انا مخير بين 3 جيوب وش تنصحوني تكفون

[جمس دينالي]

السلام عليكم

كيفكم يالربع .؟

انا مخير بين 3 مواتر

وحددولي وش افضلهم وهي

نيسان باترول موديل 97

نيسان باترول موديل 98

نيسان باثفندر موديل 2003

ابي الافضل من ناحيه

شكل - قوه - تحمل - صبر - تماسك - اداء في البر

قطع الغيار سعرها معقول - الصرفيه معقوله

[. ذيب ساحوق]

باترول 97 ممتازه جدا بالبر ولايشكي من اي شي وقوي من ناحية مكينته والدبل والقطع متوفره ورخيصه وشكله زين

هذا رايي الشخصي من واقع تجربه وشوف الاخوان وتجاربهم

[كاشت وحداني]

ارشح ال ٩٧ والله يدلك
اذا كان نظيف

[عبدالعزيز بن احمد]

انا اقولك خذ ال 97 فيه كل المتطلبات اللي تبيها

شكل
قوه
صبر
واسعار القطع معقوله
و خفيف في البر


والله ييسر امرك

[فهم العدواني]

97 وبسسسسسسسسسسسس

[بدر العبدالعزيز]

دور النظيف و المكينة والقير


والسعر

[sgl2002]

كلها زينة الا الباثفندر نصيحة لا تاخذه

ترى مشاكله واجد ولايمشيك ممشى الباترول في الاماكن الوعرة جدا

والباث 2003 خصوصا مشاكله واجد

خذ الباترول بس تاكد قبل ماتاخذه من حاجات:

الحرارة + راس المكينة هل جاه شي من قبل + مايكون فيه تفتفه + الجنزير حق الدبل + افتح غطا الرديتر وتاكد ان مويته نظيفه +

وترى الباترول موتر مايطلب شي ويصبر على الجور بس لاتلعب فيه وتغير فيه عن الوكالة

98 انا كان عندي وصراحه افخم وارسى وممتاز
و 97 اشوف الناس هابه فيه مع انهم نفس المكينة ونفس البطن اللهم الهيكل يختلف

لكن اذا اخذت 97 غير الديلكو الى الكتروني افضل


وبالنسبة للصرفية لاتسمع للي يهذري ويقول الباترول يصرف وانا احلف انه ماقد جربه

الباترول اذا كانت وزنية الكلبريتر من الوكالة وماهو ملعوب فيه ومعمول له تصفية كاملة مايصرف

وانا جربت شاص 2009 تويوتا وجربت لاندكروزر 94 وجربت باترول 98 كلبريتر والحين معي باترول 2009 بخاخ وكل الجيوب نفس الصرفية ولاتختلف وبالعكس الشاص اكثرهم صرف

يعني اذا قمت عليه تدعيس وشد بالنمر وسرعه يشفط البنزين ،، واذا رجلك هادية عليه مايصرف شي

[ساكن الحنو]

لا تشاور 97 ممتاز صبر وتحمل شرط يكون نظيف

[عاشق بانيلي]

:lاخوي انا ارشح الجماعه بس البترول ممتاز سوا 97 او98 مبروكه وكد ومد:f

[aooa]

الباترول موديل 97 طبعاً ..
لكن صعب تجد النظيف
باترول موديل 98 اذا سلق تراه يختلف عن 97 تدخل عليك حراره من تحت عند القدمين حراره موت وقد ما تسوي من عازل ما فيه فائده ويختلف عن 97

لو قلت باثفندر 2002 كان قلت لك خذه بعد باترول 97
لكن 2003 انواع المشاكل وتخبيط ..

[فهد 333]

عليك بالاستخاره
وشكرا

[برق 8]

انا افضل 97 باترول اذا كان نظيف ونصيحه ابعد عن الباثفندر

[ليل الشمال]

لا اله الا الله

[العتيبي 88]

ياغالي اذا حصلت 97 نظيييييييييييف خذه ولاتشاور .. ولا خذ لكـ 98 بس خذ فل كامل راح تدعيلي رساوهـ وموتر .. يعجبكــ ،، واي شي تبيه انا حاضر واحرص على البخاخ ..

[ابونبيل]

الباث عيوب صناعيه الى الليل
وال98 ثقيل مره وعزمه شين
97 طير شلوى خذه بس

[أبوغيث 2003]

الباثفندر توافيق

يا يجيك كله خرابات

ولا يجيك طيب لو تسوي فيه كل المصايب ما ضرهـ

فنصيحتي الباثفندر لا تشتريه إلا من واحد تعرفهـ

[Abusliman]

الباترول 98 افضلهم
هو الـ 97 عيال عم بس الشكل يختلف فقط
العزم واحد وكلهن يكدن بس شف الي يعجبك شكله واستخر وتووكل
الباثفندر مدري عنه بس ما يصف مع الباترول

[دحيم الفزعة]

رايي هج عن الباثفندر
وخذ النظيف من 97 أو 98 مع أني أفضل 97 بكثيييييييييييييير

[مكشات ابو]

ال97 ولا تشااااااووور قوة وصبر وشكل وملك الصحراء يعتبر

[سفاري959]

انصحك في الباترول اذا تبي وسع واكثر تماسك خذ 98

اذا تبي اخف نفس بس تماسكه اقل واضوق من 98 خذ

97 اما الباث انحش واذا تبي شوري ورأيي دور 98

نظيف وماراح تندم بإذن الله

موفق يالغالي

[طارق الحريري]

كل النقاط اللي ذكرته تصف ل97 الا صرف البنزين من واقع تجربتي لموديل 99 كبريتر وربع بعد يالله يمشي 500 كيلو اذا سرعتك 100بعد طبعا انا لو انحديت على هالمواتر اخذ 97 ولو اقدر ارهم ماكينة تويوتا بخاخ بيصير مضبوط عزم مشاكل مافيه واتوقع على خفة بديه التانكي يقطعك 600كيلو على سرعة 110 الى 120 واذا فليساتك زايده وما تبي ترهم خذلك فتك 2004 عزم وصرف بنزين اقل بشرط بدون مداعس والله يوفقك بالموتر اللي يسرك

[برق روق]

الباترول 97 من واقع تجربة وانا اخوك
قوة ومتانه وتحمل بأصعب الظروف
واحرص على البخاخ اريحلك
بالتوفيق

[المنيعي1]

السلام عليكم

كيفكم يالربع .؟

انا مخير بين 3 مواتر

وحددولي وش افضلهم وهي

نيسان باترول موديل 97

نيسان باترول موديل 98

نيسان باثفندر موديل 2003

ابي الافضل من ناحيه

شكل - قوه - تحمل - صبر - تماسك - اداء في البر

قطع الغيار سعرها معقول - الصرفيه معقوله




ابي الافضل من ناحيه

شكل - قوه - تحمل - صبر - تماسك - اداء في البر

قطع الغيار سعرها معقول - الصرفيه معقوله

الشكل و الأدا في البر وقطع الغيار معقولة من نصيب الـ 97

القوة والتحمل والصبر والتماسك والأداء في البر وقطع الغيار معقولة والصرفية معقولة من نصيب الـ 98

الشكل والقوة والتماسك والأداء في البر لابأس به وقطع الغيار معقولة والصرفية لاتذكر من نصيب الباث فندر

[المنيعي1]

من واقع تجربتي لموديل 99 كبريتر وربع بعد يالله يمشي 500 كيلو اذا سرعتك 100بعد
تعقباً على ردك أخوي عن صرفية الباترول الربع موديل 99 أنا مجربه لمدة خمس سنين
يمشي 480كلم على سرعة 140 إلى 150
وكذلك جربته على سرعة 120 يمشي معي 655 كلم
والموتر كبليتر وكالة اللهم أني مركب فرارات وجنوط سفاري فقط.

[((ابوملاك))]

وبالنسبة للصرفية لاتسمع للي يهذري ويقول الباترول يصرف وانا احلف انه ماقد جربه



لا تحلف وانا اخوك انا مجرب الباترول معنا وكاله على ايامه 97 الشكل القديم

والله انه يصرف صرف مهوب صاحي

[سفاري959]

لا تحلف وانا اخوك انا مجرب الباترول معنا وكاله على ايامه 97 الشكل القديم

والله انه يصرف صرف مهوب صاحي


لا نكذبك ولا نكذب الرجال لكن جاء معي اثنين 92 و93 طباً صالون

الثنين والله صرفيتهم معقوله جداً واني اتحدى البخاخ في الصرفيه واحد منهن

مشاني فوق 550 والسرعه مابين 120 الى 140

[غاوي رومانس]

عندي باترول 97 خليجي

الحمدلله رب العالمين مكينة كد ومد وقطع غيار متوفرة وقوة في البر

والحرارة مية المية

موتر طير شلوى

بصراحة بالنسبة لي اقول خذ لك باترول 97 افضل من الباقي وتوكل على الله

ولاتنسى الاستخارة

[sgl2002]

٩٨ ربع كان عندي

انا اتوقع ٩٨ اخف صرفية

اللي كان معي يطق ٥٠٠ كيلوا اذا الممشى ١٤٠ بالمكيف

[AHMED989]

باتروووووول 97 :good2::good2::good2:

[مخطور]

[QUOTE=جمس دينالي;7994079]السلام عليكم

كيفكم يالربع .؟

انا مخير بين 3 مواتر

وحددولي وش افضلهم وهي

نيسان باترول موديل 97

نيسان باترول موديل 98

نيسان باثفندر موديل 2003


كل اغلب المكشاته يتكلمون عن موديل 97 فقط والقليل تكلم عن 98 والباثفندر محد مدحة
عموما انت ياصاحب الطلب اذا انت راعي ابل ولا راعي غنم وقبلك بالبر خذ لك 97
واذا كنت كشات ورعي روحات خفيفه للبر عليك بموديل 98 ( بالنسبه 4 ابواب صالون وليس ربع )
انت لا تفكر بالسيارة من ناحية وحده فكر بكل النواحي
مثلا سيارة بر ومقناص
سيارة سفر وخطوط طويلة
سيارة مناسبات وشخص
ارجح انا من موديل 98 وطالع افضل من ناحية الحجم ومن ناحية الموصفات اذا كان سوبر سفاري وعدم ادخال الهواء بداخل السيارة ومن ناحية التماسك
وكذلك مكينته 4500 افضل من مكينة موديل 97 تكون مكينة 4200
كذلك صرفيه البنزين في الموديلات الحديثة اقل وعلى واقع تجربه جب لك موديل 98 وركب له هدرز وركب فرارات ومرواح كهربائية -- مشاءا راح يصير اخف من الكامري بالقيادة والعزم وهذه نصيحة من واقع تجربه

[ابن الغظنفر]

الله يطعمك من خيره ويكفيف شره افضل 97 قوة في البر وخوي sgl2002 ماقصر

[وهج الحياة]

ما اعرف صراحة في الباترولات ولكن كل اللي اقدر اقول له أدعي لك بأن الله ييسر لك الافضل ويبارك لك فيه

[ابو بدر العتيبي]

97 اسأل مجرب حمار كده

[abo naser 1]

السلام عليكم

انصحك ب 97 وتحت بشرط تأخذه مكمل ومصيون تأكد من هذه الأشياء قبل لا تشتري
1- مكينة بلد بدون توضيب او نقص زيت الراس بدون مسح او تدبيل الوجه ويكون حرارته ماتعدى الربع مع المكيف.
2- بطن الموتر يكون منفوض جلد رباطات مساعدات يايات أصلي.
3- ديكوراته ومراتبة تكون نظيفة.
4- الدبل تأكد من الجنزير.
5- يكون صافي بدون تقطيع او تفتفة

[عاشق حوووره]

97افضلللللللللللللللللللللللللل

[التعـ King ـديل]

انا ارشح لك الباترول سواء 97 ولا 98 ترا كلها زينه

لكن ال 97 حق كرف وجلد عملي بدون تكلف .. وال 98 حق كرف وجلد برضو ولكن افخم من ال 97

[أطلال نجد]

جميعها موديلات عمرها الإفتراضي قد أنتهى
وإن كان ولا بد
فأنا أنصحك بالنظيف منها

[هاوي فتك2004]

انصحك بل باترول 97 ويكون كلبريتر انحش عن البخاخ اسأل مجرب

[ابوخالد6]

الله ييسر أمرك إن قدرت تصرف النظر عنها كلها أفضل

[ابو رسيل2]

باقفايندر
لانه احدث

[Bader-M]

98 افضل خيار

[النهر الجاري]

باترول 97
شكل
قوه
تحمل
خفيف جدا بالبر

[عاشق السيل]

لاباث ابعد عنه ،،

إذا ناوي تبيع من قريب خذ الـ 97

إذا ناوي ترتاح بالمركب وتكد الموتر وتسلم من الخرابات خذ الـ 98 بشرط يكون بخاخ !!!!

[ابو محمد السهلي]

انصحك هج عنهن كلهن

دور فكس اوجكس من 97 الي 92 كلهم نفس بعض في المكينه والمحركات اهم شي مكيفين وموتر متماسك كد ومد وقليل خرابات وموتر يعتمد عليه × اذ انت في جيوب النيسان لاتاخذ الا موتر نظيف ترا الكسره مشاكله كثيره اما الباث مايصلح على كلام اللي جربوه اما عني ماجربته

لكن النيسان والتيوتا جربتهم كلهم