تجهيز الاكستيرا !!

[زيد الدوسري]

السلام عليكم

صباح / مساء الخير

أول شيء تحياتي لرواد هذا المنتدى العملاق من أعضاء ومشرفين وزوار

ثاني شيء أبشركم توني شاري سيارة اكستيرا 2006 ولله الحمد نضيف

وودي أستفسر وش أزين فيها من مساعدات وكفرات وإن كان فيه شيء عندكم علموني لأني أول مرة أشتري جيب ولا أعرف شيء

ننتظر تعليماتكم يا أهل الخبرة ونصائحكم التي تعودنا عليها

محبكم / زيد الدوسري

[N أبورغد N]

وعليكم السلام
الف مبروك الله يعطيك خيره ويكفيك شره
عزا الله انك ملك موتر مايردك ان شاء الله وين ما بغيت
بالنسبه للمساعدات
ركب مساعدات اوف رود بلستن صناعة المانية اذا ماهي عليه في الاصل
والافضل الغاز طبعا
بتفرق معاك بالراحه بشكل ماتتخيله خصوصا في البطناج
هذا اهم شي الان طبعا غير طفاية الحريق ومنفاخ الهوى ورقع تيوبلس
اما باقي الاشياء يبيلك تعرف احتياجك ومنها تجهز او وضح غرضك من الجيب
كشات او عساس او

[زيد الدوسري]

أول شيء الله يبارك فيك
ثاني شيء معليش مافهمت وش فيها طفاية الحريق ومنفاخ الهواء ورقع تيوبلس
أما المساعدات فشكراً علي المعلومه
وأخيرا روحتي البر يعني بين كل فترة وفترة
وسلامتكم

[.أبوعبدالرحمن]

أخي الكريم زيد الدوسري


تم تعديل العنوان لأنه لا يدل على الموضوع



وإن شاء الله الشباب ما يقصرون معك

[N أبورغد N]

تعتبر من اساسيات اي واحد يطلع بر وزد عليها شنطة اسعافات اوليه
حتى لو لم تقتنع والله يكفينا الشر

وبالنسبه لاحتياجك وانت راعي طلعات متقطه ماتحتاج شي زود
اهم شيء انتبه لزيوت الموتر الدفرنسات والدبل والقير
واذا انت راعي تطعيس ضمن الرديتر عند ورشة الثنيان بـ 50 ريال على ما اظن
وسلامتك

[زيد الدوسري]

أشكرك أخوي على تعديل العنوان

وأبو رغد تراك اقنعتني بعدين ورشة الثنيان وينها فيه

وطيب وش أفضل كفراات للسيارة يعني ينفع طعوس وشعبان
وشكراً لكم

[N أبورغد N]

انا مركب دنلوب عيبها جوانبها يشقها الشوك بسهوله
ولها صوت على المسفلت
اما في الطعوس خذ ولد يقراء

وغيره ماجربت ولا سالت صراحه لكن بحاول اجيبلك المعلومه من القروب

اما ورشة الثنيان تحصلها في الرياض صناعية الدايري مخرج 18 ولو تسوي بحث صغير في قوقل تكتب ورسة الثنيان باثفندر بيطلع لك رقم راعي الورشة ان بغيت

[زيد الدوسري]

يالبى قلبك يا أبو رغد تعبتك معاي
وننتظر تعلمنا الكفر الزين

[سعد ال شريف]

الف مبروك الله يعطيك خيره ويكفيك شره

[نفداوي]

الله يعطيك خيره ويكفيك شره
لاتعجل كل طلعه بتعرف وش تحتاج في الطلعه الجايه
( ماطور هوا - سلك اشتراك - واير سحب -كشاف 000)

[زيد الدوسري]

طيب فيه سؤال بسيط للي معه اكستيرا موديل ٢٠٠٦ - ٢٠٠٧
هل الاديتر يحتاج تغيير لأن فيه واحد يقولي لازم تتغيرة او تدبله عشان الحرارة عندنا زيادة عن أمريكا
والبواجي وأسلاك البواجي كذلك عل تحتاج تغيير

أنتظر ردكم المفيد والشافي

[نفداوي]

رايي لاتغير شي حتى تشوف انك محتاج تغير فعلاً

[زيد الدوسري]

مشكور يا نفدااااوي
طيب الاديتر يقولون ان الامريكي مصمم علي انه في امريكا واذا جاء السعودية لازم تزين اديتره
ننتظر قولكم المبارك

[هدد 1]

الله يعطيك خيره ويكفيك شره

[زيد الدوسري]

الله يجزاك بالخير يا هدد 1

[N أبورغد N]

بالنسبه للنصائح المجربه للكفرت على الاكستيرا
1- البرجستن الفرنسي
2- مستر كرفت وفيها صوت شوي
3- الدنلوب وانا سردت لك تجربتي معه
4- يوكهاما

الاغلب يستخدمون الدنلوب لان اغلبهم حقين نفود
مستر كرفت ممتازه يعيبها الصوت والا تخدم سنتين وفيها على كلام المجربين

بالنسبه للرديتر نفسه مافيه فرق
انا بحثت واستفسرت لقيت حل لكن والله عزج مني المفروض طبقته لاني شريت القطع
الا وهو تماتيك المروحه وبلف المويه ممكن هذا الفرق انصحك تنتظرني اجرب قبل

واذا عندك ايفون او قالكسي تحصل روم على البرنقو اسمه اكستيرا
بتحصل الاغلب بين الاعضاء معهم اكستيرا والي مامعه يدور او كان معه

[رسيس نجد]

مبروك ما شريت

[زيد الدوسري]

الله يبارك فيك يا رسيس نجد
أبو رغد أنتظرك تجرب أما من ناحيت الكفراات الحين الي فيها جديدة بجربها ان صلحت ولا ركبت يوكوهاما
وأما البلارنقوا فشكراً على المعلومه الجديدة

[اسبيدر مان]

ماشاء الله الف مبروك الموتر
اما بنسبه للكفرات انا جربت الهانكوك لمدة سنتين وغيرتهن وهن بهن نص عمر تقريبا ويخدمن بر وزفلت طبعا اخذتهن من الوكاله على طريق خريص

[زيد الدوسري]

الله يبارك فيك يا سبيدر مان
وشرفني مرورك ورأيك تحياتي لك
طيب هل الهانكوك تصلح في الشعبان

وفيه سؤال آخر هل فيه جنوط هلل تركب على الاكستيرا ؟؟ وإذا فيه عطوني رايكم فيها ؟؟

[اسبيدر مان]

الله يبارك فيك يا سبيدر مان
وشرفني مرورك ورأيك تحياتي لك
طيب هل الهانكوك تصلح في الشعبان

وفيه سؤال آخر هل فيه جنوط هلل تركب على الاكستيرا ؟؟ وإذا فيه عطوني رايكم فيها ؟؟

لي الشرف بعد انا
الحقيقه جربتهن في كل مكان وزينات لكن اذا طلعاتك كلها شعبان احرص على الكفر مايكون عريض لان الكفرات العريضه على طول تنشق مع الشغايا والحجري
وتراه فيه جنوط هلل للاكستيرا
رح للوكاله وقلهم ابي جنط الاستبنه للاكستيرا لانه يجي حديد اسود وسعرهن بهتسع ميه وحوله اصلي يبقى عليك رشهن فضي وياسلام سلم
وفي اجتماعنا الاخير في ام حزم كان معنا واحد مركبهن لونه ابيض

[زيد الدوسري]

أنا خاق مع الهلل شكلي بطقهن على طول

[N أبورغد N]

بالنسبه للحرارة البارح انا عند ورشة الثنيان يقول نفس الحرارة حقت السعودي لكن العداد قرأته تختلف
يقول مستعد اثبت لك هالشي بالكمبيوتر
لكن داهمنا الوقت وواعدته السبت ان شاء الله

[زيد الدوسري]

حلو يا أبو رغد ننتظرك تعلمنا النتايج

[abo]

عندي لك عدة اقتراحات بس لاتطيعني :D

ابيك تعرف بالاول انك تمتلك موتر جبار يحمل محرك قوي

فا ياليت تركب هدرز + فلتر + بواجي رياضية مع الاسلاك

ومش حتئدر تمسك الموتر من القوة :good2:

يعطيك من خيره ويكفيك شره

[زيد الدوسري]

يالغالي السيارة طيارة ما شاء الله ما يحتاج هدرز ولا أسلاك بواجي أما فلتر ممكن تحياتي لك

[الليث الذهبي]

عزيزي انصحك تبعد عن فكرت الهلل على الاكس ما تركب ابد واحد من الربع توه مركبها ومتحسف
طالع الموتر من ورا تقل مصريه طالعه فخوذه والكفرات داخله يعني قامط عليهن والكفرات الي عليه ابو لبنه
احسن الجنوط في نظري حقات الفل كامل 2008 مكحله تلقاهن عند لزوف فالغرابي صينيات على 1700 تقريبن الي مقاسهن 16
اما الكفرات لا تدور غير الهانكوك والدنلب وابعد عن العريظ ما ينفع ابد خذ زي مقاس البلد
واذا تبي تستفسر عن شي ادخل منتدى الملاك في مكشات مب مقصرين معك ان شاء الله
الله يبارك لك فالموتر ويطعمك من خيره ويكفيك شره

[الهمرH2]

أخوي صاحب الموضوع :
أنا معاي إكستيرا 2008 نصف فل
قير تماتيك و قزاز كهرب و سله فوق
التنده و لاكن ما فيها مثبت سرعه

النصيحه لك و لغيرك خل الموتر زي ما هو
لا تغير فيه شي أنا سألت قبلك خبراء سيارات
كبار في السن و زودوني بمعلومات قيمه

1 ـــ بالنسبه للحراره فهذا كله كلام فاضي
لأن فيه إستيكر عند باب السواق مكتوب فيه
((تم صنع هذه السياره بأمركا الشماليه و مطابقه
للمواصفات الخليجيه في الشرق الأوسط ))
يعني لا تخاف مطابقه للجو حق السعودية
راح تتحمل الحراره القويه ...
2 ــــ بالنسبه إذا غيرت أي شي في الكهرباء
أو أضفت شي على السياره تأكد أنه راح يخرب
عليك أشياء ما توقعتها ...
3 ــــ أنصحك تركب دعامه قويه لأن صدامها الأمامي
مصنوع من إبلاستيك على الجوانب ,,
و من الأمام صاج خفيف و شبك ,,
علشان تحمي المقدمة فقط لأنها
غالي سعرها ولا توجد بسهوله ...
4 ــــ أنصحك تلبس أرضية السياره من الداخل
بالبلاستيك الشفاف علشان تحمي الأرضيه من البلل
بالماء أو عصير أو شاي أو إستفراغ أو أي شي ...

[غالي يا غالي]

مرحباااااااااااااااااااااااااااااااااااااااااااااا اااااااااااااا
عزالله شريت موووووووووتر خياااااااال
معي له سنتين 2008 سياحي قير اتوماتيك
ماشالله تبارك الله


بالنسبة للكفرات
احلا شي جربتة كفرات ((((((فايرستون )))))) ياباني اصلي ارتفاع 70 ضغطة 10 كاندس
ممتاز جداااااااااا
بالحررررررررررررررره بالشعبان بالساحل
بالنفوووووووووووود حطهن 15 وامش

وسعره ب 600 ريال بشهر رمضان اللي فات يمكن نزل يمكن ارتفع

بالنسبة لاغراض البررررررررررررر
1- ماطور هواء
2- اشتراك
3- رقع كفرات
4- تانكي ماء داخلي 90 لتر ب 250 ريال فيبر داخلي
5- واير سحب قمااااااااااااااااااااااااااااااااااااااااش



بالنسبة للجنوط الهلل لا تشري من الوكالة رح للتشليح ودور جنوط نيفارا سياحية تجي هلل 16

على كيييييييييف كيفك

لاتركب هدرررررررز ولا تبرمج شي بالسيارة الكهرب خله على وكالته

[زيد الدوسري]

الكفر الي على الموتر ( فايرستون ) توه جديداما الجنوط اذا بركب هلل اكيد بركب مقاس ١٦ والي عنده صورة للسيارة وهي بالهلل يوريناها
بعدين جتني مشكله يوم جيت افك السله نشبت معي الحنايا الي يمين ويسار كل وحده فيها ثلاث مسامير وترطت الحين فالي يعرف ورشة في الرياض بيفكونها لي يقولي

[الديسي 1984]

اخوي السله سهل فكها رح لبزر في صناعية الحراج يفكها

بس المشكله مساميره العربجيه حقة التنده

ابي مسامير مسح وين احصلها

[إ المطرودي]

ابركب على الهلل حق الاستبنة كفرات دنلوب حجريات مقاس 235/85 وشرايكم فيهن وهل ينعدم توازن الموتر
وايش حل فرق السرعة بالطبلون عن الممشى االحقيقي اقل بعشرة

[حر اليدين]

من باب اولى شيك على الميكانيكا و الكهرباء والكفرات وفيه اشياء ضرورية مثل ماطور هواء وواير سحب وشنطة اسعافات وطفاية ومثلث سلامة والعزبة حسب احتياجك واتوقع الطبق الخلفي في الشنطة بينظم اغراضك ويخليك تستفيد من مسحة الشنطة ومن ناحية اضافات الميكانيكا والكهرباء للسيارة ما يحتاج لان السيارة قوية و خفيفة والله يدلك على اللي فيه خير تقبل تحيتي