المساعد الشخصي الرقمي

مشاهدة النسخة كاملة : الي عنده خبره بالديزل وخاصه اهل بريده ولايهون الجميع


ابو برزان
19/02/2006, 03:37 AM
بعد التحيه

يالربع انا مع جي اكس هدد أبي أحوله لديزل هل تنصحوني أول لا ؟

قبل عيد الضحيه كنا قنوص ومعنا شايب من أهل بريده وكان قانص معنا ومعه باترول ديزل ووأحد المرات ناقشني وسئلني ليه ما احول ماكينه موتري من بنزين الى ديزل ورديت عليه انه مكلف لاني سمعت أنه أذا جيت بتبدل مكينتك يعدونك مكينه ديزل مستعمله وياخذون مكينتك وتزودهم دراهم ، فرد علي أن هذا الكلام غير صحيح وهو ينطق على غير التايوتا ونصحني أني أبدلها بالأمارات ويقول أنهم ياخذون مكينة البنزين ويعطونك مكينه ديزل جديده وهم اللي يزودونك دراهم على حسب نظافه المكينه البنزين وقال يزودونك مابين السته الى الثمانيه الأف أو ببريده يعطونك مكينه ديزل جديده ويزيدونك من الالفين الى الاربعه0

الزبده اللي عنده نصيحه لي يا أخوان لا يبخل علي فيها واللي عنده معلومات عن الكلام اللي ذكرته يزودني فيها جزاكم الله خير

تحياتي
مسافر1
19/02/2006, 06:06 AM
ياخوي أركد وخل عنك التعديل والتبديل .. بع السيارة البنزين وبدلها بالديزل .. وبعدين الديزل غثى بارك الله فيك بعد أيام تصبح غمارة السيارة سوداء من الدخنه وووووو إسأل مجرب ..
ابو برزان
19/02/2006, 06:54 AM
هلا بالمسافر

والله يالمسافر انا ما اركد ومتت من صرف الدراهم على البنزين وش السوات0

تحياتي
ابو نقاء
19/02/2006, 07:00 AM
نصيحه خل عنك التعديل بعه واشتر شي جاهز من وكالته وهو ديزل اريح لك وسلمني على الديزل انا اشهد غلطان اللي مايملك ديزل
أبوأحمد98
19/02/2006, 07:29 AM
افضل لك انت انك تشتري جيب ديزل بدال الي معك لان بصراحه ماعمري سمعة ان فيه احد يبدل مكاين التايوتا من بنزين الى ديزل ..!!

لاكن الباترول اغلب الناس ببريدة يبدلونه بمكاين ديزل وفيه ناس سعوديين مشاء الله عليهم يضبطون لك الشغل ..هذا الي اعرفه ..وبالتوفيق
ذيب حضن
06/03/2006, 10:18 PM
يكفي نصف السؤال علشان يجاوبونك الجميع
وحيد111
06/03/2006, 11:52 PM
اخوي ابو برزان

انا مع الاخوان انك تشتري جيب مكينته ديزل شد بلد احسن لك من التعديل

لانه ربما واقول ربما ماتضبط معك المكينة

وبعدين ترى الديزل يغثك بالرمل واسأل مجرب

الا اذا كان ثمانية سرندل يمدحونه
خالد2000
07/03/2006, 02:59 PM
السلام عليكم
اخوي ابو برزان
عملية تبديل الماكينة الى ديزل مكلفة ماديا ومعنويا
يعني الموتر يبي يطيح من عينك بعد التركيب من الزيوت اللى بالمرتبة وحوسة اسلاك الكبوت ومشاكل الرديتر والكهرباء
ونصيحتي لك خلك على البنزين انظف واقوى ولا تمسك سرا في المحطة مع التريلات ولا احد يعطيك وجه .
وبالنسبة للامارات يوجد مجمع في الشارقة بادارة افغاني ماهر بالشغلة وامين بجانب كلية الشارقة بالمنطقة الصناعية لكن بياخذون عليك مبلغ زود من ( 4000 _ 9000 ) حسب نظافة ماكينتك اذا طلبت ( تيربو ) لانها اقوى واسرع مع ملاحظة ان كل من ركب ماكينة بالامارات يشتكي من خلل في الكهرباء .
لهذا نصيحتي لك اذا كنت ملزم تبي ديزل بع موترك واشتر ديزل وكالة اريح لبالك
هذي نصيحتي المتواضعة لك والقرار بالنهاية لك
الله يوفقك في اي قرار تتخذة وجميع اخواني والمسلمين اجمعين ...
تواق
11/03/2006, 12:02 AM
اخوي


انت راعي مقناص ودوجه الديزل عزالله اني ارتحت جدا منه اقنص واستانس ماهوب كل شوي وعيني على امبير البنزين

ها يقنصني ولا ارجع

لكن نصيحه الديزل خذه شد بلد ولا اتركه
ابو برزان
10/04/2006, 06:57 PM
بعد التحيه

اشكركم كلكم اخواني على هالنصايح والله ما اعرف كيف اجازيكم الا بكلمه جزاكم الله خير وكثر من امثالكم

خالد2000
أشكرك بعنف على هالرد اللي برد قلبي 0

ذيب حضن

يكفي نصف السؤال علشان يجاوبونك الجميع

مافهمت معنى جوابك اذا كان قصدك اني طولت بسؤالي فهذا فأنا حر لا أنت ولا غيرك يقيدني بما أكتبه ولكن الغريب انك تتفلسف ولا كتبت حرف يفيد بس الظاهر انك تبي تزود ردودك بالفاضي يافاضي0

أكرر شكري لكم كلكم أيه الأحبه ماعادا الفاضي ذيب حضن
ابن الكرام
10/04/2006, 07:25 PM
أخواني الأعزاء ابو برزان والأخ ذيب حضن الجميع هنا أخوة وأحباب وإن شاء الله تكون استفدت أخي الحبيب أبوبرزان من ردود النشاما والكلام إلي يجمد على الشارب وأنا خوك إذا انت صامل على الديزل خذ جديد زي ما تفضل وقال الأخوة ابرك لك من دوشة الصناعيات والشغل الغير مضمون وللفائدة انا استخدم السيارة الديزل خطوط طويلة مافيها كلام ,, تحياتي للجميع .
ابو برزان
12/04/2006, 04:20 AM
بعد التحيه

اهلين اخوي حاكم

أشكرك يالمزيون وماقصرت

تحياتي