سؤال عن القطه يا خبراء الكشتات

[الباز]

سؤال يا شباب مهم عن قطة الرحله هل من العدل ان نقول ان كل واحد يدفع النسبه الى عليه اذا علمنا ان صاحب السياره قد استعد وتكلف وخاطر بسيارته اليس من العدل ان نقتطع من القطه جزء يتناسب وقيمة السياره وتكلفة صيانتها وتجهيزها ارجو من الجميع المشاركه يآرائهم ولكم منى الف تحيه

[الخبير]

السلام عليكم
و الله يا طويل العمر الناس اشكال ، بعضهم يقول شف يا ابو فلان انت بيض الله وجهك ما قصرت و جبت موترك و حملته ترى اي شئ يحتاجه الموتر من بنزين او زيت او بنشر الكفر او تعطلت السيارة ترى تصليحها علينا.

و ناس يقولون يا فلان عليك الموتر و إذا قلت لهم طيب ليش ما نروح بموترك قال ما عندي استعداد اكرفه .

و ناس يخورون إذا سمعوا طاري القطه ، يحسبون ان الطلعة على شخص واحد.

كل الحالات هذي مرت علي ، لكن صدقني الخيار الاول هو الافضل . و احد من الاخوان كنت طالع انا و إياه نقنص ارانب ، المهم و حنا نطرد ورى وحده إلا و ينفجر الكفر ، غيرناه و صدنا اللي صدناه يوم رجعنا للرياض اتصل الرجال علي و قعد يعتذر و يستسمح مني ، قلت له يا فلان وش صار ، قال الكفر ما صلحته و الله انه على حسابي جديد .
وش رايك في الرجال ذا عز الله انه تاج و صدقني ما يوقف معك في الشدايد إلا امثاله.
===============================

http://nobody.jeeran.com/jkduhpma1.gif

[السمح]

أولاً أحب أن أرحب بك أخي الباز في المنتديات فياهلا وسهلا .. وألف مرحبا ..
ثانياً أهنئك على طرح هذا الموضوع الحيوي والذي يأخذ حيزاً من نقاشات أهل البر والطلعات ، وقد نظرت في طرق كثير من الناس في موضوع القطة ( الاشتراك في تكاليف الرحلة ) ، فمنهم من يدفع مقدماً لتكاليف الرحلة من بنزين وطعام .. إلخ ، فيقولون إن القطة مبدئياً 100 ريال مثلاً قابلة للزيادة .. ويهملون السيارة وما قد يطرأ عليها .. والبعض الآخر يتولى أحد أعضاء الرحلة أو اثنين أو ثلاثة مسألة تمويل الرحلة ، وفي نهاية الرحلة يجمع ما صرف ثم يقسم على الباقين ..
دعني أعرض لك نظام المجموعة التي أخرج معهم باستمرار إلى البر ، نحن لا ندفع مقدماً ولكن من الممكن أن يدفع أي شخص وفي نهاية الرحلة يجمع المبلغ ويقسم على المجموعة ، ليعرف كل واحد نصيبة ويدفعه حالاً .. ولكن الجميل في طريقتنا أننا لا نهمل السيارة أبداً .. صحيح أننا لا نعطي صاحب السيارة أي تميز ولكن أي خلل يحصل للسيارة أو ما بداخلها أثناء الرحلة يتحمله الجميع ، فمثلاً إذا كانت الرحلة أكثر من ثلاثة أيام تغيير الزيت والتشحيم وطبعاً البنزين أثناء الرحلة ، ولو حصل عطل للسيارة أي عطل وبدون تحديد حتى لو احترقت السيارة فإن المجموعة تتكفل بتأمين بديل لما تلف .. وحصل كثيراً أشياء مثل ضرب كفرات .. أو مساعدات تحتاج إلى تغيير وقمنا بشراء بديل جديد ، وفي إحدى المرات صادرت الشرطة جهاز آيكوم من صاحب إحدى السيارات فقمنا بشراء جهاز جديد لصاحب السيارة .. ولا نرضى أبداً أن يمتنع صاحب السيارة عن قبول البديل فيكفيه كرماً أن أحضر سيارته واستخدمناها في رحلتنا ...

أغلى تحية ..

[راعي عنيزة]

موضوع جميل وشيق للنقاش وتشكر عليه يالباز

ما على كلام الاخوان الخبير والسمح زود وياليت كل الطلعات تكون بالطريقة الي ذكرها السمح ومثل ما قيل دقق الحساب تدوم العشره فمواقف صغيره قد تتحملها انت ماديا لكن مع الوقت والتكرار قد تتراكم عليك وتوجد شيء من الحزازيات لذلك صفو الحساب تصفي النفوس

وعلى سبيل المثال انت عارف الاماكن الي تكثر فيها فروش الحصا تعدم الكفرات وتقطعها والكثير اذا رجع من كشتته اظطر انه يغير طقم الكفرات كله بسبتها فايش ذنب صاحب السياره انه يتحمل مبلغ الف وخس ولا الفين لحاله ؟

[عابر سبيل]

:good: تسلم والله يالباز على هالموظوع الرائع ..


الحقيقة الاخوان كفو ووفوا ولا على كلامهم زوود .... لكن السؤال اللي يطرح نفسه انك لا سمح الله توهقت وطلعت لك مع ناس كنت تظنهم انهم ما عليهم كلالالالالام .... ويوم انكم طلعتوا والقطه ام 100 ريال و150 ريال ( ما شاء الله عليهم نشااااااط ) ويوم حصل وتعطل الموتر كلهم كفوا يديهم عن الموضوع ...

الغريب في الموضوع انك اساسا ما طلبت من احد (( عوض )) او فزعه .. ولكن المفروض يتعذروون يعني اضعف الايمان .....

المهم الان السؤال اللي هو انك اذا حدتك الظروف ولا لقيت غيرهم تطلع معهم ؟؟؟؟؟ هل تطلع معهم و تقول الله يستر .... والا تقول لا والله هذولي ماينتخاوون بريال ... وتطلع لحالك انت وحظك تلقى من ربعك قدام والا ما تلقى .....



شرايكم ،،،،،،،،،،،،،،،،،


سلالالالالالالالالالالالالالالالالالالالالالالالال ام



ابكي على اللي خوته ترفع الراس = والا الردي نذبح لفرقاه ناقه

[ذيب حوما]

الحقيقه موضوع شـّــــــيق ؛ ومشكور أخوي الباز على طرح هذه الفكره 0
هناك مثل يقول (( لولا أختلاف الأنظار لبارت الســـّـــلع )) ومن وجهة نظري أن متطلّـــبات الرحلة البرّيــــه ؛ وغيرها من السفريات الأخرى سواء طالت أو قصرت ؛ مدّ تها أو مسافتها 0 لها ظابط معين وهو أختيار من سيرافقك او [[ يخاويك ]] لهذه الرحله أو المشوار وعلى هذا المرافق والذي بطوعك أخترته عن غيره لمعرفتك السّـــابقه به أو لأي دافع من قبلك تم أختيارك له 0ليكون رفيقاًَ لك فلن تختار طبعاًَ واحداًَ لاتعرفه وقد قيل من الأمثال والحكم في هذا الموضوع الشّــيْ الكثير على سبيل المثال ـ الطّيور على أشباهها تقع ـ الحي يحييك والميّـت يزيدك غبن ـ أفتك من العيّـات بأنصاف مالك وإن عيّــوا العيّـات بالمال كله ـ فالمرجعيه والأساس عليك أنت وليس على غيرك ؛ وعادة ًَ الرحلات والكشتات البرّ يه يسبقها أعداد ومشاركة وطرح آراء سواءًَ للوجهه أوالموقع وكذلك الكيفيه من قبل جميع الرفقاء أو(( الخوياء )) والترتيب والتنظيم000 0 عموما ًَ نرجع للموضوع المطروح وهو الأساس
[ القـــطـّــه ] فأني أرى أن لكل ناس أو ربع يسافرون مع بعض لهم طريقة معينه
وطبعا ًَ على ماقالوا : أقشر مغصوب أبن آدم ؛ ولا فيه أحد يبي يروح بالغصب وإن حصل فهونادر ويكون من باب المجامله 0 والقطه أو المشاركه الماديــه بالذات تحكمها الضروف وهي حسب الأحوال ولا أعتقد أن الماده سبب أساسي لعدم المرافقه وربما تكون سبب ثانوي ؛ وأقرب مثال على ذلك إن فيه ناس ودّك يخاوونك ويرافقونك بروحاتك ومشاويرك لطباعهم وخصال طيبه فيهم تميّـزوا بها عن غيرهم حتى ولو لم يدفعوا ريالا ًَ واحدا ًَ المهم تواجدهم بالرحله 0 والمهم بالرفقه الأخلاق وليس من يدفع أو يقط واللي رايح يبي يرتاح ماهو رايح ٍِ يدوّر مغثـّـة باله ؛ ولاحسّب الزرّاع زرعه مازرع ؛ ومن خلا خويه بأول زلــّـه خلا ّه الزمان بلا رفيق ؛ أما أدفع لاتدفع من فضل ربي أني ماخبرت الشيْ هذا صار معي ولله الحمد ؛ كل ٍِ حسب جوده وماجوده ولاني خابر ٍِ هناك فرضيات ؛ أو التّوقف على الماديّات وعادة ًَ مع الخوياء المتفاهمين 0 ولاني والله خابر ٍِ أنا نحسب على أحد وعلى ماقيل : المشروك مبروك واحد يعبي بانزين وواحد جاب أغراض الفطور وواحد أخذ لنا لوازم الرحله وشاركه فلان ؛ وإن أحتاجوا شيْ من الأساسيات ولاهو متوفر عندهم جابه الآخر من عنده 0 ويالله حسن الخاتمه والحياه كلها تقزير بتقزير ؛ مادايم ألا وجه الله سبحانه وكل شيْ فاني 0 ولايبقى للأنسان إلا العلم الغانم وما فعل من طيب ولاينتحسّـف عليه إلا الردى 0 وكلن يبي يعد ماواجه من طيب وألا ردى 0 وشهود الله بأرضه 0 فيالله توفقنا للخير والهدى والعمل الصالح وتثبتنا على الحق والقول الثابت 0 وأدري أني طوّلت بالموضوع ويمكن يمل القاريْ من قراءته لكن أرجو السموحه 0 والسلام عليكم ورحمة الله وبركاته ////////// ذيب حوما //////////

[القماري]

القطة
والله أنه موضوع تاعبني ، المشكلة مثل ماتفضل بها الجميع (يعتمد على ربعك وسلوكهم) يعني فيه ناس ودهم دوم يصيرون هم أصحاب الفضل والدفع على الدوام (كرم زايد) وفيه ناس يتغير لونهم ونظرهم يوم إلي تقول فلوس. وفيه ناس يدفعون ويستحون يطالبون أخوياهم بالمبلغ المطلوب وفيه ناس الوجه بلاطه ولا حتى يعبرك (ماخذه معك ومسنع أموره ومكيف على الآخر ) وفي النهاية حتى مشكور مايقولها.
أفضل حل أنه يكون للمجموعة (أمير) مسئول عن الرحلة يعرف الطلبات ويعرف تكلفتها ولو بالتقريب ويكون قوي عيون وماعنده كيري ميري ويقولها كاش ( مرافقنا القطة هالقد ريال والدفع مقدم ومطلوب منك أنك تسوى كذا وتجيب كذا ) .
يمكن مثل ذي الطريقة تعرف خويك وتعرف الإستغلالي وإذا أنت ماتحب الوحدة في طلعاتك ، توكل على الله وحضر كل شيء وسوي لك بطاقات دعوى وعوضك على الله.

[صقر]

اخواني الاعزاء
السلام عليكم ورحمة الله وبركاته


الحقيقة كلكم كلامكم عين العقل ونستفيد من هذا الكلام نقاط مختصرة

الاولى صاحب السيارة ان اغلبنا عنده سيارة جاهزة للرحلة وصاحب السيارة لايتميز عن الباقين بأي شئ
الا اذا تعطلت السيارة فيكون تصليحها على القطة
ثانيا المصاريف
عادة مايحضر احد الاعضاء (عزبة) اي الاغراض وتستكمل من القطة واذا رجع يكون له باقي الاغراض التي لم تستعمل لأنه تعب وصففها وكملها
ثالثا: هناك شريحة من الناس يتمنى الواحد يطلعون معه ولكن لضيق ذات اليد لايستطيعون الدفع فهؤلاء من وجهة نظري الخاصة انا ادفع عنهم لأني انا طالع استانس وهؤلاء ليس بهم عيب الا الفقر والفقر ليس عيبا
رابعا : وجوب وضع امير للرحلة ويكون هو المحاسب ومايعرف المجاملات حتى الكل يرضى.

[سيف السيف1]

السلام عليكم ورحمة الله وبركاته أخي الباز موضوعك جيد وهام لأصحاب الرحلات والكشتات فجزاك الله خيراً على هذا الموضوع,, حقيقة قرأت تعليقات وآراء الأخوان أكثرها مقنع اعتقد أن الرحلات تختلف باختلاف المسافات فالمسافات البعيدة هي التي تحتاج الى تخطيط مسبق,, أعتقد أن لكل شخص له أصدقاء مقتنع بهم تمام الاقتناع لذلك يجب على الجميع فتح باب المصارحة ومناقشة الموضوع ووضع شروط وبنود للرحلات لأن المجاملات لاتخدم المجموعة,, والناس تختلف ؟؟؟؟ فأنا أرى ما يأتي
1/ شراء عزبة أو ثاية وملاحقاتها خاصة للرحلات من المجموعة.
2/ تعيين أمير للرحلة بالانتخاب.
3/ اختيار المكان المراد الذهاب اليه.
4/ تعيين أمين صندوق .
5/ اختيارالسيارات للرحلة بالاتفاق مع الشباب.
6/ تغيير زيت وسيفون وتشحييم السيارات وتفقدها قبل الذهاب.
7/ بعد الرجوع من الرحلة بالسلامة يجب تفقد السيارات واصلاح أي عطل مهماكان وتغيير زيت وسيفون
وتشحييم وغسيلها بستم ومعها حبة رأس بعد,,,,