ابشتري سيارة ..واريد نصيحتكم ..

[smair911]

السلام عليكم ورحمة الله وبركاته..

اريد سيارة ثلاث مراتب .. ومتردد بين
1-فورتينر (تويوتا)
2- اكسبلورر(فورد)
3- يوكون
4- لاند كروزر .
ابي افضل هذه السيارت ..من ناحية صرفية البنزين في الديرة وفي البر ..

وقطع الغير من ناحية توفرها وسعرها ... والتحمل في البر (علما بأني مااستخدمه كثير في البر)
واهم شيء الراحة ..

عموما ابي كل واحد يبدي رأيه وشكرا..

[ابو يزيد 2]

السلام عليكم

اخوي انا لو كنت مكانك

اخذ لاند كلوزر مندون مافكر الاند موتر صبار وعطاله قليل ويحفظ على قيمته شيك بيدك متى مابغيته بعته بقيمه طيبه

وفي نفس الوقت مريح ولايصرف بانزين وعطي الله في الديره والبر هذا رأيي وشوف الاخوان وش رايهم

تحياتي

اخوك ابو يزيد

[البيـــــراوي]

واهم شيء الراحة ..

شف الاكسبلورا ممتاز اعرف واحد معه 2005
مريح وعزم وفي البر يعطيك
والسعر رخيص وسمعت انه مخفضين علية
بس مشكلتة انه طامن شوي
وكنت معه مرة ومشطنا الطعوس الي مقابل الخفس تمشيط بدون تنسيم ولاغرزنا ولا شئ
وشف نصايح باقي الاخوان
مع خالص تحيات البيـــراوي

[مسافر1]

لاند كروزر مافيه كلام اخوي ...

[smair911]

مسافر1 ، البيـــــراوي ، ابو يزيد 2 جزاكم الله خير ..بس لو تعطوني معلومات عن صرفية اللاندكروزر والاكسبلورر ... وهل تنصحوني بجديد ولا مستعمل .. وان كان عندكم معلومات اضافية عطوني الله يحفظكم.

كما اتمنى من كل من يدخل الموضوع انه مايبخل علي بالمعلومات ..

[ZERO]

لاند مجربه ما يحتاج شهاده احد

والاكسبلورر ما جربته
تحياتي

[ابو؟؟؟]

السلام عليكم


اتوقع انا اليوكن زين من ناحية صرفية البنزين في الخط

والراخة في الخط

بس الند استخدامة حلو لانة ياباني وقطع الغيار متوفرة

وكلهم بيتغيرون السنة الجاية

وسمخنا علي القصور

وشكرا

[كبريت]

السلام عليكم

1- اللاند معرف حليو من ناحية قطع الغيار بس التيوتا مو مثل الاول
2- اليوكن حلو جدا حدا وايضا اوسع من اللاند وقطع غياره معقوله وفي النفود مايحتاج
الباقيه مالي علم بها

[محب الشمال]

اخوي سمير بارك الله فيك
حتى اخوك محتار بين هذي السيارات وانا رحت للحمراني وسألت عن الباترول القير العادي وفيه نوعين
نوع اول بـ 113000 ريال
ونوع ثاني بـ 121000 ريال تقريباً بعد الخصم
ورحت للجميح والعيسى سالت عن اليوكون عند الجميح بـ 126500 ريال وعند العيسى بــ 121000 ريال تقريباً بعد الخصم لكن حسب معلوماتي في اليوكون بين الجميح والعيسى انها تجي من المصنع فئات A و B و C والظاهر انه الجيمح والله اعلم انه يجيب فئات افضل من العسيى عشان كذا هو غالي
واخوك محتار بين الباترول القير العادي وبين اليوكون وسعرهم تقريباً نفس الشي والفرق بسيط
اما الاندكروزر الجي اكس ار مريت على البازعي وقال لي سعره 165000 ريال يعني فرق حوالي 45000 ريال

صراحة محتار وبس اني افكر اكثر شي بالباترول القير العادي رقم 2

الله يحفظك ويرعاك

[الشقردي]

ممكن سؤال أول ؟؟؟

كم ميزانيتك هذا أول شئ؟
كم عدد الركاب اللي معك؟
أنت راعي خطوط ولا لا؟
طلعاتك للبر ماهي كثيرة؟
هل تهتم للجودة ولا أهم شئ سيارة ولو ان فيها بعض العيوب,(عدم الرساوة أو التفكك السريع) مثلا ؟

وآخر شئ ترى السيارات اللي انت كاتبها فوق ماهي من نفس الفئه
يعني اليوكن واللاندكروزر سيارات كبيرة ثلاث مراتب
أما الفورتنر والاكسبلورر سيارات متوسطه الحجم فيجب انك تحدد اتجاهك أولا

ونحن في الخدمة

[smair911]

الاخوان
zero ، ابو؟؟؟ ، أبـو مـحـمـد.. الله يجزاكم خير كفيتو ووفيتو
الاخ محب الشمال : الله يجزاك خير على هالمعلومات المهمة ... لكن انا من جهتي مستحيل اشتري باترول لان صرفية البانزين عالية ..والقير العادي غثيث
الشقردي اسألتك بمحلها ..
انا ابي سيارة ثلاث مراتب ..

انا بصراحة عندي باث فيندر وهو روعة لكن عيبه انه ضيق ومرتبتين يعني وسع الكامري !
وابغى ابيعه واشتري سيارة ثلاث مراتب اوسع لي ....

وعموما انا ماني راعي خطوط نادرا مااسافر ..واطلع للبر بالمواسم وبالاسبوع مرة يعني طلعاتي قليلة...

لكن انا اخاف من السيارة الكثير خرابها والي صرفيتها بالبانزين عاليه ...

الباث فندر صرفيته معقوله وماعمره خرب علي .لكن مثل ماقلت ابي سيارة اوسع ..

اما بالنسبة للميزانية فانا افكر اشتري مستعمل استعمال خفيف ..او اقسط ( الله يعين)

[ولد المزاحمية]

أخي سمير تبي رأي خذ 1-فورتينر (تويوتا)والله انه قوي لا من شكل ولا من عزم وشكل حلو

بس ما أدري عن صرفيته للبنزين والوالد وده يأخذ واحد منه

[الشقردي]

اذا تبي سيارة لك وللزمن (حول 10 سنين) تويوتا ولو انه أغلى من مثيلاته == نصيحه لوجه الله
الان نجي للفورتنر: في اعتقادي الشخصي انه بفس اتساع السيارة اللي معك والشي الوحيد اللي بتكسبه هو المرتبه الثالثه واللي اذا استخدمتها يالله تكفي الاطفال الصغار أما البالغين بتتسفط رجلينهم ولا هم مرتاحين أبد في جلستهم. وزد على كذا انه ما عاد هناك مكان للعفش. والكلام هذا بنطبق على البرادو مع زيادة الاتساع قليلا وكذلك انه أجود من الفورتنر بمراحل
(وهذي السيارتين لا تاخذ الا 6 سلندر وقير توماتيك بعد ولو بأقل المواصفات أهم شئ المكينة والقير )

أما اللاند كروزر: ملك السيارات من ناحية الجودة والصبر والتحمل والتماسك (ولا تاخذ الا VXR )
سيارة 8 سلندر وتوماتيك, بتقول يصرف بنزين أقول لك ترى ما يفرق عن الباثفيندر اللي معك
طبعا الاتساع هو أوسع وأريح مطب, ما يحتاج اتكلم عن هالسيارة واجد لكن طبعا بحكم انك تبي تتوسع لازم تتحمل ضريبة الكبر والثقل نسبيا الى الباث فايندر

الزبدة : معك دراهم قسط لك جديد 2006 أو 2005 واذا تصبر فيه اشاعات تقول انه بيتغير 2007 منها تشوف الشكل الجديد واذا ما جاز لك تاخذ الشكل اللي قبل وبينزل سعره أكيد,
أما اذا تقول صعب اشتري بهالقيمة خذ لك مستعمل ولو يحصل من 2003 وطالع أزين (لأن التوماتيك يجي خمس سرعات) والله يعينك على غثاء المعارض والتدوير.

وفي رأيي الشخصي آخذ الجديد وعلى قول الشاعر (بتصرف)


أشريه لو قيمته كلها دين ========= راعي الولع يشريه لو باع ثوبه

[عمار السفينه]

أهم شيء أبعد عن الامريكي

[smair911]

الاخ الشقردي الفاضل .. كلامك جدا منطقي ..لكن فيه نقطتين :
1- تقول ان صرفية الباثفندر مثل الجيب الثمان سلندر .. ممكن توضح كيف ؟؟؟

2- ليش اخذ vxr وهو ثمان سلندر ...ماتشوف ان gxr احسن كونه 6 سلندر واقصد بالبانزين ..




الاخ: خراب السفينة انا ما يخليني افكر بالامريكي الا كونه مريح .. لكن انا اخاف من خرابه ..

[الشقردي]

بالنسبة لـ:

1- تقول ان صرفية الباثفندر مثل الجيب الثمان سلندر .. ممكن توضح كيف ؟؟؟
ج - مهوب مثل مثل بالضبط بس اللي أقصده انك ما راح تحس بفرق كبير بين السيارتين على افتراض ان الباث اللي معك 6 سلندر , ومثل ما قلت لك لا زم تتحمل ضريبة الكبر والوسع والثقل.

2- ليش اخذ vxr وهو ثمان سلندر ...ماتشوف ان gxr احسن كونه 6 سلندر واقصد بالبانزين ..
الفرق بين لصالح gxr داخل المدينة من ناحية الاقتصاد (وهو ليس فارق كبير ابد) ولكن بما انك بتاخذ توماتيك فسوف يكون ثقيل مرة ومكنيه الـ gxr أوفق على القير العادي وفي نظري القير العادي ما يصلح الا للراعي البر اللي أكثر وقته هناك (بنسبة 80 %).

أما بالنسبه للخطوط فان vxr أكثر اقتصاد بالبنزين وهذا يرجع لأكثر من سبب:
1- كبر مكينة الـ vxr واللي تخليها تشيل السياره وهي مرتاحه أما مكينة الـ gxr فهي بتشيل السيارة صحيح ولكن بتلاحظ حنة المكينة وكأن السيارة تمشي وهي محمله
2- قير الـ vxr يجي 5 سرعات بينما الـ gxr يجي 4 سرعات (وكذلك بدون مثبت)

والفرق هذا بتلاحظه من سرعة الـ 100-120 وطالع يعني لو تمشي السيارتين بسرعة 140 مثلا في نفس الظروف
نلاحظ ان عدد دورات المكينه (ضغط المكينه rpm) بالنسبه لـ
vxr تقريبا 2700 دورة
gxr تقريبا 3400 دورة
كل الارقام تقريبية

وكلامي هذا اللي فوق نابع عن قناعة شخصية وتجربه, ان ما جاز لك عادي جدا, وان جاز لك فأتمنى انك ما تنسني من دعاك

وعليك بالاستشاره والاستخاره

واسلم وسلم

[ابودلـــــــه]

السلام عليكم
انا لي راي اخر مختلف عن جميع الاخوان وهو ان تاخذ باجيرو راح تقول وع وماهو زين بس انا اقول لحظة لاتستعجل لعدة امور منها لسبيل المثال لاالحصر :
سعره مناسب جدا يبدا من 78000 الى 110000 ريال (الفل كامل)
قوي لدرجة لاتصدق مع ناس اعرفهم مشت معهم المكينه 600.000 كم ولم تطلب توضيب واذا كان القير اتوماتيك فاعرف ناس مشى معهم القير الى 900.000 كم طبعا كلام ما احد راح يصدق فيه بسهوله كون التويوتا ماكل الجو
لايطلب قطع غيار الا نادرا او صيانه
قطع غياره قريبه جدا من اللاند كروزر
عيبه الوحيد وكيله نعااااااااااااااااااااااااااااااال

[raed]

السلام عليكم
مجرد وجهة نظر انا عندي باترول 2005 وصرفه معقول عادي وخذ اتوماتيك لانه جدا جدا ممتاز ومريح بالسفر جدا جدا جداوالبر اكيد معروف.
والتويوتا كنت مع واحد من الشباب بخط ما لقيت في راحه لانه قاسي شوي.
وصرفهم اعتقد واحد بس مع السرعه العاليه اكيد بيختلف عن السرعه المعقولة
وسلامتكم

[الضرغام]

smair911



في البداية أقول لك الله يبارك لك في أي سيارة أنت تختارها

وما خاب من أستشار وأنا أخوك وخيراً عملت



أنا ماخذ لي يوكن 2006 وماشاء الله تبارك الرحمن

راحة وصرفية بنزين جداً رائعة والسعة ولله الحمد لا يعلى عليها

والتكيف هم مسكت في البر خذ العزم وشيء يبيض الوجه وفي السفر مايحتاج كلام

أنا ما أخذته إلا بعد مشوارات طويلة مع أهل الخبرة ومن أستخدم اليوكن لسنوات

أحد الشباب عنده موديل 2004ولله الحمد والله يعطيه خيره يقول ما عرف الأعطال

الأعطال بسيطه ولا تذكر والقطع متوفرة

وأذا حبيت تسئل عن اليوكن عندك أخونا العارض<SCRIPT type=text/javascript> vbmenu_register("postmenu_381211", true); </SCRIPT>

الأتساع اليوكن أكثر سعة بين ما أخترات أنت من السيارات وخصوصاً المرتبه الأخيرة



هذا العام أحد الشباب داخل به مقناص في منطقة يقال لها الرمله الرجل يشكر ويثني عليه



ونصيحة أخوي

شوف أحد الأصدقاء المقربين منك ومن يملكون أحد هذه السيارات

وأطلع معه والتجربه خير برهان



وقبل كل ذلك عليك بالأستخارة

دعواتي لك بالتوفيق وللجميع

[smair911]

الاخ الفاضل الشقردي كلامك اتضح الان ..شاكر لك ومقدر على التوضيح.


الاخ ابو دله .. الباجيرو عيبه شكله .

الاخ raed مابه شك ان الباترول مريح لكن شفت بعيني صرفيته ..يبيلك تشتري بير بترول ومصفاة نفط .. وتمشي حولهن ...خويي كان معه باترول وكل محطه بالطريق يلبق عندها ..:D :D

الاخ الضرغام .. ااه ياليوكن بعد ماشفت 2007 انصرف تفكيري عن جميع السيارات واتجه له ...
واجلت شرية السيارة الين اخذ معلومات من الي يبون يشترونه السنة الجاية ان الله احيانا :D :D ..

وعموما التعجل مهوب زين .....

[الطعس الذهبي]

البرادو حلو

[الشقردي]

السلام عليكم
لي وجهة نظر بخصوص اليوكن اذا تسمح لي يا الضرغام ولا يهونون الاعضاء وصاحب الموضوع

اليوكن قوي من ناحية المكينه والصرفيه في الخط معقوله جدا, لكن ومع احترامي ما يقارن بمتانة وجودة الـ Vxr حتى الصبر والتحمل والتماسك

صحيح اليوكن أوسع لكن يتفكك
وانا أقول لك هذا الكلام من واقع تجربه يوكون 2006 وvxr 98
لاحظ فرق الموديل؟؟؟؟؟؟

[الضرغام]

السلام عليكم
ومساكم الله بالخير يالغالين

أخوي الشقردي مساك الله بالخير
والعذر والسموحه منك لم أشاهد ردك أخوي غير اليوم
ومسموح أخوي وخذ راحتك عساك سالم
التويوتا القديم بالذات ما أحد يقدر يقول عليه شيء
كسيارة متماسكه مما سبب القساوة في السيارة
وهذا أحد العيوب القساوة
يعني بعد مشوار متوسط الله يكون في العون الظهر صاير قطعة خشبه
وكلامك على عيني ورأسي من فوق أخوي
أنا ومثل ماقلت في تعليقي السابق
الأخ الذي أعرفه معه يوكن 2004 وماشاء الله تبارك الرحمن
ماشي معه رغم أنه بشكل أسبوعي هو في البران
من طعس إلى طعس ويعلم الله أنه دايم منافسه مع الشباب
أصحاب الأند والسفاري والله خلاهم يعرضون سيارتهم للبيع
بعد اللي شافوا
والله خايف على الرجال ياشقردي من بعد حديثي عنه وعن سيارته
الله يارب يحفظه ويخليه
وكم أسعدني والله يالشقردي بتوجيه كلامك لي
وعزيز وغالي أخوي
وسامحوني على الأطالة في الحديث

[الدبوس]

غير بالآتي :
1-فورتينر (تويوتا) إلى (أرمادا)
2- اكسبلورر(فورد) إلى (تريل بليزر)
وأنظر إلى قطع السيارات وجودتها وليس إلى صرفية البنزين

فهل تقبل بشراء لاندروفر (صناعة انجليزية) ديزل فهو قليل الصرفيه ولكن بلا شك قطعه غالية الثمن هذا إذا وجدت .