قصيدة الـــفـــكـــســــــVX-Rــــــــــــــــــــــار

[ريف النشامى7]

هذه قصيدة الـــفـــكـــســــــVX-Rــــــــــــــــــــــار ولا يهون راع الجكســـــــ GXRــــــار و الشاص و التي أتمنى أن تحوز على رضاكم و إعجابكم



يا بجاد أنا بارسلك بعلوم وأخبار =وأنت المراسل وتعناك الرسالة
حيث اني أسميك صندوق الأسرار = صندوق صلب(ن)محكمات قفاله
واركب على اللي يعجب اصحاب الأنظار= صالون لاندكروزر أبو محالة
من وارد اليابان والنوع فكسار= صمم على قمة فخامة وأصالة
يعجبك فالموقف و يعجبك لا سار =و يعجبك صوت محركه و اشتغاله
شده خبير الصنع مسمار مسمار =ثم زوده دفتر ضمان و كفالة
و برمج على الطبلون عشرين معيار =تعطيك معلومات عن كل حالة
خيار ما يستخدمه كود الأخيار=دوبه يطلع من حفيز الوكالة
محطم الرقم القياسي بالأسعار =غالي و جمهوره يكن الغلا له
راعيه وقت البيع ماهوب يحتار =ان كسبه ولا ضمن راس ماله
بالمدن شخصية وبالبر بيطار =وليا التوى عسر الدروب استوى له
لا ما عطا له رقة(ن) طقسها حار =طلع مع الشكمان مثل الذبالة
يسبح مثل صقر(ن) مربيه صقار= لا شاف جول الصيد و أفلت حباله
هذا اختياري يوم كل(ن) له خيار= و الا اختيار الغير مالي و ماله
قل له عساك مجار من سو الأخطار=و جعلك تعود بخير و أعز حالة
و اسرح من البرقا مع وقت الاسحار =و خله بدون احراج يمشي لحاله
يبعدك عن ديرة ويدنيك من دار =وينصا بك بيوت الشرف والجمالة
تاصل هل الغطغط طويلين الأشبار=قبل انصراف الفي والا زواله
تلقا سلالة عيد سمحين الأنظار= ربع(ن) لهم بالطيب طالة و قاله
جوداتهم للضيف تكرار و مرار =الأولة فاله و الأخرى عقاله
و بيوتهم يكرم بها الضيف والجار =بنيت على التقوى و كسب الجمالة
أهل الدلال اللي على صالي النار =فيها من البن اليماني زلاله
و عود(ن) ماهوب يورده كل عطار=ما يشتريه المقتصد في حلاله
و مجالس(ن) ما طبها كل ثرثار=يدله بها الطرقي ويرتاح باله
خذ عندهم يا بجاد فترة و مقدار =و عطني خبر عن كل واحد و حاله
سلم عليهم عد هتاف الأمطار=لا أقبل من المنشى صدوق(ن) خياله
ثم قل بعثني سيف بعلوم و أخبار=و أنا المراسل و أنتم أهل الرسالة
كلفني أحملها لكم سر و جهار =و لي الشرف في طاعته و امتثاله
عنوانها بمناسبة عيد الأفطار =و مضمونها من قال يثبت مقاله
و أقول يا ربعي هل المجد و الكار=يمنى الولد ما تغتني عن شماله
و حنا لنا بالطيب مارد و مصدار=و لا خير في بيت(ن) كسيف(ن) ظلاله
و العز و الجمعا لنا عز و شعار= و البغض و الفرقا تصرف جهالة
اليا تفاهمنا بالاريا و الأشوار= و هذا مع هذا بحاله و ماله
صرنا يد(ن) وحدة على طول الأعمار=و العز خير من الفشل و الرذالة
نمشي سوا و نرد للنار بالنار= دون الخقوق اللي عليها قبالة
و الشر نضرب به جبروت الأشرار=حتى يتوب عن الخطا و الجهالة
و ختامها صلوا على سيد الأبرار= اللي بُعث للناس عدل و عدالة








و سلامتكم






الشاعر سيف بن سعيد القحطاني

ترقبوا قصيدة الفكسار القادمة لسعد بن جدلان ‌‌‌‌‌‌‌كــــونــــــــــوا مـعـنــــــا

http://www.mekshat.com/pix/gallary/data/images/%dd%df%d3%c73%d1.jpg





http://www.mekshat.com/pix/gallary/data/images/%dd%df%d3%c7%d1.jpg





http://www.mekshat.com/pix/gallary/data/images/%dd%df%d3%c7%d110.jpg




http://www.mekshat.com/pix/gallary/data/images/%dd%df%d3%c7%d12.jpg






http://www.mekshat.com/pix/gallary/data/images/%dd%df%d3%c7%d14.jpg



http://www.mekshat.com/pix/gallary/data/images/%dd%df%d3%c7%d16.jpg

[نجمة سهيل]

مشكور أخوي:heart:ريف النشامى7:heart:على هالقصيده الحلوه وأنا اشهد ان الفكسار والشاص يستاهلون القصايد.(((وياما أحلى المقناص بالشاص))).
VX-R(((يسبح مثل صقـر(ن) مربيـه صقـار لا شاف جول الصيـد و أفلـت حبالـه)))

[عاشق الصحراء]

صــــــــــــــــــــــــــــــــــــح لســــــــــــــــــــــــــــــــــــــــــــــــ انك
يا ريف النشاما7.

[ريف النشامى]

مشكورين يا شباب على التفاعل



للأهمية


ريف النشامى = ريف النشامى 7

[فرد حمزة]

صح لسانك ، وتسلم على القصيدة :)

[راعي بر]

تسلم يا ريف النشامى


على اختيارك لهذه القصيدة

وصح لسان سيف على قصيدته

وانا اشهد انه يستاهل هالقصايد واكثر

وان ما خاب ظني فإنه قد طرحت هذه القصيدة ولكن لم تكن كامله ولا مرتبه .


وانت باسلوبك الجميل جملتها

وتشكر على هذا المجهود

[ريف النشامى]

تسلمون يا الربع على الردود



و لا يسلم ردي العزايم



و أعتذر عن اللقافة فإني لم أقرأها من قبل في هذا المنتدى الشامخ و لو علمت أنها
نشرت فيه لم أنشرها مرة أخرى و لكن هذه القصيدة موجودة لدي على شريط كاسيت
و قد فرغتها منه و نشرتها ها هنا لأنه يستاهلها شرواكم يا النشامى



لكم أطيب تحية


و أبشروا بالقادم إنشاء الله





reefanneshama@hotmail.com (reefanneshama@hotmail.com)ريف النشامى ليا انحدر كنه السيل @@@ و ليا كفخ عانق نجوم العلالي