رايكم بكفرات كوبر ،، تنفع للبر او لا؟!

[sgl2002]

ياشباب انا رحت كم محل وقاعد يمدح لي كفرات كوبر الامريكية ويقول تحمل وليونه واكثر من محل يمدح فيها

هل تصلح علما ان اكثر ممشاي خطوط ونفود وبر

بس مابي الكفرات اللي تتخرق من الشوك وكل شوي احط فيها رقعه

فايش رايك بالكوبر بحطها على الباترول ٢٤٥ ٧٥ ١٦

[أطلال نجد]

السلام عليكم
ما أنصحك فيها من واقع تجربة مريرة على سيارة جي أم سي

لا تتعدى الدانلوب الياباني
تأكد من وجود كلمة صنع باليابان على الإطار
وأحذر كلام وغش عمال البناشر

بالتوفيق

[sgl2002]

الدانلوب جربته

يمسح ويحبل بسرعه وادنى شي يشقه

[عقاري مع]

ما انصحك بة جربتة على جيب

[أطلال نجد]

طالما أن الدانلوب ما يصلح معك
مالك إلا ميشلان الفرنسي أو الأمريكي وأحذر من التايلندي

[AxR979]

جربت الدنلوب و كوبر و كلهم ينشقون بسرعه بالبر ..

اذا تبي الزين خذ بردجيستون و لو انه قاسي شوي

[sgl2002]

*^^^
صادق ياخوك بس واالله ياهو يكسر الموتر

[GM_400]

كفر جبار لاكنه قاسي جداً

[ددسن 2008]

السلام عليكم

والله انا كنت استعمل هانكوك وممتازه ولكن سعرها ارتفع ووصل الامريكي وتعداه

واستخرت واخذت الكوبر واقل سعر من الهانكوك بستين ريال للكفر

ويكفي ان الكوبر امريكي وحسب تجربتي ممتاز ونقشه حلوه وغويطه وما بهن صوت

وكلامي عن تجربتي خلال هالشهرين او ثلاثه حاليا وسعرهن 510 يزود او ينقص شوي

والمقاس اللي انا ركبته نفس اللي انت ذاكره بالضبط 245/75/16

وهذي صورهن راكبات على الدقس


http://www.mekshat.com/pix/upload05/images238/mk201574_20120127045.jpg


http://www.mekshat.com/pix/upload05/images238/mk201574_20120127044.jpg


الله يبارك لنا ولك ويسهل امرنا وامرك ومن يقراا

[أبو سليمان...]

والله يالطيب الكفرات ممتازه وللمعلوميه.تراها تنافس ماكسس التايواني

[أطلال نجد]

ما شاء الله تبارك الله
أخوي ددسن 2008 كفراتك نقشتها حلوة وشكلها مناسب جدا على السيارة.

أخي صاحب الموضوع
تجربتي مع كوبر قديمة من حوالي عشر سنوات وعلى سيارة ثقيله مثل الجي أم سي
قد تكون الجودة اختلفت الآن للأفضل
موفق للخير ،،،

[sgl2002]

أنا توكلت على الله وركبتها لانها صناعه امريكية 100% وفوق كذا البرجستون والدانلوب كثر الغش فيها واخذت نفس مقاس أخوي راعي الددسن

لاني بغيت ارتفاع 80 وعرض 245 قالوا مايجي الا 80 235 أو 75 245 ويقولون كلها نفس الارتفاع ماتفرق ويوم ركبها ما لاحظت نزول للموتر الا بالعكس طلع احلى



واللي لاحظته حتى الآن على الكفرات

ليونه بالمطبات عجيبة ماهو مثل البرجستون
النفود ماعاد صرت انسم واجد

خفت الرجة اللي في الباترول شوي ومع الخط تقول كامري
التراكشن فيها عالي جدا وماوجدته بأي كفر قبل ( يعني احاول افحط للموتر مايفحط الا ناشب بالارض ومع اللفات ماتسمع صوت وفوق كذا البريك اكبسه بعض الاحيان للآخر مايزلق زي البرجستون والدنلوب )

صراحه المؤشرات اللي لاحظتاها الى الآن ممتازه

[أطلال نجد]

ما شاء الله ..
الله يعطيك خيرها وتبدلها بالعافية

[مقناص10]

الله يعطيك خيرها ويكفيك شرها....
وعلى البركة

في كفرات ماستر كرافت برضو امريكية يمدحونها

لكن انت كمان ارجع بعد كم شهر واعطينا التجربه عنها من البداية ماتقدر تحكم بالصميم

لأن انا كان ودي اجربها عل مقاس265/70/17 بس ما كتبها الله لنا

[sgl2002]

يا اخوان تم تبديل الكفرات

للأسف مفروض اني اخذت شي مجرب ولا رحت احط دراهمي بشي خايس


الكفرات حبلت مع الجنب وهذا وانا بعد مادخلت بها بر واجد ،، حبلت من مطبات شوارع الرياض

المهم بعتها بنص الثمن وشريت بعدها كفرات هانكوك 10 غاط وممتازه وشي مجرب افضل واحسن

[ابو ماجد vtc]

الباترول مايصلح له الا البالون لا يرخص عليك والله استخدمها سفر وبر من احسن مايكون عشان في السفر ما اسرع عن ال 140كم في الساعه ومريح في السفر ماهو مثل الكفر العاديالعريض اللي مطبه في الراس اعوذ بالله مره ركبت الدنلوب العريض في سفره ورجعت والله ماجلس معي اكثر من شهر وابيعه ورجع للحبيب البالون السيام تاير التايلندي عز الله كفر وكل يركب اللي يرتاح له

[أبـوأسـد]

الدانلوب جربته

يمسح ويحبل بسرعه وادنى شي يشقه

أنا لي تجربة مع الدنلوب وليست طويلة

بصراحة كويس بالبر والتطعيس

لكن الشيء الي ما كنت أعرف عنه بحكم أني مستخدم جديد له

لاحظت بعد أستخدام 8 أشهر أنه يتسحك بسرعة يعني حتى الفرامل لاحظت أنه يتزحق معي الموتر مع شوارع الرياض الناعمة :mad:

لي أثنين من زملائي جربو الكوبر ومدحوها

عن نفسي شكلي قريب بغير الدنلوب وناوي على ماركة رغم أني ما جربتها لكن واحد مجربها ومدحها يقول هو ساعات يحفر بالبر لكن بالمراقي ممتاز وتحمله عالي والمشكلة مهي موجودة بالسعودية أذا ودك تسافر للأمارات وتشتريها وأسعارها الواحد حول 800 ريال وأنت طالع حسب العرض

http://www.roughgear.com/images/bfgoodrich/all_terrain_large.jpg

بي أف قودريش وبالأخص نوعية all terrain

[كشات 5]

نصيحة خذ يوكوهاما لاتدور غيرها بنفود خفيفة وماتحتاج تنسم كثيير والشعبان ايضا صبوره
الكلام ذا عن تجربة عيبها الغلا شوي لاكن تعيش بإذن الله معك لاتنسى تاخذه من الوكيل حقه الجميح طريق خريص ,,,,,

[mekshaat]

غريبه انها حبلت انا سبق شريت سياره مستعمله وعليها كفرات كوبر من راعيها

الأول لاصوت وشه بالطريق ومطبها لين وجلست فتره لين غيرتها ودي اركب

مثلها الآن بس انها غاليه لانها جنط17متاكد ان اللي انت مركبها أصليه وشلون

حبلت وهي توها طيب يوم بعتها اللي شراها منك علمته انها محبله وشي ممتاز

انها جابت لك نصف سعر مشتراها.

[sgl2002]

محبله مع الاطراف

وانا سبق قراتها في منتدى ان من عيوبها جنبها لين وتصعرر

واللي اشتراها مني البنشري

[mekshaat]

محبله مع الاطراف

وانا سبق قراتها في منتدى ان من عيوبها جنبها لين وتصعرر

واللي اشتراها مني البنشري

غريبه البنشري اشتراها منك بنصف السعر لا ومحبله بعد وين الزبون اللي بيشتريها

منه هل باقي عليها ضمان والا بدون.

[sgl2002]

عليها ضمان لا مكتوب لايشمل التحبيل الجانبي

والتحبيل اللي فيها لازم تمشي بيدك عليه عشان تحسه يعني بداية تحبيل

[العمير]

السلام عليكم اعزائى الكرام انتم تسبون كفرات البرجستون بأنه قاسي وأنا جربته لقيته
ألين من جميع الكفرات اللتى مرت على وقد انشق كفرين منها وانا في البر علما ان الهواء كان فيهن 35 ولا تحس بالمطبات ومكتوب عليها ياباني هل هي مغشوشه ام اصلي

للمعلوميه

[sgl2002]

السلام عليكم اعزائى الكرام انتم تسبون كفرات البرجستون بأنه قاسي وأنا جربته لقيته
ألين من جميع الكفرات اللتى مرت على وقد انشق كفرين منها وانا في البر علما ان الهواء كان فيهن 35 ولا تحس بالمطبات ومكتوب عليها ياباني هل هي مغشوشه ام اصلي

للمعلوميه

مستحيل

انا كنت مركب البرجستون وشفه بالتوقيع وهو حق الوكالة شد البد


قاسي جدا جدا يرفع الضغطبس بالبر ماينشق ابد

والبرجستون اذا بتشري خذ من الوكالة

[hail_ksa]

أنا جربت كفرات بريسا PRESA تايلندي أوربي
معاي من 7 شهور على باترول 95
جربتها في النفود والجلد والساحل وفوق الجبال وبالحره وبكل شعيب
ما شاء الله كان
كفر يتحمل كل أنواع التضاريس وعزل ممتاز وبالأمطار راسي

قبل كم يوم كنت مضطر آصل موقع وتعاجزت لا أوقف وأعبي الكفر بالماطور .. المهم مشيت عليه 70 كيلو بضغط هواء 15 وبسرعة 180 وما شاء الله ماصار فيه لا سحقيه ولا تآكل ووصلت سالم


عندي له صوره من تصوير جوالي بحجم كبير :
http://www.mlfnt.com/lives6/13376190401.jpg


طبعاً نوع الكفر PJ77
بحثت لك في النت حصلت على معلومات ومواصفات الكفر في موقع الشركة :

http://www.presallantas.com/EnglishWebsite/index_files/PJ77.htm





سعره أيام ماشريته قبل 7 أشهر بحدود الـ 460 للكفر 1850 الطقم

[الخندريسي]

sgl2002 انا لي سابق تجربة مع البرجستون الفرامل معه ماتسوى ريال ..كرهني في موتري فورتشنر 2012 احسب العيب من الفرامل واثر العيب من الكفرات.....مواضيعك حلوه ومفيده ...مشكور

[بلعبيد]

جربت الدنلوب و كوبر و كلهم ينشقون بسرعه بالبر ..

اذا تبي الزين خذ بردجيستون و لو انه قاسي شوي
اخي السلام عليكم ومن العايدين ....ولا هو اي بريدجستون خذ HT 840 محفور في جنبه هذا رقم واحد مجربه انا جربت الميشلان الفرنسي والدنلوب ما مشى اللا البريدجستون حتى لو هواه نقص ما يتاثر الأنواع الاخرى اذا نقص هواه تبدا المشاكل . بالتوفيق اخي .