تكفون ياهل العرف دلوني على اللي يفيدني

[عنيزاوي تبوكي]

السلام عليكم ورحمة الله وبركاته
انا اشتريت GXR بريمي وارد اليحيى 2010 والحمدلله ماشي معي ممتاز بحفظ الله وأجي اصلي هاك اليوم واطلع من المسجد والقاه مصدوم من ورى على حرف وزاوية الصدام الخلفي ومنشق
واروح لوكالة تويوتا بحكم اني اشيك عليه عندهم ودخلته اول الصيانات قالولي مانصلح الخليجي لان عندنا الصدامات والداخلي يختلف اللهم باقي البودي هو اللي يتشابه
ولو نركب لك صدام عبداللطيف جميل شهر وبينفك وبيكلفك شغل وتركيب حوالي 1200ريال

تركته ورحت لاكثر من ورشه لكن مو بالرياض قالوا نخيط الصدام ونلحمه ب 600 ريال
بس اني ترددت خفت مايضبطون البويه لي او تتقشر من الهوى ومع الايام

وش الراي يااخوان والجيب حرام وتوه جديد وحرام يقعد مصدوم

[SAS2]

بسيطه يالغالي لا تخيط ولا شي بالرياض فيه ورش متخصصه بتلحيم الفيبر جلاس

مثل صدام موترك باستخدام (( شبك صغير و كاوية )) وبدون ما يفك الصدام

والنتيجه مثل (( الوكاله )) وأحسن وانا شفت النتيجه على فكسار انكسرت اللحيه

ولحمها بنفس ألطريقه والله ما تدري ان فيها كسر من اول المهم مالك الا الرياض

وبالصناعيه يدلونك على الورش المتخصصه بتلحيم الفيبر وبالتوفيق انشالله

[التعـ King ـديل]

عندك حل من اثنين

تروح للبازعي وتشتري صدام من عنده لان مواتره خليجي

او

تلحم عند حقين الفيبر بالصناعيه القديمه وبدلك على واحد محترف اذا بغيت

[عنيزاوي تبوكي]

العضو sas
العضو كنق التعديل
شاكر على مروركم والله فرجتولي الله يفرج لكم
انا ودي لو تزودونني ببعض اسماء الورش ومكان الصناعيه المذكوره لاني بجي الشهر القادم وجيتي محدوده والله وودي اروح على بينه
ولكم وافر التحيه

[التعـ King ـديل]

عنيزاوي حياك في اي وقت وقبل تجي بيوم او يومين عطني خبر ومالك الا طيبه الخاطر ابشر بسعدك وكل اللي تبيه موجود

[عنيزاوي تبوكي]

امين ان ربي يوسع عليك ياخوك

بالنسبه للتواصل عن طريق المنتدى

[اذاني]

ماعندك مشكله اشتر الصدام جديد من وكلاء الخليجي واصبغه في اي ورشه

وعلي فكره تري صبغ الصدام الفيبر مايعيب الموتر كثير .. اهم شي البدي ماينصبغ

[أبو راشد 33]

لاتغير ولا شيء عندك حقين الفيبر يلحمونه و اضربه بويه نظيفة كلها على بعضها 300 - 400 ريال
و خل عنك هالوكالات و اسعارهم المولعة

[عنيزاوي تبوكي]

شاكر لكم جميعكم مروركم
الاخوان اذاني و ابو راشد ايضا اشكركم
أخي كنق التعديل سيتم التواصل معك ان شاءالله قبل مااجي

[عنيزاوي تبوكي]

السلام عليكم ورحمة الله وبركاته
مساء الخير
حبيت اتواصل معاك بدري ياخوك كنق التعديل عشان ماقدرت اراسلك على الخاص
انا الاربعاء الجاي بجي ان شالله من تبوك للرياض وبجلس ثلاث ايام
وحبيت انك تدلني على المحل وشكرا لك

[الذكرى الحلوه]

في بالصناعيه ورش حلوه بس شوي سعرها غالي عندك ورشة وفا وعندك ورشة الوحدان هذا تركي فنان اذ تبي رقم ابشر

[عبدالعزيز-1]

افضل ورشه في الرياض ورشة شركة الوفا وهي مشهوره وشغلهم ازين من الوكاله لكن اسعارهم غاليه وهم اذا حبيت يلحمون لك الصدام او يغيرونه اللي تبي ( انتبه ترى فيه اكثر من ورشه باسم الوفا وكلها شغلها اي كلام )

موقعهم الصناعيه القديمه على طريق الخرج باتجاه الشمال وقريبه من ميزان المجد

[عنيزاوي تبوكي]

اوكي وتسلم ياعبدالعزيز وتسلم يالذكرى الحلوه

زودونا بالارقام لو سمحتوا


ويالعزيز كنق التعديل زودنا بالرقم لو سمحت لاني انا بالرياض حاليا

وشاكر للجميع

[أبو هشام راشد]

الحمد لله على السلامة

اذا كان الشق يسير فاي محل يضبطه يكون ممتاز اما الشق الكبير فان يسبب كثرة المعجون

والامر يسير اذا اقتصر على الصدام جلس صدام سيارتي اكثر من سنة وهو مشقوق لكني من اول يوم خطته بسيم لان كانت الصدمة قبل ما اسافر ولا معي وقت للاصلاح فركبت الصدام بالاسيام وخطت الشقوق بالاسيام ولما جيت ابصلحها خفت ان الصدام يكون يبس وما عاد ينفع لكن الحمد لله له فترة بعد الاصلاح وهو مشي الحال

وترى ما يحتاج بوية فرن او صنفرة البوية لان اي خبطة في الصدام يقشع المعجون فاحرص على انه ما يكثر منه

[عنيزاوي تبوكي]

ابوهشام راشد
الله يسلمك
وشكرا على مرورك
لكن كان ودي اللي قالوا نزودك بارقام كان ودي نشوف هالارقام
وابشرك رحت لورشة السعاده بصناعية الخليج وزينته الحمدلله
وشكرا لكل من تفاعل معي بالردود

[عبدالعزيز-1]

راجعت الردود وماشفت الا شخص واحد قال نزودك بالارقام.

لكن بالنسبه لي انا ذكرت لك اسم الورشه وموقعهم فقط لاني اصلاً مااعرف رقمهم

[عنيزاوي تبوكي]

برضوا شكرا لك ياعبدالعزيز ويعطيك العافيه