هل تتأثر السيارة اذا وقفتها لمدة طويلة تصل الى سنة

[GXR_2005]

السلام عليكم ورحمة الله وبركاته

احبابي و اخواني

سوف اذهب ان شاء الله تعالى للدراسة خارج المملكة لمدة تصل الى 3 سنوات أرجع خلالها شهر او أقل في السنة

وكنت أفكر في سيارتي التي اشتريتها منذ قرابة 9 أشهر

هل أبيعها وأتخلص من الأقساط؟

هل أضعها في الكراج وأغطيها الى وقت رجوعي؟

هل أوصي أحد اخواني اذا أوقفتها بأن يشغلها لمدة معينة؟

ما رأيكم

:confused:

[شبح الصحراء]

الأفضل انك تخلي احد يشغلها لمدة خمس دقايق مرة بالشهر على الأكثر ولكن اذا كنت راح تخليها مدة طويلة جداً دون تشغيل اولاً افصل أصابع البطارية وثانياً ضع تحت الشاصي بلك لأن الكفرات راح ينزل ضغطها وراح تتضرر الكفرات لو وقفت مبنشرة مدة طويلة بسبب ملامسة الجنط للكفر وثالثاً ابحث عن مكان فيه ظل وبارد رابعاً غطها بشراع خاص ضد الماء لأن الشراع العادي يمتص الماء وقد يؤثر على البوية خامساً عند العودة بعد مدة طويلة غير زيت المحرك فوراً ويفضل تغييره في مكان السيارة قبل تشغيلها وافحص بقية الزيوت تحسباً لوجود تسرب أثناء غيابك.
أخيراً اتمنى لك التوفيق والنجاح في دراستك ولا تنسانا اثناء الغربة .

[طحنون]

مرحبا اخوي والله مافي تعقيب على الاخ شبح الصحراء
بس عندي اضافه
من الاضراض اللي تسببها الوقفه الطويله للسياره
ان الصوف اللي تابعه للقيروالعمودوالمكينه لازم انها تتاثرمن الوقفه يعني لازم انك اذارجعت بالسلامه
تحط في الحسبان انك تشيك عليها قبل وبعدقياده السياره والتأكد من اي تهريب للزيوت
+++++++
ملاحظه
بعدماتشغل السياره وتحمى لازم انك تعشق القيرللخلف والامام وترجع ريوس كم متر
+++++++
تخيل ان يجي لك واحد وانت نايم اقل شي 8ساعات ويقولك قم بسرعه واركظ 400 متروشراح تسويله
اكيد انك بتعطيه بكس بالمقلوب
السياره نفس الشي

[الغدير]

بيعها وحط فلوسها في اي مشروع متأكد منه وعقب ثلاث سنوات خذ لك سيارة جديدة
والله يبارك لك في دراستك

[الكابتن]

اتفق مع ما ذكره الاخوان واضيف ايضا ان جلود البلوف تتضرر كثيرا من كثرة الوقوف

[شبح الصحراء]

يا اخوان ما اظن ان الصوف وجلود البلوف تضرر من الوقفه .

[ابن الكرام]

البيع أفضل لأن ثلاث سنوات مهيب شوي زد على ذلك ان شكل السيارة في هالمدة اكيد راح يتغير وقيمتها ستنخفض لأن الناس تسأل عن الموديل بغض النضر عن الممشى وكذلك الحيز اللي تآخذه السيارة في كراج البيت وترى محلات تأجير السيارات ماليه الشوارع ورخيصة وموفق في دراستك وهي إللي فكر فيها الآن والسيارة موضوعها هين ,, تحياتي .

[شبح الصحراء]

لا تبيع لأنك راح تخسر اقل شي 10 الاف ريال وانت اولى بها وبعدين ما اظن يهمك شكل السيارة يتغير ولا ما يتغير والسيارة ما شاء الله تبارك الله ممتازة وطيبة وموتر ينفعك اذا جيت في الإجازة فلا تبيعها وخلها معاك وان شاء تعيش معك عشر سنوات قدام فحرام تفرط فيه .

[عقاب طويق]

الأخوان ما قصرو أما رأيى بيع وريح بالك أضيف بعض الاسباب

- الكفرات رايح تتلف واذا ما تلفت رايح يصير فيها رجه ما تروح حتى تغير الكفرات
- اليايات رايح تلين بطريقه غير طبيعيه يعني مو مثل لو أن السيارة تمشى رايح تلين طبعا مع الزمن لاكن بطريقه طبيعية ومرنه
- هل تضمن البزارين ما يخلونها طعص طالعين ونازلين عليها
- من الذكاء أنك تبيع ليش لأن السيارة الجديد تنزل قيمتها 10% كل سنه وفي ثلاث سنوات رايح تخسر 30% على أيش هذا كله لا وبعد بالش أهلك معاك شغلو طفو غطو غسلو اكو وبعدين
- ياأخي بعد ثلاث سنين تبي ترجع انسان ثاني مهما كان عشان كذا جدد كل شيئ
- اذا سافرت تكفى لاتنسانا واءستمر تراسلنا وجبلنا أخبار وصور من البلد اللي أنت فيه أول بأول 00 ترجع بالسلامه

[نمر بن حثلين]

الله يوفقك وترجع بالسلامه

انا اؤؤيد الاخوان ببيع السياره ما دامها جديده راح يطيح شوي من سعرها
بعكس لو صبرت عليها 3 سنين بتطيح قيمته زود وتقدم سيارتك وانت ما استفدت منه

[EXEPLORER]

انا مع الاخوان في انك تبيعها لان وقفتها بتكلفك وسعرها راح ينزل في الثلاث سنين سواء انت مستخدمها والا واقفه

وبالتوفيق

[سراي ليل]

بيعها وحط فلوسها في اي مشروع متأكد منه وعقب ثلاث سنوات خذ لك سيارة جديدة
والله يبارك لك في دراستك
اناأؤيد كلام أخوي الغدير

[الربذي]

السلام عليكم

هلا 2005 عسى لقيت فائدة الزر اللي بسيارة (ياقدمي ) الا وش صارة فائدة
وبعدين انا مع اخوانا بيع السياره وبعد ثلاث سنين يارب العافيه تكون الفلوس باذن الله تمام اقصد تحطها بسوق الاسهم مثلا يعد ثلاث سنوات يكون الربح 300 بالمايه باذن الله او تشغلهن بشغله حليوه وعليم بالاسهم النقيه ان بعتها وان ارى بيعها اوفق بعد ثلاث سنوات يكون الفين وتسعه عليه شكل حلو بكل تاكيد يارب العفو والعافيه

[شبح الصحراء]

لا لا تحطها بالأسهم انتم ما سمعتوا للي صار على راعين الأسهم بعد الخسارة ... احذر شيئين القمار والأسهم :no2: ما احد يضمن شي .
وانصحك ما تبيع سيارتك ، حرام سيارة جديدة ونظيفة وحلوة تروح من حظ شاريها ، انت اولى بها بس قفل عليها بالكراج وغطها وتوكل على الله .

[* الخطيب *]

رأيي تبيعها ، وتحط قيمتها في أرض بموقع مناسب هنا أو هناك .
الله يوفقك ويكتب لك الخير .

[الضاحي]

اخوي انا مريت بنفس التجربة وتندمت اني مابعت
الا بيع ولاتتردد واستثمر الفلوس بالطريقة المناااااااااسبة او مثل ماقلت انت سدد دينك وافتك من الأقساط
ثلاث سنين عمر يابن الحلال واذا الله ردك بالسلامة فلكل حادثة حديث وانا احوك

والله يدلك على سبيل الخير

[راع الذود]

مع اني راع ذود وحب البل
بس .........
بنصحك بيعه وخل فلوسه في الاسهم
بس مهو اي سهم
حطها في سهم الراجحي لنه انشاء الله خلال 3 سنوات
راح يصير ضعفين
ويمكن 3-4-اضعاف

لنه ينشطر كم مرة

السيارة اذا كانت فوق المية
يطيح فيها9 الاف في السنه
يعني 27 الف مع الاصلاحات حوالي 4 الاف





وطع شوري


انا اعرف واحد شراء عشرة اسهم في الراجحي
قبل كم سنة والحين 80 سههم






والله الرازق

سهم الرجحي له ربحية عالية مهو مثل الخشاش

[سكّين]

بيعها وحط فلوسها في اي مشروع متأكد منه وعقب ثلاث سنوات خذ لك سيارة جديدة

أوافق الأخ ..

[عــقــلاوي]

الاخوان كفّو ووفو وماقصروا
وبكل تأكيد ان راسك هالحين مفتر واحد يقول بع والثاني يقول انتبه تبيع
لكن سوف ادلي بدلوي والله يكتب لك الشور المبارك
انا ارى انك تبيع السياره وانت مخير بين استثمار مبلغها او تجميده او تسديد مستحقاتها
لإنه بكل تأكيد وقوف السياره لفتره طويله سؤثر على السياره والموتر جديد وحرام ياقف هالمدّه
واذا جيت مسافر بالسلامه بقيمتها اليوم تاخد اطلق منها بكل تأكيد

[السابقي]

اولا" اتمنى لك التوفيق في رحلتك الدراسيه وترجع بالسلامه انشاء الله

كثر والمؤيدين للبيع واللي قالو لك خلها عندك

ونا رائي اخوي انك تشوف نفسك وبما انك ذكرت انها اقساط وودك تخلص منها وتنفعك دراهم القسط بالغربه فهذا اولى

ون شفت انك مقتنع بالموتر للدرجة انك ماوك تفرط فيه فلا تبيعه وخزنه مع مراعاة الاشياء اللي بتساعد على حفاظه على جدته ( جدته فاليابان يخلف الله ) :) والاخوان ماقصرو ...


وفقك الله ونا اخوك

[الشقردي]

انا اشوف ثلاث سنين كثيره على وقفة سيارة , صحيح السيارة لقطة وماشاء الله مافيها كلام , لكن الموتر غيره موتر واذا متحسف مره بعه على قريب أو عزيز.

لكن مع احترامي للي يقول خسارة تبيع هالسيارة , أقول ان السياره سعرها يتناقص مع الوقت مهوب مثل اذا حطيتها في شئ ثاني أيا كان وبعدين كون انك تدفع اقساط (يعني دين) على شئ مجمد ما تستفيد ولا 20 بالميه منه هذي هي الخسارة

الزبده اللي اشوفه ان اغلب الاراء تشور بالبيع وتتفق على عدم تخزين السيارة, معليش تدخلت بخصوصياتك زيادة عن اللزوم

لكن لا تنسى تستخير أهم شئ

[GXR_2005]

:(



سنايدي والله ونور عيني انتم



تسلمون وتشكرون وتكرمون على الجهد الواضح والنصيحة الغالية



جعل عيني ما تبكيكم



اخواني ولا يهون باقي الأعضاء



شبح الليل



طحنون



الغدير



الكابتن



حاكم



عقاب طويق



نمر بن حثلين



Exeplorer



سراي ليل



الربذي



المتفائل



الضاحي



راع الذود



قائد



عقلاوي



السابقي



الشقردي





بارك الله فيكم جميعا وفرج همكم ونفس كربكم



والله يكتب اللي فيه الخير

[GXR_2005]

مختصر من يرى عدم بيع السيارة



- تخسر 10 آلاف ريال اذا بعتها والسيارة تستاهل تحافض عليها

- افصل اصابع البطارية

- حطها في مكان بارد وظل

- حط بلك تحت الشاصي علشان ما تنزل الكفرات على الجنط اذا خرج هواها

- شراع ضد الماء

- شيّك الزيوت لاحتمال التهريب بعد الوقوف الطويل

- اذا جيت تمشيها بعد مدة الوقوف تقدم به قليلا وتأخر لأمتار قليله للتدريب









مختصر من يرى ان البيع أفضل



- تنخفض قيمة السيارة 10% كل سنة وسوف تخسر الى 30% بعد 3 سنوات اذا قررت بيعها بعد رجوعك من السفر

- الموديل سيصبح قديم وانت عندك فرصة تاخذ موديل افضل اذا رجعت

- جدد حياتك والامور ستتغير ان كان في العمر متسع بعد عودتك

- هناك من ندم على عدم البيع وقد مر بنفس التجربة

- الوقوف الطويل يتلف الاطارات وتصبح فيها رجّه

- اليايات تلين بشكل غير طبيعي

- تتعب أهلك بالحفاض عليها والاطفال من الممكن ان يتخذوها "زحليقه" أو مخبأ :)

[شـهـاب]

اخذ النصيحه من محب

بيع السياره

واكيد بتجيب لك ان شاء الله فوق 100 الف

خذ لك ارض قريبه ولو هي صغيرهـ بفرابت الـ 60 الف

والباقي اشر فيه اسهم في شركة الراجحي او البلاد وانسه

[GXR_2005]

:)

أخي الحبيب شهاب

بالنسبة للفلوس فأنا لا أفكر في أي مشروع أو حتى أن آخذ قيمتها معي في السفر

كان قصدي من البيع أن أسدد باقي أقساط السيارة لكي لا تنسحب من رصيدي شهريا وأنا في الغربة

والله يكتب اللي فيه الخير

[abo nakwa]

اخي الكريم السيارة لة تتخزن بطريقة علمية لن يظرها شي ابدا ابدا والسيارة عبارة عن قطع معدنية هذا هو الاصل وبعد ذلك اقولك ريح بالك السيارة لن يظرها أي مكروه ولكن عليك تغيير الزيت والفلتر وتحجير الكفرات اكثر من 40الى 45 واذا كانت كفراتك تيوبلس أي بدون لستك ركب لها لستك لاجل ماتنسم وافصل اصابع البطارية وابعدها عن البدودي واذا كا ن عندك بايكة كان بها ما عندك خذلها شراع وافتح الهواية الداخلية التي بجوار المكيف لتنسيم الحرترة وافيدك علم ان هذة الطريقة يعمل بها السيارات الرسمية التي مايدقون سلفها الا بالمواسم ووالله اعرف واحد من ربعنا اسير في كوبا ان موتره دخل على السنة الرابعة وهو مثل ماهو

[salehhd]

السلام عليكم

الشاب كفوو ووفو وابدو جميع الاراء

وبصراحة من خلاصة المشاركات الي انا معاة

هو بيع السيارة وشراء ارض او وضع المال في صندوق استثماري وترى 3 سنين مهي بسيطة السيارة بيصيدها الصدى والجلد تتعب مع الصوف بسبب قلة الاستخدام

وقبل كل شيى انصحك وانا اخوك تصلي ركعتين استخارة وتاخذ الموتر وتودية المعارض ان تسهلت امور البيع بسعر مناسب ولا خل الموتر عندك

والله ييسر امورك

[كبير النواخذه]

مختصر من يرى عدم بيع السيارة



- تخسر 10 آلاف ريال اذا بعتها والسيارة تستاهل تحافض عليها
- افصل اصابع البطارية
- حطها في مكان بارد وظل
- حط بلك تحت الشاصي علشان ما تنزل الكفرات على الجنط اذا خرج هواها
- شراع ضد الماء
- شيّك الزيوت لاحتمال التهريب بعد الوقوف الطويل
- اذا جيت تمشيها بعد مدة الوقوف تقدم به قليلا وتأخر لأمتار قليله للتدريب




مختصر من يرى ان البيع أفضل

- تنخفض قيمة السيارة 10% كل سنة وسوف تخسر الى 30% بعد 3 سنوات اذا قررت بيعها بعد رجوعك من السفر
- الموديل سيصبح قديم وانت عندك فرصة تاخذ موديل افضل اذا رجعت
- جدد حياتك والامور ستتغير ان كان في العمر متسع بعد عودتك
- هناك من ندم على عدم البيع وقد مر بنفس التجربة
- الوقوف الطويل يتلف الاطارات وتصبح فيها رجّه
- اليايات تلين بشكل غير طبيعي


- تتعب أهلك بالحفاض عليها والاطفال من الممكن ان يتخذوها "زحليقه" أو مخبأ :)



اخوي اعتقد انك بهذا الايجاز قد صنفت كلام الشباب بشكل جيد..ويبقى الاختيار لك
وانا ارى ان تبيع السياره لتتخلص من الاقساط+حتى لا تقل قيمتها كل سنه
وبارك الله فيك ووفقك في دراستك وردك سالما

[altheeeb79]

ياأخي الحل عندي وأنا أبو هندى00 عطني السياره أستخدمها خلال سفرك وأنا والله أوعدك اذا جيت زياره للديره أرجعها لك تستخدمها خلال فترة اجازتك بس على شرط تدفع لي حق البنزين خلال الثلاث سنوات0000ههههه0 تبي الرأي 00 خل مويترك عندك وترى الثلاث سنوات تروح كأنها ثلاث أيام أسأل مجرب أنا تغربت 7 سنوات يارجال ياسرع الايام ومحسوبه من عمرك بس الله الله بطاعة الرحمن0000 والله يوفقك

[KEA2003]

الغدير رايه ممتاز واذا ما ودك تاخذ الراي اذا رجعت بالسلامه غير الزيت قبل تشغل:good:

[تــــوني]

بع .... بع .... بع

اذا رجعت الله يوفقك بغيرها وموديل سنتها وبعدين زي ما ذكرت انها اقساط انت بجاجة القرش في الغربه ما تدري وش يصير
عليك لو تدعس قطو قالوا ادفع لو تشتري موية قالوا ادفع ضريبة

بع وانا اخوك وفترة الدراسة الي بتقضيها في الغربة بتزيد مدخولك بإذن الله وتفكر تفكير ثاني واساساً لا شفت الخضار في هاك الديار بتكرة برانا وشعبانا ويبي لك على الاقل سنة عشان تفكر تطلع للبر واسأل مجرب تفكيرك بيتغير يمكن تشتري دباب هارلي هههههههههههههههههههههه

لاتقطعنا من ديارك وسواليفك واسفارك واهم شي ( مكشاتك ) صووووووووووووررررررررررر...

[GXR_2005]

abo nakwa

جزاك الله خير

وفك الله أسر اخواننا المسلمين في كل مكان

salehhd

بارك الله فيك ورايك على عيني وراسي

كبير النواخذه

جزاك الله عني كل خير

ورايك حكيم

altheeeb79

ما عندنا الا حلالك يالذيب :)

والله ييسر الامور

KEA2003

بارك الله فيك

توني

الله يحفظك ويرعاك

وان شاء الله ما نقطعكم (المشكلة ان من اسباب تواجدي هنا هو سيارتي :( )

الله يعين ويكتب لنا ولكم الخيره