شوفوا وش صار معي يومغيرت الزيت بيدي

[سليمان الصقر]

السلام عليكم ورحمة الله وبركاته صبحكم / مساكم الله بالخير
يوم من الأيام قررت أعتمد على نفسي رحت لمحل زيوت بالجملة وشريت 7 علب بترومين الترا سفن وقلت أبي أغيير زيت زيارتي الغالية جي اكس آر2011 وطبعن جبت العدة وانسدحت تحت السيارة وطلعت لي المفاجأة الاولى : لقيت الصرة بايزه وملصقها بمعجون أحمر ومندية وقاعدة تنقط زيت !!!! واللي قاهرني أن الهندي صاحب البنشر عميلي ومن سنين مايقارب عشر سنوات المهم غيرت الزيت وزيينت الصرة وشفت التكلفة ولا الفرق ماهو بسيط كان صاحب البنشر ياخذ مني مايقرب 120 ريال ويوم غيرته أنا بنفسي كلف علي ما يقارب 75 ريال ، واللي ساعدني على الفكره هو إني زينت مشاية مرتفعة شوي على شان تطلع عليها السيارة وبعدها أصبح من السهولة جدا تغيير الزيت أو التشييك على السيارة

أرجو أن أفدت ودمتم بخير

[SAS2]

ما شالله عليك انا الصراحه تخرب سيارتي بس ما ازين فيها مسمار اهنيك على عزمك

بس قهرني هالهندي الي ما علمك عن خراب المسمار وانت عميله

المهم ياليت الكل مثلك وبارك الله فيك

[نفداوي]

مافيه عميل عند هالاجانب انت محفظه مال متحركه +نحن ناس عندهم مال وكسالا ويجوز اخذ اموالهم باي طريقه

[عبدالعزيز بن احمد]

والله ازين ما سويت وجعل يديك ما تشوف النار

الوالد الله يطول عمره ( امين) حاط في اخر المزرعه حفره ونغير زيت سياراتنا بانفسنا وهو يجيب كراتين يشتريها جمله حول 8 كراتين ونغيرها
والله يوفقك والى الامام

[سيف وقلم]

زين إنك اكتشفت الخراب صح إنه متأخر وشكل الهندي خايف إنك تلاغيه

والمشاية بكم زينتها ولو يحصل صورة شيء طيب يبيلنا وحدة

[YUKON_GMC]

الصره دايم تبوز وتخرب في اغلب السيارات ... البعض منهم من زود الحرص يشد عليها بقوه ومع الفكه المره الثانيه تلاقيها بدأت تضعف

انا ثلاث مرات اشتري صرة زيت جديده والحمد لله ان اللي يخرب دايم سنة المسمار ولاهي سنة الكرتير مع اني دايم اوقف على رأس العامل وهو يفك لأن بعضهم مايعرف الفك من الشد

[v506]

عقبال ما تشتري مفك الفلتر وتغير السيفون :)

[ابونبيل]

ماشاء الله عليك يالذيب

بس ياليت تورينا الي ترفع عليها الموتر..

[GMC4Ever]

الله يعطيك العافية وما شاء الله عليك.


مافيه عميل عند هالاجانب انت محفظه مال متحركه +نحن ناس عندهم مال وكسالا ويجوز اخذ اموالهم باي طريقه

صدقت

[ماون ماركز]

هذه مشكلتك الثقة بالعامل ..

ما تجلس على رأس العامل وتطالعه وهو يشتغل ..

وتنزل للحفرة عقب ما يخلص .. تشيك على مسح الزيت وعلى الصرة وشدها

حتى وأنت معطيه فلوس .. أنزل بعده وشيك

[قطب 999]

من ايام علبة الزيت ب 4 ريال وحنا نغير بانفسنا والصره تبوز بسبب اهمال العامل واستخدام مفك تجاري منتهي عمره حتى ذي يبخلون بها مع ان ارباحهم ضعف التكلفه
لا تنسي خذ السيفون عند محلات العدد مثل الحزم او الدريس وخلهم يعطونك على المقاس كاب الفك

[مسير عليهم]

ممكن تفيدنا عن الرافعه وهل هي ترفع الكفرين الاماميه بس او السيارة كلها

لان اللي نعرف لازم تكون السيارة وقفتها متساويه عشان الزيت ينزل كله بالكرتير

[YUKON_GMC]

^^^

اتوقع ان الرجال عنده مزرعه او حوش وسيع او برحه حاط فيها صبات او شيء تطلع عليه السياره كامله


ليس بالضرورة وجود حفره لتغيير الزيت

تكفي 4 قطع من رافعة السياره تشتريها جاهزة ويمكن ان تصنعها بنفسك اما من خشب او حديد او اسمنت لكن الافضل حديد عند ورش الحدادهـ
وهذي صورتها





http://img29.imageshack.us/img29/7416/ramps1.jpg (http://img29.imageshack.us/i/ramps1.jpg/)
http://img853.imageshack.us/img853/6163/ramps2.jpg (http://img853.imageshack.us/i/ramps2.jpg/)
http://img3.imageshack.us/img3/5158/ramps3.jpg (http://img3.imageshack.us/i/ramps3.jpg/)

[HAS5SAN]

اهنيك والله
وهذا الشغل السنع
انا قبل فترة صرت اشتري الزيت بالكرتون
واروح للبنشري يغيره فقط وتعال شوف المعاناه
مافيه بنشري يرضى يغيره لأن الزيت مو من عنده
بصراحة معاناه تقول متفقين
الخلاصة
فكرتك اروع من الروعه
الله يوفقك

[YUKON_GMC]

^^
تدري ليه يرفضون يغيرونه لك ..؟؟

لأن المكسب خمسه ريال قيمة فك الصرهـ وماتسوى في نظرهم ..

لكن لو التغيير مع الزيت من عندهـ يكسب فيها فوق 25 ريال للسيارهـ الواحده بدون السيفون والفلتر

[ابونبيل]

صادق اعرف واحد شرا الزيت وراح عند اليمني وقاله هذا زيت حطه بالموتر قال لا ما احطه انت تبيني اخسر.!!
المهم اخرتها قاله عطني 30 ريال واغيره!

[سعلي]

اخبرنا بارك الله فيك هل تغير السيفون بنفسك؟؟؟
لان هذا هو المتعب

انا اغير الزيت بنفسي وعندي رافعات حديد لكن المشكلة تغيير السيفون هو الي جيب الهم

بالنسبة لمشاكل الصرة في حالتين الحالة الاولى من المفك لازم يكون بمقاس الصرة ودائري من جميع الجهات والحالة الثانية لا تشد على الصرة لانها من الحرارة رايحة تنلحم لحام ما تنفك.

[ولد الأجاويد]

هذا الشغل السنع والله

الله يوفقك

ياليت أحد يعلمنا طريقة تغيير الزيت بالصور والشرح وياليت يكون فيه فيديو

بصراحة شي جميل أن الواحد يتعب في حلاله

[كاتم الشكوى]

أفضل اشتر الزيت بالكرتون ومن نفس الموزع
حتى يكون أرخص بالسعر
وغيره بنفسك
بالتوفييييييييييييييييييييييييق لك

[ابا الصلابيخ]

ياجماعة وهل يفرق الزيت با الكرتون

[حلم البحر]

الحمدلله الي ماانظر موترك الله يعطيك من خيره ويكفيك شره الي سويته احسن شي ولاصرت تشيك على الموتربنفسك احسن واحسن الموترأخدمه يخدمك
بالتوفيق ان شاءالله

[حلم البحر]

ياجماعة وهل يفرق الزيت با الكرتون

أغلب شي بالكرتون يفرق ونا أخوك
بس حنااسمحولي اقولهافينا كسل
تحياتي لك

[شمالات نجد]

أهم شي الزيت بعد التغيير وين توديه!!

وأهنيك على اعتمادك على نفسك وهذا شغل بسيط المفروض كلنا نسويه

وفقك الله والجميع

[YUKON_GMC]

^^

اما تعبيه في جركل ولاطلعت للبر تاخذه معك وتكبه او إذا عند بيتكم برحه تحفر له حفره وتدفنه او الاسهل ولايضر تكبه في المجاري اكرمكم الله وتصب فوقه مطهر او بنزين بسيط حتى ينظف المجاري

[العنابي 616]

شي جميل إن الواحد يشتغل بنفسه

أخو يوكن جمس
كب الزيت في البر من أكبر الأخطاء لأنه التربة اللي بيجيها الزيت بتقعد عشرات السنين ما تنبت و راح تتلوث التربة
الحل سهل تروح عند اقرب محل زيت و تكب الزيت عنده و راح يستانس العامل لأن الزيت المستخدم يبيعونه على مصانع إعادة تكرير

[مطنوخ عبس]

أغلب شي بالكرتون يفرق ونا أخوك
بس حنااسمحولي اقولهافينا كسل
تحياتي لك



نعم وانا اخوك يفرق واجد

انا البارح شريت كرتون زيت نوع شل 24 علبه

ب 245 ريال
يعني 245تقسيم 24 =10،20
والبنشري يحسبه عليك ب13 او14
وهو طالع عليه باقل من عشره
هذا غير العشره ريال حقت التغيير
ياحليلنا مستثمرينا الاجانب لا كن توبه اغير عندبنشري

آسف على الاطاله بس حبيت ادلي بدلوي بلموضوع

[ماون ماركز]

^^

اما تعبيه في جركل ولاطلعت للبر تاخذه معك وتكبه او إذا عند بيتكم برحه تحفر له حفره وتدفنه او الاسهل ولايضر تكبه في المجاري اكرمكم الله وتصب فوقه مطهر او بنزين بسيط حتى ينظف المجاري

كب الزيت في المجاري ممنوع .. وتأخذ عليها عقوبة لو أكتشفوك
ممنوع دولياً ويحذر منه دائما ..

خصوصا اذا كان عندك مجاري .. لأنهم يجون ينظفون المواسير الرئيسية كل سنتين
فيحصلون زيت ..

واذا عندك بيارة .. يغلق مسام التربة اللي حول البيارة .. فما عاد تصرف الماء نهائي

الصح يدفن في الأرض ..

[ابودعسان]

انا نفس الحكايه اغير الزيت والسيفون بالاستراحه
وافك السيفون بابوجلمبو لاني ماتذكر اشري مفك سيفون الا اذافكيت الصره
وماشيه معي زي الحلاوه ×

[خشير الذيب]

كفو ولاهنت

[س.س.التميمي]

الله يعطيك العافيه علي هالتقرير والفكره

[.أبوعبدالرحمن]

وعليكم السلام ورحمة الله وبركاته

ما شاء الله تبارك الله


أحسن ما سويت فالعماله سواءا أنت عميل ولا مانتب عميل أهم شيء عندهم نهب الفلوس

وبحكم إنك عميل يضحك في وجهك بس هذا عشانك عميل ، أنا معامل محل تغيير زيوت من

عام 1992م وللأسف إلى الآن لازم أشيك بعدهم على نقص الزيت وتقفيل الصرة وترجيع

الصاجة من بعد مقبل أكلته منهم قبل يمكن 6 شهور في الصرة

[خيال المفخره]

ياخي والله يا فينا كسل ماتتوقعه .. المفروض انت تغير زيت سيارتك وتضللها وتعمل اي شي يكون سهل ع الاقل
ماهو يجي هندي ولا بنجالي من اقصى الدنيا وماعندهم سيارات ويتمعلم علينا

واهنيك الصراحه يا سليمان

[أبو هشام راشد]

مشكلة العمالة الاستهتار وعدم المعرفة ومن بعضهم تقصد التخريب ..
تغيير الزيت مشكلة في الزيت المستخدم وين توديه ووش لون تنظف فلتر الهواء .

واضم صوتي بطلب صورة للرافعة

[khayyal]

شباب والله انا اكسل واحد ولا احب المس السياره ابد ما ادري ليه رغم اني احب التصليح في البيت والكهرباء بس الميكانيكا مالي فيها.

بس صراحه .. اكثر ما يخرب سياراتنا هالورش .. مرات كثيره تغير زيت وتشوفه ينقص او حتى يختفي من المكينه والسبب انهم يغشوك في الزيت او ما يسكر الفلتر او الصره صح .. ولي كم سنه مكتشف ان الورش تجيب الوسوسه والخراب وقمت احاول اروح لأي سعودي على قد حاله واعطيه المقسوم واخليه يغير الزيت وفرق كبير والله يعني %90 من الورش غش وتلاعب.

السنه هاذي صاحب لي فتح ورشه وقال جيب سيارتك غير زيتها عندنا وبديت اوديها واودي معاي الزيت بس ما يرضى ياخذ فلوس والامور زينه الا مره صارت لي سالفه وما عاد اودي سيارتي عند عمال ..

غيرت الزيت عنده مع السيفون وبعد كم يوم طلعت خط مستعجل واذا علامة نقص الزيت تطلع واوقف في محطه الا يقول شكل السيفون مو مركب صح ويليك .. قال لي افكه واغيره وازيده زيت ، قلت اوكي ... وذيك المحطه فيها اثنين يمنيه ماشاء الله كل واحد اضخم من الثاني ما قدروا يفكوا السيفون!! .. وش السواة .. قالوا شوف محطه ثانيه ما قدرنا عليه ... واخليهم يزيدو الزيت علبتين للفل واطلع من المحطه وانا في الطريق وتطلع لمبة النقص مره ثانيه واقرب محطه وادخل الا اثاري لعبهم في الفلتر زاد التسريب والا السياره كلها من ورى زيت ويقعدوا العمال يحاولوا يفكوا السيفون ولا فيه فايده!! .. وتخيلوا يزيد الزيت عشان امشي شوي والا ناقصه 6 علب! .. والله ان السياره كان راحت علي المكينه .. وكل اللي اتكلم عنه مشي نص ساعه بس ولكن الحمدلله المحطه اللي بعدها بعد تعب شديد ولما قلت لليمني ماني طالع الا لما تفكه قدر يفكه في الاخر وغيرت الزيت.

ولكن المكينه قامت احيانا تطلع شوي صوت او ما اشغلها .. يعني ماعادة المكينه مثل اول.

وهذا شغل العمال .. ما عندهم ذمه .. يعني الواحد ماله الا يشوف له واحد سعودي يثق فيه او يغير الزيت بنفسه اذا يبي سيارته تدوم.

واللي يسأل الزيت بالكرتون ارخص .. اكيد ارخص باقل شئ 3 ريال للعلبه ومثل اللندكروزر ياخذ 8 علب مع السيفون يعني مبلغ مو بسيط الفرق. طبعا مو كل محل زيت بيعطيك سعر الجمله لو اخذت كرتون لازم تروح للموزع. هذا غير ان كثير من الورش يحاسبك عن زيت تويوتا مثلا واذا منت على راسه يحط لك زيت مغشوش او حتى الزيت البراميل المعاد تصنيعه وشوف عاد الفرق كم في السعر يالطيب

تحياتي
الخيـَـال

[سليمان الصقر]

ألف شكر و ألف تقدير لكل من تفاعل وشارك ولو بنظرة للموضوع والحقيقة الاخوان ما قصروا ، أجابوا عن جميع التساؤلات وبالأخص أخونا يوكن جمس ولا يهونون باقي الأخوان

[Abu Mryea]

كفوووووووو

وعلى قولة المثل ( ما حك جلدك مثل ظفرك )


وبالنسبة للي يبي يشتري بالكرتون بأسعار أرخص من غيرهم


في الرياض - صناعية العويضة - الشارع العام المتفرع من شارع الأمير سلمان


فيه محلات كفرات وقطع شاحنات وزيوت وبطاريات ووو

فيه محل جديد صراحة صرت اشتري منه يوم لقيت صاحب المحل السعودي

شغال بنفسه في المحل ,,, ( محل السنيدي )

أولى من اشتري من غيره , ابن البلد أولى

[هاوي قناصه]

الله يعطيك العافيه
لاكن رفع ضغطي هالمروح مخرب الصره والسياره جديده

الله يعطيك العافيه جهد تشكر عليه

[رحاااااال]

بيض الله وجهك و الله يعطيك العافية.

[منصور العاطفي]

فعلا المتابعة للعمالة مهمة
ولو كنت تعرفهم من زمان
وفكرك الرافعة جدا جميلة

[صاحب نوماس]

ماشاء الله عليك اهنيك على عزيمتك اخوك والله مايغير غير قالوكالة و ب 210 ريال

[أطلال نجد]

أهنيك على عزيمتك وحرصك أخوي
نحن شعب أكثرنا تعود على الكسل والإعتماد على الخدم والعمالة في كل صغيرة وكبيرة من شؤوننا
وياليت الحد على غيار الزيت
الآن حتى عند مغسلة الملابس أو البقالة تشاهد البعض منا يقف وهو داخل سيارته وينادي على البائع ويطلب كيس الخبز واللبن !
تحياتي لك

[سيف وقلم]

الطريقة الصحيحة للتخلص من الزيت تضعه في علبة وتذهب به إلى أقرب بنشر حيث يعاد تكريره

[demax]

شيء طيب الواحد يعتمد على نفسه

للتنبيه انتشرت نوعيات تجاريه من الزيوت (معاد تصنيعها محليا)

لذا اشتروا كراتي علب الزيت من الوكيل مباشر لضمان الحصول عالأصلي