منع الكشاته من التنزه في الدهنا "طريق الصمان"

[abokraym]

السلام عليكم ورحمة الله

انصدمنا في هذه الاجازة من تصرف احد افراد المجاهدين حين اتى الينا بعد نصب الخيمة وتجهيز كامل الاغراض بقوله "وش جابكم هنيا" وحتى لم يبدا بالسلام
الجلوس هنا ممنوع ماقرييييييتوا الاعلانات والتلفزيون الجلسه هنيا ممنوعه "ابرجع بعد ربع ساعه مابي القاكم"
!!!!!!!!!!!!
باسلوب عجيب غريب
مع العلم اننا لم نحتطب فقط اردنا الاستمتاع في اجواء المنطقة الجميله

يعني وين يبوننا نكشت؟؟؟؟!!!

[ابوالعز4800]

متى هذا الكلام اخوي ابوكريم

[ابو منور 93]

احترم نفسك وامسك لسانك تقعد تقلد بالهجة محد يرضها

[abokraym]

الكلام هذا يوم الخميس الماضي 7-12

[«نجم الخير»]

معروف ان الدهنا محميه لابل واحد من الربع ؟

الخوف بكرا يجي احد يحمي الثويرات

[مكشاتي111]

وعليكم السلام
كلامه صحيح
الدهنا ممنوع الجلوس والتخييم فيه

[فزاع الصمان]

لا وتبون مطر بعد الله يخلف عليكم شعب

[فزاع الصمان]

الله يشعل في جلده الجرب اللي امر بالمنع

[لمع السحاب]

السلام عليكم
هذا الامر يتكرر كل عام عند بداية الوسمي ثم يفكونه بعد الوسم والله اعلم

[فزاع الصمان]

احترم نفسك وامسك لسانك تقعد تقلد بالهجة محد يرضها
وانت هذا اللي يهمك في الامر بس مجرد تقليد اللهجه من تتوقع الاشحاص اللي يشتغلون في ها الشغله فلبينين يعني خذ الموضوع بمنضور اخر وناقش في صلب الموضوع

[ابن عكاش]

صحيح الدهناء محمية حتى شهر محرم يفكون الحمى ست شهور ثم يحمونها ست شهور
بس شكلكم قريبين من الخط انا فيها يوم الأربعاء والخميس وطلعت لواحد من الشباب جاء متأخر واشوف الدوريه يوم اقبل علي واطز يم الخط كني طالع يوم تعديت العرق وانزل في الخبه وابشرك حطبنى موترين شاص وهايلكس دفرنسين غمارة
وترى الحمى له فوايد خصوصاً اني لاحظت الأرض فيها حميس والعبل والعاذر بادي يكبر
بالتوفيق للجميع

[جيبي جايزلي]

انا بالدهنا لي اسبوع ماشفت لا منع ولا شي والوضع طبيعي

[abokraym]

هلا ابن عكاش
عن الخط تقريبا 10كلم
الحمى يكون عن الرعي والاحتطاب هذا اللي نعرفه بس المشكله اتوقع من اللي يحطبون :) خلو المنع عام والا فعلا لاحظت فرق بالارض

[abokraym]

يمكن ياللي جيبك جايزن لك انكم تقعدون بين النفد بنقره محدن شايفكم
بالنسبة لنا نفضل الاراضي المفتوحه

[الذرى]

انا كنت احد المتواجدين في الدهناء من صبيحة يوم الاربعاء
الموافق 6/12/1432هـ
ابعد عن خط ابراج الكهرباء باتجاه الشمال 18 كيلو
والامور طيبة ولاعلينا خلاف
وحطبنا وانبسطنا
ولكن في يوم الجمعة الصباح جمعنا اغراضنا وغيرنا المكان واستقرينا بالقرب من حومة النقيان
وللاسف جيب المجاهدين يجي ويسلم علينا وعزمناه على بيالة شاهي واخذت منه العلوم كلها وهي كالتالي :
( الحظر بالكامل على الكشاته واللي يحتطبون واللي يرعون من شهر رمضان الى شهر 2 هجري )
المنع جاي من صاحب السمو الملكي احمد بن عبدالعزيز
للمحافظة على بيئة الدهناء
وفعلا انا متعجب من ان العاذر بحجم عجيب وبيئة نظيفة جدا جدا

لكن على حد قول احد افراد المجاهدين
قلت له انا جاي بعد العيد هل بيكون فيه حظر والا تفتحونها فترة العيد للكشاته
وكان جوابة كالاتي :

اذا انت ذيبان ودليلة وتعرف تباري النفود وتخبي عمرك والله لو تجلس شهر مادرينا عنك
:D

يعني ابعد عن عيون المجاهدين وش تبي تقرب للخط

[ابو سعد 77]

انا كنت احد المتواجدين في الدهناء من صبيحة يوم الاربعاء

الموافق 6/12/1432هـ
ابعد عن خط ابراج الكهرباء باتجاه الشمال 18 كيلو
والامور طيبة ولاعلينا خلاف
وحطبنا وانبسطنا
ولكن في يوم الجمعة الصباح جمعنا اغراضنا وغيرنا المكان واستقرينا بالقرب من حومة النقيان
وللاسف جيب المجاهدين يجي ويسلم علينا وعزمناه على بيالة شاهي واخذت منه العلوم كلها وهي كالتالي :
( الحظر بالكامل على الكشاته واللي يحتطبون واللي يرعون من شهر رمضان الى شهر 2 هجري )
المنع جاي من صاحب السمو الملكي احمد بن عبدالعزيز
للمحافظة على بيئة الدهناء
وفعلا انا متعجب من ان العاذر بحجم عجيب وبيئة نظيفة جدا جدا


لكن على حد قول احد افراد المجاهدين
قلت له انا جاي بعد العيد هل بيكون فيه حظر والا تفتحونها فترة العيد للكشاته
وكان جوابة كالاتي :


اذا انت ذيبان ودليلة وتعرف تباري النفود وتخبي عمرك والله لو تجلس شهر مادرينا عنك
:D


يعني ابعد عن عيون المجاهدين وش تبي تقرب للخط





عزالله ان الرجال حق المجاهدين صادق..~

احنا جينا وكشتنا فيه ولا احد يمك..~

بس اهم شي خلك زابن في نقرة وادخل بعيد..~

[Z E Z O]

باقي 20 يوم تقريباً او اكثر على نهاية الوسم هل بيسمحون للكشاته بعد الوسم مثل العام الماضي ولا محددين تاريخ معين في خطاب المنع

[ذيب ساقان]

احترم نفسك وامسك لسانك تقعد تقلد بالهجة محد يرضها
يا ساتر يارب
اما انت وهالخطمة اللي مالها داعي