المساعد الشخصي الرقمي

مشاهدة النسخة كاملة : سؤال مهم مع موقف في الثمامه؟؟؟


الفتى المجازف
10/02/2006, 08:37 PM
الموضوع ببساطه احد الشباب من الربع طالع للبر توه شاري له سياره بسم الله ماشاءالله تبارك الله
باترول سوبر سفاري موديل جديد كل شي جديد حتى الكفرات جديده
المهم صاحبنا وده يجربه في الطعوس وللأسف كانت التجربه في الثمامة العزيزه على قلوب محبيها
وانا من كارهيها ولي اسبابي الشخصية منها على سبيل المثال :no:
فقدت خصوصيتها كمنتزه كان جميلا هادئا نظيفا والآن اصبح منتزه حتى اصحاب الاكسنت اصبحو يطعسون فيه :confused:
معلينا مالكم بالطويله نعود لموضوعنا
صاحبنا جاء يجرب موتره في هاالطعوس واول مادخل الا ويغرز ويطيح الموتر اتصل بي وش الراي تعال طلعني
الموتر طاح تعلق :mad: سألته انت مشغل الدبل قال ايه جربت الخفيف والثقيل قال ايه طيب نسمت او نزلت هواء الكفرات قال لا قلت له نزل الهواء نزل ضغط الهواء الى 20
وجرب اذا ماطلع اتصل بي طبعا هو معه العائلة بعد نصف ساعه اتصل قال ابشرك طلع الموتر وانا الحين اتندح في هاالطعوس واتمشى والعيال مبسوطين والله لو فيه جدار كان طلعته من زود النشاط في الموتر يحق له مشاءالله 2006 ولا يبيه يطلع الجدران :D المهم دعيت له ان الله يعطيه من خيره ويكفيه شره وودعته.
شوي الا والجوال يدق ابو فلان الله لايعيد نصيحتك (خيرا تعمل....) ليش وش السالفه وش اللي حاصل يابو فلان
قال الكفر انشق من الجنب وش اللي شقه قال شوكه خاشه في الكفر عرض طيب غيرت الكفر قال انتظرك اجل بنفس شينه ايه غيرته طيب وش الحل مع الكفر اللي فيه الشوكه البنشري يقول ماعاد ينفع ارميه في الزباله
السؤال ياشباب
اذا الكفر تعرض لمثل الشوكه اللي دخلت عرض في كفر صاحبنا وشقته بعد التنسيم اللي انا تسببت عليه بعد نصيحتي له صاحبنا يقول اني حطيت رقعت تيوبلس وشكلها مااعجبني واحس انها مهيب عمليه
عاد انا قلت ابا اطرح الموضوع عليكم متمنيا ان اجد من لدنكم الافاده حول الموضوع وهل هناك طريقة افضل من التيوبلس لمثل الشق اللي في الجنب
مع اني سمعت ان فيه حلول افضل من التيوبلس لمثل تلك الحالات.
شاكرا للجميع تجاوبهم
محمد التمامي
10/02/2006, 08:53 PM
اولا خويك ذا ما في راسه وشلون يدخل للطعوس ولا ينقص حتي لو معه جديد يعني ما ينقص ولا علشانه هواء الوكاله

شف خله يركب رقعه المانيه داخليه بـ30 ريال ويا دار ما دخلك شر

ومعليش على الاسلوب الاقشر بس غصب عني لان اكثر الناس تأخذه العزه بالاثم ويقول دبل وخير يا طير لازم تنقص هواء

وفالكم طيب
ابو محالة
10/02/2006, 08:53 PM
اخى الكريم
هناك رقعة داخلية للكفر وانا مجربها شخصيا وعملية جدا مع العلم ان اغلب البناشر ما يعرفونها مع الاسف
اما بالنسبة للتيبولس انا استخدمة للطوارى فقط حتى اوصل الديرة وارقع الكفر
ولك تحيـــــــــــــــــــــــــــــــــــــــــــــــ ــــــــــــــــــــــــــــاتى
الفتى المجازف
10/02/2006, 08:56 PM
هلا بالاخ محمد التمامي
والاخ ابو محالة
كل الشكر والتقدير على اضافتكم وتوضيحكم لا عدمناكم ياغالين
ابا اتصل على رفيقنا نعلمه بالحل عشان مايزعل على كفره.
متحسف به جديد وانا السبب في خرابه.
تمنياتي لكما بالتوفيق
دله وفنجال
11/02/2006, 07:50 PM
السلام عليكم...
أي والله خير تعمل .... وزين ماقالك ادفع قيمة الكفر...
ألمهم البناشر تتطور ونا اخوك مثلة مثل غيرة الرقع واجد وألانواع واجد وزي ماقالو الشباب أفضلها الالمانية وعليها ضمان ...
أسف اذا كان فية تعدي لاكن ياكثر الي أطيحبهم مثل هنمونة...
الفتى المجازف
11/02/2006, 11:48 PM
حياك الله يابوحسين اسعدتني بطلتك البهيه
اما بالنسبه لها النمونه وش نسوي
حبايبنا ياغالي.
ودهم ياصلون القمر وهم ماوصلو الصمان
عاد وشلون طعوس الثمامه.
تحيتي ومودتي
البيـرق
12/02/2006, 01:52 PM
ان كان الشق من الجنب ماينفع اما ان كان معدعسة الكفر له عدة حلول........
ومنها يرقعه تيوبلس-يبطن الكفر جلد مع تركيب لستك هذا ان كان الشق قوي......
ارتست
12/02/2006, 02:24 PM
ياشباب إنتبهو انا بغيت اروح فيها
مره انشق الكفر من جنبة وحطيت رقعة ب30 ريال ويوم رحت للطعوس خففت الهواء بالكفرات والظاهر ان الرقعة ماتحملت الليونة في الكفر ونسمت شوي شوي وبعد ماعبيت الكفر وانا طالع على الخط السريع وبعد ربع ساعة مادريت إلا والموتر يرجف إثر الكفرطلع هواه وبنشر وانسلخ وربي ستر فارجو الحذر ياشباب
وفي اعتقادي راعي التطعيس والنفود يبعد عن الترقيع الجانبي
الشقردي
12/02/2006, 02:39 PM
انا مع كلام أخونا البيرق
اذا البنشر مع الجنب ما يصلح ترقع الكفر
وأنت تراك ماأخطيت يوم تقول لخويك نسم الكفرات بالعكس هذا الصحيح

أما ان كان خويك متحسف مره على الكفر فأقترح انه يركب للكفر لستك ويخليه استبنه ولا يستعمله مسافات طويله
ويجيب الكفر الاحتياط (الشد بلد) ويركبه مكان الكفر اللي خرب
ويا دار مادخلك شر !!!!!
شبح الصحراء
12/02/2006, 09:51 PM
انا ماني عارف ليش خويك زعلان للدرجة هذي الموضوع بسيط ، انا يوم اشتري سيارتي اول مرة طلعت للبر انطعج الجنط بسبب احتكاكه بصخرة معترضة مدفونة بالرمل ورحت ركبت الجنط محل الستبنه وركبت الستبنه مكانه ، الواحد لازم يحط بباله لا طلع للبر انه احتمال تحصل اشياء للسيارة ولو كانت جديدة فلا يضيق صدره .
الفتى المجازف
13/02/2006, 12:37 AM
البيرق


كل الشكر والتقدير
تحيتي

ارتست

كل الشكر والتقدير/التجربة خير برهان
وشكرا على التنبيه
تحيتي

الشقردي

كل الشكر والتقدير / بس وين اللي يقدر
تحيتي

شبح الصحراء

كل الشكر والتقدير /ياحبيبي ترا ماالناس بسواء
تحيتي
--------------------

تمنياتي للجميع بالتوفيق
الطعس الذهبي
13/02/2006, 05:08 PM
يبدل بينه وبين الستبنة عشان السبير يصير يمشي الحال
لهيب الشوق
09/11/2006, 05:03 AM
http://annada.jeeran.com/bsm2.gif




http://www.alfrasha.com/up/977045031468387049.gif




إلى جميع الأعضاء والزوار الكرام مع التحية.......


{فضلاً لا أمراُ}





سيارتي كامري ولقد وجدت مسمار صغير بجانب الكفر الأمامي ،

وأريد أن اعمل رقعة تيوبلس للكفر(توجد رقعة صينية في أغلب البناشر)،

وأنا اسبوعيا أسافر (العمل خارج محافظة الخرج)،

لــــذا أريد من سادتكم التكّرم والتفضّل بتوجيهي ونصحي عــــن أ فـــضـــل رقــــعــة تيوبلس للكفر،

وإرشادي عن كيفية استعمالها وتركيبها وتحذيري عن الأخطاء التي ربما وقعت لكم من واقع تجربة.


ويوجد لدّي تساؤلات وهي: { أتمنى الإجابة عليها }

ـــ هل رقعة التيوبلس مع الإستخدام ، تُنقِص من ضغط الهواء؟ <كل يوم تلاحظ مقدار ضغط الهواء ناقص أم لا>

ـــ هل رقعة التيوبلس مع الإستخدام ، قــد تُشكل خطراُ على سلامة الركاب والمركبة؟


ـــ هل رقعة التيوبلس مع الإستخدام ،قــد تــتآكل وينتهي مفعولها ؟


ـــ هل رقعة التيوبلس مع الإستخدام ، قـــد تؤثر على عمر الكفر؟


ـــ هل رقعة التيوبلس مع الإستخدام والحرارة، قـــد تنخلع أو تسقط من مكانها ؟

ـــ هل رقعة التيوبلس مع الإستخدام، قـــد يرتفع حرارة الكفر أو ينفجر أو ينسلخ؟


ـــ هل رقعة التيوبلس لا ينصح بإستخدامها إطلاقاُ؟


............ دمتم بود.............


مع شكري وتقديري لكم على حسن تعاونكم ونُبل أخلاقكم......

للتواصل:hotmaill_444@hotmail.com


وجزاكم الله خيرا
الفتى المجازف
04/12/2006, 11:26 PM
حياك الله يالهيب الشوق

والله اسئلتك احيلها على الاخوان في مكشات

فبتأكيد توجد لهم تجارب ولديهم حلول.

وفق الله الجميع لما يحب ويرضى
نيتروجين xp
05/12/2006, 02:05 AM
ما مثل الرقعة الداخلية الحرارية فقط وعليكم بالأصلي والشغل السنع

تحياتي للجميع ..
هلال المطيري
05/12/2006, 02:21 AM
السلام عليكم ورحمة الله وبركاته عندي طريقتين :
1- رقعه داخليه مثل ماتكرمو أخواني الأعضاء
2- البخاخ اللاطس هذا ياطويل العمر والسلامه تلقاه عند حقين الرحلات وش نظامه يشبه بخاخ البويه وله لي وبراسه مثل البلف تركيه على بلف كفر السياره وتشده زين وتضغظ البخاخ ألين مايقضي وهو في نفس يحط غشاء على الشق ويرقعه رقه تامه وينفخه في نفس الوقت تكلفته بحوالي 25 ريال ويمشبك 300 كيلو لاغير وتروح الماده ويرجع زي ماكان وهذي الحركه للظروف الصعبه وشكرا ومعليش على الأطاله