ديوان قصائد خليل بن هدلان

[علي الحبابي]

السلام عليكم ورحمة الله وبركاته


والصلاة والسلام على سيدنا محمد وعلى آله وصحبه وسلم


أما بعد . . .



اقدم اليكم ديوان شاعر سطع نجمه في ساحة الشعر باابداعه وجزالة شعره


وهو الشاعر المعروف الشاعر الكبير ((خليل بن ذيب بن هدلان )



قصيدة مشاركته في شاعر العرب





برق .. وهبوب .. وذكريات قديمات=وغلا مداهيـل سقاهـا الغمامـي
هزت شجون القلب واخذت سجات=وابعدت عن زخم المدن والزحامـي
في خايع لا رحت له بعض الاوقـات=كني علـى الدنيـا محصـل مرامـي
لو المـرام اللـي تمنيـت بالـذات=اقفت بـه الايـام مثـل الحلامـي
وامضيت لي في تختخ البيد ساعـات=من الضحا حتـى ولـوج الظلامـي
ما اشوف به حي ولا اسمع به اصوات=الا هوى الغربـي ونـوح الحمامـي
اتبع هجوس البال من حيث ما جات=وفي شفهـا ذبيـت روس العدامـي
ومن عالي شفت القفـار المريفـات=تشدى نقوش معورجات الوشامـي
وهديت فكر ضـاري بالجزيـلات=وستل جناحه واعتـلا ثـم حامـي
وساعة لمح بالجو للجـول حومـات=صطى على شـرد القوافـي شمامـي
وصاد البيوت الساميات الفريـدات=النادرات اللـي عليهـا الكلامـي
صيد يجمل مـن يـروم الجمـالات=ويشبع مذاق اهل العقول الفهامـي
هـدو يقـدم للوجيـه السفيـرات=مـع بالـغ التقديـر والاحترامـي
وللقول فعل وللمواجيـب حـزات=لادقـت الساعـه وشـد الحزامـي
الطايله لـو دونهـا العمـر فـوات=آرد عليهـا مثـل ورد الحيـامـي
ورثٍ ورثته من شيـوخ البطـولات=الشامخيـن المقدمـيـن الكـرامـي
شاعر ولي في حومة العـز وقفـات=والله يعديـنـي دروب الـمـلامـي
والشعر وهبه من بديـع السمـوات=وله قيمةٍ يسمو بهـا كـل سامـي
والعرف رحله لاكتساب المهـارات=دومن التجارب يستفيـد العصامـي
والرجل رامي والمكاسيب شـارات=ولا يصيـب الطيّبـه كـل رامـي
ولا كل من طب البحور الغزيـرات=يجيـب در دونـه المـوج طـامـي
ولا كل من يسرج ظهور الاصيلات=يثني ليـا منـه غشاهـا عسامـي
ولا كل من شال السيوف الرهيفات=يروي شباة السيف والكون حامـي
ولو كل طير له كفـوفٍ شطيـرات=محدٍ فـرق بيـن القطـا والقطامـي
ولو التمنـي يـدرك المستحيـلات=اروت ضحاضيح الخلا كل ضامـي
الله جعل بين الرجـال اختلافـات=وصارت مقاييس القـدر والمقامـي
واكبر دليل ان السنيـن العسيـرات=يظهر بهـا بيـن الاسامـي اسامـي
امثال ابن هـادي زبـون الونيـات=وشالح وذيـب مخضبيـن الحسامـي
وعقاب بن سعدون ستر العفيفـات=وراكان بن حثليـن زيـزوم يامـي
من وقعهم تشبـع سبـاع مجيعـات=اليا حصل بين الجمـوع التحامـي
ماهيب تمثيـل وبطولـة روايـات=ودور درامي في مسلسـل درامـي
واليوم ياعصر الرخـا والسلامـات=نشت قنوف الخير شـرق وشامـي
وقامت تزبر كنهـا خشـم ابانـات=وهلت مطرها عقب عـج وقتامـي
ومنها ارجعت شهب الديار المحيلات=وصارت تزاهى بالنفـل والخزامـي
وزانت مراتيع الفيـاض العشيبـات=ورعى بها اللي ما يعـرف الجهامـي
فيها الجمل يمشي على غير مشهـات=وش عاد لو يبنـي عليـه السنامـي
اليا بـرك مـا يحتمـل للثقيـلات=واليا وقف مالـه شـداد ومسامـي
تمسي به وتصبح كبار الطموحـات=ويزمي على شوفه من البعـد زامـي
وبينه وبين اللي زمى لـه مسافـات=يشيب منها اللـي بحـل الفطامـي
ماله ياكود الصبر لو جـاه ميـلات=وعزالله انه لـو شكـا مـا يلامـي
وهذا سبيل الوقت من ماضي فـات=لا زان عـام ماصفـا كـل عامـي
ولو الظروف تقدر اهـل المـروات=مابه عزيـز مـن زمانـه مضامـي









قصيده في خادم الحرمين الشريفين الملك عبدالله بن عبدالعزيز ال سعود( حفظه الله )




مـا لاح بـرق بالمـزون المزابيـر=سلام وابعث بالتحيـه واشيـدي


بك يالذي طورت بالـدار تطويـر=وبذلت مجهودك على مـا يفيـدي
وجمعت عدل وقو بـاسٍ وتفكيـر=ومكـارمٍ جمـه وفعـلٍ فريـدي
وطيبك يابو متعب يفوق التعابيـر=واكبر من المادح ونظم القصيـدي
وحبك تعمق في قلـوب الجماهيـر=وفي كل يومٍ والولا لـك يزيـدي
ياللي ليا مـن كلحـن الاشاويـر=تفتل ياراع الشور شورٍ سديـدي
ولك سطوةٍ تشدى لحـد البواتيـر=ويهابها من كـان عقلـه رشيـدي
ويمناك فيها يا ابيض الوجه تحريـر=من كبله فقر الدهـر بالحديـدي
انتـه ذرانـا بالليـال المعاسيـر=وانته رصيد اللي ما عنده رصيدي
تعطي وتصخي ما حصل منك تقصير=وانت الكريم وشعبك المستفيـدي
وتقول انا في خيـر مدامـه بخيـر=وتفرح ليا شفت السعودي سعيدي
وشعبك ليا حلت صدوف المقاديـر=درعك وسيفك بالنهار الشديـدي
عزالله انه ما يبـي غيركـم غيـر=ولا يطالب فـي نظـامٍ جديـدي






قصيده مهداة إلى صاحب السمو الشيخ محمد بن راشد آل مكتوم ( حاكم دبي )



سلام للوافـي زبـون المهمـات=من شاعر صاغ البيوت وتكنهـا
تسليمة لـو قـدرت بالريـالات=غطى على الشعب الخليجي ثمنهـا
لحاكم دبي اللي يعسف الصعيبات=شيخ تزبن ديرتـه مـن زبنهـا
قايد وتحتـه للقيـاده قيـادات=ويصدر قراراتـه ويامـر وينهـا
وداره تزاهت بالوفـا والمـروات=والعز كله نابـتٍ فـي وطنهـا
لعيونها راهن بكـل الطموحـات=وكسب طموحاتٍ عليها رهنهـا
وشد العزوم وروض المستحيلات=ثم قادها قود الذلـول برسنهـا
وفتح مجالاتٍ ووسـع مجـالات=ودرب كوادرها وطـور مهنهـا
والفقر وظروف السنين العسيرات=جهز نصايبهـا وجهـز كفنهـا
وضيق عليها في كلا الاتجاهـات=وخلع سباياهـا وفـرق ظعنهـا
وقف لها وسيوف جوده شطيرات=واليا انحرت له كل مـره طعنهـا
بالصبح غاراتٍ وبالليل غـارات=حتى لحدهـا بالقبـور ودفنهـا
وشيّد عليها شامخـات البنايـات=واللي جهلها ينشد السحب عنها
وتقول له مريت رمز الحضـارات=دارٍ ولد ( راشد محمد ) سكنهـا
تحلم به ويحلم بها طيـب الـذات=وتوافقت الاحـلام منـه ومنهـا
فارس وعاشق له فتـاةٍ مخبـات=ويحتار وصفي بين كنـه وكنهـا
غيداً يعاملهـا بفـن ومهـارات=وعاشت معاه اروع ليالي زمنهـا
اليا زعل جت له على كل مشهات=واليا رضى من كل وده حضنهـا
ودامت بظله في نعيم ومسـرات=والله من صدوف الليالـي ومنهـا
واخر كلامي يابديع السمـوات=ارعه وصنه من الصوادف وصنها

[علي الحبابي]

يا زماني كل ما خلت مرزمـة الغيـوم=استخالت وابعدت والعيـون تلدهـا
والرجا من جاير الياس عيـا لا يقـوم=وضيق صدور الهقاوي وبيح سدهـا
قال لي لا تتعب النفس والوضع محسوم=لا تعنـي والمقاديـر محـدٍ ردهــا
قلت له لا تندب الحظ وتشيل الهموم=وكل حاجة بالزمن فيه حاجة ضدهـا
التحلي بالصبـر والمثابـر والعـزوم=يوصل النفس لمناهـا وغايـة ودهـا
والتجارب مدرسة والتعلم كل يـوم=والدروس تشيب الروس يوم نعدهـا
والحياة بحور يغرق بها اللي مـا يعـوم=كل نوب يصطفق جزرها مع مدهـا
والمراجل صرح يبنى على طيب السلوم=والغبي اللي ليـا مـن بناهـا هدهـا
وللظروف سياسة بالدفاع وبالهجـوم=مرة نغزي عليهـا ونـوب نصدهـا
وبين لافوح المشاتي ولا هوب السموم=نسبر لشرد الفرص والحظوظ نهدهـا
والسباع تصوم لو كان ما تنوي تصوم=الزمـان يحدهـا والحمـى محتدهـا
ما بقى الا تسهر الليل كله مـا تنـوم=وتقنب بعال الجبل والسنـون تحدهـا
وكل سبع صار في تالي ايامه خـدوم=لو جمع بين القسا والشجاعه والدهـا








البارحه يابوي كثرت طواريـك=كنك على ماضي سنينك تعـدا
من قو باسك ما تبين شكاويك=جبار مابيح لك الوقـت سـدا
لو تنهدا الاعمار والله لا اهديك=زهوة شبابي في مشيبـك تفـدا
الله يطول في حياتـك ويبقيـك=وتاتي لك ايامك على ما تـودا
وانه من صدوف الليالي يعديـك=ياللي بطيبك نفتخـر وانتقـدا
اكبر سعاده يوم ابرك وابديـك=وعلي نفسك قبل نفسـي تبـدا
واكبر سعاده يايبه يـوم البيـك=لبيه من قلـب لصوتـك يـودا
واكبر سعاده يوم اقبل اياديـك=في نشوة منها الرضـا مستمـدا
واكبر سعاده يايبه يوم اخاويـك=للمـدن والا خايـع مجرهـدا
واسمع علومك واتسلى واسليك=وينزاح هـم فالحشـا مستبـدا
واكبر سعاده يوم اصافي مصافيك=واقدر اللي لـك رفيـق مـودا
واعني وازور اللي يزورك وياتيك=واجنب اللي عنك جنب وصدا
واضد عدوانك واعادي معاديك=وآقف على درب العدو واتحـدا
لك اعتبرني طـوّل الله لياليـك=عبد مليك في لزومـك يسـدا






ياصاحبي كانـك لشوفـي تمنيـت=جيتك يا خلٍ يبهج البـال شوفـه
لا تشكي الفرقا وانا مثـل عانيـت=فرقاك يوم الوقت جـارت ظروفـه
لك صاحب واللي فرض حجة البيت=تتـل قلبـه مـن معاليـق جوفـه
الى ذكر وقت مضى قـال ياليـت=وقامت هواجيس الضمايـر تلوفـه
ومدامني يـا غايتـي بـك تحليـت=لوعات بعدك فـي لقـاك مخلوفـه
تحكي لي عيونك ولو مـا تحاكيـت=نظراتها مكتـوب واقـرا حروفـه
تقول ما غيرك من النـاس حبيـت=واقول مثلـك نـادرات وصوفـه
ودام الغلا في قلبك مشيـد بيـت=شـرع لبيبانـه وكـرم ضيوفـه
وان كان تنشد فالزمن ويش سويت=قلت الطموح اكبر من اللي نشوفـه
سقت الهقاوي في طريقـي وعنيـت=نفس ما تشكي لو لحقهـا كلوفـه
في مجاهد الدنيا كم اقبلت واقفيـت=ذيب يحـوف وقـدرة الله تحوفـه
واليـوم ياللـي مالغيـرك تمنيـت=جيتك ياخل يبهـج البـال شوفـه

يامضحي بمستقبلك لاجل ماضيك=مستقبلك قدمك وماضيك فاتـي
اللي مضى لا تنشغل فيه يلهيـك=عمـا تجيـب ايامـك المقبلاتـي
خسايرك في سالف الوقت تهديـك=جملة دروس عن ظـروف الحياتـي
لو تطرد اللي فات ماعاد يمديـك=تلحق بركب سنينـك الماضياتـي
ادفع طموحك قدم وابذل مساعيك=وكل احتمالات القـدر وارداتـي
ولا ترتجي حي يغيثـك ويعطيـك=الا العظيـم مكـون الكاينـاتـي
توسل اللي لا توسلـت يوحيـك=واليا طلبتـه ياتـي الخيـر ياتـي
الله كريـم ومـدةٍ منـه تغنيـك=والا البشر ما من وراهـم غناتـي



الزمان يـدور والخيـره خفيـه=والفرج في غرة الصبر معقـودي
ابـذل المجهـود والنيـه مطيـه=وللروابع شوح والمرقا سنـودي
يـارد الجمّـال ويدلـي دليـه=مانشد ويش الصدور من الورودي
يدحم ويشرب من الجم الرهيـه=ويروي كبودٍ وياسم له كبـودي
والنجاح يزيـد عـزم ومعنويـه=كل ما حصل على دربه حسودي
والفشـل يعيـش مالـه قابليـه=وصاحبه يذكر ولا هوب معدودي
ان لفـى للقـوم مالـه مقدريـه=وان تعدى قيل جعلـه مايعـودي
لو قضى عمره على روحه وجيـه=بالوجود وكن ماهو بالوجـودي
والوهايب من عطـا رب البريـه=ماهي من السوق تشرى بالنقودي



من لا يحسـب لليـال المقابيـل=تحملـه دنيـاه مـا لا يطيقـه
ومن صدق الاخبار في كل تفصيل=يضيع ما بين الوهـم والحقيقـه
والحق سيفه لا صطى عدّل الميـل=والفعل شاهد والمواقـف وثيقـه
والصدق يلقى في طريقه تساهيل=ما فيه حاجه تعترض في طريقـه
والكذب مهما كبرته الدهاويـل=عزمه ضعيف وكل عارض يعيقه
والناس فيها فرق بالحال والحيـل=والفرق حتى بالشقيـق وشقيقـه
وللطيب بصدور النشاما مداهيل=مثل الدرر جوف البحور العميقه

[علي الحبابي]

يامرحبا ترحيبة تنعش الروح =من روحي ابديها على روح روحي
لا تعتذر لي يا هوى البال مسموح =الحب يشفع والمولع سموحي
خطاك عندي جرح وفراقك جروح =وبعد البطا شوفتك بلسم جروحي
طيفك يباريني على وين ما اروح =وحبك سطى بالقلب عيا يروحي
امشي بعد فرقاك من غير مصلوح =واكفن احلامي واعزي طموحي
يمكن حمام الورق يدله عن النوح =الا ليا من شاف حالي ينوحي
واليوم في لقياك من صادق البوح =يا مرحبا بك والمخاليق توحي





ما كل من يمشي عيونه تقديه =كم مبصرٍ يمشي مع الدرب تايه

يتبع ميول النفس وابليس مغويه =متوسلٍ بالكذب من شان غايه

ولو كل راعي كذب تمشي حكاويه =كلٍ صنع له بالحكاوي روايه

واللي يقول ويحسب القول يكفيه =قصده يسوي بالمجالس دعايه

لا بد يوم يكشف الوقت ما فيه =ويبين قدم الناس فعله ورايه

وتعكس صعيبات المواقف خوافيه =مثل ما تعكس للوجيه المرايه

اما يحقق بالهدف يوم يرميه =والا بلاش من الهدف والرمايه



اصدق ظنوني فيك واكذب التقصير = وعنك اتخيلّي معاذير واقبلها
وابرر بنفسي حاجةٍ مالها تبرير = واغطي حقايق واقعك واتجاهلها
ولو كان صدك بان له بالحشا تاثير = ليا قصّرت حبال المواصيل اطولها
وعلشان ما اهدم الغلا وارخص التقدير = اعرض احتمالات الجفا واخذ اجزلها
وزمانٍ مضى يعطيك للي حصل تقرير = ادور رضى خاطرك والعالم ازعلها
ولا زال لك عندي مكانه ووضعٍ غير = ولك قيمةٍ لا جيت يمي تحصلها
وهذي رساله صغتها باصدق التعبير = تحمل الوفا والود .. والصدق يحملها



مالك ومال الناس ومجامل الناس = اللي يعزك واجب انك تعزه
واسرج حصان الطيب في كل نوماس = ورمحك على جزل المكاسيب كزه
ولا ترخي سموعك معا كل بلاس = وسدك عن سموع المخاليق وزه
واللي مغلٍ من نجاحك ومحتاس = وقدره يفوح ومشعل الحقد قزه
خله ولك سيره وقيمه ومقياس = ومثلك هروج اهل الحسد ما تهزه
واخذ الكلام اللي من الراس للراس = وانهج على درب الوفا والمعزه




خليتني بين الرجا والمناجاه = مثل الغريق اللي يدور نجاته
اسبر لطيفك والمحه واتحلاه = واشوف له في كل صوب التفاته
واسهر على ذكرى زمان قضيناه = واسج به واهيم في ذكرياته
وبيني وبينك من يودك وتهواه = يوصيك واسمع مايلي في وصاته
ارفق عليه من الوله يوم تجفاه = الهجر موته والمواصل حياته
واجب عليك تصون وده وتحماه = وتروف به روف الغني بغناته
وان حال من دونك ظروف تحداه = وقف معه حتى يحصل مناته




لا تعذلون اللي يزور المداهيل = لو ان ماله بالمداهيل حاجه

لو خدها ممحل ولا علّه السيل = ويهب نوده ويتركز عجاجه

عنده تساوي شط دجله مع النيل = وفيها عناه وسلوته وابتهاجه

يشتاق شوف رسومها لا اقبل الليل = شوق المفارق لا انتظر للمواجه

في سجته يلقى رموس وتماثيل = لا شافها يدله ويضحك حجاجه

تغنيه عن مجلس هل القال والقيل = وسوالفٍ بين العيا واللجاجه

يلقى بها من ضيقة الصدر تعليل = لا جار به وقته وكدر مزاجه

كنها تقول اصبر على الهم ويزيل = والضيق له عند الولي انفراجه

والغيب علمه بالليال المقابيل = وكلٍ على ما قدر الله يواجه




الله من قلب تسوقه هقاويه =يم الطوال النايفات الرفيعه

ما طاوع العذال لو كان تنهيه =لو قالوا إن ما طاعك الوقت طيعه

يا عاذلين القلب هذي مناويه =وهذا هوى باله وهذا ربيعه

ما هو تصنع والتصنع لراعيه =وراع التصنع غير راع الطبيعه

وان ضقت من دار جفوني اهاليه =سجت القدم وفجوج ربي وسيعه

ورجواي باللي ما يخيب لراجيه =ورجوا بغيره تاليتها قطيعه

والوقت مهما جار ياللي تراعيه =لا تشتكي واصبر بما تستطيعه

وان قلت هذا الوقت شانت مواريه =الجوع ما عذرب سباع مجيعه

والحظ لو كلٍ يبيعه ويشريه =يا كثر من يشريه والا يبيعه

واللي كتب للعبد لازم يلاقيه =لو بينه وبينه حصون منيعه

ولا بد من يوم يحين الوعد فيه =والعمر يمضي والليالي سريعه

[علي الحبابي]

اعداد وتقديم

((وسمي نجد))

وهذا اقل مانقدمه لشاعرنا الغالي خليل بن هدلان



وباالتوفيق للجميع

تقديري واحترامي