سؤال للصقارة

[غاوي تعب]

يا اخواني اذا هديت الطير وهو توه ما خلص طرح الريش يعني توه ما صف ريشة بالكامل ( حالة مقيض ) وشهي المشكله يعني مايقدر يصيد والا كيف ؟؟؟

[الشبارم]

اخوي غاوي تعب

السلام عليكم و رحمة الله و بركاتة

اود ان اقدم و جهة نظري المتواظعه و هي.

الطير ما في شي يمنعه من الصيد الى في حالة شبعة الطير او لا سمح الله مرض الطير و في حالة الطير الذي اهديت و هو ما قرنس هذا يعيقه بعض الشي في الطيران و المشكله الثانية ماهو سبب تاخر الطير في القرناس و يمكن ان الطير مجرد انه متاخر في القرناس و هذا شي طبيعي في بعض الطيور, و ان كان الطير من الطيور التي تبكر في القرناس و هنالك احتمالات و هن ان الطير جاه مرض في الربطه او المدهنه لا تفرز كما ينبغي او ان بعض الطيور اذا تغير عليهل المكان تصوم " يعني توقف لفتره معينه من الزمن حتى تتكيف مع المحل الجديد" .

في الحاله الاولا " يجب فص الطير في المستشفى"
في الحاله الثانيه" يجب فحص المدهنه و اذا كانت تبي دق يجب ان تدق المدهنه و افضل من يدق المدهنه على حسب علمي هوا العويدي"
في الحاه الثالثه" يجب انتظار الطير حتى يامره الله و يحذ ف ريش"

و اذا كان الطير تمت النايفه "و هي الريشه الثانيه من الخارج في الجناح" و راعي الطير مستعجل على المقناص ينقل الطير و انشا الله ان الموسيه " الريشه الاولا م الجناح" ما تطيح ولا يغيرها.

رجو اني افدك و لو بعض الشيء

اخوك

الشبـــــــــــــــارم:cool:

[أبو فيصل]

الطيور ماهي سوى بعضها ما يهد دام فيه ريشه عادها خضرا (الدم يمشي فيها) وحسب معلوماتي اللي اسمعها ان هذا ينطبق على الشاهين مع اني ما عمري قنيتها.

لكن اذكر مره عندي طير حر اشقر صغير يدبس الحباري وريشه كله اخضر حتى الثالثة باقي عليها شوي.

أنصحك تنشد راعي الطير الأول ان كان تعرفة ولا تغرك نفسية الطير على الملواح او الحمامة. هناك بعد عامل الحرارة هذه الأيام ما كل طير يصمل اذا تكبرت الحبارى.

اللة بوفق الجميع

[غاوي تعب]

أخوي الشبارم ،،،،،،،،،،،،،،،،،،،،،،،،،،،،،،،،،
أخوي أبو فيصل ،،،،،،،،،،،،،،،،،،،،،،،،،،،،،،،
عزا الله ماقصرتوا بالجواب بس أنا خطرت لي فكرة ومعها عدة ادوات استفهام وأنا أقرأ اجوبتكم وهي اننا نلاحظ بهالمنتدى قله الكلام عن امراض الطيور والصحيح خلونا من قوله ( اذا مرض طيرك ودة للدكتور )
ليه حنا بهامنتدى ما نكتب عن امراض الطيور وعلاجها بالطب العربي مثلا انا سمعت ان الطير اللي يصيبه جدري يقومون بعلاجة بكي الحبة اللي تطلع فوق المنقار ويبرأ بأذن الله وعلى هالأساس انا اتمنى من اللي يعرف معلومات عن علاجات الطيور يفيدنا وترى هالشي ماهو بمستحيل ولكم الشكر

[تواق]

السلام عليكم جميعا
صحيح انا طيري جته سده وديته دكتور اعتقد انه بريطاني قام يفلسف ويرطن انجليزي
وانا نفسيتي عدمانه قلتله سوا الي تبى سوا عمليه في يدين الطير وتخدير كامل
واخيرا جاني وبكل برود الانجليزي المعروف قال اسف الصقر مات
والله كنه معلمني بخبر وفاه احد من اهلي بغيدت اذبحه
وشكرا اسف على الاطاله

[غاوي تعب]

يعوضك الله خير اخوي تواق وانا الصراحة لو عندي خلفية كبيرة كان فتحت موضوع العلاجات بموضوع شيق لكن احاول استقصي من الشيبان وانشاء الله اجمع معلومات واضيفها