سكر بماء وريح وارتاح

[عاذي]

كثر في الأونة الآخيرة بهذا المنتدى العزيز الحديث عن بيع الطيور وشراؤها وماهي الشروط الضامنه للبائع او المشتري والمشتري هو الحريص على وضع الشروط دائما .. والمفتاح الأساسي للشروط هو وشلون تصير دعوجي وتاخذ حقك سواء كنت بائع او شاري .. فمن الاجدى من وجهة نظري هو ان تشتري الطير سكر بما لايشرط البائع ولا يشرط المشتري .. لأنني ماشفت من الشروط اللي اضمنت حق احد خاصة المشتري وكم واحد اكلها علقة ولا على ماقالوا اكل خابور ... بمختصر العبارة مافية ثقة .

[البيان3333]

والله مشكله بس اناس مهي واحد فيه رجال يقال قال وفيه رجال اذا قال مايصدق

[ابو مقحم]

الناس تختلف وانا اخوك بعض الرياجيل كلمته عن صك
وبعضهم لو يحلف قدام الكعبه ما صدق

[ابا الصلابيخ]

اخي الكريم /

الشرع لم يترك شيئ وأمر با الكتابة بين الولد وابية فما بالك با الصديق او موقع لاتعرف منهم احد

حتى النبي ابراهيم علية الصلاة والسلام بما معناه عندما خاطبة رب العباد قال / اولم تؤمن يا ابراهيم قال ليطمئن قلبي

يجب الحذر الحذر من البيع والشراء ويجب ان يكون هنالك كتابات حتى ترد الأمانات لأهلها

[الشامي55]

شكرررررررررررررررررررررررررر

[اقدم صقار]

السلام عليكم ورحمة الله وبركاته
اخي الكريم
سكر في ماء يعتبر عند الصقاقير مريض او ما ينفع >>> في البرميل
وهل لو كان عندك طير سبوق ويلحق وطيب للبيع بتقول سكر في ماء !!!
انا من وجهة نظري ان الرجل يقول اللي عنده من علوم الطير بصدق ويشرط الشاري الفحص في المستشفى والمدعى يشوف جناح الطير سواء على حمام او على الشلو (التلواح)
على كذا الواحد يشتري وهو مطمئن ان الطير اقل شي سليم من الامراض او الكسور وما شابه ذالك
اما الفعل عاد علمه عند الله ، يمكن يصيد معك وهو ما صاد مع اهله ويمكن ما يصيد والصقاره لها دور في الطير
بصراحه موضوع البيع والشراء شبه انعدمت المصداقيه فيه وللاسف من كثر ما نقى ونشوف من المشاكل وكلامي ماهو عام للجميع ولاكن الخيب خرَب على الطيب وباقي من اهل الخير والصدق واجد والناس فيهم الخير والبركه
عسى الله يوفق الجميع لما فيه الخير
تقبل مروري
اخوك ابو منصور

[انور العنزي]

الناس وانا اخوك ماهم واحد مثل مافيه طالح تلقى صالح وبعض الاعضاء كلامه عن ورقه واقسم باالله انب ندمان اني مادخلت المنتدى من زمان لان تعرفت على رجال تنشرى خوتهم اما السكر بالماء احرص على الفحص واهم شي منهو منه تشتري بامكانك اذا كنت متواصل التعرف على رجال ثقات وقد الاستشاره اقصد بالعضو الي ماهو مضبوط

[عاذي]

شكرا لمروركم جميعا : لكن من كثر الكذب وعدم المصداقية وعد الوصف الدقيق لفعل الطير ومواصفاته الواحد يشتري بثمن منخفض .. ويترك التوفيق على الله ان نجح الطير يحمد الله وان فشل الطير مايلوم نفسة ويقول انضحك علي ويكتشف نفسة انه ماهو صقار ذكي وانه صقار محدود النظرة .. والافضل ان الصقار ماينخدع بطير ذو سعر خيالي .. واكيد منكم من يعرف ناس اشتروا طيور فوق الخمسين الف ريال ويوم جاء الجد كم راحت عليه من حبارا يعني لو شريت طير بالفين ريال يمكن يفعل اطيب من ابو خمسين الف .. اسأل الله التوفيق لجميع المسلمين والمسلمات .

[حمد لعنزي]

صؤتي مع صؤت ابؤمنصؤر ؤانؤرالعنزي

[عواد الشمري2]

الله يعطيك العافيه على الموضوع
وكثر النقاش بالموضيع هذي
بنسبه للبيع الطير سكر بماء هذا معناتها بدون خط رجعه
يعني تشتري كوم ريش
بس الورقه هي الي تظمن حقوق الناس
وعلى قولت اخوي انور فيه الصالح وفيه الطالح

[الحر503]

ما ازيد عن كلام الاخوان كفو ووفو بيض الله وجيههم ولاهان القاري ,,,

[ناوي السفر]

سلام عليكم ورحمه الله وبركاته
تبون وجهت نظري الي عنده طير سبوق وصامل ويذبح مراح يعرضه في المنتدى الطير له سمعته واين رفاقته وربعه مايشرونه الطير الطيب مايروح بعيد ولايعرض في المنتداء

[(هزاع)]

لاحول ولاقوة الا بالله
اقول مستعين بالله عزوجل
انني اتفق مع الاخوان انه كثر وبشكل ملفت الغش وختلط الحابل بالنابل وماهو بالمنتدى فقط بل بعد بالسوق ولاقلت للواحد وش علوم الطير قام يمدح الى ان يفهمك ان الطير ماهدوه على طير ولا على ارنب الا طرحه
ولاقلتله افحصه واشوف طياره ( اختلق لك الف عذر)
ليه ترفض الفحص والمدعى الا ان الطير به بلا
كنا نسمع بالغش عند شريطية السيارات وزيت اصطب
اضاهر انتقلت العدوى
لاكن ماتخلا من اللحوات الغانمه اهل الذمه ولا يسلمون من ان تبخس سلعهم ويهاجمو من اولائك ليخلا لهم الميدان
وبختصر بكلمه (المسلم ماهوضعيف الا لله)
فحص ومدعى ولا فارق انت وطيرك

[llonely]

الحل الله لا يهينك دربيل وقرشع وسمان وعبي التانكي الاحتياطي فل والعزبة اهم شي لا تنساها وعلى مجيرمة بس مو اللحين ان شاء على اخر السنه واطرح الطير بنفسك وانا اخوك

[البرنس الليبي]

اي طير يعرض في مكشات ويجاوب على اللسته يعتبر مطالب بها وإذا اختلف شي فأنها تدينه فيما لو رفع الامر لجهات رسميه ....مثلا يقول الطير يلحق الحمام السلم وتتفاجأ ان الطير مايعرف الحمام اصلا .

[Moo7al]

من وجهة نظري
اسأل عن راعي الطير قبل وبعدها انشد عن الطيره وعلومه ومن حقك تشوف جناحه بالمدعى

الطيب لأهل الطيب مبدأ وعاده = والا الردي لو حاول الطيب ماطاب ...

دمتم بود

[الكعمي]

والله كلام الاخوان عين العقل والغش في كل مكان أنا تركت الصقاره أوكرهت الصقاره من سنة 98 ميلادي بسبة
اني خاويت أحد ؟؟؟؟؟ طبعاً عندنا بالكويت وكان يشتري الطيور بالاف الدنانيروبعض الطيورنوريها الحباري تصفح عنها من تخيش الحباري يهف الطيرونهدله من الحباري اللي نصيد على طول يكبسها والله 6 حباري يكبسها بس قفريه يصفح عنهامااطول عليكم الرجال يهدالطيرعلى الحباري اللي صايدينها ويصورها فيديو ويوريهااللي يبي يشتري الطيرويقول هدادوعندنامثل بالكويت يقول الله يعزكم ويحشمكم ويعزمنتدانا الغالي (اشتروحش لاتصيرجحش )وسامحوني يااخواني

[الامبراطوري]

السلاكم عليكم ورحمة الله وبركاتة

فعلا كلام اخونا عاذي قمت الصواب وان المصداقية بكلام الصقارين اشوكت على الانقراض تعال ناخذ امثلة على بيع الغش سواء بالسوق او بالمنتدى

السوق
- الطير لحاق وسبوق وطلاع وابا الحكايا وصايد قبل اسبوع خرب حط قوسين على خرب يعني بيصيد النصر بعد كذا الطير ما عنده مشكلة
- الطير سليم من جميع الامراض وما فية الا العافية وبالعلامة يقولك الطير مهدود وهو ما شاء الله يالله تشيلة من الصنعة واذا قلت بهدة اليوم يقولك لة اسبوعين ما هد
- الطير ما يكوش ولا ينقل ولا يصيح واذا جاء يبرقعة صاح الطير قالك اول مرة يسويها وهو لا فك برقعة تقول سيارة دورية من الصياح
الطير مخرج من الشيوخ عاد رح دور من هم الشيوخ يمكن يقصد شيخ القبيلة فؤاد والله ماندري
- الطير اصيل ومطروح على يد شباكين وهو تفريخ وبوزة يجيلة شبر ورجلية تقول رجلين دجاجة رومية الخ ...

نجي للمنتدى
- الطير يقولك قرناس يمكن ثنو او ثالث واصلا الطير طايحة خشومة من الكبر

- الطير سليم وما عمرة شاف المستشفى واذا وديتة المستشفى تقاة ما شاء الله ملفة مليان من الامراض شكلة سليم من العافية
- الطير صايد مع اهلة الاولين ومعي ثلاث سنين ما شاف شي سبحان الله انقرضت الحباري من هالطير
- الطير يوجد فيه عيوب اخرى تتفاجئ انة كات لا ولله الحمد
الخ .....

ولا المشكلة اللي جايبين طيورهم لسوق كاملة المواصفات تلقاة يدور طير ابا الحكايا واذا لقا طير بالمواصفات اللي يبي تعال اسمع النقد الهادف البناء عن الغش والامانة


تحياتي لكم ودمتم بود اخوكم الامبراطوري

[راعي صيحه099]

كثر في الأونة الآخيرة بهذا المنتدى العزيز الحديث عن بيع الطيور وشراؤها وماهي الشروط الضامنه للبائع او المشتري والمشتري هو الحريص على وضع الشروط دائما .. والمفتاح الأساسي للشروط هو وشلون تصير دعوجي وتاخذ حقك سواء كنت بائع او شاري .. فمن الاجدى من وجهة نظري هو ان تشتري الطير سكر بما لايشرط البائع ولا يشرط المشتري .. لأنني ماشفت من الشروط اللي اضمنت حق احد خاصة المشتري وكم واحد اكلها علقة ولا على ماقالوا اكل خابور ... بمختصر العبارة مافية ثقة .




طيب ســـؤال
اذا صار الطير طيب وصايد ويهد على الحمام وكراوين وحباري وكل شي
وباعه الرجال وهو صادق
وجاء الموسم الجاي
وطلعت الطيور من المربط واخذ الرجال طيره وجرد وجهزه
ولا صاد ولا لحق حتى الحمام لأن السبب من صقارته اعدم الطير( وش تقول فيها)

اضرب لك مثال
رجال باع له طير مشروط يلحق الكروان
وهده اللي شاريه الصبح على كروان ولا بغاه واتصل على اللي شاريه منه وقاله طيرك مالحق الكروان
رد عليه قال الكروان موجود قال ايه قال انا جايك وجاء لمه واخذ الطير من الضحى الى العصر وجاء للي بايعه عليه وقاله وين الكروان وهد عليه الطير ولحقه لين ذبحه

وش تقول في هالشي؟؟؟ اذا صار السبب من صقارة الرجل؟؟


من تاخذ كلامه؟

[سعيد العقير]

مسيتم بالخير
انا مع اخوي اقدم صقار كلام سليم ميه بالميه
والصيد كلن واصقارته انا سبق وبعت طير وصايد معي وراكد ومبروك وسليم خذاه واحد وجاني بعد ثلاث اسابيع وقال الطير يحقل وفيه صيحه وما قنص
اصير انا مجرم الحين
صقارته رديه وش اسوي به
ابيض وجه يا اقدم صقار كلامك وسبقتنا عليه ودك هالكلام يرفعونه اعلان للجميع

[عاذي]

اشكر لكم اخواني جميعا ردودكم ومشاركتكم وان دلت على شئ فإنما تدل على حرصكم على ابراء ذمتكم وذمم اخوانكم الصقاقير من مبدأ حديث الرسول صلى الله عليه وسلم فيما معناه {{ انصر اخاك ظالما او مظلوما قالوا الصحابة ننصره مظلوما فكيف ننصره ظالما قال تأخذون بيدة بعدم الظلم وارجاع الحقوق لاصحابها }} فما طرحت هذا الموضوع الا لابدأ ارئكم وحلولكم للاستفادة منها والافادة لجميع من يطلع عليها وهذه ماتأتت الا بفضل الله سبحانه ثم فضل منتدى مكشات واعضائه وادارته العزيزة فلا ازيد على ماطرح من مواضيع سابقة من الأخوة الاعضاء الا لزيادة وعموم الفائدة فيشهد الله اني احبكم فالله واصبوا لذلك اليوم الذي يأتي لا ظالم ولا مظلوم لجميع المسلمين والمسلمات .. فما انا الا صقار مبتدئ يسعى للفائدة من خبرتكم وتجربتكم .. اسأل الله التوفيق والنجاح ودوام السعادة للجميع .

[تميم2222]

صح لسانك........

[اقدم صقار]

مسيتم بالخير
انا مع اخوي اقدم صقار كلام سليم ميه بالميه
والصيد كلن واصقارته انا سبق وبعت طير وصايد معي وراكد ومبروك وسليم خذاه واحد وجاني بعد ثلاث اسابيع وقال الطير يحقل وفيه صيحه وما قنص
اصير انا مجرم الحين
صقارته رديه وش اسوي به
ابيض وجه يا اقدم صقار كلامك وسبقتنا عليه ودك هالكلام يرفعونه اعلان للجميع


شهادك اعتز فيها يا سعيد العقير وصدقني ما نيب راعي مجامله ونصيحه لا تشرط لحد لو يصيد معك عدد ريشه إلا للرجال اللي تعرف انه صقار وتثق في صقارته قبل يشتري الطير
ودي ابيع صقار بنقص فلوس عن غشيم بفلوس واجد
الموضوع مرمس من زمان ولاكن من تصفحي وجدت ردك وحبيت ارد عليه