ياهل مكشات شرايكم فالونيت الدير

[عاشق دفرنسين]

السلام عليكم
كيف الحال أخواني
أبي رأيكم فالدير الونيت الشايب عندي وده بونيت
هو معه ونيت ويقول أبي لي ونيت رحت عاد أنا المعارض وحصلت
الدير 2012. ب40 ألف جديد وطاره هو ودرايش تماتيك قلت أشاوركم
قلت له عنه قال أخاف انه ماينفع ولا يقعد يخرب علي قلت والله مدري هو صيني
بس مدري عنه هو عشان جارنا معه واحد 2002 ومأشاءالله ماشي معه يقول ماعير إلا زيت وفحمات ويقولون سمعت وماني متأكد انه تركب عليه قطع الهاليلكس قلت بسال وشوف عاد مالي إلا الله ثم أهل مكشات هو زين ولا مهوب زين
وانتظر ردودكم

[يكفيني نظرة]

شراه ابوي لأخوي مشى 10000 عشرة الاف وخبط والوكاله تقول مهوب على الضمان وانا واياهم شيل وحط الين دفعنا نص قيمة التصليح وطبعا مايتعدى 140 بالخط اخر طبلونه مكينته على كلام اخوي مكينة هايلكس 84 ..
وفيه جيب عندهم اسمه ( سيف ) كنه فور رنر مع ولد عمي كل ديكوراته الداخليه متطلقه ومتكسره موديله 2005 لو تركبه تحسبه جيب 80 من القرقعه..

[مواطن]

السلام عليكم
الوالد شرى وحده موديل 2002 على وقتها ب32000 طلعها من الوكالة بالرياض ووداها للقصيم
اول ماوصل احترقت الفيوز كلها وخرب المكيف وطلع صوت بالبكرات
وصلحناها بالوكاله والان هي بالمزرعة واقفة على بلك من اربع سنوات مخبطه وكل شي متعطل ومصدية والله لوتشوفها تقول موديل 70

[حرنا بك]

لا حول ولا قوة الا بالله... حسبنا الله ونعم الوكيل.. صايرين منطقة تجارب وعلى حساب الناس

[عاشق دفرنسين]

لاحووووووول الله اجل انحششششششششششش والله انا قايله اشتر عطيا الله ددسن وانت معك واحد قبل بس شايب يقول فيه ونيتن ارخص منه هههههههههه قلت له بس ماله الا رايه بروح الحين له واوريكم فيه ههههههههههه هو معه ددسن بس ماسكتن على جديد قلت له خذ ددسن قال طاااير غاالي عاد بروح اقنعه الله يعطيكم العافيه اخواني ويعوض عليكم

شين مجربه احسن من شين ماتدري عنه

[التعـ King ـديل]

ابعد عن الدير وابشر بالخير

ددسن عطيه الرحمن مركب وجوده

[عاشق الكابرس]

من اسوء السيارات تخبيط مكينه ونه في الدفرنش اذ كان ديزل خرابات الطرمبه واذرعه وقطع غيار غير متوفره طالبيه بالشهور