رايكم / اف جي 2007 امريكي

[حبل الوريد]

بسم الله الرحمن الرحيم
سلام عليكم ورحمة الله

طرا علي اشتري اف جي مستعمل 2007 امريكي قير عايدي
وش رايكم في الموتر من ناحيه محركات كجوده وصبر وقوهـ
لأني سمعت ان 2007 و 2008 كان فيه مشاكل بالقير
مدري هي تشمل العايدي بعد ولا
تنصحوني فيه



وفيه شباب شارو علي بسييرا مستعمل غماره حوض


وما خاب من استشار

[abu ziyad]

هلا فيك اخوي

اتمنى لك التوفيق بإختيار سيارة مناسبة


انا شريت بعد التوكل على الله اف جي 2008 أمريكي

وصراحة ما مثله ولايفرق عن السعودي سوا في العداد فقط

بس انا شريت فل كامل يعني تماتيك انصحك بالتماتيك ترى مايعيبه شي لاقوة ولاخلافة

وفي النهاية القرار اللي ترتااح له استخر الله فيه

,,

[Abo gssar]

من ناحية النشاط خذ ولد يطربك طرب نشيط وخفيف وماكنك راكب جيب ...

[حبل الوريد]

سلمتم يالربع
ولا زلت اود معرفة المزيد

[اسبيدر مان]

انا انصحك بالقير الاوتو لان القير العادي يجي دفع رباعي مستمر وييصير ثقيل اشوي بعكس الاوتو والموتر نشيط واثبت وجوده بفتره قليله
وبالمناسبه مره طالع للبر واشوف شايب هو وابنياته معهم واحد ابيض يطاعسون عليه ويتمشون وجلست اضحك وقلت هذا شايب يبي يتشبب
وبالاخير الله يكتب لك الى فيه الخير

[ارفع مقامك]

اذا تبي نصيحتي خذلك سييرا {جمس حوض} ما مثلة اقوا من الاف جي وانشط ....

[مخاوي الحصني]

الاف جي موتر نشيط واذا انت من هواة القير العادي فهو ممتاز بالبر ومتعب بالمدينه مثل الرياض

[حبل الوريد]

مشكورين يالربع
طيب الدفع الرباعي المستمر وش عيبه
يعني ما اقومه باثنين ويبرد عزمه بالطلوع ؟؟

[المصباح السحر]

نصيحه جربه ترا انا مثلك نويت عليه ويوم جربت حق خويي صراحه طاح من عيني وقلت لخويي بكم شريته قال 110 الاف قلت والله ما احط فيه 20 الف

الجيب الصح الهدد اذا تبي جيب
والامريكي يبيله ناس مروقه وعندها خبره بالكهرب والمكانيكا بحيث لو تعطل عليك وانت بالصمان تقدر تمشيء نفسك وتطقطق فيه اما اذا كنت مثلي شغل وامش ما يصلح لك ابد

[شمساوي]

والله الاف جي كله مادخل راسي ونصيحه لك السييرا أحسن منه قوه وعزم وشكل حلو

اشر اي موتر تايوتا غير الاف جي وخاصه التومتيك ماينفع ابد في البر والطعوس الرفيعه على طول يقظي عزمه ومايرد نمره الى اذا وقف

1- عندك الهدد
2- الفورشنر 6 سرندل قوي خيال ولا بعد اتومتيك

[حبل الوريد]

الله لا يهينكم
بس الافجي ياباني
الي انشد عنه الدفع الرباعي المستمر يقولون بالقير العايدي بس
وش عذاريبه ووش محاسنه

[AbdulAZiz M]

مشكورين يالربع
طيب الدفع الرباعي المستمر وش عيبه
يعني ما اقومه باثنين ويبرد عزمه بالطلوع ؟؟

الدفع الرباعي المستمر ما فيه عيب يذكر إلا اللي يحب يتمشى بالنفود بالكفرات الخلفية نفس نظام الهايلكس والإف جي القير الاوتو والربع والشاص وغيرها
الرباعي المستمر بالتأكيد افضل في المنعطفات وثباته افضل
الإف جي من موديل 2009 وتحت يجي بالمكينة السابقه ( 1gr-fe ,vvti ) وتتميز عن المكينة الحالية ( 1gr-fe dual vvti ) بالتورك العالي وفي التطعيس ما يبرد إلا بعد ما ينزل الآر بي ام عن 3600 دورة في الدقيقه لكن المكينة الجديده تتميز بالاحصنه في الخط اسرع لكن في التطعيس يبرد بعد ما ينزل الآر بي ام عن 4400 دورة في الدقيقه الأول تقريباً يقطع على 60 أو 55 كم أقل بشوي في موديل 2009 وتحت يعني احتمال مو أكيد تقدر تقومه بإثنين لكن ممكن يصعب عليك القومه بإثنين الرباعي المستمر ،، لكن السؤال ليه تبغى تقومه بإثنين،، المحرك الجديد القير العايدي يقطع فيه 65 كم تقريبا وتورك اضعف نسبيا ورباعي مستمر يعني 90% ما تقدر تقومه بإثنين

نقطه ثانيه ،، الرباعي المستمر موضوعه سهل اذا ما اعجبك تقدر تفصله بـ 900 ريال وكثير فاصلينه في البرادو واللاندكروزر والفورتشنر
اذا تبغى قير عايدي عليك بالموديلات السابقه 2009 وتحت واذا كان من موديل 2010 وفوق انصحك بالاوتو
معلومه ثانيه مكينة 2009 وتحت تقدر تركب عليها شاحن سوبر تشارج من شركة TRD يرفع الاحصنه إلى 305 وألعب في اطلق طعس ،، اجتمع القير العايدي مع قوة المحرك


والله الاف جي كله مادخل راسي ونصيحه لك السييرا أحسن منه قوه وعزم وشكل حلو

اشر اي موتر تايوتا غير الاف جي وخاصه التومتيك ماينفع ابد في البر والطعوس الرفيعه على طول يقظي عزمه ومايرد نمره الى اذا وقف

1- عندك الهدد
2- الفورشنر 6 سرندل قوي خيال ولا بعد اتومتيك

الفورتشنر والاف جي نفس المحرك ما ادري كيف تقول ضعيف علماً بأن نسب الدفرنس من صالح الاف جي

[حبل الوريد]

بيض الله وجهك يبو سعود
لاهنت على المعلومات الطيبه
بس تحتاج تقومه باثنين مالك لأن الاول نمرتة قصيرهـ
طيب اليه الفصل ويش بالضبط فرارات يعني

[AbdulAZiz M]

بيض الله وجهك يبو سعود
لاهنت على المعلومات الطيبه
بس تحتاج تقومه باثنين مالك لأن الاول نمرتة قصيرهـ
طيب اليه الفصل ويش بالضبط فرارات يعني

ووجهك أبيض

مثل ما قلت لك الإف جي من موديل 2009 وتحت نمرته في الأول اقصر من الإف جي والبرادو الجديد ( ابو مكينة جديده ) وفي نفس الوقت نمرته اطول من جيب الربع بشوي

لكن العائق احتمال يكون الرباعي المستمر لأنه يثقل القومه شوي

فصل الرباعي المستمر يكون عن طريق فك الدبل وإزالة 8 تروس صغيرة جداً وتلحيم ترسين كبار ويصير خلفي واذا بغيت تشغل الدبل الخفيف ولا الثقيل عادي يعني يصير مثل الاف جي الاوتوماتيك والربع والشاص ،، ولو تبحث عن طريقة فصل الرباعي المستمر راح تحصل مواضيع واسماء الورشتين اللي تشتغلها

الفرارات ما تركب على الإف جي

[حبل الوريد]

لاهنت والله يالغالي
طيب وهل ترى لو خذته يحتاج فصله ولا لا
خاصه اني علمت ان قير الـ 7 والـ 8 الاوتو حصل في بعضهن مشاكل
وخوفي لو اخذ عايدي واحورف به يضر القير عقب ولا لا بغيت صيانه جلست بجنبه

[راعي الطوايل]

السلام عليكم أنا معي اف جي 2007 امريكي اخذته صراحة الموتر ماعليه كلام بس في الغالب اللي يجيبونه الشريطيه من الامارات وأكثر اللي يجي جايته صدوم ،
فصل الرباعي المستمر في ميكانيكي سعودي معروف اسمه المبارك شغله تمام
وهذا رقمه بعد إذن الادارة 0503151217


بالنسبة لكلامك أخوي عن القطع:
القطع اغلبها مثل السعودي أما قطع القير والكلتش فتحصلها في المحلات والوكالة لأن القير مثل البرادو والكلتش مثل البرادو والشاص وعلى هذا قس.

[حبل الوريد]

الله لا يهينك يا راعي الطوايل
موترك عادي ؟؟ اذا عايدي كيفه معكـ
وبعدين لا جى صدوم خفيفه ولا وجه
بوصي واحد من الربع شريطي سيارات دايم يجلب من الامارات

[راعي الطوايل]

ايه نعم عايدي ، صراحة الموتر ماشاء الله تبارك الله ، أما الصدوم من جهة السائق الباب الصغير الخلفي مع الرفرف الخلفي , أما من جهة الراكب الباب الكبير وطبعا لم أعلم عن كل هذا الا بعد الشراء بوقت طويل.

[حبل الوريد]

طيب يالذيب اشغلتك شوي كيف الموتر ونشاطه
وهل ضبطت الدبل زي ما قال اخوي عبدالعزيز

[AbdulAZiz M]

لاهنت والله يالغالي
طيب وهل ترى لو خذته يحتاج فصله ولا لا
خاصه اني علمت ان قير الـ 7 والـ 8 الاوتو حصل في بعضهن مشاكل
وخوفي لو اخذ عايدي واحورف به يضر القير عقب ولا لا بغيت صيانه جلست بجنبه


ولا انت

والله فصل الرباعي على حسب حاجتك

اذا انت نظامك بالبر وسواقتك راكده ما فيها تطعيس بس بالكفرات الخلفيه مثل اهل الأرباع والهايلكسات خله على حاله واذا غير كذا افصله واطرب عمرك :D

قير السبعه والثمانيه ما فيها مشاكل والقير مستخدم في البرادو من موديل 2005 ولا احد اشتكى منه بس بعضهم ما يعرف للقير الأوتو ويطعس فيه بطريقة خاطئة ويحرق كلتشاته
انا معي اف جي اوتو من 3 سنوات ما قربت لا المكينة ولا القير الحمدلله رب العالمين

قير الإف جي العايدي نفس قير البرادو بالضبط 6 نمر بدون الريوس يعني كلها 7 نمر

الإف جي 2011 نزل قير عايدي في السعوديه ،، ع شان تضمن قطع الغيار زيادة :)

[راعي الطوايل]

لا ابداً بالعكس يشرفنا ، نشاط الموتر ممتاز لكن مثل ماقالوا الاخوان النمرة الاولى في المراقى تبرد لكن بالثاني حلو واذا كنت راعي تطعيس الموتر بيطربك خفه وقوة ، فصل الدبل الظاهر انها نفس الطريقة.
أحب أنوه ان بعض الناس اخذوا فكرة سيئة عن الاف جي اول ما ظهر لكن الان انتشر بكل رهيب و اسعاره مع دخول الشتاء وصل 2008 النظيف الى مئة ألف .

[حبل الوريد]

بيض الله وجيهكم
علمكم غانم
لاهنتو يالربع

[الذيب 502]

شف الموضوع بختصار وبدون فلسفة الدفع الرباعي تكون الكفرات كلها
تدور الكفرات الامامية 30 % والخلفية 70%

وهو افضل في المنعطفات لكن الناس ما تحبه لانك ما تقدر تنوفر وتستهبل في النفود لان
السياره بتمشي سيددددددااااااااااا مو زي الخلفي تفوحط مكانها

[ابونبيل]

الافجي ممتاز جدا قوي

بس ترا مقارنتك ماش يعني تقارن حوض بجيب مافي رابط بينهم كانك راعي تحميل خذلك سيرا واذا طلعات خفيفه بدون تحميل افجيه