افضل الكفرات للجيب اللاند كروزر [الأرشيف]

الراعي

19/03/2006, 08:54 AM

الاخوه الاعزاء اعضاء المنتدى الغالي
ارغب بتغيير كفرات سيارتي لاند كروزر Gxr الموجود الان God Yeer ولكنها قاسيه ومطبها قوي
ماهي افضل كفرات
تحياتـــــــــــــــــــــــــــــي للجميع , , ,

البيـرق

19/03/2006, 09:48 AM

عليك باليوكوهاما ممتازة جدا ولينة خط وبر...........

هاوي خلا

19/03/2006, 10:29 AM

الأخ العزيز الراعي عندي لك نصيحة بالنسبة للكفرات وهي أن السيارة تجي بها كفرات شد بلد وهي موزونه على ثقل الموتر وارتفاعه وحاطين بعين الاعتبار الميول والانحناءات واللفات وهم وازنينه على الموتر وزن بقياسات وابعاد حسب حاجة السيارة .
فأذا أنت ملزم تغير الكفرات خذ نفس المقاسات اللي على جنب الكفر تلقاهن بالنسبة للعرض والارتفاع ومقدار الكاندس ((الغاط)) أي دعسة الكفر .
واذا على شان المطبات هناك يا أخي مساعدات استرالية تريح الموتر وهناك بالون ينفخ نفخ ويوضع في المساعد وتخفف هواه وتزيده على حسب الرغبة وله بلف لوزن الهواء فيه وهو عملي جداً .
المهم أحرص على عدم تغيير الكفرات بنوع أو مقاس أخر غير شد البلد هذي نصيحتي ووجهة نظري .
ولك مني خالص التحية .
أخوك هاوي خلا .

ناصح

19/03/2006, 10:54 AM

أنا أعتقد ان أفضل كفرات هي التي تأتي مركبة من بلاده

وهي الدنلوب استخدمها واحد من الشباب لمدة سنتين ونصف ومشى عليها 120000 كلم ولم يحصل لها إي شء ولم تبنشر ولا حتى مرة واحدة

سلطان الأحمري

19/03/2006, 11:26 AM

الدنلوب لا تدور غيره ..

بالنسبة لليوكوهاما جيد لكن عيبه يصدر صوت مزعج ..

الشقردي

19/03/2006, 11:30 AM

وكلام الاخوان على متمه

الدنلوب ثم الدنلوب ثم الدنلوب ثم .....

لا تتعدها نصيحة مجرب
تبيه خط , رمل , حجره , وعر .....
معي vxr 98 ومن ذيك الحين وانا معامل هالنوعيه

مدلّه الرعيان

19/03/2006, 01:10 PM

الأخ / الراعي

اعتقد ان الاخوة الكرام كفّوا او وفّوا لكن من خلال تجربتي ونصيحتي لك استعمل كفرات ( مشلن ) ولن تندم ، انا معي Vxr مديل 98 ولم استعمل سوى كفرات مشلن ومرتاح جداً معهن .

مع تحيات اخوك / مدلّه الرعيان

مدلّه الرعيان

19/03/2006, 01:11 PM

بعيد الهقاوي!

19/03/2006, 06:37 PM

دنلوب دنلوب

ملاعب الريح

19/03/2006, 07:36 PM

السلام عليكم ورحمة الله وبركاته

إسأل مجرب عليك بالدنلوب عندنا ولله الحمد 3 جيوب وكلها دنلوب عيبها قاسيه شوي لاكن عليها تحمل غير طبيعي
الوالد معه فكسار 2001 جلس معه الطقم سنتين الحمد لله:good: ولا قد بنشر معه طبعا الفكسار دفع رباعي مستمر

واحد من العيال مركبها قبل سنتين تقريبا وراحة الجره:D والى الحين الكفرات معه زي الفل اللهم بعض الازعاج مع السرعه

تبيها نفود خذها تبيها شعبان خذها تبيها خط بعد خذها:)

سعر الكفر هالايام 350 ريال تقريبا لأنه متوفر وأوقات الغلا ياصل 380 او 390 ريال

تحيتي(بو سيف)

ستيشن

19/03/2006, 08:31 PM

اخوي

لا تتعدى الدنلوب انا معي لاندكروزر من يوم فكيته من 2002 ونا ما استخدم الا دنلوب ويقعد معي سنتين
لكن فيه ملاحضه: الدنلوب انواااااااااااااع فيه دنلوب وارد ( بن زقر ) وهو الاصلي صناعه ياباني
وفيه دنلوب وارد ( بن شيهون ) وهذا صناعته اماراتي لو يقولك بريال لا تاخذه وما تفرقه عن بن زقر الا بالصناعه وميزة دنلوب بن زقر اذا بغى ينصلخ يطلع صوت قبل لا ينصلخ لا تتعداه جربت الميشلان والهانكوك
الميشلان عضل والهانكوك لين ويتاكل بسرعه
ولك الخيار

لاهوب

19/03/2006, 09:52 PM

وين مشاركتي يامشرفنا الغالي ليش حذفت؟؟؟؟؟؟

البيـــــراوي

19/03/2006, 10:08 PM

انا اشوف اكثر اللاند كروزرات يركبون كفرات الدونلب
واخبر راعي هدد مركبها
مع خالص تحيات البيــــراوي

الراعي

21/03/2006, 07:39 AM

الشكر كل الشكر لاخواني المشاركين بالرد على استفساري والشكر موصول للمشرفين والاعضاء لهذا المنتدى المتميز

أبومتعب العمر

09/05/2010, 09:51 PM

مشكورين يالربع ولكن كيف افرق بين كفرات وارد بن زقر وكفرات وارد بن شيهون
وكم سعرها
ولكم احترامي وتقديري

ZIAD_KSA

10/05/2010, 02:42 PM

مشكورين يالربع ولكن كيف افرق بين كفرات وارد بن زقر وكفرات وارد بن شيهون
وكم سعرها
ولكم احترامي وتقديري

النادرتو

11/05/2010, 10:04 PM

اخوي عليك بدنلوب

خرطوش الصيد

11/05/2010, 10:52 PM

اليوكوهاما طيبه

االكريزي

12/05/2010, 01:39 AM

الا ندكروزر اغلبهم دنلوب
وانت شوووف وش يناسبك

aliwww

08/07/2010, 08:30 AM

والله يربع أنا بعد ودي أركب كفرات وحترت بين دنلوب قيمتها حسب بعض الشباب 450 لكن على مقال مدري كيف أفرق بين بن زقر وبين بن شيهون مدري النوع الثاني أللي يقدر يفيدنا ياليت ولكومهو كيفها وياليت أحد يعلمنا عن الفيرستون واليكوهاما

سهم قيادي

09/07/2010, 10:09 PM

ذا المره غيرت عن الدنلوب وركبت ماكسس عادي تايلاندي 275/70/16 ما بعد جربته على خط او بر لكن مبدأين راضي عنه جدا لينه وما له صوت ضجيج وسعرها 380 للكفر الواحد واخذتها بعد السؤال عنها

مداوي

09/08/2010, 03:41 PM

مشكورين جميعا واشوف ان ترشيح الدنلوب غلب البقيه

السومر

11/05/2011, 05:36 AM

ودي ارفع الموضوع هذا لاني بركب كفرات واخذ العلم من النشاما

عاشق الحيسية

11/05/2011, 10:15 AM

ياخوي

لاتعدى البالون (ماكسس) 900

ليونه ولا تدري عن البطناج

ن م ر

11/05/2011, 11:15 AM

خط + بر + جبال

ما فيه مثل الـ

http://t1.gstatic.com/images?q=tbn:ANd9GcRFUcQCUhzXgdEiOt0YtEyBbhdHOWqxO 7g7R8sN4hdKYTzcgK2A

هذا الكلام عن تجربة 9 سنوات مع الدنلوب في اللاندكروزر
وكل طقم أركبه يجلس معي لا يقل عن سنتين وانزله وهو باقي فيه نص عمر لكن السلامه أولاً
فيه طقم مشيت عليه اكثر من 130 الف كيلومتر واستمر معي سنتين و4 شهور
وغيرته وهو ما شاء الله تبارك الله ما قد بنشر معي ولا انصلخ

احرص عزيزي على دنلوب وارد بن زقر الأصلي ويكون تاريخه جديد

هذا بعد التوكل على الله

مع الأسف الأسعار في ازدياد مستمر
بالنسبة لمقاس 16 اللي يركب على الـ GXR
2005 كان سعره في حدود الـ 300 ريال
2007 في حدود 400 ريال
2009 ارتفع وصل 500 ريال وانخفض واشتريته بـ 430 ريال
2011 وصل ارقام فلكية
ركبت طقم قبل أقل من اسبوع بـ 550 للحبه

السومر

11/05/2011, 08:07 PM

خط + بر + جبال

ما فيه مثل الـ

http://t1.gstatic.com/images?q=tbn:ANd9GcRFUcQCUhzXgdEiOt0YtEyBbhdHOWqxO 7g7R8sN4hdKYTzcgK2A

هذا الكلام عن تجربة 9 سنوات مع الدنلوب في اللاندكروزر
وكل طقم أركبه يجلس معي لا يقل عن سنتين وانزله وهو باقي فيه نص عمر لكن السلامه أولاً
فيه طقم مشيت عليه اكثر من 130 الف كيلومتر واستمر معي سنتين و4 شهور
وغيرته وهو ما شاء الله تبارك الله ما قد بنشر معي ولا انصلخ

احرص عزيزي على دنلوب وارد بن زقر الأصلي ويكون تاريخه جديد

هذا بعد التوكل على الله

مع الأسف الأسعار في ازدياد مستمر
بالنسبة لمقاس 16 اللي يركب على الـ GXR
2005 كان سعره في حدود الـ 300 ريال
2007 في حدود 400 ريال
2009 ارتفع وصل 500 ريال وانخفض واشتريته بـ 430 ريال
2011 وصل ارقام فلكية

ركبت طقم قبل أقل من اسبوع بـ 550 للحبه

كفيت و وفيت الله يعطيك العافيه

السومر

11/05/2011, 08:09 PM

ياخوي

لاتعدى البالون (ماكسس) 900

ليونه ولا تدري عن البطناج

البالون في البر انا معك

شعيب المليح

14/05/2011, 09:19 AM

نصيحه ابعد عن الدونلوب انا معي جيب فكسار ركبت له كفرات قبل رمضان الماضي باسبوعين وتاريخ الكفرات 2010 ومن ابن زقر اللي في شارع الضباب والحين احنا في شهر 6 والله العظيم ان 2 من الكفرات مغيرها مركب القديمه وكل يوم مار بنشر السياره رسبت في الفحص بسب رقع التيوبلس واحد من الكفرات فيه 3

YUKON_GMC

14/05/2011, 09:30 AM

... الزين معناته يكد ويمد = واللي يكد ويمد يعني مطناج قوي = والمطناج قوي ويكد ومد دنلوب الوكاله الياباني ولاتدور غيره
... والشين معناته مايكمل سنه = واللي مايكمل سنه يبنشر من الشوك وأول حفره بالزلفت ينفجر هذاك البالون والكوري والصيني والتايواني وانحش عنه

طحنون

14/05/2011, 09:53 AM

الأخ / الراعي

اعتقد ان الاخوة الكرام كـفّـوا او وفّـوا لكن من خلال تجربتي ونصيحتي لك استعمل كفرات ( مشلن ) ولن تندم ، انا معي Vxr مديل 98 ولم استعمل سوى كفرات مشلن ومرتاح جداً معهن .

مع تحيات اخوك / مدلّه الرعيان

المشلان ممتاز لاكن ووسوسبي لانه لين زياده عن اللزوم وكل لحظه احسب اني مبنشر والسبه انه لين واجد ومن الجوانب ماينشدبه الظهر اي شوكه ينشق
هاذي مشكلته لاكن في الاداء في القياده على الزفلت رقم 1 بدون منافس يعطيك تحكم وتماسك كأنك راكب سياره المانيه

السومر

14/05/2011, 11:27 AM

يا اخوان يعني الحين كفرات الدنلوب قاسيه

انا هذا اللي وسوس فيني كل يوم في الصناعيه الشيك على الجلد واغير مساعدات

بسبت رجفة السياره بالكامل لا دعست عيون القطط او المطانيج النحيفه اللي تجي ورى بعض

دايم تلقاه قبل نقاط التفتيش او التحويلات

اجل بغير ميشيلان وريح راسي من دوخة القربعه

mr.قهد

14/05/2011, 02:53 PM

دانلوب ولا تشـــاور راحه وخفه ولين على الموتر

السومر

15/05/2011, 12:31 AM

على حسب ما استنتجت من الاراء وجمعها في رد واحد

ألا وهو /

اللي يتردد على البر بشكل مستمر يركب دنلوب صح مطناجها قوي لكن تتحمل في الارض الجلد والرجله والنفد
والله يعينك على الزفلت

اللي اكثر استخدامه في المدينه والطرق يركب ميشلان لتصويت الاعضاء لها وثنائهم عليها ولان مطناجها ناعم
واذا نزلت للبر اعرف وين تضع رجلك على ما يقولون ..واهم شي تكسب راحت راسك من القربعه وتحافظ على
سيارتك من القساوه

ملاحظه:

يجب ان نترك نظرية مع الخيل يا شقراء يعني علشان الناس يركبون دنلوب للجيوب لازم نركب دنلوب
وأدلاء الرأي يجب ان يكون عن طريق تجربه لتعم الفائده
ولا انسى بأن وسوسة الاهتمام بالسياره تفرق من شخص الى أخر .

وان شاء الله اني افدتكم

الباثفايندر3

10/05/2013, 08:37 AM

للرفع يااخوان كيف اعرف هذا وارد بن شيهون وهذا وارد بن زقر

hamo0o0ody

10/05/2013, 02:08 PM

الدنلوب ولا تدور غيرها للاندكروزر

الباثفايندر3

10/05/2013, 09:46 PM

لاكن يا اخوان كيف اعرف هل هذه الكفره وارد بن شيهون او بن زقر حتى لايلعبون علينا بعض العمال

رقم صفر

11/05/2013, 06:28 AM

أصحاب الجيوب آخذين صورة حسنة عن كفرات دنلوب.. والسبب عبارة

شد بلد !!

وهذي أكبر عملية تسويق لكفرات دنلوب ،

و80% من أصحاب الجيوب ما جرب غيرها ..

فطبيعي أنهم يمدحونها مدح أعمى !!

جرب ميشلان وسترى الفرق الشاسع .. ولا يردك فارق السعر ..

الكفرات تعيش معك سنتين على أقل تقدير فلا تبخل - من أجل راحتك وراحة سيارتك وسلامتك - بفارق 100 ريال في كل كفر ..

شقردي

11/05/2013, 11:50 AM

سيارتي لاند كروزر

وندمت جدا أني غيرت لمشيلان

قاسية جدا ولا ينفع لا في رمل ولا في بطناج
سيئة جدا جدا

وفي الأخير انسلخ واحد منهم وأنا امشي 120
رحت وكالة مشلان في طريق خريص

تعامل سيء جدا ورفضو تعويضي

ورجعت لدنلوب بصراحة كد ومد

خل عنك مجرب ومعروف ورائع ومطب لين

الباثفايندر3

11/05/2013, 01:09 PM

بيض الله وجيهكم جميعا
الاخ شقردي الله لايهينك ابمسك نصيحتك انا مجرب دنلوب لاكن قلت ابغير ميشلان لاكن الحمد لله اني ماركبته

P O W E R

11/05/2013, 01:57 PM

انا مركب برجستون قاسيات شوي لكن زينات بالخط وبالنفود حليلات والتراكشن والحرارة كلها a وركبت عقبها دنلوب مشكلته قاسي واذا وطيت عيون تقطط او حفره ترج السياره او تزحف لان التراكش والحراره فيها b وهذا عيبها لكن زينه للبر والشعبان والخط جامعه كل شي

شنطة عده

11/05/2013, 03:11 PM

كفرات دنلوب صار لي موقف بعدها اقتنعت بها وانا كنت ناوي ابدلها بنوع ثاني

كنت ابزور واحد منوم في مستشفى الشميسي وكنت متاخر
والبوابه الرئيسية مغلقة
ورحت للبوابة الشمالية وكنت اعتقد انها دخول وهي خروج فقط
ومحطوط عليها المسامير الحاده المثبتة بقاعدة حديدية
الي تمنع الدخول وتسمح بالخروج
انا من العجلة لفيت بسرعة ودعستها بالكفرات الاربع وتوقعت ان الكفرات بتضرب كلها
والحمد لله ما صار فيها اي شي ....... صحيح قاسية ومطبها يعور في الراس
ولكن تعجبك في المواقف الحرجة

al-jree7

11/05/2013, 07:54 PM

أنا أعتقد ان أفضل كفرات هي التي تأتي مركبة من بلاده

وهي الدنلوب استخدمها واحد من الشباب لمدة سنتين ونصف ومشى عليها 120000 كلم ولم يحصل لها إي شء ولم تبنشر ولا حتى مرة واحدة

:good: +1 :good:

الباثفايندر3

12/05/2013, 11:29 AM

ركبت اليوم كفرات دنلوب وعلى الله توكلت

أطلال نجد

12/05/2013, 01:11 PM

كفرات سيارتي دنلوب الياباني شد بلد قطعت عليها حتى الآن ٥٠ ألف كيلو و هي لا تزال شبه جديدة ولم تبنشر ولله الحمد

لكن المطب و عيون القطط في الرأس

joblak

12/05/2013, 03:44 PM

يا الربع انتوا من جدكم وينكم عن اليوكوهاما ؟؟؟؟؟؟؟

الدنلوب قاسي وانواع الصريخ والاصوات المزعجه على اللفات واذا طول معك التاير صار دائره يفرش على الارض

اليوكوهاما للجيب الاندكروزر لا يعلى عليه ان بغيت مطب وان بغيت قار وخطوط وان بغيت بر نسم هواه واستمتع باحلى مطامير هههههههههه

باث 3

20/05/2013, 09:50 AM