بعد اخبار عيوب الاند ....

[اليكي]

بسم الله الرحمن الرحيم

اخواني انا من ملاك لاند كروزر .. وكل سنة نسمع خبر خبرين عن هالمشكلة .. ولا اخفيكم هذه المشكلة خوفتني وصرت ماستخدم مثبت السرعه ..

لكن بعد اخر خبر الا وهو رمي الزجاجة الخلفية !!! بصراحة استغربت لكن لم اعلق او ننفي او نتكلم عن هذا الموضوع بحكم انه خبر صحيح 100 % . لانه عن طريق مقدم في الشرطة و مقدم برامج . اصبح الخبر اكيد ... وصرت اتابع وش صار بالموضوع واتابع بالمنتديات ...

اخر خبر انه وفد ياباني جاء للملكه للنظر بهذه القضية ... واكيد كلكم اطلعتو عليه وشفتوه ...

الغريب في الامر ان عبداللطيف جميل والوفد اليباني حسب ماذكر بالخبر يبحثون عن الي صارت لهم مشاكل ويدقون عليهم حتى وصل الامر انهم اتجهو للجهات المختصة على شان يبون يشووفون وش مشكلتهم ...

واحد قال بعت السيارة !!

والثاني مركب مثبت سرعه يعني العيب ماهي بالسيارة

والثالث مازال ( البحث عنه مستمر ) !!

وانا اخبر حنا شعب مامدى شي يخرب عندنا الا ونشبنا بحلوق الوكالات فما بالك بمثبت سرعه علق معك !! قسم بالله لو صارلي ماصار لهم لااوقف الموتر قدام باب الوكالة ولا اطلع الا ومعي فلوسه كاش .. ولا اركبه مره ثانيه ابد لو تاصل للمحاكم !!

يعني مافكرو الي صار لهم هالسوالف بانهم يشتكون .. اقل شي يشتكي نفس الوكالة !!

عموما ايقنت واقتنعت انه هالموتر ذهب

وعلى قولة المثل

لايرمى بالحجر الا الشجر المثمر ...

بصراحة صابتني حيرة ولاتلومني .. لانه بالعربي مافيه موتر مثله لك وللزمن ..

صرت اخاف يرجع الماضي يوم كان معي نيسان وكان جوالي مليان ارقام ورش ومكانيكين @!#$

او موتر غيره ..

صارت تجيني كوابيس باليل اني اشتريت نيسان وافز من نومي واسمي وانفث ثلاث مرات يسار ...:(

بصراحة لاتلومون من جرب التويوتا انه ينزل ويسوق غيره ...
ومازلت اتابع الاخبار حتى تبان الحقيقه كامله ... ومن بعده ان شاء الله بحط مثبت السرعه واحط رجل على رجل وخل العذال تحكي حتى تتعب ..


لكن اتقو الله يالي تلفقون قصص .. يعني مثل واحد ناقل حادث لشاب رحمة الله عليه وحاطة بموضوع عن مشاكل تويوتا .. الموضوع غير والحادث غير تصير بكل السيارات .. تبحث بقوقل وتكتب حادث (....) يعطيك صورة ... بلا تلفيق ...

هذا والله من الحره الي بقلوب العواذل .... الى الامام تويوتا سر ونحن معك جيل بعد جيل ..


اخوكم / اليكي .

[SAS2]

يعجبني الي يقتنع برايه وتفكيره بعيد عن كلمه يقولون ومعك بكل كلمه

وعن نفسي لاوالله الصراحه اني خايف جدا جدا يمكن عندك شجاعه

اكثر مني او اني حذر بزياده على العموم الله يستر عليك ويجنبك

ويجنب كل مسلم كل مكروه

[المنيعي1]

يارجال السوالف هذي نسمع به قبل أربع سنوات كنا مانصدقه بس الظاهر مايطلع دخان من غير نار.
ولكن أذا مثل ما كتبت أنك تحب هذه السيارة وبنفس الوقت متخوف حط فاصل للبنزين وريح راسك

[HAS5SAN]

لا حظ معي :
مايخرب مثبت السرعه في اللاندكروزر إلا إذا قرب ينزل الموديل الجديد
سبحان الله

[Abo gssar]

لاتقول اجل ماشفت قناة الاخبارية اليوم وش يقولون كان عرفت ان اللي صار فعلا حقيقي

[- النشمي -]

اقول ركب فاصل طرمبة اذا الله مبليك بحب هالماركه

والا انتظر الموديل الجديد يمكن يعدلون هالعيوب اللي طلعت في موديلات 2008 الى 2012

لايجي يوم وتكون عبره لغيرك


واسأل الله سبحانه ان يجعل في نصيحتي خير لاصحاب اللاندكروزر الجديد

[زمان وطاف]

عاد صدز تجيك كوابيس..


وتفز من نومك, وتسمي, وتنفث ثلاث مرات يسارك.

كل هذا كره للنيسان


ههههههه


الله يستر عليك

[algnas11]

قول الله يكفينا شر المصايب

[ذيب عالية نجد]

عاد صدز تجيك كوابيس..


وتفز من نومك, وتسمي, وتنفث ثلاث مرات يسارك.

كل هذا كره للنيسان


ههههههه


الله يستر عليك

ههههههههه من جد هالإنسان هذ دايم النيسان مسبب له قلق وكوابيس مدري ليه

[الخيمة والذرا]

طيب كان خليت رايك لنفسك وشريت لك ولعيالك من ال (((لاند))) ,,,,ليش توهق غيرك


قسم بالله الذي لا اله الا هو ان سيارة افالون 2010 صار لها نفس المشكلة في جنوب القصيم ,ومر الرجال من عند النقطة حقت التفتيش بين السما والارض ,,لين امر الله خوية وكسر أمان القير برجله

هذي إسأل عنها أمن طرق المذنب

[مغلي]

بعد اخبار عيوب الاند ....

بالنسبة لي

مستحيل افرط وابيع اليوكن

حياتي وحياة من حولي غاليه

[أبو خميس 2008]

قلتلي تنفث ثلاث أجل ( وين أصرفه ذي ) ما فيه مشكل أمشيه لك


مايحتاج أحلف تبي تصدق صدق ماتبي براحك


ولد خالي شراء فكس أر 2011 المهم علق عليه وهو بشارع انكاس الي برياض


لاكن ربك ستر عليه وفضاء القير معه وطفاه


بعدين أنا ودي أدري وش دخل النيسان بل موضوع ( لكل بارز أعداء )


بعدين وش فيه ماضي نيسان هاذا السوق الى اليوم يرغب الباترول 90 إلى 97 ودره الناس ادواره


حبيبي تايوتا اليوم ولا بريال ( هونداي أفضل منه بواجد )

[الكونغررس]

لو انا عندي لاند الحين واسمع بالمشكله والله ما يقعد عندي بيتي ولا دقيقه لان ممكن تخسر ارواح البشر على هالعيوب الفادحة وتويوتا تتكر اخطائها بشكل كبير وكان قبله السيكوبا والاوريون والحين الدور ع الاند وانصحك تبيعه واحسن من انك تسبب خسارة لروحك ولغيرك

[WWS]

كــلآمك الله يخليك زين مـــآبه خلآف
لآنه ؤجه نظرك يــآ بعدي
لكن ؤيش دخل نيسـآن !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!

[عشق البر]

بلاك ماجربت تشري نيسان جديد ونضيف الا خلك على موترك مانبي الشريطيه يطيحون بالباترول
انا كان معي فكسار 2003 وشريت سوبر 2008 وعز الله اني رقيت بنفسي مهب على قولتك انزل؟؟ خلك على الفقمه والله مدري وش شايفين بالشكل الجديد الشكل القديم ازين ولا يقارن لا ركبته تظلم الدنيا من سواد الديكور والله انه يجيب الغلقه
الحمدلله اللي خلان اشري السوبر والله ولله الحمد اني ماندمت وعرفت بعده ان الناس ماعندهم الا الخرطي والدلاخه

[محطم عنيد]

نيسان وبس ( مدام الوضع تعنصر)


والله يستر ع المسلمين

[مجنون نحم]

انت ما اخذت العبرة من الناس و شكلك تبيها في نفسك -لا قدر الله-

[ابراهيم_999]

الباترول الجديد افخم واقوى واحلى وشبابي وعائلي وارخص بس شعب صارت عنده التيوتا من العادات والتقاليد

[volcano]

وجهة نظرك وعلى الجميع احترامها

دائما استعين بالله في كل شي


بالتوفيق

[sgl2002]

انا يوم كان معي تويوتا كان يجيني في المنام صوف قير وصوف دفرنس وكارونة وكلها تطاردني واقوم وانفث عن يساري


بعدين غريبة ماجاك الى الان كابوس مثبت السرعة وبجنبه دينمو الدبل


ياحبيبي تدري وش احسن مافيك انك اقنعت نفسك بنفسك

[ملك الإحسآس]

يا اخوان كلن ينام على جنبه اللي يريحه

[مواسي الطعوس]

اتركوه يبي يغطي المشاكل ولايقدر .... هذا كلام ....يعزي نفسه .سيارات الورش معروفه ,,,على كثر ورش جميل وموزعينه المعتمدين بكل مكان ....الا انهم مكدسين بالورشه العاديه بعد .

[مزدهر]

يا راعي الموضوع ترى المشكلة ما هي من المثبت الله يعافيك المشكلة من الدعسة علق سيارات ما فيها مثب أساساً

[الخيمة والذرا]

يا اخوان كلن ينام على جنبه اللي يريحه



ايه بس لا يوهق العالم بخطبة وش طولها ,,,أقرب ماتكون للدعاية ما هو للرأي

[الخيمة والذرا]

يا راعي الموضوع ترى المشكلة ما هي من المثبت الله يعافيك المشكلة من الدعسة علق سيارات ما فيها مثب أساساً


اخوي المزدهر ولا مهونة بالاخوان,,اعتقد ان المشكلة ((مركبة)) يعني بين نظام الحقن والتسارع وبين الدعسة وبين المثبت وبين نظام الامان اللي توهم مجربينه واللي ما يسمح لك بفصل اي شي في حال التعليق ,,,,يعني الدعوى تجربة فاشلة وحنا اللي نبي ناكلها ...............بالهنا والعافية

[رفرف83]

اووووووووووووووو والله هالمعرف طلع منه غبار كح كح كح
اليكي انت من عرفناك وانت على اكسبلورر
سبحان الله هناك معرفات مرابطه عند مواضيع تويوسا حتى لو بها دمار وخراب ديار
لا تاكل دسم بالليل عشان ما تجيك كوابيس
شافونا سود قالوا هنود خخخخخخ

[الخديوى]

انا من عشاق اللندكروزر بس شف تقرير وتحذير ارامكوا من هذه السياره
ابحت فى الجوجل تقرير ارامكوا بشان اللندكروزر ونشاء الله بتقتنع

[.أبوعبدالرحمن]

وجهة نظرك وعلى الجميع احترامها

دائما استعين بالله في كل شي


بالتوفيق



ليت الأعضاء كلهم زيك

بارك الله فيك أخي

[الغرش]

السلام عليكم ..
هنا يتحقق المثل القائل : لولا اختلاف الأذواق لبارت السلع
فعلاً لو اتفقت الأذواق على تويوتا او نيسان او يوكون لبارت السلع الأخرى !
لكن الله بحكمته جل وعلا وزع الأذواق كي تعم الفائدة والرزق ..
وهناك مثل آخر يقول :
رضا الناس غاية لا تدرك

[عفشك مكمل]

المفترض ان يكون خطابك موجه لبحث وتقصي الحقيقة لان الامر يهمك قبل غيرك

وخلك من المقارنات وتشتيت التركيز في امور انت تلمسها الان في مداخلات الاخوة

من بعدك. المواضيع تحتاج ثقافة و وعي بالحوار قبل ما نهتم بتصميم الاحرف وبناء

الجمل .

يبقى ما في اعلاه وجهة نظر خاصة وممكن تقول غيره على طريقة حوارنا كعرب كيف اصبحت والى اين تسير؟

[H 2]

بسم الله الرحمن الرحيم

اخواني انا من ملاك لاند كروزر .. وكل سنة نسمع خبر خبرين عن هالمشكلة .. ولا اخفيكم هذه المشكلة خوفتني وصرت ماستخدم مثبت السرعه ..

لكن بعد اخر خبر الا وهو رمي الزجاجة الخلفية !!! بصراحة استغربت لكن لم اعلق او ننفي او نتكلم عن هذا الموضوع بحكم انه خبر صحيح 100 % . لانه عن طريق مقدم في الشرطة و مقدم برامج . اصبح الخبر اكيد ... وصرت اتابع وش صار بالموضوع واتابع بالمنتديات ...

اخر خبر انه وفد ياباني جاء للملكه للنظر بهذه القضية ... واكيد كلكم اطلعتو عليه وشفتوه ...

الغريب في الامر ان عبداللطيف جميل والوفد اليباني حسب ماذكر بالخبر يبحثون عن الي صارت لهم مشاكل ويدقون عليهم حتى وصل الامر انهم اتجهو للجهات المختصة على شان يبون يشووفون وش مشكلتهم ...

واحد قال بعت السيارة !!

والثاني مركب مثبت سرعه يعني العيب ماهي بالسيارة

والثالث مازال ( البحث عنه مستمر ) !!

وانا اخبر حنا شعب مامدى شي يخرب عندنا الا ونشبنا بحلوق الوكالات فما بالك بمثبت سرعه علق معك !! قسم بالله لو صارلي ماصار لهم لااوقف الموتر قدام باب الوكالة ولا اطلع الا ومعي فلوسه كاش .. ولا اركبه مره ثانيه ابد لو تاصل للمحاكم !!

يعني مافكرو الي صار لهم هالسوالف بانهم يشتكون .. اقل شي يشتكي نفس الوكالة !!

عموما ايقنت واقتنعت انه هالموتر ذهب

وعلى قولة المثل

لايرمى بالحجر الا الشجر المثمر ...

بصراحة صابتني حيرة ولاتلومني .. لانه بالعربي مافيه موتر مثله لك وللزمن ..

صرت اخاف يرجع الماضي يوم كان معي نيسان وكان جوالي مليان ارقام ورش ومكانيكين @!#$

او موتر غيره ..

صارت تجيني كوابيس باليل اني اشتريت نيسان وافز من نومي واسمي وانفث ثلاث مرات يسار ...:(

بصراحة لاتلومون من جرب التويوتا انه ينزل ويسوق غيره ...
ومازلت اتابع الاخبار حتى تبان الحقيقه كامله ... ومن بعده ان شاء الله بحط مثبت السرعه واحط رجل على رجل وخل العذال تحكي حتى تتعب ..


لكن اتقو الله يالي تلفقون قصص .. يعني مثل واحد ناقل حادث لشاب رحمة الله عليه وحاطة بموضوع عن مشاكل تويوتا .. الموضوع غير والحادث غير تصير بكل السيارات .. تبحث بقوقل وتكتب حادث (....) يعطيك صورة ... بلا تلفيق ...

هذا والله من الحره الي بقلوب العواذل .... الى الامام تويوتا سر ونحن معك جيل بعد جيل ..


اخوكم / اليكي .



اخوي كلامك مردود عليك
النيسان ماشفنا منه الا كل خير
ولكن الموديلات القديمة يعيبها الكلبليتر واما المديلات الجديدة من 98 الى الان كمبيوتر ولا فيها مشاكل لا بالخفة ولا بالماكينة ولا بالقير الخ
مافيها اي مشاكل بالعكس
وكلامك كله تسويق لتايوتا وغطاء للي حصل للاندكروزر
وسيارة البر معروفة نيسان بدون منازع واللاندكروزر مافيه كلام ولكن عابته هالمشكلة وان ِشاء الله تنحل ويحصلون لها حل خصوصا انهم حصلوها باكثر من موتر

[ددسن 2008]

صرت اخاف يرجع الماضي يوم كان معي نيسان وكان جوالي مليان ارقام ورش ومكانيكين @!#$


او موتر غيره ..


صارت تجيني كوابيس باليل اني اشتريت نيسان وافز من نومي واسمي وانفث ثلاث مرات يسار ...:(






بسم الله عليك تغط زين بالليل لا تبرد:D

وش دخل النيسان في قرايب السالفه ؟؟؟؟

كاد المريب ان يقول خذوني

[على رمشي تمشي]

الله يبارك لك في حلالك ويعطيك من خيره ويكفيك شرهه - لابد من اخذ الحذر اخي الكريم

[الجمس]

انالله وانااليه راجعون
وشب مندبين الوكالات قاموا يتصافقون!!!!!!!!!!!

[الخيمة والذرا]

ليت الأعضاء كلهم زيك

بارك الله فيك أخي



كلنا زيه إن شاء الله

تذكر قول رسول الله الكريم اللي يعلمنا الرقي والقيم (((من رأى منكم منكراً فليغيره بيده ...............))) اعتقد ما يحتاج اكمل