؟؟؟كهربائي يسلك بطاريه اضافيه بالقصيم؟؟؟

[يزيد 999]

بسم الله الرحمن الرحيم
السلام عليكم اخواني وبعد قمت بتجهيز سيارتي فورد حوض بشد وبقي كم شغله ومنها الطبق لاني لقيت اللي يفصلون طبق مظبوط بالرس ب1000ريال واعتقد السعر مبالغ فيه وفيه ايضا اللي هو تسليك الكهرب بحيث انه اللمبات وخلافه مسلكه وجاهزه ومطلع لي سلك جرجور جامع فيه كل الاسلاك للتوصيل بالبطاريه مباشره لاكن ماحصلت الكهربائي اللي عليه العلم
واللي نبغاه منكم يالقروم ورشه تظبطلنا الطبق وتسلك الكهرب تمام وانا محتار بين اني اركب بطاريه اوبتيما او احط بطاريه اضافيه مع منظم وكتاوت فياليت تشورون علي وان كان البطاريه الاضافيه هو شوركم فوشو احسن محل يوصلي البطاريه ويكون شغله نضيف وفاهم بهالامور وسعره كويس وكم يحتاج وقت
طبعا يااخوان شيرو علي بورشات بالقصيم لاني ماقدر اطلع برا القصيم
شاكر ومقدر

[مافيه]

ماشاء الله شغل مرتب وبحاول افيدك بالي اقدر عليه

اخوي البطاريه وتسليكها اخبر فيه واحد عندكم يمدحون شغله الضاهر انه بعنيزه او الرس وهو اقرب ماله الرس ((او ان راسي منقلب وهو ببريده)) المهم ان الرجال سعودي وشغله نضيف ومابعده على الكلام الي جاني عموما الاعضاء مهوب مقصرين معك وبيدلونك مكانه

والطبق فيه عندك اكثر من طريقه له
الاول عندك الحديد قيمته على موترك تقريبا من ال500 لل 650 ريال عشان صندوقك عريض وكبير شوي المهم الحل يفصل لك تيوبات المربعات 2 ملي واحرص على ال2 ملي ترا فيه من النص ملي لل3 ان ماخاب ضني الشاهد انه يفصلهن لك ويخليهن مثل الشبك مربعات تقول عاد انت ومزاجك بس الافضليه 10 في 10 صنتي مقاس المربع ويلحمها ببعض ويحط فوقها شبك او صاج حديد انت ومزاجك ثم لبسها طبعا التلبيس بحساب لحاله

او فيه حل ثاني يفكك من القرقعه بس ما ادري بيتحمل على حوض موترك ولالا وفي نفس الوقت لازم تقسم الحوض نصين ((لانه عريض اعرض من موتري شاص))
تروح اقرب مخزن او صناعيه تبيع الواح خشب وافضل نوعين لك ال ام دي اف (المضغوط الي يستخدم للغرف) او نوع ثاني ناسي اسمه يجي لونه اسود ( الي يستعملونه العمال في الصب) والاسود اقوا
بس انا بحكيلك عن تجربتي
المهم اول شي تسويه تاخذ مقاسات الحوض عندك الطول و العرض اخبر مقاس اللوح 145 في 225 سنتي وانت تاكد من المصنع او المخزن الي بتشريه منه كم الاطوال الشاهد خذ السمك 25 اتذكر قيمة اللوح 125 ريال وخذ الي يسد حاجتك ولاتزود عليها ((باقي الخشب لاتجدعها بتحتاجه)) الضاهر ان لوحين بتسدك

الشاهد انت قصصهن على حوض موترك وركبهن عليه ثم دعم الخشب من النص بلوح ويفضل تسوي سكه للوح على الطبق من تحت بحيث انك تقسم الحوض من تحت نصين بكذا يكون عندك طبق يتحمل الاوزان الثقيله ((في موتري جالس عليه 6 وماقال لا ولعلمك سمك الخشب 18 ملي ام دي اف ماخذه من دولاب)) طبعا شغلي مسويه انا بالبيت

بس انت حوض موترك كبير اخاف تحتاج تدعمه بلوحين لان ال ام دي اف مايتحمل الوزن اخاف من تركبه وتجربه ينكسر عليك
واكيد فيه انواع كثيره افضل من النوعين الي ذكرتهن لك لاكن الاسعار هي الفاصل مثل لوح السويدي يبدا من200 ريال الطول 225 والعرض الضاهر مايتجاوز ال50 وفيه الزان لاكن سعره غااااالي ووزنه ثقيل وفيه نوعيات كثير لاكن الاسعار بتكلفك اكثر من ال1000 ناهيك عن الوزن و السمك

[يزيد 999]

جزاك الله خير اخوي ومتعك بالصحه والعافيه الحقيقه انك مبدع والصراحه انا فكرت اني اسوي الطبق بنفسي لاكن المشكله مافيه وقت والصراحه انك افدتن باشياء كثيره وياليت لو تنزل له تقرير بمكشات

[(هزاع)]

ام دي اف كرتون مضغوط لاجاه الما ينتفش لاانصحك به

[ابوصالح77]

حياك الله اخي الكريم
بالنسبة للبطارية الآضافية يوجد عدة كهربائيين
في بريدة /
العثيم - صناعية الرواف
٤*٤ - حي الضاحي
عروق الشمال - شمال بجوار كبري الراشديات
وأما المدن الآخرى فما عندي خلفية
وبالنسبة للشد وشبك وغيره عندك ورشة الرحيلي مقابل مدينة التمور

بالتوفيق

[يزيد 999]

طيب يااخوان الأسعار كم ووش الافضل البطارية الإضافية او بطاريه الاوبتيما

[«نجم الخير»]

هذا رقم ابوابراهيم العثيم دق عليه وخذ من راسه كهربائي مافيه منه :good2:

0554889118

[مافيه]

اخوي يزيد ماقمت الا بالواجب حنا اخوان هنا وكل واحد يدور النصيحه و الشور

الي اقدر عليه بقدمه

ومن ناحية التقرير انشاء الله بينزل لاكن تونا عليه والمثل يقول اكل العنب حبه حبه

التجيهيزات مابعد اكتملت اول ماتكتمل بنزل لكم التقرير ((ادعو ربكم انه يكتمل))

والي يقول الام دي اف مايتحمل

انا اخالفك الراي صحيح تضره المويه وماينفع مكشوف ((لاكن انا استعمالي واستعمال اغلب الناس داخل الشد)) و الشد الزين معروف انه ماتخره المويه ياليت تعطيني علم وشلون بيجيه الماء..؟

وانقطه الاهم كل انواع الخشب تضره المويه واولهم السويدي و الزان وهم افضل الموجود اذا جته مويه يصير رخو ويطلع ريحه مايطيقها احد يخرب علي لوح راس ماله 150 ريال يغطي نص الصندوق ولا يخرب علي لوح يكلفني حول ال350 ريال واصغر حجم مايغطي ولا ربع الصندوق