عندي يالربع بعض الاسئله يالصقارين والشباكين

[Makrof]

السلام عليكم ورحمه الله وبركاته
اول مشاركه لي واول مرره اكتب واعذروني على قله مشاركاتي
عندي يالربع بعض الاسئله يالصقارين والشباكين

حول بعض الاشياء بخصوص الصقور



1 ما هو الطعم اللي تنصحوني فيه عشان احطه في الشبكه وياليت مع توضيح اكثر يمكن لان بعضها صعب توفرها



2 اذا مسكت لي صقر او شريت صقر توه وحش وش الطعام اللي يفضل اعطيه اياه



3 اذا صار حولك صقور فوقك وش الطريقه الاحسن لاصطيادهن وما هو الطعام اللي يغريهن

تحيــات اخوكم المكروف

[ابوساسا]

حياك الله يا Makrof في هذاء المنتدى منتدى المراجل ونيابة عن جميع الأعضاء احيـيك وارحب فيك.

راح اجيبك على الأسئلة حسب معرفتي

الطعم او مايسمى عند الشباكين { الـزريـق } المعروف هو الحمام عند الشباكين كلهم ولاكن بعض الطيو لها مزاج خاص مثل الشيهان البحري دايم يحب الزريق الي يطير مثل حمام البر { الخضاري او حمام القليب } لانه سريع والشيهان يحب السرعه وفية { القميري والقوقسي والقطا لبعض الطيور. والزريق الي جميع الطيور تهد علية وحريصة علية هو الفري اوالمريعي او السمان حسب التسمية وهو البري فقط . هذا من الزريق الطاير اما الحيوانات عندك الجربوع والجرذي والفارة { الله يعز الجميع }.

اذ بغيت تطعم الطير وهو وحش او غير وحش تطعمة حمام مافية امراض او مثل الي ذكرنا فوق او لحم صافي بدون شحم { هـبـر } غنم والحاشي افضل .

ترمي حمام والأفضل حمام بري يكون يطير وبشرط ان الطير ما يشوفك وانت ترمي الحمامة وافضل منها القميرية لاكن لازم تحط ثقالة وافضل من القميرية الفري لأنة الوحيد الي تهد علية جميع الطيور ولازم بثقالة { الثقالة اي حاجة تكون ثقيلة وحجمها صغير وتكون مربوطة بحبل طويل مشان مايجفل منها الطير وعادة ماتكون من الرصاص } .

وأسئل الله ان يوفـقـك بالطـير الي تطـرحة ويغـنـيـك.............

[Makrof]

العناوين

السلام عليكم ورحمه الله وبركاته

اشكر ياخوي ابو ساسا على ردك وبيض الله وجهك وويضعه بموازين حسناتك

بالنسبه للي ذكرت انت ياخوي من طرق والله افادتني كثيررر

لكن وش رايك لو اني شريت

من سوق الحمام حمام او سمان بينفع

وبالنسبه يااخ ابوساسا للي ذكرت اذا بغيت اوكل الطير سوا كان وحش او غيره
تقول لحم صافي او حاشي

طيب ينفع اقدم له طير حي ؟

انا ماودي اثقل عليك والله ولا اثقل على الرجاجيل

عندي استفسار اخير يا الربع وانت يا بو ساسا
قريت في اخد المواضيع شخص يقول انه عنده قرناس وتوه ماطيح ريشه
يعني باقيله وحده ورد عليه واحد ثاني يقول باقي لي ثنتين
مادري وش المقصد من تطيح الريش؟

تحياتي لكم جميعا
المكروف

[ابوساسا]

العزيز المكروف
شكراً لك على هذاء الأطراء الطيب وهذاء يدل على طيب اصلك والسؤال عادي ولا فية شي واسئل الي نعرفة راح نجاوبك علية والي مانعرفة نقول مانعرف...

1- نعم ينفع انك تشترية من سوق الحمام لاكن لازم يكون نشيط وسمين والسمان يستحسن لو يكون بري لأن البري اذا رميتة قام يحاول الطيران ويغري الطيور على الهددعلية .. والسمان البلدي فية ميزة انة اذا رميتة للطير { لبد } ولا تحرك يصير كنة الأرض لاكن لة طريقة اذارميتة حاول تغطي عيونة بتيب{ للزاق } مشان مايشوف وينة فية ويقوم ويتحرك..

2- الأفضل انك تذبحها لة مشان ماتتعذ ب والثانية مايخرب المحل بالريش الا اذا كان ودك تفكلة حمامة وتخلية يلحقها بالبر..

3- الطير سبحان الله العضيم كل سنة يجدد ريشة كل الريش وتسمى هذي بالقرناس او { المقيض } يكون الطير فيها مربوط بمكان بارد وضلال تسع شهور او اقل وفية طيور تغسل بسبع شهور بالوقت هذا يقوم الطير بتجديد الريش مثلاً يرمي ريشة قديمة من الجناح الأيمن وشبـيهتها من الجناح الايسر وينتضر حتى تخرجان الجدد وبعدها يقوم بنفس الطريقة مع ريش آخر... ومقصد هذول الي تقول يعني باقي ريشة وريشتين يعني الطير معروف انة اخر ما يرمي الريشة الأمامية في الجناح يعني اول ريشة بالجناح { الـمـوسـيـة } هي اخر مايرمي واذا قال باقي وحدة يعني هذي واذا قال بقي ثنتين يعني هي ولي جنبها وتسمى الريشة الثانية { الـنايـفــة}

وارجو المعذرة اذا حصل قصور

[Makrof]

هلا اخوي ابوساسا وبيض الله وجهك :light:
اشكرك على كل كلمه كتبتها والله يجزاك الف خير

اخوك المكروف