اذا بنشرت بالبر ولا معي عفريته والله مشكلة.!.!.!.

[سماوي]

اذا بنشرت السيارة بالبر ولا معي عفريته ما أدري وش أزين ممكن تساعدونني أخواني لأنها مشكلة تبنشر السيارة وأنت قاعد اتناظره والله بلشة
أرجوكم ساعدوني الله يرحم والديكم :confused:

[السعلو]

اخي الكريم / سماوي

لست بالخبير في هذا المجال و لكني سمعت قصص كثيرة في هذا الشأن و خصوصا من رجال كبار في السن و تتعطل السيارات او تبنشر بدون ان يكون معهم عفريته فماذا يفعلون .

اولا
تقوم باسناد الكفر المبنشر ( يعني تضع تحته صخرة كبيرة - او اي جسم يستطيع حمل ثقل السيارة ) طبعاً توضع تحت الدفرنس من جهة الكفر المطلوب او البودي او المقص

ثانيأ
تبداء بالحفر تحت الكفر المبنشر ( الله يعينك ) لذا لازم تختار تربة مناسبة للحفرتوقف السيارة عليها حتى يتحرر الكفر ويبدأ في الدوران وعند ذلك يتم تغيير الكفر .

ثالثا
بعد تغيير الكفر تحفر تحت الصخرة ( مع الانتباه الشديد ) حتى يعود الكفر و يتحمل ثقل السيارة مرة اخرى .

-------------------------

طريقة اخرى
ان كنت في منطقة رملية ( ثولث بالكفر المبنشر ) يعني خله يتعلق على حافة طعس
وبعد التغيير احفر تحت السيارة حتى تخرجه من التغريز .

ارجو ان اكون افدتك

اخوك
السعلوو

[فرد حمزة]

كلام السعلو سليم وميه ميه ، وقد شفت زمان يوم أنا صغير الشيبان يبدلون البنشر بالطريقه ذي

لكن اللي بتاكل هواء صدق إذا بنشرت ولا معك مفتاح العجل :(

[رعد]

والله بتاكل هواء اذا بنشرت وما معك استبنة:confused:

[العزام]

إذا بنشر الكفر عليك ولا معك عفريته فعليك أن ترفع كفر السياره إذا بنشر على حصاة رفيعه حوالي شبر بأن تضع حجر تحت الكفر وتقوم بتقديم السياره للأمام حتى يصعد الكفر على الحصاة وبعد ذلك قم بوضع حجر تحت الدفرنس وبعد ذلك قم بأزالة الحجر تحت الكفر بطريقه الآتيه
حجر الكفرات الأخرى بحيث لاتتحرك السياره لاقدام ولاوراء. وبعد ذلك قم بتدوير الكفرحتى يلفظ الحصاة التي تحته مباشره.

[جــلــمــود]

السلام عليكم

والله افكار طيبه اول مره اعرفها

بس يا شباب الاستبنه والعفريته اهم حاجه ممكن الواحد يتأكد منها قبل الذهاب الى اي مشوار طويل
واهمها مشوار البر

على فكره شباب قولو الحمد لله على السلامه

اليوم طلعت افطر بالبر وانفصل الدبل علي بوسط الرمل ولا حولي احد بمنطقه بعيده شوي

تدرون وش سويت ؟

[فرد حمزة]

جــلــمــود


عليكم السلام والرحمة

الحمدلله على السلامة

بشر وش سويت ؟
لا يكون رجعت للديره بالرويس ؟ :D

الحمد لله على سلامتك

تحياتي لك ... فرد حمزة

[جــلــمــود]

اقولك الدبل تقول رجعت ريوس :D

الي سويته طال عمرك

كان الكلام قبل اذان المغرب بعشر دقايق ويوم فصل الدبل صار الموتر تقل كراسيدا مايتحرك من مكانه الا هو غاطس اكثر

والله وانا الي واشب الضو وازهب الفطور ويوم جا وقت الفطور وادق بالتمر والقهوه

يوم زانت العلوم وفتحت الدنيا وصار الواحد يقدر يحدد مصيره بكامل قواه العقليه

الا فيه رجال شروا من يقرا كانو يفطرون بعيد عني وشافوني عالق وجو فزعو ماقصر

كان من ضمنهم واحد يقول انه عسكري في حرس الحدود وانه جلس 8 سنوات بمنطقة الخرخير والرمل والتغريز عنده مثل شرب الفناجيل :D

المهم اني مارجعت ريوس الى الديره :p

[سماوي]

والله مداخلات رائعة وربي يحفظكم لاتغرزون ولا تبنشرون:D :D

[al-nashmi]

هاه يوم جاك اللي كان في حرس الحود........ وش سويتو؟؟؟؟؟؟؟؟ قلنا شبكتم الدبل ولا لا ........
واذا شبكتوه علمنا كيف شبكتوه......

ياخوي عجل علينا تراي حار ماقدر اصبر.........
وترى ماهو كل ماغرز الواحد بيجيه واحد بحرس الحدود ويطلعه:D :D :confused:

[جــلــمــود]

اسف يالنشمي

نسيت اكتب بنهاية الرد

وتحمر وتزمر :D :D :p

[نقا هشال]

مشكورين

طرق جديده لرفع السياره

تحياتي لكم,,,

[راعي عنيزة]

تابع مسلسل اكل الهوا الجزء السابع :D

وبتاكل هوا اذا بنشر عليك كفرين :D

وبكل فخر قد حصلت لي والسبب (روعه كلب ابن ست وستين كلب :D )

كنت اتمشى في شعيب مربع وكله اشجار ومنظر على كيف كيفك والجو براد وحلو ومطلع ايدي من الشباك وناسف الشماغ على الكتف <== شغل سواويق سكوس :p المهم كنت في قمة الانسجام والهدوء الى ان حصلت الكارثه :eek:
فجأه سمعت صوت وسط اذني عو عو عو هو هو هو هو هو :confused: والتفت ولاه كلب كبر الجدار واقف جنب الشباك ووده يعرمش ايدي :eek: (الظاهر خواله اسود )
ومن الروعه حطيت رجلي على الدعسه وما ردها الا الاديتر وقامت الكفرات من الدوسه تدور بوش فوق فروش حصا :D وما مشيت شوي الا والكفرات مجاوبه ومنصلخات ومتمصلخات :D


السعلو
يا جعلك تسلم ياخلفهم على هالافكار الرائعه والحلول العمليه

جلمود
اجل صرتو خويا انت وفيد سلاح الحدود يعني قلب ما اطلع للتهريب اخذك معي وماحد يقولنا شي (عندك واسطه :D )

[جــلــمــود]

والله يا راعي عنيزه على ها الانسجام بالشعيب وبين الاشجار ماتقول الا ماوكلي :p

الحمد لله على السلامة

وبشر عساك ثوررت بالجعري الي روعك :p

[باث 2000]

تخيل علقت السياره فوق حجر
وقاعد تحفر تحفر الين ماتعبت
وفكيت الكفر
بعدين تيجي تشوف الاستبنة مبنشره
يعني باختصار تعبت على الفاضي
هههههههههههههههههههههه

[باث 2000]

افضل حل
انا تاخذ معاك رقعة ومنفاخ

[ماجد الحايلي]

من وين طلعت هالموضوع
هذا له اكثر من 12 سنه
الله يرحم الحال

[ملك الفكتوريا]

ما انسى يوم غرزت بالطين بالفورد



جربت العفريته والفرشه وشنطه فاضيه ولا طلعني الا راعي باترول الله يوفقه ويجزاه خير


يالبى الرمل الفكتر ما يغرز فيه واذا غرزت ريوس وتطلع

[.أبوعبدالرحمن]

تاريخ كتابة الموضوع 07/11/2002, 08:41 AM


يغلق