أستفسار عن ترهيم طرمبة بنزين bmw للسفاري. عاااااااجل

[K.S.A.A]

السلام عليكم ورحمة الله وبركاتهمساكم الله بالخير
كما هو واضح في العنوان اللي ركب طرمبة البنزين bmw على جيب سفاري فياليت يفيدنا فيها. هل ينصح بتركيبها؟؟
ووإيش مواصفات الطرمبة؟
موديل كم ؟وحجم كم ؟؟
وكم سعرها ؟


شاكراً ومقدراً للجميع .

[مواسي الطعوس]

__ مامثل حقت الفتك .....وسعرها بحدود 380 ريال وكاله .

[قدر مكتوب]

مزعجة مره لها صوت مزعج , جرب طرمبة الفتك على قول الرجال او الفكس ار او walpro كلها جيدة

هذا موقع walpro وللعلومية غالب اصحاب المرهمات والتعديل يركبونها
http://www.walbrofuelpumps.com/

[الخلاوي 15]

انا كنت مركب طرمبة فكسار على باترول بخاخ 95

والحين مركب طرمبة بي ام .. كلهن طيبات لكن يعيب البي أم انها غاليه جداً حول 700 ريال

[راعي المجهم]

طرنمبة الفكساااااااااار أفضل طرنمبة بنزيييييييين كهربائية

[كيري ميري]

الباترول 2002 وفوق ممتازه

[قلقانش]

من واقع تجربة على نيسان لصاحب الموضوع

انا جربت طرمبة الـ بي ام واللي تصنعها شركة Busch

مواصفاتها /

سعر غالي 700 بالضبط
صوت زنه مزعج
دفع متوسط

واذا حاب اجيب لك ارقامها فا انا حاضر اصور لك كرتونتها

وجربت Walpro امريكية بديله

الصدق ضغط عالي وممتازة حيل وسعرها معقول 250 ريال بس وتلاقيها بكثرة عند محلات قطع الغيار الامريكية

دور وبتحصلها

لكن لا تخلي احد ينصب عليك ويجيبها من عنده على اساس انها طلبية ويصلخك بـ 350 او 400 ريال

أطيب التحيات ,,

[Magellan]

والبرو (Walbro) عنوان الثقة وجودة المنتج
هذا اللي اقدر اصف هذه الطرمبة
الطرمبة هي كهربائية فقط لايوجد لها جرم وتركب على جميع السيارات مع بعض التعديلات البسيطة
مثل انك تشيل قفيز او تعدل مجرى الفلتر ...ألخ
ويصل ضغطها حتى 80 psi بينما الطرمبات حقات الوكالة فهي لاتتجاوز 60 psi
المشكلة الآن الصينيون قلدوها وعندي وثيقة تثبت ذلك
لذلك يٌنصح بالشراء من موقعهم او من ebay اي تتأكد من المنتج موجود بأمريكا قبل الطلب

[ويكو]

تسلمو اراء جميلة من وجوه اجمل بارك الله فيكم

[ابوكشتات]

طيب ياشباب طرمبة والبرو له موزع بالصناعيه القديمه بالرياض وهل تصلح على الجموس لأن غالبية اعطال الجموس 90% طرمبة بنزين .

[درجلان الشمال]

نصييييحه لاتركب طرمبه بي ام تراه ازعاااااج والظاهر انه ضعيف ضخ البنزين لاني اشوف السياره اختلف عزمه خاصه اذا دعست عليه بالبدايه يكون كانه ثقيييل الي يوصل عداد الضغط 3 وبعده ينطلق
هذي تجربتي ولكم تحياتي

[K.S.A.A]

أحب أشكر كل شخص تفاعل مع الموضوع وأقول :
الله لايخليني منكم ومن تواجدكم لاعدمتكم .

وبيض الله وجهيكم على النصائح.
وأحب أبشركم أني ركب طربمة BMW حجم 740 ( 8 سلندر )
بقيمة 600 ريال ( الله يعوض علي وعلى جميع المسلمين ) , ألماني وليس من صناعة بوش .

والنتائج إلى ألحين ممتازه , ضغط ممتاز وخفة عزم والموتر يمشي بكل أريحيه ولا يوجد صوت للطرمبة ( ممكن الصوت يختلف من نوع لآخر )

وأحب اضيف للجميع أني كنت مركب طرمبة جيب لكزس وكانت النتائج طيبه بالحيل
ولكن ضعفت هالأيام وغيرتها بطرمبة الBMW

وأسأل الله لي ولكم التوفيق والسداد وأن يعطينا من خير سياراتنا وأن يكفينا شرورها .

[التعـ King ـديل]

طيب ياشباب طرمبة والبرو له موزع بالصناعيه القديمه بالرياض وهل تصلح على الجموس لأن غالبية اعطال الجموس 90% طرمبة بنزين .

بالنسبه للجمس ركب له طرمبه فكسار لانه ثمانيه سلندر مثله وتضبط امورك قيمتها تقريبا 500 ريال

وعندي الورشه اللي تضبطه لك :good2: