ليش تحمي سيارتك قبل لا تمشي ؟؟؟؟ [الأرشيف]

مشاهدة النسخة كاملة : ليش تحمي سيارتك قبل لا تمشي ؟؟؟؟

طير استراحه

10/02/2006, 01:27 AM

سؤال ابحث له عن اجابه ... مافيه كاتالوج لأي سيارة جديده يقول لازم تحمي السياره ؟؟
اذا من اللي اخترع تحمية المكينه قبل التحرك ..
طبعا انا متأكد انه سعودي مليون بالميه ولا يمكن تخالفوني الرأي؟؟

ارتست

10/02/2006, 01:59 AM

حلو كلامك بس قل لي ليش اجل حطو علامة c في امبير الحرارة..................... كان شالوها وخلو علامت H للحرارة المرتفعة بس
علشان كذا اتوقع لازم تحمي حتى تصل الحرارة فوق رمز البرودة
وبيني وبينك لاعاد تحمي بس انا مااقدر اتحمل الخساير علشان كذا راح احمي واحمي والله يصبرنا........................ امزح معك

محب النياق

10/02/2006, 02:13 AM

التحميه في كل السيارات مكتوب في الكتلوج 30 ثانيه فقط

بس علشان يدور الزيت في المكينه

بن عميرة

10/02/2006, 02:17 AM

أخي طير استراحه السبب الأول:- كان محرك السيارة يصنع من معادن (سبايك) لا تتحمل الاختلاف المفاجئ في درجة الحرارة بين السطح الداخلي (غرفة الاحتراق) و الخارجي فيحدث شعر (كسر) في محرك السيارة لكن تم معالجة الأمر قبل الستينات الميلادية.

السبب الثاني:- قبل ظهور الحقن الإلكتروني الكامل كانت عملية خلط الوقود بالهواء تعتمد على جهاز ميكانيكي بحت ما يعرف بالكلبليتر (ميكنزمات= زنبرك ضغط , قلاب, ...... الخ) تعمل تلك الأجزاء بصورتها المثالية عند ما يكون المحرك ساخن و العكس الصحيح عند ما تكون باردة تكون نسبة الخلط غير مناسبة فتظهر الأدخنة و يلاحظ عدم انتظام حركة السيارة (تقطيع).

مافيه كاتالوج لأي سيارة جديده يقول لازم تحمي السياره ؟؟

كلام منطقي صحيح 100/100 لا يوجد سبب لتسخين السيارة بل يعتبر عامل مساعد بأتساع ما يعرف بثقب الأوزون بسبب العوادم المنبعثة من تلك السيارات الغير مستفاد منها بالحركة

salehhd

10/02/2006, 01:15 PM

السلام عليكم

انا قريت اكثر من كتلوج لسيارات يابانية

التويوتا واللكزس يقول
10 نواني وتكون السيارة جاهزة وفي الاجواء الباردة تسير في سرعات منخفظة
يعني السيارة تكون جاهزة لانطلاق بعد 10 ثواني من التشغيل واذا الجوب برد تمش شوي شوي لين ما يرتفع الانبير

النيسان
يقول 30 ثانية وتكون السيارة جاهزة ونفس الشي بالنسبة للجو البارد
وكذلك الهوندا

في الحقيقة فكرة التسخين مأخوة من السيارات القديمة ايام الثمانيناة وسيارات الديزل لانها لازم تسخن وزمان كان الوالد الله يذكرة بالخير يقول كنا نولع الشوله تحت السيارة علشان تسخن بعدين نشغلها لان انواع الزيت القديمة كانت تجمد مع البرد

رحال نجد

10/02/2006, 04:42 PM

أشوى أنكم علمتوني يالربع لأن هذي هي طريقتي من يوم عرفت السيارات ومابلا العافية

عيناوي اصيل

10/02/2006, 04:46 PM

انا لا اقوم بتسخين السيارة ، فقط دق سلف وتحرك ولكن ببطئ حتى تسخن السيارة
وهذا الشي طيب في الصيف للنظام البخاخ والكربوريتر .
ولكن في الشتاء نظام الكربوريتر ما يمشي بدون تسخين ولو لفترة بسيطة

للاسف الاغلبية تقوم بتسخين السيارة وحتى في الصيف ظنا منها بان التسخين يطيل
عمر المحرك.تشوف السيارة شغاله لمدة من 5 الى 10 دقائق قبل ان تتحرك.

والسموحة منكم

الربذي

10/02/2006, 05:45 PM

ياليتكم تقنعون واحد اسميه مريض تسخين سياره تصدق انه يقعد احيانا 45 دقيقه يسخن بالسياره ومعه امريكي ويقول لازم يسخن عشان مايخرب عليك لكن انا يمكن 40 ثانيه بس ملاحظ احيانا بالبرد اذا كان تحت الصفر وكم مره يكون تحته ماتمشي السياره عدل تقطع بالرغم انها بخاخ وموديل حديث لاماتقطع بالمعنى اللفظي يكون عزمها ضعيف وكانها تكن ماتسلك وخصوصا اذا دعست بسرعه
لكن الاحظ لابد من تسخسن السياره وبس اللي يبي يحافظ عليها وشاريه بدم قلبه وفوق الميه

غالي

10/02/2006, 09:14 PM

والله انا رجال من يوم خبرت عمري وانا احمي السياره من دقيقتين الى خمس دقايق
وهذا افضل للسياره وتعيش المكينه اكثر ولايطلع عليك صوت البلوف والزيت يرتفع مايكون نازل
ولكن الي مااقتنع بالكلام يجرب بنفسه خصوصا الي مايحمون سياراتهم
ابطلب منهم يجربون يوم صبح يحمون سياراتهم 4 دقايق بس او 5 دقايق
ويحفظون صوت المكينه ويخلونه ببالهم
ومثل بكره يروح وهو مايحمي ويشوف الفرق تحس ان بالمكينه زنه حتى ااذا كان توماتيك تحسه يالله يغير يصيف
وهذي ملاحظاتي شخصيه
والله اعلم شكرا

ملاحظه: توصيه لي شخصيا من الوكاله يجب تحمية السياره 5 دقايق
وبعدها خذ راحتك تسرع والا ماتسرع فيها

طير استراحه

10/02/2006, 10:08 PM

ابراهيم

11/02/2006, 04:25 AM

بو خليفه

11/02/2006, 08:33 AM

عادة مكتوب في السيارات يجب التسخين في الموديل القديم قبل 1990 من نصف دقيقة إلى دقيقتين
أما البخاخ إذا كان الجو بارد نصف دقيقة
أما الأوروبي و الكوري لا يوجد تسخين السيارة لأن يوجد فيها منظم لحرارة السيارة لكن البرودة القاسية يجب تسخين السيارة من دقيقة واحدة تكفي و إذا لم تسخن تحس السيارة ثقيلة خاصة في الياباني و الأمريكي
أما الأوروبي لا يتؤثر سواء سخنت أو لم تسخن

تحت الظل

11/02/2006, 09:46 AM

والله موضوع حلو

ولاحظت هذا الشيء في بريطانيا

والله ( أحلف ) .. ما عمري شفت أحد يحمي سيارته , أبد .. دق سلف وامش !
والجو باااارد !!!

يعني ما أتوقع إن التحمية شيء ضروري .. بس أهم شيء عط الموتر من نص الى دقيقة عشان يضبط وضعه

.
.

محب الشمال

11/02/2006, 09:56 AM

كان عندي باترول موديل 97 واذا ما سخنته وامشي على طول يقوم يتفتف وينتع معي عشاني ما سخنته

صراحة انا اشوف تسخن السيارة احسن عشاان يرتفع الزيت ويتحرك في الماكينه وتستعد السيارة

يعني تسخين السيارة اشبهه بالتهيئة للسيارة والاستعداد

هذا رايي وقد اكون غلطان

والله يحفظكم ويرعاكم

الكونترولCONTROL

11/02/2006, 10:00 AM

في الصيف دق سلف و عشق و امش
اما في الشتاء ما تتحمل المكينة تحريك العمود و ثقل القير و هي جامدة

وثاب

11/02/2006, 11:26 AM

والله ياأخوان انا لي زميل ماقد حما سيارته ابد من عشرين سنه تقريبا ولكن يقول لاتدعس على السياره اول ماتمشي ..والسؤال اذا كان المفروض انك ماتحمي سيارتك ليش الار بي ام يصير فوق الواحد اول ماتشغل ويستمر الى دقيقه تقريبا ؟؟

نفس السؤال اللي ابسأله

والسؤال اذا كان المفروض انك ماتحمي سيارتك ليش الار بي ام يصير فوق الواحد اول ماتشغل ويستمر الى دقيقه تقريبا ؟؟

هلا وغلا

11/02/2006, 11:40 AM

حي الله الشباب

الومينا يلزم انك تحميها 5 دقائق كما ورد بالكتلوج

salehhd

11/02/2006, 01:13 PM

نفس السؤال اللي ابسأله

والسؤال اذا كان المفروض انك ماتحمي سيارتك ليش الار بي ام يصير فوق الواحد اول ماتشغل ويستمر الى دقيقه تقريبا ؟؟

سؤال في محله

بالنسبة لي استنى لين ينزل الى الواحد وامشي على طول

mediaksa

11/02/2006, 02:50 PM

السلام عليكم ورحمة الله وبركاته،،،،

هذه نصيحة للجميع
لتسخين السيارة قبل تحريكها:

في فصل الشتاء.
للسيارت التي تعمل بنظام الكاربريتر من (2 إلى 4 دقائق فقط)
للسيارات التي تعمل بنظام الحقن الإلكتروني البخاخات (20 ثانية أو دقيقة واحدة كحد أقصى)

في فصل الصيف.
للسيارت التي تعمل بنظام الكاربريتر من (10 ثوان إلى دقيقة واحدة كحد أقصى)
للسيارات التي تعمل بنظام الحقن الإلكتروني البخاخات (10 ثوان أو 30 ثانية كحد أقصى)