التصريح المؤقت يا جماعه الخير

[عيسى الدوسري]

السلام عليكم ورحمه الله وبركاته
والله يا شباب انا الصراحه طفشت من هالمرور كل مالهم يشوفوني على طوول مخالفه عدم حمل الرخصه ففكرت ارتاح منهم واطلع لي تصريح قياده فياريت تساعدوني انا من مواليد 1416/2/1 لكن بالميلادي 1995/6/29 الحمدلله بالهجري اعتبر اني داخل في ال17 هالاسبوع لكن بالميلادي باقي لي 6 شهور تقريبا وبالاثبات التاريخ مكتوب بالهجري المهم انا اخاف اروح الدله ويحسبون العمر بالميلادي او يحولون التاريخ من هجري لميلادي فياريت من اهل الخبره يجابوني هل بيحسبون بالميلادي او الهجري ؟
وشويه من الشباب يقولون لي لازم تتم ال17 عشان التصريح فأنا ما فهمت كيف يعني أتم ال17 يعني انتظر سنه كامله ع بال ما اطلع التصريح وانا توي داخل بال17 هل اقدر اطلع تصريح الحين ولا لا ؟!


وآسف ع الاطاله ..

[عبد الله 99]

لا يالغالي ابد تقدر تطلع
انا قبل حول الشهرين مطلع لأخوي
على ما اضن انك تحتاج اربع صور 4×6 و ملف اخضر علاقي و تعبية الأستماره حقتهم تلقاه عند البوابه يعبيها و يحطها في ملف اخضر و يدبس الصور مع صوره لبطاقة الاحوال
بعدين تدخل و تعطيهم الملف و دفع رسوم دراسه 535 و يعطونك ايصال الكلام ذا الصبح
و تداوم من صلاة العصر إلى العشاء من السبت إلى الثلاثاء يدرسونك و خرابيط السواقه و اللوحات إلى الثلاثاء و بيختم على الورقه الي معك بعد اربع ايام و تجي الاربعاء الصبح و تختبر في نفس مركز التدريب و نفس المركز الي عطيته الملف
و يختبرك اول شي على الميدان بعدين تلبيق بعدين كمبيوتر اسألة عن اللوحات بعدين تطلع للصاله و تسلم الملف من جهه و تشوف احد الرجال الي يوقفون عند الباب و يدفعون عنك الرسوم عن طريق الجوال الرسوم 100 بس ياخذون 120 او انك تاخذ رقم الحساب و تسدد و تروح لشباك و تعطيه الملف و يلطعونك يجي ساعه و يصوتون لك و تاخذ البطاقه و سلام عليك
و لا تاخذ قيود و خرابيط الي تماتيك ولا نظاره ولا هالخرابيط و لا تجيب له طاري عنها
و الشي الاخير نصيحه من اخو إلى اخو
لا تطلعها من الرياض و تتحسف والله انها شقى
واحد من الجماعه مطلع لولده من حريملا او سدير والله مدري بس يقول في يومين و التصريح في يده
و الله يوفقك دنياء و اخره

[عيسى الدوسري]

لا يالغالي ابد تقدر تطلع
انا قبل حول الشهرين مطلع لأخوي
على ما اضن انك تحتاج اربع صور 4×6 و ملف اخضر علاقي و تعبية الأستماره حقتهم تلقاه عند البوابه يعبيها و يحطها في ملف اخضر و يدبس الصور مع صوره لبطاقة الاحوال
بعدين تدخل و تعطيهم الملف و دفع رسوم دراسه 535 و يعطونك ايصال الكلام ذا الصبح
و تداوم من صلاة العصر إلى العشاء من السبت إلى الثلاثاء يدرسونك و خرابيط السواقه و اللوحات إلى الثلاثاء و بيختم على الورقه الي معك بعد اربع ايام و تجي الاربعاء الصبح و تختبر في نفس مركز التدريب و نفس المركز الي عطيته الملف
و يختبرك اول شي على الميدان بعدين تلبيق بعدين كمبيوتر اسألة عن اللوحات بعدين تطلع للصاله و تسلم الملف من جهه و تشوف احد الرجال الي يوقفون عند الباب و يدفعون عنك الرسوم عن طريق الجوال الرسوم 100 بس ياخذون 120 او انك تاخذ رقم الحساب و تسدد و تروح لشباك و تعطيه الملف و يلطعونك يجي ساعه و يصوتون لك و تاخذ البطاقه و سلام عليك
و لا تاخذ قيود و خرابيط الي تماتيك ولا نظاره ولا هالخرابيط و لا تجيب له طاري عنها
و الشي الاخير نصيحه من اخو إلى اخو
لا تطلعها من الرياض و تتحسف والله انها شقى
واحد من الجماعه مطلع لولده من حريملا او سدير والله مدري بس يقول في يومين و التصريح في يده
و الله يوفقك دنياء و اخره



منوور موضوعي عبدالله 99
لكن اللي اقصده اني بالهجري بدخل ال17 بكره والمشكله بالميلادي باقي لي 6 شهور وادخل ال17 يعني لسه انا 16 بالميلادي و17 بالهجري <<لحست مخ
اخاف اروح لهم ويحولون التاريخ من الهجري الى الميلادي واتورط
ياريت تكون فاهمني
اما بالسواقه فأنا محترف لا توصي خخخخ<<اطلع برا
اخوك الله يحفظه لكم مواليد كم بالهجري والميلادي
ومنور موضوعي مره اخرى;)

[عيسى الدوسري]

172 و رد واحد :(

[الباحث_6610]

مثل ما قال أخوي عبدالله 99
لاتروح للرياض رح لحريملا وإلا سدير
وان شاء الله أمورك تمام

[aaeenn]

العمر يحسب بالهجري وانت كملت السبعطططعععشششش مبروك رح يوم الثلاثاء الجاي وقلهم انك من طرفي ولا تشيل هم

[التعـ King ـديل]

الدوائر الحكوميه عندنا تعتمد التاريخ الهجري مالهم علاقه بالميلادي ابد

بس زي ماقالو الاخوان شف لك برا الرياض

[الجني العبد]

يعتمدون على الهجري ، أنا طلعت التصريح بنفس اليوم اللي ولدت به بالهجري

[عيسى الدوسري]

بيض الله وجوهكم واحد واحد قسم بالله انكم رجال عن ظهر رجال

[.أبوعبدالرحمن]

تم تعديل العنوان لمخالفته قوانين القسم

[ابوسلمان 33]

يبيلك تاخذ جدتك معك كل مارحت
واذا شافك رجل المرور يمشيك
تراء جدتك احسن من التصريح
يعتبرونه رخصه قياده عمومي
ههههههههههههه
الله يعينك ياابني على هالدنيا
بكرا تكبر وتشوف