عملية استغفال من الورش

[سيف وقلم]

هذا موقف حصلي مع أحد الورش فأبي شوركم و ما هو التصرف السليم

حصل لموتري حادث بسيط يحتاج سمكرة وبوية رحت لصناعية العروبة أنا وأخوي سعرت 3 ورش الي قال بألف والي قال بألف وشوي وآخر ورشة (أ) مذكور شغله نظيف لبناني أول مارحت له قال بألفين قاله أخوي بألف وخمس وإنا وإياه قال بألف وسبع طبعا الاتفاق شفوي ومع (عمرو) دخلته الموتر (S) يوم الأحد العصر عنده

جيته يوم الخميس أعطيته بعض القطع أدور موتري في الورشة (أ) ما لقيته سألت العمال في موتر (S) قال ماعندنا موتر بهذا الاسم جاء (عمرو) قلت وين موتري راح وداني ورشة ثانية (ب) وتفاجأت إن موتري عند ورشة ثانية (ب) وقال هذا الورشة تبعنا وقد اشتغل في الموتر ما بقي إلا الفرن وأشار بيده إلى الفرن الي في ورشته (أ) وقال تعال استلمها السبت عقب العشاء طبعا رحت وكلمت أخوي قال إيه خير


راح للصناعية يوم السبت الصبح مبكر توهم فاتحين وإلا الموتر في محله أي عند الورشة الثانية (ب) وقد دخله فرن الي عنده وخلص نزل أخوي وكلم العامل على أساس إنه زبون بيشوف شغله قال هذا شغلك قال إيه قال بوية الفرن أنت مسويها قال إيه قال أخوي كم تكلفة الشغل قال ألف وثمان قال طيب تعرف وين ورشة (أ) قال لا ما أعرف ورشة بهذا الاسم

راح أخوي للورشة (أ) ولقى (زيد) أخو (عمرو) قاله أخوي أبيك بأكلمك قاله أنتم ورشتكم زينة وتزيد عن السوق شوي عشان شغلكم مضبوط قال(زيد) إيه قاله أخوي فيه ورشة تبعكم هنا قال(زيد) ما فيه إلا ورشة (ج) تبعنا قال أخوي فيه ورشة (ب) مب تبعكم قال (زيد) لا قال أخوي طيب عندكم موتر تشتغلون فيه اسمه (S) قال ما عندنا موتر بهذا الاسم قال أخوي وشلون أنا مدخله عند (عمرو) وحطه في ورشة ثانية قال (زيد) طيب دق عليه وتفاهم معه قاله أخوي أنا منيب داق عليه تفاهم معه أنت قال (زيد) خلاص أنا غلطانين ومن هالكلام تعال العصر وما يصير خاطرك إلا طيب مشى أخوي من عنده وعاد بآخذ منه الموتر بكرة الأحد العصر طبعا أنا ما عطيته ولا ريال حتى الآن

[الحريصي]

بالعربي راح يصلحه عند ورشة ثانية بأقل والفرق بجيبه لاتخليه عطه نص السعر اذا تأكدت فعلا ان الورشة ماهي تبعهم واذا ماجاز لك الشغل قدم فيه بلاغ


بس الصراحه يوم قريت الموضوع حسيت اني بالثانوي ودرس رياضيات ههههههههههههههه

[سيف وقلم]

الظاهر إني طولت السالفة وهي قصيرة وبالنسبة لشغله حليو أنا متأكد مرة إن الورشة مب تبعهم بشهادة مدير الورشة نفسه


هههه

[abo mani3]

شف الورشة الثانية وقله كم تكلف السيارة هذي كأنك زبون

وكاسره واذا جا عمرو عطه القيمة حقت الورشة الثانية الي اشتغلوا على موترك

[abo mani3]

طبعا بحجة ان عندك نفس السيارة بنفس الصدمة

[عبدالعزيز بن احمد]

رح حاسب الورشة الثانيه اللي زينت الموتر عندها

ولا اعط عمرو مدري زيد قيمة الورشة ب

وياليت تعلمنا اسم الورشه عشان مانكون ضحية تلاعب

الله يسهل الامر

[سيف وقلم]

أ ورشة السحيم مقابل تقديرات الحوادث
ب ورشة العمودي أيضا مقابل تقديرات الحوادث من الجهة الثانية

المشكلة ورشة العمودي سأله أخوي كم صلحت الموتر الي هو موتري قال بألف وثمان يعني نصاب شلون بيعطيه أكثر

[ابوسعود .]

طيب ليش مسوي فيها مشفر وحاط حروف وكذا خلنا نكون واضحين خل اللي ما عرف عنهم يعرف كل شي عنهم بدل الرموز اللي انت حاطها ...

هداك الله تبي الناس تنضر وانت تدري عن كل شي ...

عزالله الشعب راح دمار كلن يبي يتكتم وسريه وحالتكم حاله افضحهم والعن جدفهم ولا تسكت عنهم ...

[خبايا انسان]

المنطقه هذيك اغلبهم نصابين واولهم وكاله الحمراني هي ومديرها الغامدي

[العشة]

يااخي ذكرتنا ايام الرياضيات بالمعهد ونظرية فيثغورس س + ص = ص2

بس الوكاد عقدنا ذاك الوقت

[RW7..ALBDAWA]

اسحب موترك وتوكل على الله وخله يولي هو وورشته

وفلوسسك بـ مخبآك < من رأيي لأحد يقولي حرام عليك ولا اي شي

اللي مسوي يلعب يستآهل ينجحد فيه

[abo naser 1]

عمالة مخالفة وسايبة أكلت البلد وخيرة وأخرجت أبناء البلد من أعمالهم بملف أخضر يبحثون عن الوظائف
عنوانهم الغش والخداع والتلاعب بالأسعار
رأيي شغل موترك وخلهم يتضاربون بين بعض وتبرع بمبلغها

[volcano]

انتو اتفقتو على سعر معين والرجال خلص لك سيارتك سوا في ورشته او ورشة غيره وهذا يسمى شغل من الباطن ولا به ضرر ويسمح فيه النظام مثل المقاولين اصحاب المشاريع وان اختلف طبيعة العمل.. لا ياخذك الطمع عط الرجال حقه .. ولا تنسى في الشرع والقانون قاعدة وهو (العقد شريطة المتعاقدين)

[تميم2222]

ما دام شغله اعجبك ... فبسلامته ... لو يسويها في المريخ .. لكن الكلام انه طلع السياره .. من الورشه وهذي مسوليه عليه كبيره والله ياخيي ياكثرهم بصناعيه الملز تشوفه عامل راكب بنوراما وقاعد يتمشى فيها بالصناعيه .. يتميلح عند ربعه كم ترفع الضعط هذي الحركه:hot:

[الحياة]

اسحب موترك

[سيف وقلم]

شاكر لكم مروركم جميعا

يالحبيب أنت تعرف إن الورش تختلف من حيث جودة الشغل أنا لاقي بألف ريال ولو بأدور بألقى أرخص لكن شغل مشي حالك بس ما رحت لمه ورحت للورشة المذكورة عشان شغله زين ونظيف ودافع زود عن سعر السوق يروح يوديه ورشة ثانية بدون ما يعلمني لا ويقول هذي ورشتنا وتثبنا من كلامه وطلع كاذب أنا أعرف أدخله في ورشة ثانية وأكثر ما كثر الله الورش يعني يتكسب من وراي
العقد يكون الالتزام من الطرفين وهو أخل بشرط من شروط العقد ووداه عند ورشة ثانية وهو الي نقض العقد
هو اسمه رستم في ورشة السحيم حتى مدير الورشة اسمه الظاهر عبدالله قال نحن نتحمل المسوولية ورفض يتدخل وقال تفاهم مع رستم يعني هم مقرين بالخطأ

[gr73mri]

طريقة شرحك للموقف جميلهوبالنسبه للموقف هذا يصير كثيررر في الورش
الرقابه معدومه تماما
ابسط مثال: ورقة اصلاح السياره من المرور!
للحين فيه احد يضرب مشوار للمرور عشان يطلع ورقة الاصلاح وهو يدري ان الورشه ما بتنشده عنها!
والله ياجماعه نظامنا ماشي بالبركه

[ملك الفكتوريا]

والله ما يأخذ هلله ليه الدنيا سايبه

[سيف وقلم]

الصراحة عطيته 800 ريال وواجدة عليه وتحسفت و بغيت ما أعطيه شئ لا وطالب 1000 ريال بعد, لون البوية أفتح وما ضبطه كان المفترض يرش طرف الرفرف والباقي لمعة (لكر) رشه كامل وكذلك الكبوت الرديتر كان الاتفاق يفكه وأوديه أنا حقين الرديتر يلحمونه ثمين يركبه هو ما فكه ولا جاه, طبعا حقين الرديتر يأخذون 60-70 على فكه فقط غير التلحيم ,الأسطب حق السكن ما ركب له مسامير حط غراء ما أدري معجون ويقول وزنية وكالة, قاعدة الانتل أدورها ما لقيتها قال تراها ب5 ريال صار ما ركبها وخلاها تسقط فوسط الرفرف وطلعتها بشق الأنفس بحبل ويالله قعدت ساعة لين طلعتها

لا وقوي العين يقول عندي 3 سيارات مدخلها في ورشة ثانية

اسم العامل :رستم أو برستم -- ورشة السحيم وعندهم --ورشة الدرع -- تبعهم-- صناعية العروبة

[الخلاوي 15]

مقدي فيه لاتجونه شباب خلوه يفلس

[طال الانتظار]

الله يستر لا يكون مشلحين من الموتر شي مثل قطع غيار