هل تستعمل حطب ( الأثل ) في شبة النار ؟

[كرار]

بمناسبة دخول موسم البرد وشبت النار حبيت شوف رأي الأعضاء في حطب الأثل وهل يصلح لشبة النار .. أم أن شبة النار لاتحلو إلا بالسمر .. والغضاء

[محطم عنيد]

والله طال عمرك

من عرفت الدنيا مانشب غير بالأرطى فقط لاغير ياحلو شبته وطبعة ريحته بالثوب

والله يكفينا وياكم شر النار

[نديم السهر]

عن نفسي ما استخدمه ريحته مزعجه وشبة النار ما تحلا الا بالارطى والغضا

[سبع الهيجا]

في سنين الغلاء .... حتى الحطب ما سلم منهم.... شب بكل شيء ممكن يولع.

لكن الي سمعته ان الاثل ( دخانه سام جدا ).

وما تحلى الشبه الا بالارطى .. او الغضا ... او السمر.

[اول]

الأثل ماعليه خلاف لا صار شبته في خلا
اما لا صار في مكان مغلق يعني في غرفه او خيمه مايصلح

[عجيب والله]

الأثل اذا في مخيم او مكان مفتوح يمكن
بس يدبر الواحد نفسه لو بالبروسوبس او الكين ولا يقرب الاثل

[من البدائع]

عن نفسي لا يمكن استعمل الاثل رائته كريهه وتعلق في الملابس وسام

وسمعت من احد الاخوان ان الرائحه في القشره فقط لو تشيلها تروح الريحه

[ولد روووق]

من اسمة ماهضمتة

[احلى نواف]

ماينفع مره مره

[hmody00]

اشب بسياج ولا اشب باثل...
الاثل فقط حرارة !!! لا ريحه زينه ولا جمر..ينفع جذوووع كبااار مرره للمخيمات ومفتوح وغيرهـ للسقف ولا للشبوك...

السمر فقط هو زعيم الحطب لا ارطى ولا غضا ولا غيرة..مع اني بمنطقة الغضا والارطى قريب ولكن مثل السمر لااايوجد ان سلم من الغش...
قالتها المربعانية وهي توصي ولدها..ابعدي عن اللي اكلهم تمر وحطبهم سمر !!

[كرار]

مشكورين على الإفادة والمشاركة

[F-15 ذيب خزاز]

اللهم أعذنا من النار ..

والله وانا اخوك ماينفع قالوها لك الاخوان ,, الأثل ما شوف يشب فيه إلا دلاّلين سوق الغنم وشريطيتهم..

والبرد وانا اخوك مامعه صرفه الا التدفي زين وشبة النار لامن ماحصل غير الاثل شبها وما جاك عندي وانا اخوك اهم شي تدفي نفسك..

وأحسن الحطب اللي جربته.

السمر رقم1 دفئ ورايحته طيبه
الجرم يدفي بلهبته بس ما له جمر وريحته طيبه بالحيل بالحيل أطيب من أي حطب

[كنز المشاعر]

شفت اللي تحت

http://www.mubawab-media.com/pictures/279054/l/%D9%84%D9%84%D8%A8%D9%8A%D8%B9-%D8%AE%D8%B4%D8%A8-%D9%85%D8%B1%D8%A7%D8%A8%D9%8A%D8%B9-_127152.jpg

والله يانوب اننا نقول بها

[ال-رايق]

اذا بتاخذ رايي وبكل صدق وما فيه زعل هو احسن شوي من :
الكفرات

[F-15 ذيب خزاز]

ههههههههه

أظحك الله سنّك

[أبوعابد 22]

والله وان واخوك مافيه احسن من السمر
لا أرطاء ولاغضا
مير الأرطاء ماينافع وأنا في الدهنا حاطبين أرطاء موترين خلص في يوم واحد الارطاء حار وزين بس مهنا جمر ويرمد بسرعه
يعني السمر رائحه زينه و جمر يسر الخاطر يعني يصلح للقرص

[عويل الذيب]

الاثل ..... اردى انواع الحطب له رائحة كريييييهه والسدر افضل منه بكثير طبعا بعد السمر

[أبوتركي V8]

والله الاثل هو سمر اهل سدير بعد السدر والارطاء

[راعي الطلعات]

اذا هو يابس مرره شبه ولا عليه خلاف

شبيناه في الاوجار ولا به خلاف ابد جمرته زينه

[أبو علوى]

والله يا مشاركات بعضكم إنها تفطس ضحك مير الله يسعدكم

والأثل طيب غير ريحته تقول قطران بجسمك و هدومك و تلزق فيك يومين والا أكثر و ما منه فايده إلى جمر يخمد بسرعة

يصلح ولع لعود يتيم من السمر و القرظ:D