طريقة حلوة عند التغريز للجيوب التوماتيك

[Trail Blazer]

السلام عليكم .

كيف حالكم جميعا :)


في الحقيقة هي فكرة طرت على بالي ولا جربتها في التغريز

لكن أتوقع انها بتفيد ..

قريت مرة موضوع لأحد الأخوة ... ( نسيت اسمة ) المعذرة .

وكانت فيه فكرة لتطليع الموتر اللي قيره عادي من التغريز الأقشر

وكانت الفكرة تتلخص في انك تطفي الموتر ( بعد ماتحطه على الأول ) تم تشغله من دون ماتضغط على الكلتش يعني بينتع الموتر ..


تراود الى كثير من الأعضاء تساؤل عن التماتيك ... وش يسوى به .


انا لقيت فكرة وأتمنى انها تعجبكم ولا أدري ان كان أحد سبقني بها ؟؟


الفكرة كالتالي :


أولا وأخيرا : حط القير على N تمن ادعس بنزين لين يرتفع عداد الضغط شوي إلى ( 2.5 - 3 )

ثمن حطه على طول على D بينتع الموتر .. ( لازم يكون عداد الضغط مرتفع عن الحالة الطبيعية ) أنا جربتها على موتري لكن ماكنت مغرز كنت على القار :p .

لكن اتوقع انها مضرة شوي للموتر .. والله يسلمكم في كل وقت

حبينا نشارككم و بانتظار تعليقاتكم أحبائي :) ...

[مفتاح التقنية]

السلام عليكم...
كلام سليم .......... وفكرة رائعة
لكن الكل يعرف أو الأغلب أن القير الأوتوماتيك حساس لمثل هذه الحركات المفاجئة

ولا يمنع فعلها لكن لاتكثر منها حتى لا يتأهر القير

[الضرغام]

مشكور على هذه الفكرة
وأنا مع ماقال الأخ / مفتاح التقنية
حول أن القير التوماتك حساس ومثل هذه الطريقة
قد تؤثر عليه أذا ما تسبب في خرابه بالكامل
مشكور أخوي وعساك على القوة

[شبح الصحراء]

طريقة خطيرة يمكن تتلف الجير على ما اظن .

[نمر بن حثلين]

بارك الله فيك
لكن اعتقد انها تدمر القير

اذا غرزت مالك الا تنسم الكفرات وتبرح وتحط الدبل في الثقيل وتوكل على الله

[بو خليفه]

لا يمكن أن تظهر السيارة إلا ظهرت فيكون الذي خرج السيارة و من التغريز (زوروا رمز العدالة ) أو (استيف)
يجب عليك تخف الهواء حتى لو يكون صفر و تحاول زحف الرمل عن السيارة واستخدم الجير على الو

[طلحة]

طريقة خاطئة فبدلاً من أن تكون سيارتك مغرزة فقط ستكون سيارتك مغرزة ومكسور قيرها.

[aziz2727]

والله فكره
بس اتوقع ان القير في هذه الحاله قد ينكسر
وبدال ما تطلع السيارة بشوف احد يوصلك اقر مكان

[هاوي الله]

ياااااااااااااااااااااااااااااسلام عشان تجيييييب العييييييييييييييييييييد مشالله على التفكير ؟؟؟

[غيّام]

اتمنى ان الفكره تنفع اكثر مما تضر

اشكرك على المجهود

[منيصف]

الفكرة جيدة في العا دي وفي الا تما تيك التنسيم ثم التنسيم وشكرا
على الفكرة

[منيصف]

الفكرة جيدة في العا دي وفي الا تما تيك التنسيم ثم التنسيم وشكرا
على الفكرة

[salehhd]

السلام عليكم
مشكور على الفكرة لاكن مع الاسف فكرة ما زينه وممكن تعدم القير

[ابن هدبة]

ياجماعه الهدوء الهدوء

اولا تحط السيارة اذا مغرزه L1 او L2 وتنسم التواير على 20 وتسحب سايد البريك الى اخر شى

وتدعس بنزين لين تحس ان السياره تبى تفز من قوة الدفع ثم تهد البريك راح تنقز السياره من مكانها

[*(عاشق ربع)*]

السلام عليكم جميعا ....................
أخي العزيز فكرتك جيدة ولاكن أن الموتر يبي يحفر ويغرز أزيادة جرب وشف

[غضنفر]

ما اظن بتنفع
لأن الموتر بيقوم يحفر زيادة وبيغرز اكثر
ازين شي دورلك راعي شاص يتلك لم بيتكم
ولا عاد تشري جيب تماتيك

[خيال نجد]

الطريقه الاولى ممتازه للقير العادي

بس الثانيه للقير التوماتيك زي موتري

تخيلت الموقف......؟؟؟؟؟

بالبر بلحالي مغرز ومتوهق ...... لا وأجرب طريقتك بعد ..... كملت مغرز ومتكسره تروووس القير

فكر بغيرها أشوف أحسن

تحياتي وإلي الأمام.... وحسن خطك ..... ونجمه

[hani458]

فكره جيد سوف يكافئك عليها الوكالات والورش يالنسبه

امزح طريقه خطيره جدا ستؤدي الى كسر تروس القير

[الماحي]

السلام عليكم ورحمة الله \هى فكره ممكن يروح فيها الكير و صليب عمود الكردان ادا كان ضعيف

[ياهولي]

الله يرحم مزنه



ياهي طريقه عبقري

[إبن فيصل]

خطيرة جداً على القير التوماتيك وبتأثر عليه أحسن شي نسم الكفرات وإستخدم الدبل إن وجد

[ريف النشاما]

:d

أكيد إن عندك ورشه ..........تراني أمزح


من واقع تجربه ..........قير تماتيك مع خالي وليس معي ............شفته يوم غرز ......وشاف ولده

يقرر على الموتر .......نزله .....وطفا الموتر .......

....برح له .....ساوى الأرضيه ورصها بالحجر الصغير .........وبكل هدوء دق سلفه ومشى بسلام

== فالحل هو .....تخفف الهواء حتى عشرين ولا خمس طعش ولا عشره .....حسب القوة والعشره أحسن ......

== تبريح اللي تحت الكفرات .........فرش شجر صغير تحت طرف الكفر ومده لمسافة متر أو أكثر

خلف الكفر وأمامه .........ثم التحريك بهدوء حتى يبدا بالحركة والصعود على هذه الشجيرات

ثم زيادة الدعسة ولكن بحذر وإذا مشى عطه عطه ثم أدعس ولا توقفه إلا في مأمن :d


= القير العادي ........هذا حل الغراز ودواه سو اللي تبي ولكن فعل ماسبق ذكره مع هز الموتر بنمره لين يدعس على الشجيرات ثم رجعه أو قدمه لحد الوقفه ثم قدمه أو رجعه لين يمشي ثم عطه عطه
بحذر شف تراه بيمشي عطه القاز لين توقفه في مأمن


==== الطين ........أحسن شي جربته .......(الرمث) شي خيال .....وماشابه الرمث ينفع

مثل الحرمل وغيره .....أحسن من أي شي ثاني ولا تتعب نفسك .......

العميلة دفنه تحت الكفر ثم التبريح ونشره على طريق الكفر لمسافة مترين دكه دكه على مواطي الكفر وشف كيف يمشي عليه .....ماكن تحتك طين

[kh22net]

قم بعملية هز السيارة بترقيصها للأمام او الخلف حتى تنط من مكانها واذا نطت حط رجلك وانتبه للطريق

[ابوفهد1234]

التنسيم والتبريح قدام الكفرات 0 وطريقتك تكسر القير اكيد

[راعي ال 8100]

طريقتك غلط يالغالي كذا تجيب خبر القير وقد سواها واحد من العيال مع بليرز زيك وجاوب القير عليه و 4500 ريال في الوكاله اذاغرزت ربك معطيك دبل ليش ماتستخدمه ؟؟

[الطعس الذهبي]

هذي الطريق للي يغرزون اما الطارات الله يخلين واياكم منهم مايغرزون



وازين خل انك تصير طارة او لاتدخل الغراز او البر كله

[غالي]

والله يااخوان لنا فوق 50 سنه وحنا نقول وش حل التغاريز وما التغاريز ونلف وندور في دائره
يااخوان والله غير التنسيم قبل لاتدخل الرمل هو الحل ومافيه حل غيره
حطه من 10 لين 15 طبعا للجيوب
بالله عليكم بيغرز؟؟؟
مع احترامي لكم ماظنتي بالرمل بيغرز الا بيسبح اين كانت السياره
حطوا قاعده :
الرمل لازم تنسم
والطريق لازم تتفخ
دام الكفر يدور وانت مغرز اعرف ان العيب في الكفرات الا ان نسمت بتطلع لان الكفر يفرش على الرمل ويلزق فيه ويرقى فوقه
التنــــــــــــــــــــــــــــــــــــــــسيم وبس
وغيره مافيه :)

[sahil]

افضل طريقه اذاكان الموتر بدون دبل هي فصل سلك من اسلاك البواجي وتنزل الهواء الي 18 هذي طريقه مجربه وامنه علي السياره والهدف من فصل سلك البوجي رقم 4 هو التقليل من دوران الكفرات على الفاضي وانت مرتاح تمشي في اي مكان وتوقف في اي مكان والبر وده سياسه وصبر

[بن محارب]

السلام عليكم

شكلك صاحب ورشة لتصليح القير ألأوتوماتيك:d

.................................................. ..............................

تويوتا قير عادي وفك راسك من الدوشة ...

تحاياي

[الدبوس]

سلام عليكم . .
على مسئوليتي أن القير (((بينكسر))) من ثلاث محاولات لأن تروسه من برادة الألمنيوم .

[طشي وامطري]

اتوقع كل الحالتين فاشلة لا العادي ولا التمتيك.
لأن الموتر إذا غرس وغاصت الكفرات بالرمل ما ينفع به التنع

[الدحمي 225]

السلام عليكم ورحمة الله وبركاته

انا اقول نسم كفراتك قبل ما تدخل وريح عمرك ...
واذا كان اللي معك موتر تماتيك ودفرنسين ومغرز عطه الثقيل و سايس الموتر عشان ما يحفر


.................................

[عـبـود 911]

وفيه طريقه ثانية مجربها على هدد 2000 وعلى جي اكس ار 2006 وكلهم تماتيك


إلى غرزت سلمك الله ودخل نص الكفرات اضغط زر الدبل الين تطلع عندك لمبه الدبل ( خضرا ) وبعدين اسحب العصا حقت الدبل مرتين ( الأولى على N يفضي القير يعني لو تحط القير على D ما يمشي , بعدين اسحبه ثانية على 4l اللي نبيه وبعدين تولع لمبه بنية يعني الدبل القوي ) وحط القير على L عشان ما يعشق للثاني ورجلك على الفرامل ووحده عالبنزين فك رجلك عن الفرامل وبسرعه ادعس البنزين على النص بيتحرك الموتر شوي وبعدين حطه عالـr وارجع بيرجع اكثر من ماهو متقدم تو وبعدين عالـl وعلى كذا إلين يطلع الموتر وان ما طلع حفر قدام وورا الكفرات هي صح صعبه شوي بس نتايجها حلوه وماهي مضره

[منتعش]

أتوقع أنها تظر الموتر مره .
ويمكن يكون طقه في القير .

[ولد الشايب]

والله القير يبي يطيح من ثاني يوم .

تبي طريقة للعجازين اللي ما ينسمون بس يدمر الاذرعة ويجور على الموتر شوي . طال عمرك حطة بالثقيل وعشق ( عادي او تماتيك ) ولف الدركسون آخر شي يمين ويسار ( طبعاُ يبيلها عضلات ) ويطلع الموتر لكن أذرعت الموتر يبيلها وزن بعدها

وإذا تبي تريح نفسك نسم 10-5 حسب الرباظة ( لا عادي ولا تماتيك ) كلها يبيلها تنسيم