تجهيز الباترول للاوديه

[اس اس اس]

عندي باترول 90 ربع
السياره اداوم عليها في وادي كله حجار تقريبا 20 كيلو وماشاء الله السياره ماشيه تمام التمام
بس المشكله
احسه ينااقز ووجه السياره ينزل ويطلع كيف اخليه ثابت
تصدقون ربع التويوتا في الاوديه اريح منه
وبصراحه الطريق وعر
وش اعدل على السياره بالظبط مساعدات يايات
مع ان كل شي في شد بلد

[السيد60]

السلام عليكم

اذا السيارة عندك فيها يايات
ترا لها بوالين تركب داخل اليايات راح تخلي السيارة اريح

والاخوان ماراح يقصرون معك ويعطونك ارائهم

[مقلع الرمث]

والله من رايي انك تبيعه وطقلك ربع تايوتا مادامه اريح

[البواردي5]

ركب قدام مساعدات جيب شاص او ربع بس يكون من موديل 2000 وطالع يجي غاز

والخلفيه ركب مساعدات شاص قديم موديل 87 . يجي زيت

صدقني رايح تدعيلي كل مانزلت من الازفلت ومسكت الجلد........

[شاص نيسان 93]

عدل في الوادي وخل السياره

[اس اس اس]

السيد ٦٠ وعليكم السلام
شكرا على تعقيبك اخي الكريم بس وين احصلها البالونات ذي
اخوي مقلع الرمث
السياره بصراحه عزيزه علي كثير
المشكله عندي بمقدمة السياره اكثر شي مو ثابته
اخوي البواردي
هل مساعدات الجيب الشاص ٢٠٠٠ تركب بدون ترهيم نفس مقاس الباترول
ونفس الشي بالنسبه للمساعدات الخلفيه تركب بدون ترهيم
شاص نيسان
شكرا على المرور

[sgl2002]

الكفرات هل هي عريضة ام سلق

[عشق البر]

^
^
^
سؤال مهم الكفرات لازم تركب كفرات حجريه
وركب طقم مساعدات استراليه ( مورنو رخيص وزين )

[المنيعي1]

هذي ضريبة الراحة في الخط الباترول القديم مريح جداً أريح من الربع تويوتا وأريح من الباترول من موديل 98 وفوق والسبب الياي لين . فيكون مريح مع الخطوط المعبده والمستويه ولكنه مزعج في الطرق الوعرة.

الحل أنك تركب ياي أسترالي ومساعدات رياضية أو ركب ياي موديل 98
بس مع الخط تقل الراحة شوي.

[اس اس اس]

اخوي sgl2002
الجنوط هلل والكفرات سلق نحيفه
اخوي عشق البر يعطيك العافيه
اخوي المنيع
هذا اكثر شي عجبني في الباترول مريح في الطرق المعبده وفي الطعوس بس في الاوديه لا
وانا حاليا استخدمه في الوادي فقط
بالنسبه للياي الاسترالي اركب امامي بس ولا كامل

اخواني بالنسبه لهواء الكفرات كم اخليه بحكم خبرتكم

[Abo gssar]

مستحيل يكون ربع تويتا الين من نيسان اتوقع عندك مشكلة في موترك

[bad boy]

ركب طقم ياي استرالي قدام وورى 2 سم وركب مساعدات شاص ورى
وقدام ركب ياي من موديل 2000 وفوق

[ساكن الحنو]

خذها من تجربه طويله جدا مع النوعين النيسان ركب يايات استراليه خلفيه واماميه 3 سم مع مساعدات البلد وطقم معهن كفرات بالون وانس المطب والمناقز

[sgl2002]

الباترول انا جربته بالطرق الوعره ممتاز وانسيابي\

يعني يرقى الحصاة والجرف بدون صعوبة

واذا كنت تبي تخففه شوي من المناقز مالك الا مساعدات شاص

[.أبوعبدالرحمن]

أخوي الغالي :


ركب طقم يايات استرالية


ومساعدات مورنو طقم


وهل الكفرات حجرية أو حقت تحميل لأنه فيه ناس أهم شيء عنده سلق لكن ما يفرق بين هذي وهذي


مثل هذي حجرية


http://www.mekshat.com/pix/upload05/images238/mk36760_k.jpg





والثانية تكون نقشتها مثل كفرات الدنه أو الدداسن القديمة مثل هذي


http://www.mekshat.com/pix/upload05/images238/mk36760_iip.jpg


http://www.mekshat.com/pix/upload05/images238/mk36760_iio.jpg


لأنه شفت وأعرف ناس كثير ما يفرق بينها ويقول لي ركبت كفرات حجرية وهو مركب زي اللي في الصورتين


الثانية والثالثة

[ابوسند9]

هذا بلاء ابوك يا عقاب
اما مسئالة ان الربع اريح فهو مافيه شك اريح وخاصه بالوعر والطرد!!
شف وانا اخوك يايات هذا الموديل كويسه ولا تبدلها ولاشي انت شيك على المساعدات لاتكون خربانه وانا اشك فيها ما دام مع الوجه ينزل على طول
عاد اذا تبي الراحه ركب بالون وخلى الهواء على 15 وحط بيالة الشاهي على الديكو وتوكل على الله ولا يردك شي

[اس اس اس]

احب الشكر كل الشباب الي ردوا
وابشركم ركبت مساعدات شاص ٢٠٠٠ اماميه وثبت وجه الجيب

[Abu Mnsor]

خذ مني هذه المعلومه وانا اخوك
عن تجربه شخصيه

اول حاجه ركب كفرات بالون نوع ماكسس
ركب ياي استرالي 2 سم طقم
مساعدات استرالي اصفر طقم

راح تدعيلي