المساعد الشخصي الرقمي

مشاهدة النسخة كاملة : يا اخوان أبي شوركم في الربع للأهمية


NaCl
29/04/2006, 12:50 AM
السلام عليكم

يا اخوان أنا لقيت بالمعارض جيب ربع موديل 88 أربعة سلندر ومطلوب فيه 16000 شامل النقل، علما بأنه مفحوص ومجدد، وعلى كلام راعي المعرض إنه نظيف وعلى الشرط


فحبيت أسألكم هل يسوى الجيب ولا لأ

أرجو الرد للأهمية
الشاص
29/04/2006, 01:19 AM
ياهلا والله ومسهلا

انا من راي المتواضع يالغالي

16 في 88 واربع سلندر يعني عزم دايخ ( الددسن ابرك منه)

زدها شي بسيط يالغالي وخذ لك كانك معزم على الربع من 92 وطلع 4500 ومااظن بيفرق واجد خصوصا هالموسم

واتمنى لك التوفيق يالغالي
NaCl
29/04/2006, 01:29 AM
السلام عليكم

مشكور أخوي على التجاوب

والحقيقة إني طالب بالجامعة وأبغا سيارة أكرفها يعني أوقفها بمواقف الجامعة وفي نفس الوقت تنفع للبر والتحميل(لأن ماعندي خبرة بالتطعيس لكن ودي أتعلم)، ومهم أيضا يكون قطع غيارها رخيصة ومتوفرة، وبعد ما درت في السوق لقيت ثلاث سيارات

1- الربع اللي قلتلك ( وشكله مايستاهل)
2- دتسن 91 ويبغاله تصليح للبواجي لأنها منتهية حتى لما شغلها اللي بالمعرض مااشتغلت، لكن على كلام راعي المعرض إنها نظيفة ومافيها إلا مشكلة البواجي، علما بأن سعر السيارة مع النقل والفحص يكلف 11000.
3- جيب ربع سفاري موديل 90 (شكله فل) وعلى كلام راعي المعرض إنه المكينة والقير نظيفة، وقيمته مع النقل 14000

علما بأني وجدت جيوب ربع باترول البيضاء موديل 91 و 92 لكنها غالية فوق العشرين

فأتمنى أخوي انك تشور علي علما بأن حدي 16000

وجزاك الله خير
شبح الصحراء
29/04/2006, 01:50 AM
يا اخي العزيز لا تطيع كلام راعي المعارض اذا قال الموتر نظيف لأن كلهم شريطية ونصابين ، افحص الموتر بنفسك عند فني متخصص او خذ واحد معاك عنده خبره بالسيارات ولا تتوهق وتطيع كلام راعين المعارض ، وبالنسبة للمبلغ اللي معاك يكفي يجيب لك جيب فاكس موديل 86 نظيف او شاص من نفس الموديل وبالنسبة للباترول الربع اتحدى اذا فيه باترول 91 او 92 قيمته فوق العشرين وان كان احد قال لك هالكلام فهو شريطي نصاب ، انصحك وانا اخوك تاخذ معك واحد من ربعك خبرة بالسيارات .
NaCl
29/04/2006, 02:56 AM
أقول شيخ الصحراء أنا أشهد انك شيخ

ياخي جزاك الله خير على هالنصائح والحقيقة إني احترت، لكن هل ممكن أحصل شاص بحدود الـ15000 ونظيف

ومعليش أخوي بالنسبة للباترول الربع (الظاهر يسمونه السلق) اللي لونه أبيض كم قيمته لو كان حول الواحد وتسعين

وبعدين وين أحسن مكان أروح له لو بغيت أشتري مثل هالسيارات لأني ماأعرف إلا معارض النسيم

ومشكور عالرد
حـاتـم
29/04/2006, 04:53 AM
أخوي الغالي

انا امس الجمعه فالمعارض ولقيت ربع باترول فل كامل 91 ونظيف جدا وقيمته 16 الف يا بلاش بصراحه

اذا تبي رقمه راجعني على الخاص وابشر بعزك

بس قل آمين ما أنباع الموتر

واذا تبي تفحص

افحص في فحص شامل اسمه الغروب بـ300 فحص شامل ويطلع كل مافي الموتر

وانا مجربه ممتاز


ومشكور

أخوك / حاتم
شبح الصحراء
29/04/2006, 12:56 PM
الباترول الربع 91 بحدود 14 او 15 الف حسب نظافته وانصحك بالباترول الربع اكثر من الشاص لأن الشاص اظن ما يناسبك لأنه غير مريح البته وابحث عن اللاند الفاكس القديم موديلات 85 86 87 لأنها سيارات تتحمل كل الظروف وتاخذ ركاب اكثر ، وبالنسبة لأفضل الأماكن لبيع وشراء الجيوب اظن معارض القصيم في بريدة لا يعلى عليها تحصل سيارات انظف وارخص من الرياض خصوصاً هذا الوقت مع دخول الصيف .
بس لا تنسى تفحص الموتر واسأل عن اسعار السيارات من اكثر من شخص وحاول يجي معاك واحد خبرة بالمعارض والسيارات .
مرة اخرى اتمنى لك التوفيق ومبروك مقدماً .
NaCl
29/04/2006, 08:44 PM
يا اخوان جزاكم الله خير والله إني من غيركم كان ضيعت

أقول أخوي حاتم إذا عندك رقم راعي الجيب الربع أرجو إساله على الخاص

ومره ثانية أشكر وبعنف جميع من رد وشارك في هذا الموضوع

والله يرزقكم في الدنيا والآخرة
NaCl
29/04/2006, 10:24 PM
أقول أخوي حاتم حاولت أرسلك رسالة عالخاص لكن ماعرفت

أرجو مراسلتي على البريد

khlooodi@hotmail.com

وشكرا