للبيوك الله المستعان ولا ضرنا الحمد لله.

احسنتم يالاخوان وبارك الله فيكم والله يمتعكم بالصحه والعافيه ورضا الرحمان ويرزقنا وياكم سعه الصدر والرزق في الدنيا والسعاده بالاخره قوولو آمين ..