محتار وش اشتري موتر !

[gx-low]

السلام عليكم

أخواني يقولون : ما خاب من استشار

أنا معي لاندكروزر 2003 G ما قصر معي صبور وقليلة مشاكله

لكن نبي نجدد وندور المواصفات الزينة .. مشكلة الجي ما عندك الا قير ومكينة

وصراحة اني محتار وش اخذ ساعة يطري علي فكسار 2007 .. واقول بقيمته خذ جكسار 2008 وبعدين اقول دور لك فتك حتى البرادو والباجيرو دخلناهم في القائمة

هواجيس الله يدافع وسواليفي هاليومين كلها بالمواتر

فنبي منكم الشور الزين والنصيحة لاخوكم وانا حدي في بحر 130 الف

ابي موتر عملي وقليل خرابات ومواصفاته زينه ويمسك سعره فوش رايكم

شاكر مقدما

[فتكاوي الرياض]

الله يرزقنا وياك اللي نتمنا والجميع يارب

والله يا الغالي انا بعطيك رأيي الفتك موتر بس قطع غيار مافيه وكيله علله

ورش للفتك تعد على الاصابع طبعا انا اتكلم على الرياض اما المدن

الثانية ما ادري عنها وفي قطر والامارات وكيلهم يقال انه ممتاز

يعني مالك الا يا جكس ار اهم شي 8 سلندر ولا برادو ولا يوكن تراه

سواقته مريحه وفي الخط ولا احلى ومكينه قويه اذا تبي الراحه والقوه

يوكن ولا تاهو تبي تحمل وكد ومد ويمسك سعر لاند كروزر وبرادو

وموفق يا الغالي

[يكفيني نظرة]

اللاند كروزر الجديد مريح وحلو خارجيا ..
الداخلي مافيه فخامه..
البودي رهيـــــــــــــــــــف ،صدمه بسيطه يروح فيها وقطع غياره غالي الشمعه 3300 ريال ..
مع ابوي الموتر ومجربه..

[سيف الظفير]

السلام عليكم





أخواني يقولون : ما خاب من استشار





أنا معي لاندكروزر 2003 G ما قصر معي صبور وقليلة مشاكله





لكن نبي نجدد وندور المواصفات الزينة .. مشكلة الجي ما عندك الا قير ومكينة





وصراحة اني محتار وش اخذ ساعة يطري علي فكسار 2007 .. واقول بقيمته خذ جكسار 2008 وبعدين اقول دور لك فتك حتى البرادو والباجيرو دخلناهم في القائمة





هواجيس الله يدافع وسواليفي هاليومين كلها بالمواتر





فنبي منكم الشور الزين والنصيحة لاخوكم وانا حدي في بحر 130 الف





ابي موتر عملي وقليل خرابات ومواصفاته زينه ويمسك سعره فوش رايكم





شاكر مقدما




من خلال تجربة

ونصيحة خذها من اخوك


لا تتعدا اللاندكروزر الجديد من 08 الى 011

اشور عليك بالزين هذا


لاندكروزر / لؤلؤي / 2008 اسبيرين + ونش + دفلك / بدون فتحة

سعودي وارد عبد اللطيف جميل (( لان الخليجي فطيمي او بريمي او عبد الغني او بحريني غالي ))


واذكروا الله يالغالين ترا العين حق

اذكروا الله

صورة موتري الثالث من الجيوب الجدد الشكل الجديد


http://img204.imageshack.us/img204/8083/48817898.jpg

[gx-low]

اللاند المفخرة شيخ لكنه غالي

والا هو ما فيه كلام

[عاشق السيل]

نصيحة وإن شاء الله تدعيلي ،،

سوبر سفاري 2008 أو 2009 مواصفات عالية جدا وراحة مركب وسعة ونشاط مو طبيعي وصبر وتحمل ورساوة ورزة !!

صحيح قطع غيار غالية ووكيل لك عليه لكن السيارة ماتطلب كثير خاصة إذا عطيتها شوي اهتمام ،،

والله يوفقك للي فيه الخير والصلاح ....

[ابونبيل]

شف وانا اخوك انت مرتاح للموتر والي تبيه بالسيارات زيادة اشياء كماليه اذا تبي تحط قروشك وتضمن ماتندم ان شاء الله خذ مثله فكسار
لو حصلك 2007 احسن شي اما الجديد اخاف تاخذه ولا يناسبك

اما الفتك طلعه من القائمه سياره مالها قطع غيار ووكيله تعبان مره كل قطعه طلبيه وينطعك اسبوع وسعر غالي

خلك على التويوتا الموزعين كثار والقطع بالبقالات

[ابا الصلابيخ]

رأيي يا الحبيب تشوف البرادو

اشوف الناس تمدح فيه

[أبو هشام راشد]

ما شاء الله تبارك الله والحمد لله إن تغييرك ليس إلى أقل بل إلى أعلى زادك الله من واسع فضله

أخوي لي تجربة بسيطة في سيارتين كانت الأولى ماشية معي تمام ووهي هايلكس ٨٥ وأحببت التغيير كحالك فشريت جديد على وقته هايلكس ٩٥ ولكن من واقع تجربة القديم أفضل وفلوسك معك لكن الحياة تجارب والله ييسر أمرك

من رأيي شرط التغيير هو اثنان :
# جرب السيارة قبل شراءها ولو اجار السبب لأن الاذواق والاهتمامات تختلف من شخص إلى آخر فأفضل رأي هي التجربة بعد الاستخارة
# لاتبيع سيارتك اللي معك إلابعد ما تسلك معك الأخيرة

وبالتوفيق

[جلمود الحره]

((ماخاب من استشار))
قديمك نديمك ........مافي مثل الاند القديم وخل عنك الجديد مشاكل وتعليق وتنك وبلاستك ومشكوبيات بالصدامات
وداخليه لون كئيب يجيب الهم وانت مجرب يعني مايبيلها شور والله يوفقك

[ابو فيصل 2011]

من رئيي خلك على مويترك تراك منتب لاقي زي جودته وصبرة اخسر عليه شوي وضبطة من والى وغير من مظهرة شوي وركب له جنوط وخله يزين في عينك واجلس عليه خمس سنوات

[عبدالله //]

ياخوي خذ لك فتك وخل عنك الكروزر الجديد ثقيل وقبيح ويعلق وفيه مشاكل دبل ويطيح سعره والقديم النشاط لك عليه وغالي ... الفتك نشاط يطربك وديكور افخم عزل الصوت تمام اقل صرف من التويوتا. ولا تشتري لين تجرب الفتك وتجرب المفخره , تقبل مروري:)

[عفط]

تبي شوري والله مااتعدى الـ fj
جرب سواقته واحكم بنفسك

[sgl2002]

اذا انت تفكر ان الجديد بيغنيك عن اللي معك وانك بتنسى هذا اللي معك
فعز الله انك بتندم

الجدد صراحة صارت سيارات مدن ( اللاند والباترول)

اذا انت تبي بر وكرف خلك على خويك او خذلك فتك

اما اذا كنت اكثر وقتك بالمدن والخطوط وسواقة بر راكدة فخذ الجكس ار من ٢٠٠٨ وفوق

لكن ترى الفتك بتشوف فيه اللي ماشفته بغيره

خصوصا اذا جيت مكان ثم تقول مابيمشي وتتفاجأ انك تعداه والا علق وتقول مابيطلع وشوي الا وانت تقول ضارب مطب فقط وهذا عن تجربة اللاند والباترول وكلن فيه حقه ولا نبخسه

[غواص وقناص]

هذي نصيحتي وبكيفك
لا تفرط في موترك ناس تدور له بلمنقاش
الله يحفظك ويرعاك تحياتي لك

[حاضر بالنواظر]

انا اتكلم من تجربتي كان معي يوكن 2008 دبل هبلبي وتعباااا علق علي الدبل وفي السفر ارتفعت حرارة القير ووالقير وبعته بيعه كلب سرق أهله وشريت برادو سته سلندر تي اكس ال 2010 بصراحه بطل في البر وشي يرفع الراس بس مشكلته قاسي شوي يعني الراحه لك عليه لكن بطل

[Abusliman]

من رايي تاخذ جكسار 2008 او 9 .. 8 سلندر افضل من الفكسار القديم
الفكسار مهب شين بس اني افضل الجديد اكثر

[gx-low]

ما قصرتوا يالربع والله يسلمكم جميعا

المشكلة إذا كثرت الخيارات الواحد يتشتت

لا زلت حائرا

[gx-low]

بالنسبة لموتري ما فيه شيء ونظيف ومجدد 2007 لكن الواحد لا شاف هالمواتر مدري وش يجيه

ساعات يمر من جنبي مفخرة الارض واخق معه

واذا شفت فتك يطعس قمت اذكر الله

وان مر من جنبي جمس سييرا محمل العزب والتوانك قلت هذا الغرض

حالتي صعبه

[gx-low]

اشكر الجميع على دعواتهم الطيبة والله يجزاكم كل خير

[ALBDRANE]

والله شف يالطيب أن كان قلبك ما بعد تولع مع الفتك رغم مشاكله .... فأنصحك باللاند كروزر ......!!

[قلايد الخيل]

الله يرزقك بمموتر آلخيرِ إن شآءالله
والحـآظرين ياارب

[hany316]

والله وانا اخوك انصحك بجيب لكزس 470 جوده فخامه وكل شي

[الليث الرهيص5]

النصيحه اخي
الالماني اسد غابه
ويجي الاند كروز الثمانية سلندر عندنا باستراليا
اكثره لاندكروزر 8 سلندر او 6
تسمونه جسكار او في اكس ار فكسار
بعدها يجي باترول
بعدها يجي رانج روفر

بس طبقا لجور الممكله الحار والصحراوي ارجحلك اللاند كروزر 8 سلندر البنزين رخيص واخذ 2011 ماعليك بكلام ان الجديد ضعيف هههههههههههههه بالعكس كلما ينزل موديل فول ابشن يعني كامل المواصفات كراند يكون افضل استغرب
من البعض بردودهم يقولون اخذ اقل من 2008
عجيب غريب
انته شوف اما الماني
او ياباني
الامريكي مع احترامي زباله
صرف بانزين ضخامه
خسائر تصليح
ولاتحتار حسب فلوسك
شوف
لافتك ولا هم يحزنون

[طير شلوى نجد]

والله وانا اخوك نصيحه ومع اخواني الي شاروا عليك خل مويترك معك ما انت لاقي احسن منه وان كنت راغب الراحه طق معه صغيره انا فرطت بموتري وقلت ما قصر والحين والله ثم والله اني اطقه ندامه المواتر الجديده مركب وخط ومكينه تطربك وما به طعس بيوقفه لاكن موتر ما هو لك وللعمر اخو موترك اجلده بجلد برمل بحصيان ولدخلت الديره ما شاء الله اقرب مغسله ويرجع كما كان بالتوفيق

[gx-low]

والله وانا اخوك انصحك بجيب لكزس 470 جوده فخامه وكل شي

نصيحتك على العين والراس

اللكزس ما فيه كلام شيخ

تسلم لي يا الغالي

[سدئ المزن]

وعليكم والسلام

انا من رايي لا تعدى تايوتا القديم على قد دراهمك
الفتك انا ماجربته لاكن يشكون من الكهربا مدري ليش

[يزيد 999]

اخوي خل الياباني على جنب لاراحه ولاقوه من واقع التجربه شف لك وانيت سييرا من 2006 وفوق وركب ورا شد اللي فيه تكيه وارتاح وترا بفلوسك يمديك تشري 2011 وكاله

[دل البحار]

عليك بالتايوته ترا مافيه اخوها

[أبوراشد]

نصيحتي تشري جي 2010 أو 2009 فتحه 6 سرندل تماتيك أو عادي حسب الرغبه,, تجيبه الـ 130


,,

[كشات 64]

السلام عليكم
اولا الله يوفقك دنيا و اخره
ثانيا عن نفسي اقولك لا تتعدى السيارات اليابانيه
ثالثا من وجهة نظري ابعد عن المواصفات السعوديه و عليك بالخليجي
رابعا لازم تكون مقتنع بالسيارة
خامسا لا تنس صلاة الاستخارة
و فالك التوفيق
و السلام عليكم

[gx-low]

بيض الله وجيهكم

[kings.1998]

السلام عليكم ...
اخوي انت رجال جمعت فلوسك فلس فلس ولا ودك ترميها وتندم بالموتر وتتحسف على موترك يا الغالي انا انصحك ب VX-R 2005 او 2007 وفي رفاهيه شاشه ومراتب جلد وبدال المساعدات هايدروليك اما الجدد مع عماني ويشتكون منها هاذي نصيحتي من المواتر الي انت حددتها وانا بضيف موتر حطه براسك التاهو الدبل مع واحد من العيال ما شاء الله لاصرفيه بنزيم وراسي رساوت جبل ما شاء الله وعليه مكينه اقوى من الاند الجديد و القديم واقل صرفيه بنزيم ومن ناحية التحمل فهو تحمل وفي البر والله ما يرده طعس ما شاء الله

ولما تقارنه بالاند و الباترول ياخي حرام مواتر بهذا السعر وفيه بديل لها بسعر معقول

[SaMi83]

عز الله انك بتزداد حيره ههههههه

الشور الاول ياطويل العمر تمسك بسيارتك والرفاهية اللي تبيها تقدر تركبها بموترك ان ودك

الشور الثاني انت ذكرت سعر البيع فخلك على التويوتا سعره فيه لان الناس ماتعرف الا ابو جميل وشغال يصلخ بالشعب السعودي وهم لازالو يحبونه واخوي اشترا 2011 جي اكس فل كامل 208 ولافيه نفقيشنgps وسقت الموتر قوه وعزم ورفاهيه وشاشه خلفيه المهم الموتر منتاز لكن المقعده حقته تكسر الظهر وسعره مبالغ فيه

الشور الثالث الباترول منتاز بس وكيله زفت بمعنى الكلمه

الشور الرابع لاتقرب اليوكن فيه مشاكل واجد

والله يوفقك ويكتب لك اللي فيه الخير ان شاء الله

بالتوفيق



×

[ابن عكاش]

والله وانا اخوك نصيحه ومع اخواني الي شاروا عليك خل مويترك معك ما انت لاقي احسن منه وان كنت راغب الراحه طق معه صغيره انا فرطت بموتري وقلت ما قصر والحين والله ثم والله اني اطقه ندامه المواتر الجديده مركب وخط ومكينه تطربك وما به طعس بيوقفه لاكن موتر ما هو لك وللعمر اخو موترك اجلده بجلد برمل بحصيان ولدخلت الديره ما شاء الله اقرب مغسله ويرجع كما كان بالتوفيق


نفس اللي في خاطري خذ هالكلام وان شاء الله مارح تندم

[gx-low]

انا اميل للاندكروزر 2007 vxr لكن فيه مبالغه ياسعاره

والا هو شيخ