تعبت ادور القطعة هذي ...من يخبرها لي؟

[شبل الطنايا]

السلام عليكم ورحمة الله وبركاته
وكل عام وانتم بألف خير يارب
وعيدكم مباركم مقدماً


المساعدة يا اخوان :(

عندي قزازة الطبلون مكسورة
مدري وين احصلها مريت محل قطع الغيار قالوا مستحيل تلقى؟

قلت مالي الا الله ثم اهل مكشات يدلوني او يخبرون ولو مستعملة
او يجي لها ترهيم او وش الحل يا اخوان؟؟

لاحد يقول غير الطبلون كامل ههههههه


الموديل 2006 سفاري

[أبن فطيس]

فيه غراء يسمى بأبو جني

مسكت وقوي ولا تحتاج للتغيير أبد ,,

وفقك الله

[شبل الطنايا]

لا يابن الفطيس القزازة تحلف مطقوقه بشوزن ماينفع فيها ترقيع

[مواطن]

التشليح
هو الحل

[شبل الطنايا]

والله يالمواطن اخاف يتغلون علي اهل التشليح ويقولون
مانبيعك قزازة طبلون تبي طبلون كامل حياك الله

:( لكن اللي يخبر لي ولو تشليح ومكان اكيد يعلمني

واللي يوفرها لي مستعد اشريها منه وله اتعابه وفوقها بوسة خشم

[غالي يا غالي]

فك الطبلووووووووووووووون

ودور محل حدادة (( ابواب وشبابيك )) او محل تفصال مطابخ

وقل لهم فصلو لي قطعه على نفس مقاس هالطبلون وانتهينا

[شبل الطنايا]

غالي ياغالي.. يعلم الله انك تقرأ افكاري
بعد ما يأست فكرت بهالشي لكن ينفع ظنك؟؟

[جلمود الحره]

اخوي في حال مالقيت القطعه في حل يمكن ينجح معك


الا وهو تروح لمحل الاطارات الزجاجيه وهومحل مختص بتركيب الزجاج على الواح واطارات الصور الشخصيه والرسومات وتختار سماكة الزجاج وتاخذ القطعه على شان المقاس وتخليه يقص القزازالمطلوب ثم اذا شفت الفكره نجحت تجيب سيلكون وتلصقها على اطار الطبلون الداخلي ..وان شاءالله تلقى

[شبل الطنايا]

جلمود انا مريت الوكالة وقال تبي طبلون؟
قلت لا قزازة طبلون وش ابي بالطبلون كامل

قال ماتلقى عندنا

وسالفة الترهيم حلوه ومريحه ولا منة بعض الناس جعلهم للخساير اي والله

[مخايل البراق]

وعليكم السلام ورحمة اللــــه وبركاته
القزاز مايكب لأن الطبلون مقوس
اذا كنت بالرياض رح لقزاز السالم اللي بالصناعية القديمة عندهم بلاستيك مقوى ينحني معك وفصله على الطبلون
اتمنى لك التوفيق

[شبل الطنايا]

مخايل البراق حطمتني ههههههههههههههه

امزح يالغالي :) لو اقولك لي فوق السنة مهملها
وتوني فكرت اهتم فيها واصلحها


بس مو مشكلة لقيت ارقام تشاليح برى المنطقة

وبتصل فيهم وآمري لله

[ساري بليل]

التشليح وبس
الرياض تشاليح تمام

[الإستراتيجي]

شف عند أمور أختر منها :

تأخذ من التشليح وتشوف لك طبلون خربان وتعطية الخبر تقول أبي طبلون خربان عشان ما يتضرب فيه

فدور وأبحث بهذه الطريقة من دون ما تعلمه أنك تبي الزجاجة فلما تحصل واحد على رأيك خذه .


أو

خذ لك طبلون كامل تشليح .

أو

فصل لك .

أو حط عليه شمع زجاج صمغ .

او حط عازل مؤقت بلاستيك . في منطقة الكسر

أو

اطلب من الوكالة طلبيه بغطاء طبلون وخبرهم إن ما طلبوه أنك تقدم شكوى

لأنك من حقك تطلب مسمار صغير أي حجم . (( ولازم يسوي لك طلبيه )) طبعا بسعر طلبيه من اليابان .

للمعلومية في الجميح كنت أطلب طلبيات وتجيني .

فالمفروض أنك لما تكلمه تزن عليه وتكلم مديره وتدخل على إلي من داخل الإدارة ما تخلي الموظف يرجعك عشانه يبي يمشي بضاعته الكاسدة .

فانت الطبلون عندك نظيف ما عدا هالكسر .

بالتوفيق شوف إلي يناسبك من الحلول وأتمنى الإخوان يفيدونك أكثر

[الإستراتيجي]

على فكرة :

القصيم فيها تشاليح حلوة ببريدة أنا أروح لها أحصل عندهم أشياء ما أحصلها في تشاليح الرياض ,,,


نسيت إسمه أعتقد العجلان

[شبل الطنايا]

يعلم الله انك ماقصرت يالأستراتيجي
وكلامك عين الصواب بس والله من زود
الأحراج برأسي يوم قال ماعندنا الا طبلون كامل
غسلت يدي منهم

وانا ماعندي مشكلة القصيم مو بعيد عني كثير اروح لها
ع الفاضي والمليان

بس المسائلة هل أكيد ان احصل طلبي عند المحل او التشليح الفلاني

هذي زبدة الموضوع


وبيض الله وجهك يالاستراتيجي بحاول اجيب رقم العجلان
ولو ان فيه اكثر من تشليح يحمل هذا الاسم بالقصيم

[كثير السؤال]

شفلك طبلون خربان ماعاد يشتغل وخذ قزازته بس عاد وين تلقاه

[الإستراتيجي]

يعلم الله انك ماقصرت يالأستراتيجي
وكلامك عين الصواب بس والله من زود
الأحراج برأسي يوم قال ماعندنا الا طبلون كامل
غسلت يدي منهم

وانا ماعندي مشكلة القصيم مو بعيد عني كثير اروح لها
ع الفاضي والمليان

بس المسائلة هل أكيد ان احصل طلبي عند المحل او التشليح الفلاني

هذي زبدة الموضوع


وبيض الله وجهك يالاستراتيجي بحاول اجيب رقم العجلان
ولو ان فيه اكثر من تشليح يحمل هذا الاسم بالقصيم


أخوي قبل ما تروح لأي مكان حاول تستخدم الأرقام للتشاليح والأخوان ما راح يقصرون


ولو ما قدرت تحصل الرقم خبرني أبحث لك عنه وبإذن الله أجيبه ...


للمعلومية للأسف معلومة بتأثر فيك شوي وهي /

العجلان للأسف حتى لو قال ما عندي راح تحصل عنده لأنه العمال ما هم فاضين على طول فك وتركيب في القطع فتحصلهم مشغولين شف لك يوم فاضي أطلع لهم خفافي دور على رواقه وإن شاء الله تحصل حتى لو قال ما عندي شف لك أي طبلون يكون البلاستيك ممتاز ولا يهمك باقي الطبلون لأنك تبي هالنقطة ..

خذه معك نظف القطعه حاول تخلي أحد يركبها لو خفت تكسرها لأنها تنكسر بسرعة وهي كبس

زي ما قلت في الأول لو ما حصلت الأرقام أبحث لك عنها

[abu-turki2009]

أخوي الشبل هذا رقم تشليح العجلان(الرئيسي)ببريده 063290111
والله يوفقك

[شبل الطنايا]

يا اخوان كلمت كم تشليح وحصلت عندهم
قالوا تأخذ الطبلون كامل بقزازته قلت ابي خربان
عندكم قالوا لا :(

ومريت واحد قال بحاول ارهمها ويوم شاف شكل القزازة مقوسة قال صعبة حيل

بنتظر الى ما بعد العيد واشتري طبلون كامل وآمري لله

الا اذا احد الاخوان خبر لي حل يلحقني به :(

وشكرا لكم جميعا

[ابوسند9]

اخوي شبل...كل عام وانت بخير
انتظر شوي بشوف لك بس عطنا شوي وقت
بس ممكن تقول لنا سفاري فتك واللى 4500 ؟

[شبل الطنايا]

ابو سند من وين طحت علي انا ادور اللي مثلك يجيبها لي من رأسها
لا يالغالي سفاري عادي مو فتك

او على قولك بحجم المكينة 4500



العلم يابو سند يا مسندي انا بنتظرك

[أبوصالح9]

دور لك تشليح متقطع يعني داااااااااااااااااج بالعربي وعنده نفس القزازة شرط ان يعطيك اياها وفوقها حبة خشم لاتروح لتشليح كبير ومعروف لانه ضامن ان فيه غيرك الف بيدخلون عليه وياخذون القطع منه- هذا نظامي مع التشاليح والقطع الصعبة-بالتوفيق

[شبل الطنايا]

يعطيك العافية يابو صالح ههههه مصيري القاها ماعليك :)


خلنا ننتظر ابو سند

[الكلاسك]

الحل سهل جدا
تعرف اللي يعملون بلاستك على انوار السياره ويسخنه بالنار وياخذ الشكل اللي يبغا
رح لهم وخله يعمل لك الشكل ويقوسه على كيفك وركبه
وان شاء الله تزبط معك
تحياتي

[..بقايا انسان]

طيب دور في تشاليح ان شاء الله بتلقي

[شبل الطنايا]

يعطيكم العافية جميعاً وماقصرتوا يا اخوان
والشكر للأخ الغالي أبو سند اللي تعبناه معنا

والحمدلله قدر أخونا ابو سند يحصل القزازة بطريقته

وتم تركيبها بسلام