تكفون بياض بعين شيهانتي وش اعمل ؟؟؟؟؟؟؟؟؟

[غاوي تعب]

لاحظت بياض خفيف بعين الشيهانه اللي عندي تكفون اذا فيه احد يعرف وش هالمرض ووش علاجة او هو امر عادي وطبيعي ارجو الافادة

[وضــ الوافىـاح]

هلا اخوى غاوى تعب


اذا البياض من جديد يمكن من البرقع حاول ان تاخير البرقع


لان برقع الطير اذا صغير يصيب الطيب بحوافه

حاول طال عمرك تبدل البرقع

ورح لعيادات الطيور احس لك من الوصفات الطبيعيه

[غاوي تعب]

اخوي وضاح الوافي والله شايل البرقع عنه من حوالي اسبوعين لاني ماني مستخدم هالطير هذي السنه والبياض هذا صابه وهو بدون برقع يعني البرقع مهو السبب

[وضــ الوافىـاح]

هلا والله اخوى غاوى تعب

طال عمرك ما مر على نوع المرض لكن الاخ ابو ساسا
وباقى الشباب يمكن لديهم فكره حول الموضوع

واليك اهم الامراض التى تصيب الطيور واسبابها


الأمراض التي تصيب الصقور :-
القــلاع :

هذا المرض تسببه جرثومة وليست بكتيريا ، وغالباً يحدث بطريق العدوى من أي طير أخر وخاصة الحمام وكذلك الاكل الفاسد .

ومن أعراض هذا المرض قلة الشهية ، وتظهر رائحة كريهة من فمه ولفظ الطعام أي تقطيع اللحم إلى قطع صغيرة ورميها .



الجدري :

هوعبارة عن انتفاخات صغيرة حمراء على شكل حبيبات تظهر على أصابع الطير وحول فتحات أنفه وهذا المرض معدي وينتقل عن طريق لسع البعوض الذي يسبب المرض؛وهذا المرض قد يؤدي إلى تشوه رجلي الطير ووجهه إذالم يعالج .



الســومار :

وقبل أن يصاب الطير بالسومار تظهر عليه حالة يطلق عليها (( الحفاة )) وهنا يكون العلاج أسهل قبل ان يتضاعف وتصل إلى مرحلة السومار .

ويظهر هذا المرض عل كف الطير بسبب الوقوف المستمر على وكر غير ملائم ويكثر هذا المرض في الغالب على الطيور الكبيرة ثقيلة الوزن عند ما تقف على أرضية غير مناسبة .

أمراض الجهاز التنفسي ((الرداد )):

عبارة عن فطريات تصيب رئة الطير ومن ثم يبدأ تأثيرها على الأحشاء الداخلية خاصة الأكياس الهوائيية والكبد والكلى ولأخطر من ذلك أنه يصيب الرأس والبطن في وقت واحد وأسبابه تواجد الطير في أماكن رطبه لاتصل إليها أشعة الشمس ويعرف هذا المرض من لون براز الطير الذي يميل إلى لون الصفرة أو الخضرة قليلا .



ديدان الصدر :

عبارة عن ديدان صغيرة دقيقة تسمى الديدان الخيطية تصيب الأكياس الهوائية فتؤثر عليها مسببة ضيق التنفس والتهابها، ومن أسبابها الماء غير النظيف والاختلاط بطيور مريضة .



التهاب الأمعاء والكبد :

وسبب هذا المرض الديدان الكبيرة التي تعد من أخطر الأمراض التي تصيب الأمعاء والكبد ، وهناك سبب أخر وهو البكتيريا الموجوده في الطعام الملوث التي تؤدي إلى الإسهال .



الصرع :

من أسباب هذا المرض أكل الصقورللحمام والعصافير التي تأكل المزروعات المرشوشة بالمبيدات الحشرية وهنهاك أسباب أخرى منها التعرض للبرد الشديد

[ابوساسا]

اخوي غاوي تعب
البياض الي بعين الشيهانة يمكن من قبل تشتريها وهو بها وتوك تشوفة وهذاء يسمى { وضحّة} بالعين اذا صارت صغيرة وذا كانت العين كاملة تسمى العين وضحاء يعني بيضاء.

اذا كانت جديدة حاول تحط عليها نقطة وحدة كل يوم من قطرة {بروزولين} المصرية تلقها بالصيدلية وبعد يومين او ثلاث شف النتيجة يمكن تفيدها.

[غاوي تعب]

اخوي وضاح الوافي الف شكر وما قصرت يابعدهم كلهم
_________________________________________

اخوي ابو ساسا والله انت داهيه هالمنتدى منت بسهل والصحيح ماني تاركك حتى تعلمني اللي تعرفة بالطب الشعبي انت مرة علمتني عن مرض السويرق وعلاجة واليوم تعلمني عن مرض الوضحة وعلاجها وش رايك ابدا انا وانت ووضاح الوافي بدايه حلوة بالكتابة عن هالامراض وعلاجهن بالطرق الشعبية واكون اول من يحط شوية معلومات وانا رايح اقول اشياء من عندي واشياء من عندك انت قلتها سابقا وكذلك الاخوان
1- مرض الصرع ويسمى ابو رقيبه وهالمرض ماله علاج الا علاج وقائي قبل ما يصير المرض لكن فيه علاج بالطب الشعبي وهو انك تمسك الطير وتضحي ببعض ريش رقبته من الخلف وتنتفه وبعدين يتم معالجته بالاتي فيه ناس جربو الكي بالمسمار على جلده وفيه ناس جربوا دهن منطقة الرقبه من الخلف بأي شحم سيارات او فازلين وفيه ناس يقطعون عرق صغير موجود بمنطقة خلف الرقبة وهو عبارة عن عرق اسود اللون ( والصحيح اذا صاب طيرك هالمرض اعمل به كل هالاشياء احسن من موته )
2- مرض الجدري وهو عبارة عن نتوءات حمراء مستديرة تصيب الطير في مواطيه واعلى المنخار وعلاجها يكون بكي الحبه التي فوق انف الطير ويكون الكي بعد ان تكون الحبه قد تصلبت
3- مرض يصيب بعض الطيور مرض داخلي ويسمى{ سويرق} وهذاء خطير يرمي الطير اكثر ريشة بدون ترتيب..( ليس قرنسة ) وعلاج هذا المرض يكون بأعطاء الطير فيتامين هـ + سلينيوم
4- مرض بياض في العين وهو اما ان يكون من البرقع او هو مرض يمكن معالجته باستعمال علاج وذلك بوضع قطرة واحدة بالعين يوميا ولمدة ثلاث ايام


وعندي سؤالين لكم هل الشناذرة هي نفسها الشبه واذا كانت هي عندي طير حر وكري ياليت تقول لي وشلون اعطية ووش كبر حجمها
السؤال الثاني اسمع بالمدهنه ودقها ياخوك تكفى وش هي والله حيرتني يمكن لها اسم ثاني عندنا واخيرا سلامتكم

[غاوي تعب]

نسيت اسم العلاج لرقم (4) بروزولين مصري الصنع كما قال ابو ساسا

[وضــ الوافىـاح]

هلا والله غاوى تعب زين يا خوى شورطيب واللى يعرف يحط وتراه ابو ساسا مايقصر وانت ماعليك زود

انا بحط عن مرض السامور
مرض الساموور اذا تم تداركه فى بدايته ممكن توقف انتشاره وذالك بوضع ماده

الفازلين مكان الاصابه :


ولنا تكمله

[غاوي تعب]

هلا والله بوضاح الوافي نوارة المنتدى واريد اعرف اذا كان يفيد تخضيب رجول الطير بالحناء في حاله السامور بس يكون الحناء سايل

[غاوي تعب]

انا جبت البروزولين بس المشكله بتقطير عين الطير والصحيح ان طير نزر الطباع ما ادري هو لازم اكتفه والا ماهو ضروري لان التقطير بعينه ما يجي على الكيف وهو واقف تكفون اذا فيه طريقه معينه للتقطير بعينه

[ابوساسا]

الحقيقة ياخوي {غاوي تعب} شورك والله طيب لاكن عند اكتمل الموضوع ارجو منك انك تنقلة بموضوع واحد يكون فية جميع ماكتبنا عن امراض الطيور وعلاجها لكي يسهل على العضو او الضيف البحث فية..

فية مرض ذكرتة انت وهوجدري واسمة الدارج{ جد رة} وهي اكثر ماتكون ببوزالطير { منقارة} وهي حبة صغيرة اول ماتكون زي الموية وبعدين تكون حبة قاسية واهمالها يقضي على بوز الطير وعلاجها بالكي وهوكي الحبة بمسمار وتكو حذر بلكي . لمسةخفيفة على بوزالطير لأن البوز مثل البلاستيك يتأثرعلى طول ويذ وب بلكي . وبعد يوم او يومين تتقشر الحبة وتكون حبة بيضاء يمكن نزعها ونقشها بمنقاش وتروح بأذن الله...

وذكرت مرض الصرع واسمة الدارج { الد ورة} وهو اكثر ما يجي من الحمام المصاب بهذاء المرض عند اكل الطير هذاء الحمام وعلاجة صعب اولايوجد لة علاج حتى الكي مع الرأس يكون احياناً غير مفيد لأنة عرق خفي على من لايعرف او يتطبب . والكاوي لابد ان يكون خبير وعندة المام لأن اي خطاء يسبب اقل شي العماء للطير اوالموت . وعلاجة بالمستشفى افضل ...

القلاع -- مرض يصيب الطير وهو شائع وخطير عند تركة قد يقتل الطير وهو مكروبات وتجبنات بيضاء بفم الطير او تكون بالعلافة { الحويصلة} وهذاء المرض يمنع الطير من الاكل . اذا كانت بالفم لايقدر الطير على الأكل واذاكانت بالعلافة يكون الطير ممسك بالعلف مدة طويلة ولا يقدر على الأكل واذا اكل يقوم {بقذف}العلف بأخراجة من علافتة .. وعلاجة بسيط اذا كان بالفم يعطى حبوب تسمى حبوب القلاع واذا كانت بعلافتة لابد من الذهاب بة الى المستشفى وذالك افضل لأن عندهم مواد سائلة تحقن في جوف الطير مع العلف المطحون..


اما عن سؤالك عن الشناذرة هي مادة بيضاء قريبة من الشبة لاكن ماهي شبة وتلقاهاء عند العطارين اوالي يصلحون الدلال..
والمقدار : نصيحة اذا كانت اول مرة لك تعطي طير شناذرة يستحسن انك تودية لصقار علشان تشوف كيف المقدار وتتعلم مشان ماتضر الطير لأنها اول مرة لك تعطي طير شناذرة ... يعطى الطيرالحر شناذرة مقدار حبة الفول البيضاء وتعطيه بعدها موية واول مايذ ب الشبـيكة{ مادة خضراء اللون لزجة } عادة يذب الشبـيكة مع ماتبقى من الشناذرة جميع .. بعدها تكون ذابح لك حمامة وناتفها تعطيها الطيرعلى طول مشان مايحرق باقي الشناذرة علافتة.. لابد ان يكون الطير صنيع او موزون للهدد لانها ماتصلح تعطى الطير وهو ضعيف...
المدهنة : هي زميكة الطير { الشحمة الي يطلع منها ريش الذ نـيـبـاء او الشكة }

التقطير بعين الطير: برقعه ثم امهد الطير بمهاد وبعدها ارفع البرقع ثم امسك راس الطير بيدك وافتح عينة وغطى العين بأصبعك ونقط بعينة وبعدها بدقائق برقع الطير ثم فك المهاد عنة ..

[غاوي تعب]

هلا والله يابو ساسا يارجال والله ماتركت لغيرك شي يكتبونه ما شاء الله عليك ماهو بس وفيت وكفيت الا بعد ما خليت شي الله لا يحرم هالمنتدى منك. انت تدري يابو ساسا وانا جالس اقرا لك اقول ياحظك يابو ساسا ما تحتاج لغيرك يكفيك معلوماتك
و جزاك الله الف الف الف الف الف الف الف الف الف الف الف الف الف خير ومشكورين

[ابوساسا]

حياك الله ياخوي غـــاوي تـــعـــب

بلعكس ياخوي معلوماتي على قدي والخير كلة بأعضاء هذاء المنتدى هم الي علمونا الي مانعرفة..

وانا مستعد والأخوان هناء مستعدون بالرد على اي استفسار منك او من اي عضو..

ولك فائق التحية والاحترام.................