عندك كشته مدة 3 ايام كم تأخذ معك من لتر ماء؟؟ وكم يكفيك؟؟

[سدرك]

السلام عليكم ورحمة الله وبركاته

إذا كن عدد الاشخاص 4 في رحلة مدة ثلاثه ايام

كم من المتوقع ان يكفيهم من الماء؟؟؟

وانتم يا أخوان اذا طلعتوا كم تأخذون من لتر من الماء

اللي معه ونيت مهب مشكله عنده الصندوق ويحط في البرميل الازرق 250 لتر

لكن البلاء الجيوب حدها تانكي 120 لتر

وياليت اللي يرد يذكر نوع السيارة..
وحجم التانكي...
وكم يوم يكفي...
وعدد الاشخاص...

[ابوالعز4800]

دايم احسبه كل شخص له في اليوم 15 لتر والحمدلله تكفيني المويه ويبقى ربع التانكي

[عاشق السيل]

وعليكم السلام ورحمة الله وبركاته ،،

أنا مركب تانكي 100 لتر بالسفاري وإذا صار معي واحد ثاني ونفس الكمية أتوقع تكفينا لا صرنا 4 أشخاص !!

[سوبر152]

أخي الغالي عيدك مبارك تقبل الله منا ومنكم
صيفا:s 118 لتر+2كرتون ماء كيسان :s
شتاءا:f 118لتر +2كرتون حليب:D:l:good2:

[ابوصالح2006]

بالنسبة للشرب ناخذ معنا ترمس ماء يشيل حوالي 15 الى 18 لتر تكفينا بإذن الله ونعبيه قبل مانطلع
الطبخ ناخذ معنا الدبة البيضاء اللي ماتستبدل وكافيه جدا
اما الخزان 95 لتر من خزانات الوطني الفيبر اللي يجي واقف خلف المقعد
الحمدلله 6 اشخاص يكفينا وضوء وغسيل مواعين وقضاء الحاجه اكرمكم الله لمدة 3 ايام ويزيد احيانا .

[تيتشر]

ان كانك حريص بالحيل

فيه فكره توفر فيها بغسيل المواعين

خل شرب الشاهي والقهوه باكواب ورق

والاكل بالنسبه للفطور صحون بلاستيك والغدا حط السماط فوق التبسي عشان ما تغسله

وعلى قولة احد الاخوان اهم شي ما يكون معك احد يبربس بالماء

وعند استخدام الماء لا تفتحونه على آخر شي وتقدر تحط ليفة من حقات القهوه بطرف لي المويه يخفف من انسكاب الماء

[* ابو باسل *]

حسب الاستخدام انت نسيت اذا كان معك عائله وطلعتك يوم واحد بس 200 لتر ماء ماتكفي وخاصه اذا كانت الطلعه من الصباح الى الليل اما بالنسبه للشباب والعزوبيه اكثر شي يسرف في الماء هو غسيل المواعين والشباب الي يشكون في الوضو تحصله يتوضى اربع مرات ههههههههه

[التعـ King ـديل]

اخوي على حسب الاشخاص اللي معك احيانا 100 لتر تكفي 4 واحيانا 200 لتر ماتكفي 2 يجيب واحد بربوسي يحسبه في بيتهم يفك الماء وياخذ راحته غير اللي يحسب حساب القطره من التانكي

انا عن نفسي جركل المويه الابيض اخذ 1 بالصيف + نص كرتون مويه ابو نص الصغيره لكل شخص

وبالشتاء مثل واقول بنفسي الزود ولا النقص والعطش

[سلفاريو]

هلا بك اخوي
اهم شي في البر...ان يزود الماء ولا ينقص
حنا 8 اشخاص لمده 3 ايام اكل وشرب وشاهي وقهوه وغيره يالله يكفينا توانك الموتر
900 لتر معانا واحد الله يهديه يحب يلعب بالماء
وشكلنا الطلعه الجايه بنخليه في البر ههههههههه

[سدرك]

هلا بك اخوي

اهم شي في البر...ان يزود الماء ولا ينقص
حنا 8 اشخاص لمده 3 ايام اكل وشرب وشاهي وقهوه وغيره يالله يكفينا توانك الموتر
900 لتر معانا واحد الله يهديه يحب يلعب بالماء
وشكلنا الطلعه الجايه بنخليه في البر ههههههههه


ههههههههههههههههه

مشاء الله عليكم

يعني كل شخص له 110 لتر = كل شخص له تانكي بلحاله

[ابن غفيص]

بحكم خبرتي المتواضعه أرى إن١٢٠ لتر كافي وزياده .
لكن الأمر الأهم كيف ستستعمل الماء؟؟
يجب تركيب نقاص مكيف صحراوي لكي يقلل من تدفق الماء،،،
وبهذه الطريقه رشدنا استخدام المياه و كفانا الميه وعشرين لتر،،،×

[ابن غفيص]

هلا بك اخوي
اهم شي في البر...ان يزود الماء ولا ينقص
حنا 8 اشخاص لمده 3 ايام اكل وشرب وشاهي وقهوه وغيره يالله يكفينا توانك الموتر
900 لتر معانا واحد الله يهديه يحب يلعب بالماء
وشكلنا الطلعه الجايه بنخليه في البر ههههههههه



هههههه هلابك أخوي شكلكم تتروشون يومياً ههههه
طيب عزيزي أبي أسألك عن الحنفيات المستخدمه ؟؟؟
هل ركبت نقاص أو حنفيه عاديه ؟؟×

[عبرود الودي]

انا اغلب طلعاتي 3 ايام ..

تقريبا 140 لتر .. عددنا 3 اشخاصى الى 5

لاتقولون واجده .. غسيل مواعين فطور وغدا وعشا غير الوضو ..
والحمدلله الموتر يشيل ولا عليه قاصر ليه مانشيل

[راعي الوعد]

ولا يهونون الأخوان الأعزاء .. أخي الفاضل أنصحك تستخدم شطاف الوضوء حق السنيدي

أبو خمسه لتر و تعبيه قبل لا تطلعون و يستخدم للوضوء و لغسيل المواعين و الأيادي و غيره من الأمور اللي ما تخفى عليكم

للإقتصاد في الماء و فكرة الشطاف حق الوضوء زينه أنك بالبرد تسخن الماء لو حبيت بقدر و تحط الماء بشطاف الوضوء للإقتصاد

وعدم الإسراف ، ولعدد 3 أشخاص أو حتى 5 أشوف أن 100 لتر زينه و تكفي و توفي و لكن نقول الزود ولا النقصان

و أنت بكيفك قسمها ما بين ماء الغسول و ماء الشروب

وبالتوفيق إن شاء الله

[الدهريز]

السلام عليكم
اهم شيء وضع نقاص صغير جداً للماء حتى يقلل الصرف ويكون اصغر من لي المكيف الصحراوي انا عندي 85 لتر ويكفي 3 اشخاص لمدة يومين ، تم وضع نقاص صغير بعد ماطلعت انا وبعض الربع في العمل وكانوا كبار بالسن الله يطول بعمر الجميع وقام واحد مهنم وقال ابغسل المواعين وبدا الله يجزاه خير يغسل ويسولف اخذ على الملعقة حوالي ربع ساعه ياما ( فركها ) بالتراب تكرمون وياما كب عليها الفيري واستلم الليفه والماء يصب والرجال يسولف ( طبعاً ذاك اليوم ماكفانا الماء إلا فطور وغداء وحنا كنا 3 ( نفر ) وبعد هالسالفه حطيت النقاص وقلت للرجال يالله تعال غسل وسولف والحمد لله اضبطت الأمور .
ارجع والكرر اهم شيء حط نقاص صغير لتوفير الماء .

[شري97]

120 لتر يكفي ان شاءالله بس لاتبربسون ولاتنسى تركب نقاص صغير بزبوز الي يركب عليه لي المكيف الصحراوي

[عبدالله 102]

http://image.made-in-china.com/2f1j00wMLTqZhJrVkE/Air-Pressure-Sprayer-TF-01-.jpg

هذا افضل حل للاقتصاد في الماء

[mfmf]

150 لتر ممكن تكفي

[المخبر]

اهم شي الماء خذ اقل شي 4 كراتين

[«نجم الخير»]

وعليكم السلام

الطلعه في مكان واحد راويه وبربس على كيفك
اما كل يوم محل يكفي توانك الموتر وزود

[من حايل]

ماسئلت الا معكم ناس تلعب بالماء هههههههه انصحك تاخذ مثل هذا


http://up2.aa.vg/24575420100119037.jpg

[ابومحــ م ـــد]

عندك طبخ وقهوه وشاهي وشرب
وعندك استخدام شخصي وضوء والذي منه
وعندك غسيل مواعين
وعندك زود للاحتياط ماتدري وش يصير لك وتحتاج ماء زياده
الماء من 100 لتر الى 200 لتر حلوه ولا تاثر على الموتر بالثقل
ولكن عليك بوضع حنفية التوفير لخروج الماء قليل حتى ما يروح بالارض على الفاضي
قال صلى الله عليه وسلم بما معناه ( لاتصرف ولو كنت على نهر جاري )

[الصفراء]

مائة لتر تكفيك خلال ثلاثة ايام

[الصفراء]

وماء الشرب خذا ماء صحة كرتون من البقالة