مشورتكم الله لايهينكم : هايلكس دبل vs باترول ربع [الأرشيف]

الخلاوي 9

10/01/2012, 04:21 AM

سسلام عليكم ورحمة الله وبركاته ،

اخباركم يالربع عساكم طيبين انشاء الله .. :good:

الوكاد يالربع حبيت اسئلكم للمجربين عن الهايلكس الدبل ياباني طبعا 2002 الى 2005 وربع نيسان 98 الى 2002 بسم الله نبدا "

القوة
الصبر
الكرف
اقل صيانه
الصرفيه
التماسك

يعني وش الي منهم نظمنه لطلعات الرمله :eek: والقنص والكشتات ~
وطبعا الخطوط واستعمال يومي :good2:
يعني موتر بتاع كله ;)
وعلى فكرة ترا مالي بالمقاوم والمراقى وهالاشياء
انتظر ارائكم ان شاء الله
تحياتي لكم .. "

شمالات نجد

10/01/2012, 04:54 AM

كلهن مضمونات والضامن الله سبحانه

لا تقارن ولا تكبر الموضوع السيارتين طيبات وحول بعض والاغلبيه بيقولون لك الباترول الربع وانا بعد اقول الباترول الربع مافيه كلام خصوصاً اللي عزوبي او توه معرس وعياله كتاكيت مجربه وادور النظيف احتريه يرخص

ودامك راكد صدقني مهوب مبهذلك بالخراب بس تطرح في النظيف واول ما تشتريه ويجوز لك انفضه من الصدام للصدام لا تقصر على عمرك.

السؤال المهم: هل انت بحاجة الحوض وعفشك كثير هنا الورطه :) ؟

اذا كنت بحاجة الحوض انصحك بالهايلكس 2006 وطالع مجربه دفرنسين ديزل يا كيف عاد البنزين

ولا تنسى تستخير

وفقك الله والجميع

.أبوعبدالرحمن

10/01/2012, 07:49 AM

ما قصر شمالات نجد

كل السيارتين يمعتمد عليها خصوصا في البر

ولكن هل أنت راعي تحميل أو إذا رحت للبر تحمل أو لا ؟

طبعا الصبر والقوة والتحمل والصرف والتماسك كلها تقريبا مثل بعض

غاوي رومانس

10/01/2012, 08:05 AM

وعليكم السلام ورحمة الله وبركاته

يقولون انهم عينين في راس

لكن حاجتك هي اللي تحكم

انا عندي باترول واعشق الباترول ولكن ماني متعصب الحمد لله
والهايلكس من السيارات اللي معروفة مايحتاج تنشد عنها

وعلشان كذا انت اللي تحدد الموتر اللي تحتاجه

الهايلكس للي عندهم عفش كثيير في الكشتات وغيره والباترول الربع

لاصحاب الكشتات الخفافية وتاخذ عفش بس مو مثل الهلي

وانت واختيارك

ابونبيل

10/01/2012, 08:38 AM

اذا بتطلع البر لازم بتحمل اقلها خيمتك وحطبك.. خذ هايلكس

الباترول زين بس صرفيه وعدد الركاب قليل واذا بتطلع البر وبتحمل عفشك ماراح تصفالك الا غماره
اما الهايلكس غمارتين وحوض

العنابي 616

10/01/2012, 11:02 AM

الهايلكس تنطبق عليه جميع الصفات و يتفوق فيها على الباترول
القوة
الصبر
الكرف
اقل صيانه
الصرفيه
التماسك

و زيد عليه إن الربع يغثك بالمكينة تقطيع تفتفة و عزمه ضعيف

الخلاوي 9

10/01/2012, 11:21 AM

شمالات نجد : الله يجمل حالك ماقصرت لكن لو ماحتاج الحوض كان مافكرت بالهايلكس والعفش كثير .. والله يعطيك العافيه ماقصرت يابعدي "

ابوعبد الرحمن الصفيَان : حياك الله يابعدي ايوة الله احمل جراكل وعزب وخيام .
وبيني سمعت ان الباترول يصرف بنزين ويقرقع يعني ماهو متماسك على كلام مجربيه وعزمه ماهو بذاك الزود . والله يجمل حالك ماقصرت "

غاوي رومانس : حياك يالغلا ولله زي ماقلت فوق اهم شي تحميل لان العفش واجد . تحياتي لك يالغلا "

ابونبيل : مرحبابك والله ياطويل العمر هذا الي مخليني اميل للهايلكس صرفيه الباترول وعدم التماسك (القرقعه) تحياتي لك "

العنابي 616 : هلا ولله يابعدي والله هذا الي اسمعه ان الهايلكس يتفوق عالنيسان بالصرفيه والتماسك وقل الصيانه اما الصبر والكرف زي بعض تحياتي لك يالغلا "

sgl2002

10/01/2012, 11:26 AM

اذا حصلت ربع نظيف غير ملعوب فيه وكل شي فيه وكالة اخذه

طبعا الباترول يتفوق على الهايلوكس في كل شي

ولا بزيدك انا جربت الشاص ومعي الحين باترول ربع

والله ان الباترول يطلع اماكن ما يوصلونها هل الشاصات

العنابي 616

10/01/2012, 11:31 AM

الله يكتب لك اللي فيه خير
و على شان تتأكد جرب بنفسك و راح توضح لك الأمور جدا

الخلاوي 9

10/01/2012, 12:26 PM

sgl2002 : والله يابعدي على الي شفناه ان الهايلكس يتفوق بحاجتين التماسك والصرفيه وهذه اهم شي اما الباقيات زي بعض يقولون .. واخيرا ان صراحه اقتنعت ماودي الافحوض لكثرة العفش واحيان للحلال .. تحياتي لك "

العنابي 616 : باذن الله بطلع بكرة اجرب الهايلكس والله يعين "

الا يالربع كيف ممشاء الهايلكس الدفرنسيين طبعا بالنفود وبالطلوع وتمشي بالنفود والجبال والوعر كيف تمشي وانت واثق ومرتاح يعني يجمل ان شاء الله ؟

sgl2002

10/01/2012, 01:53 PM

انا ذبحوني الناس بكلامهم عن الباترول انه يقرقع وهذا هو معي واجلد جلد الموت ولاصار قرقعه لكن هي مسكة بعقول الناس

مسالة الصرفية اكيد الباترول اكثر من الهايلكس الباترول ستة سرندل ٤٥٠٠ سي سي والهيلكس نص مكينة الباترول واربع سرندل

باقي الامور كيف تقول متساويين فيها

يعني بالمناطق الوعرة ماتطلع الهايلكس مطلع الباترول لكبر دفرنسات الباترول ونظام تعليقه

لو على كلامك ان الباترول والهايلوكس متساويين كان لقيت الكشاته واهل الحلال وفروا على انفسهم العنا والغثا من الشاص واخذوها

لكن في النهاية اذا انت راعي تحميل فخذ لك هايلكس لكن لاتتفاجأ بالعزم خصوصا بالدبل

مواتر البر الباترول وللاندكروزر غيرها ماصنعوا

ابونبيل

10/01/2012, 02:00 PM

سير على قسم الهايلكس الدبل بتستفيد اكثر وبتلاقي اجوبه على كل اسألتك

عشق البر

10/01/2012, 04:45 PM

لو فكرت تاخذ باترول لا تاخذ كربليتر خذ بخاخ
اقوى عزم واقل صرفيه ومايغثك بالصفاوه
وبالنسبه للتماسك الباترول الديكور اللي يتفكك ويغثك اما تحتية الموتر ممتاز واحسن بكثير من غيره

HAS5SAN

10/01/2012, 05:01 PM

مقارنة صعبه
الهايلكس فئة والربع فئة
عموماً
الربع قوي ويطربك في الطعوس والمراقي وأريح من الهلي
http://t0.gstatic.com/images?q=tbn:ANd9GcQOiMqVWNTlQHZiXl2wIRJcvE8Iu9zNs LPrP8Cmi4-lvRktzczqgvWMyzDO
http://www.google.com.sa/url?source=imglanding&ct=img&q=http://www.t63ysup.com/up/PATRUL1.jpg&sa=X&ei=HEQMT-DfM6qg4gScm-CyBg&ved=0CAwQ8wc4aQ&usg=AFQjCNECF8dhtJ1jJj4EZ1hg4qxqjqLoVw

والهايلكس تستفيد منه في التحميل وارتفاع بطنه عن الارض
http://www.google.com.sa/url?source=imglanding&ct=img&q=http://www.mekshat.com/pix/upload03/images146/mk14800_dsc00184.jpg&sa=X&ei=SUMMT4zJGs344QTUhPWLBg&ved=0CAsQ8wc&usg=AFQjCNFVHeTS64S-7OjtDXgth0KPFSX2uw

http://www.google.com.sa/url?source=imglanding&ct=img&q=http://www.haraj.com.sa/userfiles20/2011-10-28/e3f307f508a9126f638a88ec1794b6c1.jpg&sa=X&ei=rkMMT566Joqi4gSYtpiJBg&ved=0CAwQ8wc4Dw&usg=AFQjCNHaeXTJUosCzwFToMnyqybgcXi0PQ

لا تنسى تستخير الله سبحانه

اليكي

11/01/2012, 12:49 AM

اذا كنت تحتاج الحوض خذ هايلكس ... واذا بغيت الباترول هج وحط
رجلك عن موديل 98 99 .. يبي يبهذلبك بهذه ... خذ لك بخاخ مو كلبليتر ...

الخلاوي 9

11/01/2012, 03:43 AM

بيض الله وجيهكم ماقصرتم وتم صرف النظر عن الباترول ليس عيبا به والله انه موتر كفو ..
لكن فكرت فيها وقلت الهلي افضل لزوم العفش والحلال ويكفي 4 انفار مع اغراضهم وانشاء الله انه يجمل ..

تحياتي لكم ماقصرتم بيض الله وجيهكم .

ذعار الغامدي

11/01/2012, 05:24 AM

حاسب استعمالك اذا عفشك واجد خذ الهايلكس وانت تقول تبيه للحلال مايحتاج يعني اكيد الهايلكس

تحياتي لك ~

الخلاوي 9

11/01/2012, 05:26 AM

ماقصرت اخوي ذعار وتم التوجه للهايلكس

تحياتي لك "

المنيعي1

11/01/2012, 02:06 PM

انا جربت الربع باترول بس كان وكالة موديل 99
أستعملته خمس سنوات وبعته ماشي بحدود 300000 ألف كلم ماطلب شي نهائي أفضل موتر جربته بدون أي أعطال مع اني أجور عليه , اللهم ركبت عليه فرارات وبواجي رياضية لتقليل صرفيت البنزين يمشي معي الى 480كلم بالتفليلة.
الهايلكس جربته مع احد الشباب زينة ولكن لاتقارن بالباترول:
*الهايلكس دبل ماتطلع طلعات الباترول بالنفود .
*أذا جرت عليه ممكن يحترق الكلتش .
*الراحة لاتقارن بالباترول.
*الرساوة بالخط والبر لصالح الباترول.

مواسي الطعوس

11/01/2012, 02:35 PM

- هو يقول انا راعي حلال وراعي عفش ...المفروض مايقول وش رايكم ؟؟؟؟الهايلكس من ها الناحيه افضل له .ومطابقه له .

- هو مثل اللي يقول ابغى موتر اول حرف منه هاء واخره س .باترول ماتجي .

الخلاوي 9

11/01/2012, 03:20 PM

المنيعي1 : هلا والله حياك العموم يارجال مو بشرط يكون احسن من الباترول اهم شي يجمل بالنفود والكشتات البعيده والرساوه ماهي مهمه لا بالبر وباالاسفلت تونا شباب يعني مهنا خلاف انشاء الله اما الكلتش سمعت انه بالجديده 2006 وفوق العموم ماقصرت يالغلا منور "

مواسي الطعوس: ياحبنيلك انا حبيت اسأل عن الهايلكس الدبل كم استفسار ولا الباترول مايحتاج .. وكنت يعلم الله اني ناوي واحد منهم لكن حاجتي للحوض هي خلتني اميل الهايلكس .. واخيرا تحيات لك يالغلا "

المنيعي1

11/01/2012, 09:30 PM

المنيعي1 : هلا والله حياك العموم يارجال مو بشرط يكون احسن من الباترول اهم شي يجمل بالنفود والكشتات البعيده والرساوه ماهي مهمه لا بالبر وباالاسفلت تونا شباب يعني مهنا خلاف انشاء الله اما الكلتش سمعت انه بالجديده 2006 وفوق العموم ماقصرت يالغلا منور "
"
الله يوفقك فيما تختار
واذا محتاج حوض مثل ماقال أخونا مايحتاج أستشارة .
ولكن للمعلومية أي سيارة أربع سلندر دبل ماتحمل الجور في النفود وذلك لضعف المكينة يعني مع الجور يقوم يفلت الصحن ويحترق وهذا ينطبق على الهايلكس والددسن والجيوب الأربع سلندر بستثناء الديزل الأربع سلندر تكون أقوا من البنزين في العزم.