مشكلة في الجيب ولاحلتها الوكالة الى اليوم !! اسعفونا !!

[نجمة سهيل]

السلام عليكم ورحمة الله وبركاته ..

كيف حالكم يالربع على البركه رجعة المنتدى ..

يالربع عندي مشكلة في الجيب ولاحلتها الوكاله .. كل مادخلته لهم واستلمته القاها فيه والمشكله اني فحصته مرتين بالكمبيوتر ويقول سليم (( رغم اني مااعترف بصيانة الكمبيوتر )) .. دخلته تشييك 40الف وقلت لهم على المشكله قالوا سليم .. دخلته 50 الف وقلت لهم عنها قالوا سليم .. دخلته 60 الف اخر تشييك وقالوا سلييم ..

دخلته عليهم الاسبوع الي راح والموتر كان ماشي 68 الف .. قلت لهم عن المشكله وطلعته ورجعت بس اقل من اول ..

المشكله هي طقه بالقير اذا وقفت السياره .. اوضح لكم اكثر مثلا امشي وجيت عند الاشاره بوقف اول مايوقف الموتر يطق طقه والقير يتحرك شوي معها .. حتى ولعت لمبة At الاوتو تشيك .. وبعدها صار الموتر مايغير أبدا على الأول معلق .. اطفيه واشغله مره مرتين ويرجع طبيعي وبعض الأحيان يعلق على الرابع .. واطفيه واشغله واقلبه عادي واول مايمشي الموتر يقلب تماتيك ويعيي يرجع مره ثانيه عادي ..

والي يقهر الواحد انه لما دخلته لهم بعد ماانتهى ضمانه على 68 الف .. قالوا فيه مشكله في الدائرة وصلحناها ..

الحمد لله الحين مالاحظت شي مارجعت لي مشكلة تغييرات القير .. بس الي مهبل بي طقة القير .

والمشكله القير فحصته اكثر من مره سليم مافيه شي .. وان كان فيه محل احسن من الوكالة دلوني عليه ..

وديته لبن مرضاح وساقة الفني قال لا تطمن ان شاء الله المشكلة ماهي في القير جبه لنا ونصلحه ان شاء الله ولا وديته لهم لانه كان في الوكالة ..


اسعفونا يالربع ترى الموتر جديد 2005 .. على فكره الموتر باترول سفاري توب ترونيك (( عادي وتماتيك ))

[معطاب]

اسعفونا يااهل الخبره وانا برضه عندي نفس المشكله بس موتري جيب ربع تويوتا 2006 ومشكلتي اني انا عند الوقوف والضغط على الكلتش اسمع صوت الطقه تحت وعند سحب دواسة الكلتش بسرعه والموتر واقف وفاضي اسمع الطقه ذي مريتلي على واحد سعودي عندنا بالديره ويقولي انو الطقه ذي في الكلتش مو في القير ويقول انو فيه فحمه وملقاط للكلتش تكون موجوده بين القير والمكينه وسبب الطقه منها بس انو يحتاج يفك قير الموتر عشان يغيرها ويقول ايضا انها ماتأثر وانا متردد اوديه الوكاله لاانه نصحني عنها كم واحد واظن انو الطقه اللي تسمعها انت بموترك ايضا من الفحمه والملقاط عموما اللي عنده فكره عن هالموضوع لايبخل علينا ووش رايكم اوديه الوكاله ولا اتركها
وتحياتي
<O:p</O:p

[القماري]

هذه واحدة من قصص غش الوكالات
معقول يكون صاحب السيارة يرى أن الموضوع به مشكلة بحاجة لإصلاح ، والوكالة تماطل بقول أنه (لامشكلة على الإطلاق)!!!
أتوقع أن المسألة غير طبيعية والجير به خلل أو عطل ما (الأفضل في مثل هذه الحالة تبليغ المدير العام للوكالة أو حتى إرسال رسالة للمصنع ) توضح فيه نوعية المشكلة وتاريخ مراجعاتك للوكالة وأيضا أن أمكن إرفاق ملف فيديو للمصنع.
قد يحصل أن يكون عيوب تصنيع فما المانع من تدارك الأمر وإصلاح الخلل ؟ّ ولماذا يطلب من الزبون تحمل النفقات والتعب والبهدلة والمشاوير.
من غير المنصف أن تكون السيارة موديل 2005 أو 2006 ولا يوجد حل .
نصيحة أن لا تتنازل عن هذا الخلل والأفضل أن تذهب بالسيارة لأكثر من ورشة (فقط لأخذ تقرير أن أمكن بدون طلب إصلاح) وبعدها تعرض التقارير على الوكالة فإن أنصفوك أو بعدها ترجع للمراجع الأعلى (الوكيل ذاته أو حتى المصنع أو حماية المستهلك وحتى إن وصل الأمر لهيئة المواصفات والمقاييس) أعتمد على الخطابات الكتابية ولا تعتمد على قول بدون دليل .
بالتوفيق

[ابن هدبة]

السلام عليكم

نجمة سهيل انتبه ياخوى ترى شغلتك كهرباء او وزن للقير بس يمكن ضربتلك جرف والا مطب قوى .

والا انت يامعطاب نعم هذا صوت الفحمه يمكن داخلها تراب من غير وجيهكم ويحتاج لها شحم

وليا فكيت مرة بدل الفحمة والدسك والصينية وحط ربل الحماية من التراب اللى بعصا الكلتش
وريح نفسك بالمرة .

[معطاب]

مشكووووور يابن هديه بس سؤالي هو هل انا لو تركتها لها تاثير وبعدين حاولت اشحمها ماحصلت لها مكان مشاحم بعدين قالو لي انو عشان اغيرها لازم يفك القير ابي نصيحتكم هل اوديه الوكاله ولا افكه واغيرها برا ولا اتركها عادي لاانو قالولي انو مالها تأثير

[Mohammad]

عزيزى بخصوص الطقطقه فى كلتش الربع! اعتقد ان القطعه المتسببه فى المشكله اسمها (clutch Master)...اسأل عنها فى الوكاله واعتقد تغييرها يلزم انزال القير. وتقول الوكاله انها ليست مشكله ولكن الصوت الصوت مزعج ولو غيرتها راح الصوت تماما ولكــــــــــــــــــــــن بمجرد ان تدخل فى طعس وتستخدم الدبل وتستخدم الكلتش زياده شوى وهذا طبيعى يعود الصوت!

نريد توضيح من الاخ ابن هديه بخصوص ربلة الحمايه هل هى قطعه غيار والا شىء خارجى وكيف يتركب؟ اذا كانت المشكله بالرمل والغبار ولو انى اشك فى ذبك وهذه تقوم باللازم فهذا حل ممتاز وتوكل على الله

[معطاب]

مشكور اخوي محمد بس الصوت ذا انا اسمعه على طول عند سحبة الكلتش وننتظر توضيح الاخ ابن هديه عن الربله وشاكر لك مرورك

[ابو خطاب]

الوكالة دواها السريع والعاجل... بدل ماتدخل في مراسلات واتصالات وخطابات..ووزارة تجارة..همن يقضي الضمان وانت تردد.
انصحك اخوي نجمة سهيل ..تدخل الموتر على حسابك للوكالة..وتطلب منهم اصلاح المشكلة.. ولا تجيب طاري لا ضمان ولا مجاني.

واذا جيت تستلم الموتر وتاكدت من اختفاء المشكلة تماماً.. طلع مايثبت ان السيارة تحت الضمان ويتحملون كامل نفقات الاصلاح.
واذكر في ذلك احد الاخوة كان لدية سيارة فولفو جديدة وعلى ضمان..وقد اهدر الكثير من وقته وبقي دون سيارة بحجة ان سيارته عند الوكالة من عدة ايام لاصلاح خلل فيها..ولكن دون جدوى..فلا صلحت السيارة ولا التزمت وصدقت الوكالة..وبعد عدة اسابيع ادخلها وطلب من موظف الاستقبال اصلاحها باي كلفة كانت..وقد اتصلوا عليه ليخبروه ان المشكلة في نظام حقن الوقود ويكلف تقريبا 7000 ريال +اجرة اليد..ووافق على الاصلاح.. عند ذهابه لاستلام السيارة..طلب منه التسديد ..فابرز اوراق الضمان وان السيارة لا زالت على الضمان وكذلك ابرز تقارير اصلاحهم السابق..ليثبت انه ليس بسوء استخدام...وقد انتهى الامر الى ضحكة من قبل مدير الصيانة. على قدرته على اخذ حقه بالحيلة دام انهم لم يعطوه اياه بالحسنى.

(من له حيلة فليحتال)