سيارة العائلة ... استشارة واستفسار

[بربنجي]

السلام عليكم ورحمة الله وبركاته
اخواني اعضاء مكشات سلمكم الله
انا افكر وابي استشيركم باذن الله
ناوي بأذن الله تعالى اشتري سيارة للعائلة
طبعا ابي اسالكم وش افضل سيارة للعائلة امس رحت لشركة هونداي ولقيت السيارة زي الفان الي تجي ثلاث مراتب سيارة عائلية كويسة وسعر القير العادي 74 الف والتماتيك 76 الف
ورحت لتويوتا وعندهم سيارة عائلية تجي كذلك ثلاث مراتب ولكن ما شفتها ماهم حاطينها بالعرض وسعرها حول 80 ألف ورحت للهوندا شركة هاشم لكن اسعارهم مبالغ فيها اشوف حيث ان الاوديسيس سعرها نسيت لكن اعتقد 130 ألف ريال
وسؤال وش رايكم اشتري هونداي او انوفا من تويوتا او كيا مع اني رافض كيا يقولون سنتين ثلاث وتنعدم
واستفساري التالي هو انه هونداي وانوفا اربع سلندر هل هناك مشكلة اذا مثلا حملت عليها اغراض او مقاضي مثل جملة وغيرة لان بعضهم يقولون اربع سلندر انحش عنها
وممكن ادبر دفعة اولى حول ثلاثين الف ريال باذن الله تعالى وابي اقسط الباقي و لا ازود عليهن كم ريال واشتري مستعمل من المعارض وهل اجد نظيف وبهذا السعر لو وصلته لاربعين الف ريال
اسف جداً جداً على الاطاله مع علمي ان اعضاء مكشات طويلين بال ويحبون المساعدة قدر الامكان
اكرر اسف والله يحفظكم ويرعاكم

[عبدالعزيز بن احمد]

والله انا اشوف ان التيوتا وش زينها

شفها مع ذا الكدادين ماقالت شي
مثل ماقلت ان الهوندا والكيا كلها 3 سنين وخلاص اما اذا حافظت عليها 5 سنين


وانا ارشح التويوتا

واقولك ابعد عن الاقساط لا تقربها نهائيا


اما عن التحمل ٤ الاربعه سلندر يتحمل هو نفس الهايلكس مكينته حنا ماخذينه ايجار من مكه وحملنا عليه حمل اكثر من الجمله اللي انت بتحمله ورحنا عليه ( الباحه) وتمشينا فيها ٥ ايام ورجعنا


هذي وجهة نظري تتحمل الصواب والخطأ

[يزيد 999]

والله يااخوي بما انك ناوي على فان فارشح لك الوندستار من فورد اول شركه معروفه وقطع غيار متوفره ورخيصه وسياره شعبيه ومرغوبه عند البيع وفخامه من ناحيه الجلد ومراتب منفصله وعزم خطييير
وتحصل بالصالات امريكي نظيف جدا وبسعر مناسب
واهم شي صل صلاه الاستخاره وادع بالدعاء الماثور عن الرسول صلى الله عليه وسلم
تحياتي وموفق

[راكب البترول]

لو سمحت عطنا الميزانيه حقتك;)



اذا عايلتك هه نافارا

واذا وسط خذ باثفندر " اصبر على 2013 "

واذا كبيييره باترول او لاند<اخاف يعلق عليك :p او باجيرو او يوكون وتاهو

كل السيارات الي فوووووق ماشاء الله عليها هذا رايي :p

اخوك / راكب البترول :good2:

[بربنجي]

ما قصرتوا اخي راكب الباترول ويزيد
بالنسبة للميزانية ممكن ادبر اربعين الف او خمسين الف دفعه اولى واقسط الباقي او اني اشتري وحده كويسة من الحراج لانها غالبا ما فيها مشاوير للبر ولا سفر فقط بالرياض على خير أن شاء الله تعالى
بالنسبة اخي يزيد مريت امس شركة فورد وقالوا لي ما عندنا سيارة عائلية
ما قصرتوا وبيض الله وجهكم والله يحفظكم ويعافيك وجيمع المسلمين .. آمين

[يزيد 999]

http://www.haraj.com.sa/11819155/*سيارة_عائلية_فورد_فري_ستار_جميع_المواصفات_م_2007_ */يعطيك العافيه اخوي شف الرابط هذي اللي اقصده

[GMC4Ever]

الله يوفقك للي فيه خير

بالنسبة للكيا فواحد من الزملاء مطلع كيا من 4 أو 5 سنوات وما شاء الله سيارته ممتازة ونظيفة يداوم عليها ويسافر عليها ويتمشى عليها ويمدح فيها.

والأخ يزيد999 ما قصر أعطاك رابط سيارة الفورد

وبالتوفيق إن شاء الله تعالى،،،

[Bader-M]

وعليكم السلام

راح التكلم معاك من منظلق
1- صاحب صنعة (عملي )
2- دراستي
3- تجربتي

انا عندي كيا موهافي له سنتين و نصف و ماشية معاي اكثر من 90 الف كم
ذهب بها الى البر الدهنا و الصمان و الشوكي و المحارق
السفر ذهبت بها الى مكة و القصيم (خمس مرات) و الدمام اكثر من ثلاث مرات طبعا انا من سكان الرياض
والحمد الله لم توجهني مشاكل
كيا و هونداي نفس بعض ولكن الاختلاف في الشكل فقط
يعني محرك الابتيما نفس محرك السوناتا
يمتاز الكوري بسعر مناسب و جودة و قطع غيار رخيص
واذا تبي نصيحتي خذ لك تراجيت زميلي يستخدمه اكثر من 4 سنوات (موديل 2007) و ذهب به لابها اكثر من مره والقصيم كل شهر تقريبا و حتى الان ماشي معاه اكثر من 220 الف كم
اغلى قطع غيرها هي الشداد السير المحرك و سير المحرك و سعرهما لا يتجاوز 230 ريال فقط
يعني ارخص من سير الكامري بدون الشداد
اعتقد انك تجد موديل 2009 م لا يتجاوز 45 الف بالكثير انصحك به
على فكرة المحرك 6 سلندر قير اتوماتيك

تحياتي اليك

[هلي ديزل]

والله انا اشوف الانوفا خيار ممتااز وسعرها جديدة بحدود 75 ألف،،
والمعروف انها نفس الهايلكس من ناحية المحركات والهايلكس مايحتاج شهادة،،

[ذيب الغربية]

نصيحه لاتفكر الا في تويوتا لو غاليه بس جودة

[سلطان1977]

أخوي خذ لك هونداي أو كيا وكلهن نفس الشركة بعد ما شرت هونداي شركة كيا
هذا عصر السيارات الكورية، جودة، متانه، اعتماديه، سعر معقول، وخدمة،
وأما التويوتا فخلاص الجودة مضروبة عندها - وتويوتا تبيع بسمعتها آخر الثمانينات وأول التسعينات ولا لو تنزل سيارات تويوتا بشعار غير تويوتا ما أحد شراها
والله يوفقك للخير

[سلطان1977]

ايه وعلى فكره يالغالي
تقدر تروح أي مكتب تأجير سيارات وتستأجر السيارة اللي ودك فيها يوم أو اثنين تجربها قبل لا تشريها
غالب المكاتب الحين عندهم سيارات كورية صغيره وعائلية

[بربنجي]

بيض الله وجهكم جميعاَ بدون تخصيص
ما قصرتوا واراكم كلها طيبه وانتم اطيب
اخوي bander-m بالنسبة لكيا موهافي ومعك ما شاء الله تبارك الله الله يعطيك خيرها ويكفيك شرها سنتين ولا شفت منها شي هذا دليل انها كويسة باذن الله تعالى
واعتقد سعرها معقول وعلى كذا ان شاء الله اليوم ولا بكره امرهم اشوفها وعسى الله يسهل الامور
اما تراجيت ما عرفها وش هي وش اسم الشركة هل هي كيا او غيرها
اخوي هلي ديزل التويوتا كويسة لكن الفتره الاخيره اشوف الناس تشتكي منها ومن اسعارها المبالغ فيها ولا ادري عن قطع غيارها يمكن غالية مع حسب علمي ان قطع غيار كيا غالية يعني صح السيارة رخيصة لكن يطلعون حقها من قطع الغيار والصيانه
اخوي ذيب الغربية كلامك صحيح تويوتا طيبه لكن الناس خوفتنا منها الفتره الاخيرة
اخي gmc ومدام انك تمدح الكيا والاخوان في بعض الردود يمدحونها ويقولون سافروا عليها
شكلي باتوكل على الله واشتري كيا والتوفيق من الله
مع العلم انه كنت رافض الكيا لدرجة اني مريت اكثر الوكالات ما عدا كيا من الاساس ما جيتهم مع اني مريت من قدام الوكالة بس على كلام الناس ما يمدحونه
ولكن بعد مدح الردود لها ومناسبة سعرها باتوكل على الله واشتري وحده
ما قصرتوا يا اعضاء مكشات وهذي ما هي غريبه ولا غريبه على ابناء الشعب السعودي اهل فزعه واستشارة
حفظكم الله جميعاَ وجميع المسلمين ... آمين

[HAS5SAN]

أرشح الانوفا وبقوة
والله يرزقك من حيث لا تحتسب
http://www.motorbeam.com/wp-content/uploads/Toyota_Innova_2012_Launch.jpg

http://www.google.com.sa/url?source=imglanding&ct=img&q=http://www.toyota4arab.com/upload/i/00007/ae3dzh6w7x31.jpg&sa=X&ei=gr4mT7GzD6aQ4gSS-MD6DA&ved=0CAwQ8wc4Iw&usg=AFQjCNFiKmFWIRbU0Eo9gZoM3jPI8fKiBA

[الذواديm]

التيوتا الانوفا انتشرت بشكل كبير خصوصا تكاسي شف الامارات سياراتهم الكبيره التكسي اينوفا يعرفون انه موتر يتحمل كرف وتعرف تكاسي الامارات طول اليوم شغالين كد

اما الهونداي والكيا ابعد عنهم نصيحه سعرهم ما يمسك بتعيش معاك اقلها 3 سنين واخذ بعدين التهربد والموتر بيتفكك


وعندي لك شور على جمس يوكن اكس ال موديل 2000 بس يبي له صيانه اذا مستعمل تخبر هل موتر يحملون عليه اشياء ثقيله ويخسي يقول لا ما اتحمل بس يبي له صيانه مثل ماقلت لك وبيجيب لك العله اذا كان مكروف

سعره عندنا في قطر حدود ال 34 لاكن في السعوديه مبالغين في اسعاره يوصل الى 45 الف و50 الف



ف ارشح لك الاينوفا شف لك موديل 2009 او 2010 عشان 2010 بيكون سعره رخيص وتحت الضمان بس اهم شي يكون ممشاها قليل وشيك على الموتر من الصدام لي الصدام ويكون تماتيك اريح حق العائله

والله يوفقك

[أبو هشام راشد]

اختيار السيارة المناسبة أمر محير والسبب ليس في جودة السيارات الموجودة بل في الردائة والمبالغة بأسعار قطع الغيار

الحقيقة في بداية موضوعك رشحت الأنوفا من تويوتا مع عدائي الشديد لها لكن لما رأيت ميزانيتك فأرشح اليوكن أو تاهو من موديل 96 تدور لك شيء نظيف في حدود فلوسك لأنه أشوفه الخيار الأنسب بدل من دفع قيمة سيارة أغلب أو قاتها واقفة وخسارة يروح موديلها ويتغير شكلها مثل موهافي من كيا والكوري بشكل عام ممتاز من حيث الاستخدام وأصحابة ينصحونه من حيث قطع الغيار لكن كاعتمادية في السلامة أشوف استخدامه مجازفة

بالنسبة للتراجيبت من هونداي حجمها مناسب ومن شركة عريقة لكن كوري مستخدم ما أظنه خيار مناسب والظاهر آخر موديل نزل عندنا 2008

واتمنى لك التوفيق

[بربنجي]

الاخوه ابو هاشم و

HAS5SAN (http://mekshat.com/vb/member.php?u=35613)

الذواديm (http://mekshat.com/vb/member.php?u=227012)

والاخوان السابقين ما قصرتوا والله يجزاكم خير
بعض الاخوان رشحوا اليوكون ما فيه شك اليوكن زين لكن وين النظيف والجديد سعره شوي غالي مع انه ارخص من باقي السيارات
انا باتوكل على الله واشتري انوفا شكلها بالاخير هي الانسب على الاقل انها تويوتا مع اني ما احب التويوتا لكن وش اسوي اشوف اكثر الاصوات تمدحها
وحسب علمي ان قطع الهونداي غاليه لانها محتكرة
والكيا اشوف بعض الناس يمدحها وبعضهم يذمها والله اعلم
لكن باشوف الوكالة اليوم امرهم ان شاء الله مره ثانية وامر كيا وان شاء الله تسهل الامور
حفظكم الله جميعاً وجيمع المسلمين ... آمين

[Bader-M]

http://moshax.com/classifieds/screens/4cc3f7779854884839c32f298.jpg
هذا صورة التراجيت


...........

بنسبة التيوتا الانوفا سيارة رائعة ولكن سعرها مرتفع مقارنة بالمبلغ الذي ذكرتة (40 الف)
لن تجد الانوفا بهذا السعر
وعلى فكرة هي هايلكس مصندق محرك هايلكس و كذالك القير و الدفرنس (ربما اختلاف بنسب فقط )

تحياتي اليك

[بربنجي]

اخي بدر

يعني التراجيت هونداي والهونداي ما فيه شك شركة قديمة وجيده
لكن رحت انا لهونداي قبل يومين ما لقيت عندهم تراجيت الي لقيتها فان او زي الفان اسمها H-1 بسعر 74000 للقير العادي والتماتيك يفرق زود الفين ريال
بامرهم ان شاء الله مره ثانية واسالهم عن التراجيت اليوم ولا بكره ان شاء الله
حفظكم الله ورعاكم

[بربنجي]

على فكره اخوي بدر صورة التراجيت الي وضعتها حلوه وشكله زين

[ابو حامد888]

اخي العزيز في سيارة اسمها فورد فلكس سياره مطنووووخه للعائلة شكل وجوده وقوه وثلاث مراتب ومريحه جداً


http://www.blogcdn.com/www.autoblog.com/media/2010/05/11flextitaniumwhtsued.jpg

[ابو حامد888]

http://media.ed.edmunds-media.com/pictures/VEHICLE/2011/Ford/2011.ford.flex.20333062-E.jpg

[ابو البر]

في عز الصيف والدنيا تطبخ مالك الا سياره مثل اللي يستخدمونها اللي يوصلون الطالبات

شف بالشوارع وش نوع السيارات .

وبتلاقي
تويوتا وبس .

[- النشمي -]

اخوي نصيحه اخويه خذ من اي شركه الا تويوتا وخصوصا انك تبي سياره عائليه

انا فقدت الثقه بهالشركه عقب مشاكلها الاخيره



تحياتي

[المطرب]

انا رأيي مع اللي يقول اليوكن وخاصة الاكس ال وانا والله بعت جيب موديل قديم لان العايله ماشاء الله كل مالها تزدحم ودورت على يوكن وفعلا غالي جدا بس الحمد لله حصلت يوكن زي الورده وماهو ماشي بس والله مقروص بقيمته موديله 2005ابيض بدون دبل بس ما شاء الله مركب رسمي ووسيع خاصة اذا شلت المرتبه الخلفيه اللي يتمدد يتمدد على كيفه نظيييف اخذته مع النقل والتجديدات بسبعين الف والحمد لله مرتاح وللمعلومية ترى الامريكي بدأ يزقح سعره فووووق وخاصة الام في الكويت اسعارها نااااار
هذا رأيي ولكم ودي

[بربنجي]

اليوكون فكره طيبه لكن ما ادري محتار صراحه اخاف اطيح بواحد مستعمل يبلشني بصيانه ووروش
والجديد سعره ما فيه شك ارخص من باقي السيارات لكن ما ابي اشتري جديد ما يحتاج لان سعره غالي على الشغل الي محتاجه له
والله اعلم الحين قاعد اقلل الخيرات وخليتها على الهونداي او الانوفا
والتوفيق بيد الله ما قصرتوا وبيض الله وجيهكم وعلى ارائكم والله يحفظكم ويرعاكم