استفسار بخصوص طريق الرياض دبي وبوجود طفله سنه ونص

[tooq]

السلام عليكم ورحمة الله وبركاته



شباب ابي فزعتكم باقتراحات وخريطه ان وجد

باذن الله وان سهل الله ووفقني بطلع من الرياض الى دبي

وطبعا بطلع بسياره وسمعت انسب خط هو من الرياض الى منتزه سعد
وافرق معى منتزه سعد بعدين يقولن تروح الاحساء ومنها الى طريق سلوى

ياليت الاخوان يشرحون لي ا يعطوني خريطة مرسومه بغوغل ماب
من الرياض الى البطحا اعرف اني بكلف عليكم لكن محتاجها والله

اهم شي ابي اعرف متى افرق من دخولي منتزه سعد على الاحساء


ثاني شي عندي بنتي الله يحفظها لي ويبلغني فيها يارب
باخذها معاي عمرها سنه ونص
وش تنصحوني فيه هل يصلح اسافر ومعاي طفله بالبر
وايش انسب وقت اسافر فيه او امسك الخط بالذهاب الى دبي وبالعودة

والله يجزاكم كل خير

[ابو حسان اسحق]

عليكم السلام ورحمة الله وبركاته

اكيد الشباب بيفيدوك ان شاء الله بالنسبة لطفلتك الله يحفظها لك وتكبر وتشوفها عروسة يارب

[MAAASH]

وعليكم السلآم ورحمة الله وبركاته

الطريق اللي ذكرته يالغآلي ما أعرفه للأسف

لكن فيه طريق يختصر لك تقريبآ 200 كيلو

اللي هو طريق حرض

طبعآ من الخرج تمسك طريق حرض

وسييييييييده إلى منفذ البطحاء

أنا توني مسافر معه من إسبوعين تقريبآ

وكل ممشآي في الليل

الله يحفظ لك بنتك

وتروح وترجع بالسلآمه

[صاحب فتك 2005]

طريق حرض يختصر ولكن مانصح فيه عوائل وخصوصا في الليل


اولا طريق مكسر ورايح جاي

ثانيا كله تريلات
ثالثا قطعه ((يعني افهم يافهيم))
رح مع طريق الشرقيه وامش ع مهلك لين يجيك كبري الهفوف تقريا 250 من الرياض وامش معاه سريع وطريق امان وطمان
توصل بالسلالالالالامه

ولاتنساني من دعواتك

وبوصف لك كتابي ماعرف من قوقل
تمشي من الرياض مع طريق الشرقيه لين يجيك مكتوب الامارات قطر الهفوف وتفرق يمين ياطويل العمر وتمشي قبل الاحساء يجيك لوحه الامارات يمين وتمسكه وسيده ياطويل العمر لين البطحاء تقريبا ممكن 150 او 170 الفرق بس تمشي وانت مرتاح احسن من هذاك انا كنت اداوم وراء حرض والله انه هبل فيني الطريق من التريلات والعج وقطعه لو تبنشر ماحولك احد



وشكرا

[مقناص 2010]

انصحك بالطريق الاني : تاخذ طريق الرياض الدمام السريع حتى تصل الى مفرق (الهفوف: النعيريه) ويبعد المفرق عن الرياض حوالي 280 ك ومكتوب عليه الامارات قطر تاخذه يمين حتى تصل الى الهفوف ومن هناك ستجد لوحات توجهك وعموما بجانب الهفوف الخط يترك المدينه على اليسارومن هناك تاخذ الخط الذي يتجه الى الامارات .لاتسافر الا في النهار اذا مشيت بدري سوف تصل ان شاء الله قبل الليل متمنيا لك رحلة موفقه وللاحاطه هذا ليس اقرب الطرق ولكنه اكثرها امانا وبعد ماتتعدى الاحسا عب بنزين

[tooq]

يعطيكم العافيه يارب واحد واحد
والله يوفق الجميع ويباركله عياله وذريته
وانا استفسرت لاني تخوفت اسافر ومعاي طفله مع قلة الاماكن الي ممكن
تكون استراحات جيده للعائله
لكن حسب وصفكم اعتقد انسب وقت امسك الخط الفجريه اذا الله سهل دربنا
يكون غدانا في دبي
جزاكم الله الف الف خير