عزيزي المكشاتي عندك سيارة عائلية ! تفضل إدخل وعطني رأيك

[ماجد الحايلي]

بسم الله الرحمن الرحيم
أخواني المكشاتية
كل عام وانت بالف خير
والله يتقبل منا ومنكم صالح الاعمال

يأخوان بالنسبة للسلة اللي يركب عليها العفش أيهما أفضل السلة العلوية
أو السلة الخلفية لأنه نويت أشترى وحده وأنا عندي يوكن للعائلة وناوي
على سفر إن شاء الله إذا تيسرت الأمور.

لكن المشكلة بدأت حين دورت على سلة طلعت لي النصائح من كل جهه
ناس تقول السلة الخلفية خطرة وتأثر على القير وصرفية البنزين وخراب
العمود حق السرعه والسلة العلوية ماتخلي الموتر يمشي وماادري أيش بعد

السؤال هالحين وخاصة للمجربين ؟
هل فعلا فيه مشكلة بتركيب السلة سواء العلوية او الخلفية ؟
طيب لو الخيار بيدك وش تركب او ايهن تفضل ؟

دمت بود وانتظر ردودكم

[كبسولة2]

السلة الخلفية طويلة وعند المواقف والرجوع للخلف يجب ان يكون السواق حذر

لأنه كثيرا ماتسوي حوادث بسبب طولها

السلة العلوية ممتازة جداً

وفيه طريقة أفضل منها كلها وأرخص فيه طربال يركب فوق التندة وتحط أغراضك فيه

وله سحاب ومسكات يمسك في الشبك العلوي وتسكره وضد المطر مصنوعة من قماش تنزاني

وفيه سله فيبر غلاس زي الشنطة الكبيرة تحط أغراضك وتسكر عليها

والأفضل السلة العلوية بلا منازع

أما انها تبطي سرعة السيارة فهذا إذا كنت بتمشي بسرعة 180 هنا ممكن تبطي سرعة السيارة

أما بسرعة 120 فليس لها ضرر

وبعدين سيارة محملة ركاب وعفش إضافي سرعة 120 تعتبر خطرررررررة جداً

في حال انفجر عليك اطار وقد صارت معي وربك ستر

بعدها إذا حملت السيارة ما اتعدى 100 حتى لو اتاخر ساعة ساعتين 3

السلامة اولاً قبل كل شئ وبعدين خذ المسافة رحلة وسوالف وشاهي وقهوة

مو لازم تطير بين السماء والارض وكل مطرود ملحووووووووووق

تحياتي

[sgl2002]

السلة العلوية حسب استخدامي

[ماجد الحايلي]

كبسولة2
الله يعطيك العافية وشكرا على ردك السريع وتفصيلك المميز
وانا والله الاقرب لنفسي السلة العلوية
لكن انتظر ردود الاخوان لفائدة اكثر
اشكرك

[سفاري959]

افضل الخلفيه بشرط تكون نوعيه ممتازه وتتحمل لأن عفشك يكون قريب عندك اما الي فوق عذاب اذا جيت تحمل والا تنزل عفشك ومسأله انها تأثر على الموتر ما ثبت شي وحتى لو كانت تأثرفهي بتأثر اذا كنت بتخليها دايمه على الموتر ودايم تحملها اما مسأله سفره ثم تفكها مالها اي تأثير

[سلفاريو]

مع رأي الاخوان سله علويه

[حسن الشمالي]

ارى ان رأي اخوي كبسولة هو الصواب...ولايهونون الباقين...
وأؤيد ماقالة خاصة الطربال اللي مفصل ويحط فوق التندة...
مهنا بزين منه.... عبه من الخلقان والبطانيات والمخاد... وصك السحاب.. واربطة ... ولايردك الا استراليا..

ورحلة موفقة...

[FAPioO]

انا اشوف السله مؤقته وبتفكها فماراح يضر
يعني اذا فكيتها بيرجع موترك زي اول
والخوف الزايد ماله داعي وانا اخوك

[صب لي فنجال]

هي على حسب المسافه اللي بتمشيها اذا المسافه من 300 كم الى 500كم ركب الخلفيه ولا تسرع 120 زين واذا اكثر لا تركبها
خذ كلام الأخ كبسوله2 ولا يهنون الباقين لأني مجربها وانا جاي من مكة للرياض تقول راكب قارب تهز السياره
مع ابسط هويه مثلك خابر الخطوط الطويله وزفلتتها
وبالتوفيق

[ماجد الحايلي]

الله لايهينكم ماقصرتو لكن حسبت الطريق حاولي 2800 كيلو ذهاب واياب والظاهر ان شاء راح تكون سلة علوية

[الجيب عزوه]

السلام عليكم و رحمة الله

عام 1430 رحله برفقة العائله و المسافه 4500 كم و لمدة شهر

و مركب سله خلفيه و اربع شنط وعدة البر و رواق و فرش

و السياره الان معي و بدون اي مشاكل و لله الحمد

[عاشق السيل]

العلوية تتميز إن الثقل على مركز السيارة ،، تشيل عفش أكثر ،، ماتزيد من طول السيارة ،، مافيه أي تأثير على القير أو العمود أو الشاص ،،

عيوبها : تثقل سرعة السيارة لا صار الهواء مواجه للسيارة ،، الصعود فوق السيارة لترتيب العفش !!

الخلفية تتميز بقرب العفش عندك ،، ما تتأثر بالهواء ،،

عيوبها : ترفع وجه الموتر ،، معرضة للكسر مع الهزات القوية ،، ممكن تأثر على عضلات السيارة ،، ماتشيل عفش كثير ،، تزيد من طول السيارة ،، تمنعك من فتح الشنطة ،، وحتى لو طويتها تكون مشوهة لمنظر السيارة !!

باختصار ركب سلة علوية مثل ماقالوا الشباب والله يوفقك برحلة محفوفة بحفظ الله تعالى ....