إدارة المـرور الرياض

[غيث 6]

بسم الله الرحمن الرحيم

السلام عليكم ورحمة الله وبركاته وبعد


قصتي مع إدارة المرور


الحمدلله والصلاة والسلام على
ابداء قصتي قبل ثلاث اسابيع رحت للبر بسيارتي الجيب اللي تسوى عندي عيوني
ويوم رجعت من البر يوم الجمعة مساء عطيت اخوي اللي اصغر من سيارتي وقلتله اذا قمت الصبح ود سيارتي وغير زيتها وغسلها طبعا السيارة لاند كروزر 2005
رحت الصبح للعمل ويوم جت الساعة عشر دق علي اخوي وقال اني صدمني واحد وان المرور بيجي اول شي قلتله انت طيب قال الحمدلله والسيارة الثانية راعيها طيب قال الحمدلله بس دقه خفيفة قلت خير انشالله الاستمارة الوتأمين عندك في الدرج واذا احتجتني دق واجيك قال خلاص بعد ساعة ونص تقريبا دق علي وقال ان المرور جاء وقرر ان الخطاء على صاحب السيارة الثانية 100% وانهم عطوني ورقة عشان اسوي تسعيرة اصلاح السيارة عند ثلاث ورش بعدها بنص ساعة دق علي وقال انهم عطوني التسعيرة يقيمة 6400 ريال واني رجعت للمرور وقالو دامها فوق 6000 لازم تروح لشيخ المعارض وراح بالسيارة لشيخ المعارض وقدرها بمبلغ 6700 ريال ورجع للمرور قالو خلاص راجعنا يوم السبت تاخذ قيمة اصلاح سيارتك وعطونا ورقة اصلاح قالو تقدر تدخل سيارتك للورشة المهم يوم جا يوم السبت وراح اخوي للمرور وقال انا جاي استلم قيمة اصلاح السيارة راح العسكري شوي ورجعله وقال خذ هذار قم ابو الولد كلمه وتفاهم معه قال اخوي شلون قال كلمه وتصالحو شف كم يعطيك كلمني اخوي وقلتله دق عليه شف وش يقولك دق عليه اخوي وقال الرجال والله السيارة تكلفتها واجد وبعدين ليش تصلحون السيارة بقطع وكالة ومن هذا الكلام قلت لأخوي لعد تكلمه دقيت عليه انا وكلمت الرجال بطريقة المترجي لإني دريت ان ماعندك احد من ناحية المرور ولكن لرجال قال انا مانب فاض واذا فضيت بكلمك واصلا ترى التكلفة هذي واجد شفلك حل معها وبعدها الرجال معد يرد فيليت تحكمون وتعطوني حل لإن المرور سحب علي وقال حاول معه بالله هذا كلام آسف على الاطالة لكن اعذروني

[قلبي طيب]

اطلب الله ما يضيع حق وراه مطالب

قاتل حتى تنتصر

[][][زلفاوي][][]

لا حول ولا قوة إلا بالله

أنت ما عليك صلح موترك وخل فواتيرك معك "الله يعوض عليك"

و حقك ولا تضيعه لو توصل وإياه للمحكمة دام الخطأ عليه 100% فهو يتحمل الإصلاح والتعويض

[كاشت وحداني]

لابد ان معاه واسطه في المرور
ولا في هذه الحاله ما يطلع الصادم الا بكفيل عسكري وتأمين المبلغ .
قدم شكوى على مدير المرور اللي فيه ملف الحادث .
وان شاء الله تنحل

[عفشك مكمل]

دبر عمرك وصلح السيارة كان الامر يلزم واحفظ الفواتير

وتابع من المكتب الي بالمرور وماعليك

هذي اجراءات وهالجحلط من العسكر يعرقلونها الا اذا شافوك صامل

اذا ماسدد يعممون عليه ويحولونه للمحكمة

هذا موقف مريت به قبلك فخل شغلك طقطقة معهم وخلها من سعة بال

[VXR.2007]

خذ كم صورة لسيارتك قبل التصليح

[صقر باهله]

لا حول ولاقوة الا بالله

لاياغالي لاتترجى ولا شي انت صاحب حق

اما انه يسرح بزرانه في الشارع ويجحد حقوق الناس مب على كيفه

انت اتركه ولاتعبره وبإذن الرحمن هو الي بيبدا يدق عليك

اتصل على على 989 وعلمهم الموضوع كامل وصدقني مدير القسم بكبره بيدق عليك يقول لك وش تامر فيه

وان شاء الله حقك بتاخذه غصب عليه

وابي منك طلب لو طلب ريال تتنازل فيه لاتنازل عنه

عشان يعرف ان الناس مب لعبه له ولبزارينه

[كن مع الله]

الله يعوض عليك يالغالي
اذا انك راعي نفس للمراجعات والمطالة لاتتركها
ورئيي واكرر رئيي اذا انك رجال مقتدر ومغنيك الله
اجعلها صدقة عنك وعن والديك ولينصرنك الله ولو بعد حين

[محب للمكشات]

باين من كلامك ان الشخص اللي عليه الخطا ماعنده تامين ... في هذا الحاله مايحق للمرور انه يطلعه من الحجز الا بكفيل او بسدد المبلغ .....

[عبدالعزيز بن احمد]

وصلها للمحاكم واشتك في كل محل لا تخلي مكان الا وشتك فيه

واذا مشيت على كلام الاخوان وصلحت سيارتك بفلوسك خذ الفواتير ورح للمكتبه وصورها كم صوره

ولا يردك الا المحكمه

اذا بلعت حقك وسكت ماهوب راجعتن لك دراهمك

لا تسكت لا تسكت لاتسكت

ولا دور لك محامي فاهم
اخوي الصغير صدم مصري معه ددسن 2000 وانحاش وخلاه وبعد تقريبا 8 ايام مدرينا الا المرور مكلم ابوي
وسحب عليهم وبعد3 ايام جرجروا ابوي واخوي في المحكم لين سدد ابوي

نصيحه لا تسكت لا تسكت

[غيث 6]

اطلب الله ما يضيع حق وراه مطالب

قاتل حتى تنتصر


شكرا اخوي وصدقت ماضاع حق وراه مطالب

[غيث 6]

[][زلفاوي][][;7895244']لا حول ولا قوة إلا بالله

أنت ما عليك صلح موترك وخل فواتيرك معك "الله يعوض عليك"

و حقك ولا تضيعه لو توصل وإياه للمحكمة دام الخطأ عليه 100% فهو يتحمل الإصلاح والتعويض


والله يا اخوي زلفاوي صلحت الموتر وحفظت الفواتير ولكن واضح ان فيه لعب في المرور

[غيث 6]

لابد ان معاه واسطه في المرور
ولا في هذه الحاله ما يطلع الصادم الا بكفيل عسكري وتأمين المبلغ .
قدم شكوى على مدير المرور اللي فيه ملف الحادث .
وان شاء الله تنحل


الواسطة مافيها كلام معه واسطة في المرور والدليل ان الولد عمره 17 سنة فقط ونص يوم وهو طالع وابوه واثق بس الله يخلف

[غيث 6]

الله يسهل........
وشكرا للجميع وكل من تفاعل معي في موضوعي

[ولد وايل]

السلام عليكم ورحمة الله

اخي الكريم

حولها للشرع والمحكمه في حالة عدم استجابة الرجل

توقف جميع تعاملاته البنكيه والحكوميه

وترتاح من عوار الراس زي اول

[المنيعي1]

حصل معي قبل زمن ليس بالقريب
سعرنا وبالأخير قام يصرفنا وجيت المرور وسوو تسعيرة ثانية وطلعت اغلا من الأوله قالو ياتدفع المبلغ المطلوب او التوقيف.
فا رفيقك هذا أما له أحد عند المرور وقال خلنا نمرمطه شوي او رجال مايجي ألا غصب .
ماعليك منه تروح للمرور وتقول الرجال رفض وأنا رجال أطلب حقي وتنشب بحلوقهم مع العلم ان لهم الحق بأعادت التقييم ثلاث مرات وبعدها يلزمون الخصم بالدفع أو التوقيف.

ملاحظة / أذا لم تجد تجاوب من موظف المرور لاتقف مكتوف الأيدي عندك مدير الشعبه ومدير القسم حتى لو تصل لمدير الأمن العام. فهم يستغلون من يجهل النظام.

[كاشت وحداني]

لو شفت فيه تلاعب من القسم
على طول مكتب مديرالامن العام وبيحولها للمتابعه وربي ينفضون القسم نفض .
وهم يستغلونها واكيد ان المقسوم حاصل حاصل ولا ما بيعطل عسكري المرور معاملتك بلاش
واكبر غلطه لهم عدم توقيف الغلطان واخراجه بدون كفيل وبدون تامين المبلغ .

[محمد آل مغيرة]

أخوي انتبه انتبه انتبه
صور الموتر قبل التصليح ,,,, صور الموتر قبل التصليح
وخصوصا اذا كان اللي صادمك مأمن
حتى لو ماهو مأمن صوره

[غيث 6]

والله الى الآن جاري البحث
الله يسهل

[الهاجر12]

السلام عليكم ماعليك منهم ورح وادخل على مدير المرور بالقوة وانت كلك ثقه وماعليك من احد قله السالفه لأن هذي الواسطة من تحته واذا كانت من عنده تبين معك من طريقة تعاملك معه وكلمه على انك تبي تشتكي ولارح توقفها عنده انا صار موقف اكثر من كذا

[الهاجر12]

صدمني واحد راعي ليموزين من ورى وجى المرور وحط الخطى عليه 100% واخذ الباكستاني للتوقيف وسعرنا الورش طلع حدود 4300 وراح الوالد الله يجزاه خير للمرور انا كنت مشغول وقال هو بروح المهم جاء نفس الشي قالوله الباكيستاني طلع بكفاله طيب جيبوه قالو مانعرف رقمه وين ورقه الكفاله أخذت اسم الكفيل ودقيت على 905 ماله ارقام عطوني اسم ولده دقيت عليه تدرون وش قال قالي ياخي الوالد متوفي قبل 10 سنوات كيف المؤسسه قائمه الى الحين المهم ماعاد اخذت بالأوراق اللي عندي ورحت لمرور الشرق الطابق الثاني ومالقيت مدير مكتب مادري منه المهم دخلت على المدير على طول قلتله السالفه واذا ماتلاقي لي حل انا راح اتصرف تصرف مايعجبكم والسالفه مارح توقف عندك اذا مالقيت لي حل قال انتظر ددقتيين بالإستراحه بعد اشوي لقيتهم يتراكضون من تحت ملازم أول معه اثنين عسكر وناداني قالي بكره تجي تاخذ فلوسك بالفعل جيت واخذت الفلوس وش اللي سوو هذولي الله واعلم بس لاتخلي حقك وانت راعي حق هم الخطأ عليهم والله يوفقك

[volcano]

اذا عندك تأمين شامل صلح سيارتك على التأمين , وخل التأمين يطرد الرجال مع المرور وريح عمرك

[مغلي]

هل الكفيل في هالحاله يكون ملزم بدفع قيمة التصليح الي قدرها شيخ المعارض

او كفيل كلام فاضي ... مجرد اخرج المخطي من الحجز ... وبس
.
.
هل شيخ المعارض معترف فيه 100% من قبل المرور ... او تحصيل حاصل

[مطر وسم]

:l:f:l:f:l:f :good2::good2::good2: