السلام عليكم ورحمة الله وبركاته

[راعي المصندق]

بعد التحية :
أولا كل عام وانتم بخير ..
في الحقيقة انا عضو جديد اخ لكم محب البران والصيد واتمنى ان اشارككم المتعة والفائدة أعجبت صراحة بالحماس والاخوة ..... المهم ما أطول ..

انا صراحة ماني بمرة فاهم بس راعي طلعات وصيد ورمي بالروسية وحبيت اشتري وكري بـ 1300 ريال لكن ما اعرف بالطيور شيء .... يعني اسألني بالشوازن والفشق بس , فتنصحوني أشتري وكري ؟

وأوضح زيادة انا ترى مني براعي حباري وقطا , لا قميري ودراج ونحم ( أحيانا ) وبط وغرانيق .

وش تقولون اشتري ولا لا ؟

بس ترى الطير ما مدرب بس كبيير وحليل .

والسلام ختام ......

[العليمي]

حياك الله معنا عضو في المنتدى . ويا هلا ومرحبا فيك .
اما بالنسبه للصقور فلا تسئلني عنها . دورنا عند البنادق:D .
لاكن فيه شباب من المنتدى راعين صقور و انشاء الله ما يقصرون معك...

[الشبارم]

اخي العزيز راعي المصندق

السلام عليكم و رحمتة و بركاتة و كل عام انت بخير

رداً على سوالك
اولاً اسئل نفسك هل ترغب الصقور ام لا ؟
ثانياً هل ترغب الصيد بالصقور ام لا ؟
ثالثً هل عندك الوقت للاعتناء في الصقر ؟
رابعاً هل عند القدره على الصبر في تدريب الصقر ؟
خامساً هل عنداك المادة الفائضه للصرف على الصقر و معنى هذا الاكل و البنزين للسيارة ان كان انت من اهل الرياض ؟

اخيى العزيز اذا كانت الاسئله السابقه جوابها بنعم انصحك نصيحه خذلك صقر حر

اخي العزيز هنالك نصيحة خذها ام ارمها في البحر

ابعد عن الطيور و غثاها خلك على بنيدق و الى الطيور كلها غثا في غثا انا اقول الكلام هذا و انا راعي طير الله يفكنا من غثاهن .

اخوك

الشبـــــــــــــــــــــارم:cool: :cool: :cool: :cool:

[راعي المصندق]

شكرا يا العليمي ويا أخوي الشبارم ..

والله الصقور ما اعرف واحد عنده صقر وانا والله ماني براعي صيد بالحيل بس هه طلعات خفيفه ... حبيت اسئل عن الاكل والطردي وراه وشلون مكلف يعني ما ياكل فضايل ؟ ولازم الاحقه وهو يطارد؟

والحر اظنه غالي بالحيل .. يازين الروسيه وانا اخوك :)

وشكرا مره ثانيه ..

[السمح]

راعي المصندق :
خذ العلم من واحد جرب .. طع شوري أخيّك لا توهق .. ولا تدخل راسك بالشرك .. الطير يبي له خدمة أكثر من أولادك .. وتدهيل وهداد .. وتطليق كل عصرية .. وإذا طلعت للبر لازم تخدمه تدور له جرة .. وذي قديمة وذي جديدة وذي طايرة وهذي مقنوصة .. ورقبك يبي له بتالي النهار ملزمة علشان تفك التصليب اللي جاه من كثر التدنيق .. :D
لكن لو أنك مطلع خشم البندق طال عمرك وكل شي يوسع الصدر ترميه .. هذي درجلانه وهذا بلبل وإن خطمت عليك حبارى وأخطت عليك معك فرخ الشيهانة اللي ما يمدي الحبارى تمثنى بالتلعة إلا هي ذابحته ;) ..
بس ترى يبي يزعلون علينا أهل الطيور .. يمكن إني واحد منهم .. ليش نتعدى على الحبارى .. بس إذا ذبحت الحبارى بالبندق يبي لك تسوي نداء لأهل الطيور وتقول لهم إنك ذبحت حبارى وتعالوا دوروا يمكن تلقون الخرب ... :D :D :D

أغلى تحية ...

[وضــ الوافىـاح]

سلام عليكم



اول شى الله يسامحك يا السمح يا خوى يا زين الصيد وانت على يمينك طير حر :cool:

اشقر ماهو بندق البندق طال عمرك فى الصيد ماله مزاج :(

طاخ والا انت صايد لكن وين المطارده والحماااس والتفرج

ووين وانت تشوف طيرك يغط السحاب وهو ورا الحبارى

ووين ووين وش اقولك يا خوى السمح


وين يوم يكافخ ويصارع الخرب:D :D

يا راعى السوال عليك طال عمرك بالطير ولو رخيص
ما هناك عيب بسعره اهم ما فى الموضوع اعداد ه للصيد

ولا تقرب البنادق ترا نصيحه يقولون وبعيد الشر هل ايام البنادق تنفجر مدرى وش صايبها :cool: :eek:

[راعي المصندق]

بصراحة كلامك يحمس يالوافي ويا خوي المشرف .. والله كل شي يبيله وقت واعتناء وتدليع

البندق يبيلها مصاريف الفشق وتنضيفها على فترات والصقر يبيله تدليع ومصاريف الاكل والطردي ,, وبصراحة ما يزين الطلعة الا الله ثم الكرف .

بالمناسبة الوكري ماهو مثل الحر أقصد الحر المناسب مهو الي يطارد الخرب لا الي على قد القطا كم يجي سعرة , اذاهو دون الـ 5000 ريال زين ..
وفرخ الشيهانة كم عليه ؟ ووالله يمدحون الفرخ.

والله أنا محتار يعني الطير والبندق والشعيب وآخرتها قميريتين , مشتاقين للحباري والخرب:),, ولا يا الربع