استفسار عن الفورد اكسكيرجن ( شبيه الجمس )

[الشهابة]

السلام عليكم و رحمة الله و بركاته


ابسألكم يا هل الخبرة و المعرفه عن


الفورد اكسكيرجن الكبير العائلي ( شبيه الجمس )


معروض عليّ واحد موديل 2000 و ماشي تقريباً 260 الف كلم و حجم المكينه 10 سلندر و دبل


السيارة خليجية و البودي إن شاء الله نظيف


كيف استخدامه و قطع غياره و صيانته و من جربه وش عيوبه وش مميزاته


و خصوصاً إذا كان في اغلب الوقت بيستخدمه سواق


و هذي صورة شبيهه للمذكور أعلاه


http://www14.0zz0.com/2012/02/28/20/906295457.jpg (http://www.0zz0.com)

[أبو مسفر]

ماله شعبية وكبير والاكسبديشن أكثر منه شهرة وشعبية ويجي منه شاص طويل
واتوقع سعره دون 20000 ريال مادام موديله 2000 والا لا ؟

[الشهابة]

هلا بك يا أبو مسفر ..

من ناحية ماله شعبيه كلامك سليم .. و انتشاره قليل .. و بالنسبه للحجم إن بغيت الحق فهو و الله يعتبر حجمه كبير و لكن بالمقابل وسيع من داخل و يشيل اللي تبي بالراحه .. السعر يقول راعيه صل السوم حول الـ 25 الف ريال .. و انا و الله محتار و خصوصاً بحجم المكينه الـ 10 سلندر و الممشى أحس انه واجد عليه .. يسلمك ربي و شاكر لك مرورك

[HAS5SAN]

ما انصحك فيه ابد ترها 10 سلندر
وفيه نوع بدبل ونوع بدون

[الشهابة]

اخوي HAS5SAN ..

انا تراني على جريف و دزوني و اطيح متررد في مشتراه .. و خصوصاً مثل ماقلت أنه 10 سلندر و هذا اكبر سبب يخليني اتردد .. و النوع هذا بدبل .. شاكر لك و مقدر مرورك و رايك ..

[ابونبيل]

اتقي الله تعطي سواق 10 سلندر !!

فلوسك بتروح على البنزين خذلك جمس كانك تبي موتر كبير على الاقل اقل صرفيه

والله يوفقك

[البناوي 12]

:Dانننننححححححش.اسمع الكلام..الله يرزقك احسن منه......

[الشهابة]

ابو نبيل ..

و الله ماودي اعطي السواق سياره بنفس حجم المكينه هذا ( 10 سلندر ) .. بس هذا اللي لقيته في حدود سعر 25000 ريال .. لأن الاكسكيرجن موديله 2000 و بنفس السعر لقيت جموس موديلاتها 93 و 94 و 95 و حالتها تعبانه ..

[الشهابة]

البناوي 12 ..

جزاك الله خير على النصيحه .. و الله العالم اني صرفت نظر عن السيارة ..

[ابونبيل]

اشر لك فان فورد او هونداي اذا للسواق تراه وسيع ورخيص والجموس القدام مافيها خير خراب الى الليل

[ملك الفكتوريا]

المشكلة لو السيكل خسارة بالسواق



لكن الجمس هذا ما شاء الله وأسأل من ركب وساق وجرب مريح وعزم بالخط وقوة وصرفية مقبولة بجانب 10 سلندر والممشى صحيح واجد لكن لو نظيف اشتره واستخدمه انت وحافظ على تغيير الامور الاستهلاكية سنويا وبتوصل الـ 600 والـ700 بالراحة هذا فورد مو لعبه يكرف

[الشهابة]

ابو نبيل ..

سيارات الفان تعقدت منها بسبب فان الهونداي H1 .. غربلني في عيشتي خرابات و اعطال بعضها غريب و بعضها سخيف و لكن يعقد الأمور و ما صدقت على الله اني تخلصت منه بأرخص الأسعار .. شاكر لك مرورك

[الشهابة]

ملك الفكتوريا ..

لو السالفه على السواق او عمال كان هانت .. و لكن اللي بيركب معك السواق ما تبيهم يتعبون او يتضايقون بسياره صغيره او بسياره كل يوم و الثاني خربانه او محتاجه لصيانه .. نقول يا رب تيسر الأمور و في ظني إن الاكسكيرجن الحين بعيد عن خاطري .. شاكر لك مرورك ..

[مافيه]

اخوي انا ماجربت ولا لي خلفيه عن السياره

لاكن اذا كان الموتر نضيف ومركاته ممتازه توكل على الله وخذه ((ولاتاخذه الا وانت فاحص محركاته كمبيوتر ومجربه قبل))

خصوصا ان سعره يعتبر رخيص 25 الف على مثيله مافيها خساره وان اتعبك بالخراب دفه بالسوق على اقل تقدير يجيب ال20 وهو عجل

وبهاذي القيمه تتعب مالقيت لك سياره بنفس مواصفاته وموديله

الا اذا كان عندك امكانيات تزيد المبلغ هاذا شي راجع لك

[درب الصحراء]

اتقي الله تعطي سواق 10 سلندر !!

فلوسك بتروح على البنزين خذلك جمس كانك تبي موتر كبير على الاقل اقل صرفيه

والله يوفقك

10 سلندر ما هي مقياس لصرفية البنزين

مكاين اللاندكروزر والشاص وال FG هي 6 سلندر وصرفيتها اكثر من 8 سلندر الامريكي ومن ال 12 سلندر

فيه فرق بين مكاين فيها تقنية خفض استهلاك الوقود وبين مكاين بدائية

ومن ناحية السيارة الي اعرفة انه تم ايقاف تسويقها من كم موديل

وبالتوفيق للجميع

[ابونبيل]

^^^
خويي كان معه مثله بس ونيت 8 سلندر يشرب شرب

[الشهابة]

جزاكم الله خير للجميع يا اخوان ..

بصراحه السيارة صرفت نظر عنها نهائياً .. بعد سؤال شخص جرب السياره بنفس المواصفات و لكن بدون دبل لمدة سنتين ..

من تجربته .. العزم ما شاء الله سياره جباره و لكن القير يتعب مع المكينه و وضب القير و العداد ما وصل 80 الف كلم .. حجم السياره متعب في الرياض مع الزحمه و الحفريات و سبب له حكات كثيره في البودي .. قطع الغيار ما تعتبر غاليه و لكن ما يعتبرها رخيصه و مشكلتها ما تتوفر في الغالب الا في الوكاله .. بالفعل بعد سؤال كم معرض قالوا اخر موديل عرفناه عنها كان 2008 و لكن الوكاله يقول مبيعاتها انخفضت عند 2010 !! و السياره موجوده و لكن بالطلب !!!