لأهل الكشتات والبر ،، تفضلوا بالدخول

[أبوخضير]

بسم الله الرحمن الرحيم

السلام عليكم ورحمة الله وبركاته
مساكم الله بالخير
عساكم بخير يأحلى أعضاء ،، شكلي طولتها هههه نخش بالموضوع

انا شريت ددسن مديل 2000 نظيف الحمدلله
بس ودي اقلبه للبر شاريه انا للبر وعاد الشتاء قرب ولازم نبداء نجهز السياره للبر من الى

وانا جاهز لكلامكم يابطال ابي الموتر للبر ( مب تطعيس انا اول مره اشتري موتر للبر ومأعرف اطعس يعني ودي اجهزه للطلعات ودي اتمشى بسس
اتمنى تفيدوني بكل شي من الصدام للصدام

ملاحظه : انا بروح الكويت بالعيد الي ينصحني اشتري شي من هناك يفيدني ،،
شباب اي احد يبيني استفسر له عن شي بالكويت انا جاهز يكلمني ويبشر بعزه ،،

[sgl2002]

اللي اعرفه حسب استخدامي للددسن انه ما يصلح لها كفرات غير الدنلوب عرض ٢٢٥ ارتفاع الوكالة وانسى تغرز بالنفود

[أبوخضير]

يعطيك العافيه أخوي انا والله ناوي على كفرات دانلوب خط عريضه بس مادري كم مقاسه بالضبط

[المميـز]

:

مبروك الموتر والله يعطيك خيره ويكفيك شره

يبي لك تشتري ماطور هواء وعدة رقع الكفرات احتياطاً
ويبي لك طال عمرك تركب ( البكله ) النور اللي بالكبوت ووحده وراء تنور لك الحوض
ويبي لك محول كهرب 220
ويبي لك عقد انوار يشتغل على المحول
وتانكي ماء مخصص لحوض الددسن

هذا اللي يحضرني الحين

وان شاء الله الاخوان يفيدونك اكثر

:

[طيرشلوى 2]

اهم شي ان الموتر يكون دبل اشان يطربك

[أبوخضير]

يبارك فيك والله يجزاك خير وان شاء الله اني بسوي الي قلته بس لو تعطيني المكان للي اشتغل عنده اكون شاكر لك
وشكرا على مرورك العطر

[أبوخضير]

طير شلوى اشكرك على طلتك موضوعي ،، بسس تراك حطمتني يعني اذا ددسني بدون دبل مايطرب وانا اخوك !!!

[fahad marzouq]

لوووك شااري شااص اطيب .. لكم ام عزيز مااعليها كلها زين الله يعطيك خيرها ويكفيك شرهاا

[ذئب الدهناء]

يطعمك خيرها ويكفيك شرها :

1/ تركيب شد للصندوق

2/شراء عزبة الطبخ والقهوه

3/ماطور هواء

4/اشتراك

5/واير 25متر

6/كنود

7/جارمن

8/تركيب لمبات ويفضل البيضاء على جانب الشد

واخيرا احرص على الصحبه اللي تستفيد منهم في دينك ودنياك وفقك الله وفالك الوناسه

[طال الانتظار]

حبيبي ام عزيز تطربك دبل ولا بدون دبل
اهم شي ارفعه شوي وحط كفرات عريضه
وفصل تانكي مويه في الصندوق صغير على طرف وركب شناكر سحب
وماطور هواء بالكبوت داخل صندوق تفصله عند محل الحداد
وركب لمبه بالكبوت
هذا ما لدي حالياً
وتقبل مروري

[ذيب الفاو]

عزالله وانا اخوك الددسن ماتنفعك بالبر ابدا ابدا شيبت راسي

[sgl2002]

^^^
واللله ياخوك ماعاش مع البدو من اول الا هي


وانا استخدمت ثلاث دداسن
راحة وخفه اذا غرزت تطلع بسرعه بس لاتلمسها الاول تغرز

[أبوخضير]

فهد شكرا علر مرورك والله اذا على الكيف كل واحد يبي شاص ولا جيب بس يجيب الله خير

[أبوخضير]

ذيب الدهناء،، الله يجزاك خير وان شاء الله اني بروح للسنيدي واشتري الاغراض،،

[أبوخضير]

طال الانتظار ،، الله يوفقك ان شاء الله ومشكور على الطله الحلووه

[اشهب .]

لاتنسى المسعدات امامي وخلفي غاز جبريال ابيض ممتاز

يشد الموتر ويفكك من المثولث

[أبوخضير]

يعطيك العافيه اشهب ماقصرررت

[السبيعي 503]

أنا من رايي تركب كفرات مقاس 215 يوكهاما

وترفع الموتر شوي وتشتري عزبة من محلات السنيدي او الغرابي أو اي محل يصلح لك

وتكمل باقي الاغراض من لمبات وفرشات علشان يصير طلعتك ممتازة واكيد بيرو معك موتر ثاني

وللابد تحط وااااير قوي لان التغاريز الله يعينك عليها واذا كان الددسن بخااخ أفضل من الكبليتر


وطلعات البر موب للازم كلها تطعيس فيها شعبان واماكن بدون تطعيس


والله يوفقنا ويااك

[mr.salih]

الله يعطيك من خيرها ويكفيك شرها.....أخوي بسألك عن أسعار الدداسن لاني ناوي على 2005؟؟..ياليت إذا تعرف تفيدنا مشكورا ماجورا..وعذرني شطحت شوي.

[أبوخضير]

السبيعي 503 الله يعطيك العافيه وماقصرت .. والله الي معي كلبليتر
يس ان شاء الله الكفرات تساعد انا اليوم بركب للكفرات ان شاء الله

[أبوخضير]

مستر صالح ..... والله الاسعار غلت انا ماخذه ب25الف ..لقيت 2006 سعره 50

يعني تقدر تقول الاسعار نار ..... لبى الشطحه ياشيخ

[أبوخضير]

الحمد لله ركبت كفرات خط دنلوب عريضه 225

[مافيه]

اخوي لاتشتري شي متنب محتاجه

هاذا انت تقول ابيه للبر قبل لاتقول ابيه للبر قل وشو استعمالك له تبي تجهز السياره وبس ماتعرف وش تستفيد منه ..؟ تجهيزات الددسن بختصار بدون خنابيق زايده هاذي حلاة الددسن

لمابات وانا ارشح الخارجيه مايحتاج تثبتها قيمتها ب 15 للوحده من اقرب محل
المعاميل (العزب) على حسب استعمالك والله يعينك على تجميعها ويفضل تفصل عزبة القهوه و الشاهي عن عزبة الطبخ
اذا كنت تحتاج وهاذي حط تحتها الف خط ركب لك هنقل وشراع الهنقل من اقرب محل حداده سعره مايتعدى ال500 ريال للغماره و الغمارتين و الشراع من الغرابي سعره مايتجاوز ال200 ريال ولمعوميتك الشاص الهنقل ب 600 و الشراع ب 300 ريال واذا بغيت تبطين زد 200 ريال << والشراع تفصيله عند افضل محل في الغرابي ناسي اسمه حتى بدون مكاسر وعطيتك اسعار التفصيل على الشاص عشان ماينلعب عليك

الاشياء المهمه لتجهيز الددسن
دبل المساعدات الاماميه اذا كنت راعي نفود
وغير لعابات السست وركب لعاب اكبر من حق الوكاله وهاذي من اقرب مخرطه

الجنوط وهاذا شي راجع لك يفضل تركب جنوط دايو اذا كنت راعي نفود وهاذي من الغرابي مع الحرص على الاحتفاض بجنوط الوكاله لاتبيعهن ولا حتى تفكر في بيعهن

وخذ لك ماطور هوا

وصل الله وبارك انت جاهز ولايردك الا شبك الحدود