نخيتكم ما نخيت رخوم

[راعي الحميّة]

وش دعوة لا تطل أدخل :d




مسيكم بالخير ياشباب
عندي لاند فكس ار 2001 ودي أبيعة وأشتري أرمادا فل ابشن وش رايكم بالأرمادرا من ناحية الاستخدام وهل هو عملي أو فية عيوب ياليت تشورون علي

[الشقردي]

خلك على موترك لا تتحسف

الا اذا تبي سيارة أوسع فكر في خيارات أخرى أما لمجرد التغيير فما أنصحك انك تترك التويوتا الياباني وتنزل الى الاقل جودة.

[بيّن]

تحول عن السنام وتركب الردوف .

اخوووووووك

[بواسامه]

اتستبدل اللذي هو اردى باللذي هو خير00000 ترى اعرف الايه بس اقتباس

ياخي الفكس اطلق وارحب واجمل واقوى واحفظ لقريشاتك وكل شي
والصلاة خير من النوم

[ابو نوااف]

ياراعي الحمية مساك الله بالخير انت ومن يشوف
الله يسامحك بس في اكس ار تبدله با ارمادا افاااااااااااااااا ما هقيتها
الله يعطيك خيرة ويكفيك شرة قل امين بس

[تــــوني]

انا انصحك تشتري رد بول عشان يعطيك جوانح

[راعي الحميّة]

الأخوان
الشقردي
بيّن
أبو نواف
الله يعطيكم العافية على شوركم وفعلا ما خاب من استشار

توني انت مثل الي يقول ياعمي طير :d :d <<< وش رايك بالتفسير
يعطيك العافية

[ابوشعيل 97]

افااااااااا بس افااااااااا تترك ال vx-r وتروح لأبن مرادر دري وش اسمه حتى اسمه ماعرفناه خل عنك وقبل ماتبيعغ اسمع القصايد الي فيه
راكب الي لامشا الخط الطويل لو مشى يومين ماجاب الملل
اقصد الفكسار ماغيره بديل لعنبو من صممه لين اكتمل
امدحه وان مامدحت اخر موديل ويش ابمدح موتر غير اجل
ابيض لونه مثل زبده صميل وارثمن خشمه مثل خشم الفحل
اقرا القصيد يابعد خشمي يالي تطلي الشور تحياتي ابو شعيل

[الـــــهدد]

الفكسار

لا يقارن ابداً

با الارمادا

الفكسار مركب شيوووخ

[عـــمـــر 11]

وشجاب الصين للطين
والعيب في الارمادا كانك راعي بر الثقل والكبر وهذا بحد ذاته عيب عيب كبير
مشكور يا(راعي الحميه)على الموضوع

[غضنفر]

اذا تبي نصيحتي
بع الفكسار وطقلك هدد 2006

[راعي الحميّة]

الأخوان الاعزاء
أبو أسامة
أبو شعيل << صح لسانك
الهدد
عمر 11
الله يعطيكم العافية على مروركم وشوركم وهداية الله
الاخ الهدد
ما جربت الهدد بس ما أظنة بفخامة الفكس ويعطيك العافية

[ابوالجازي]

السلام عليكم ورحمة الله
اسمع هالقصيده وانت قرر قصدي اقرا

ياراعي الحميه
ياراكب اللي تو طبلونه اصفار
مطلاع ومنزال التريله مماشيه
توّه جديد ولامشا غير مشوار
من الوكاله الاوصل بيت راعيه
تايوتا جيب وشايل احروف فكس ار
ابيض ومن داخل حلا البيج غاشيه
فتحه به اسبيرين مطنوخ وخيار
شنطه مراتب جلد وكل الحلا فيه
كنه الامنه تواسا على القار
طيارة الميراج بوصفٍ وتشبيه
راعيه ياطابه بعيدات الاقفار
لطرد الحباري والمقانيص شاريه
يبغاه الامن واسقة مد الانظار
ولاه مايبحل بطيره يباريه
بارضٍ سهل ولابصعيبات الاوعار
مر يباري الطير ومر امتعديه
فالخط بيطار وفالبر بيطار
وسط المدينه مابه احد يجاريه

وسلامتكم

[منتعش]

يا أخوي الغالي
خلك على الجيب خلك على الجيب
أنا مثلك بعت موتري الجيب وشريت موتر جديد من الوكالة
ولكن تحسفت جداً وما طول معي وبعته ورجعت لجيب اللاند كروزر
والآن أجرب أغلب السيارات وما أرتحت إلا مع الجيب .

فنصيحة خلك على جيبك ( القوة - المنظر - الشياكه - قيمته فيه عند البيع - حق بر وسفر وتحميل وطعوس و.... )

[هاوي الله]

نصيحه عليك بــ Gx 2006 استبنتين فل 2 ارباك ونش + فتحه بس أهم شي يكون الدبل الصغير قير وليس زر كهرب ( يعني مهوب دفع رباعي ) من اليحيى.

إلا إذا كانك تبي أوتوماتيك فإخذ VXR من البازعي عشان الضمان لأنه أوتوماتيك والحافظ الله .

[anas]

انت بغيت النصيحة: والصراحة... ان الانسان بطبيعته يمل ويحب التغيير فلماذا لا تنتظر لعل الجيب الجديد اللاندكروزر 2007 بيتغير شكله كما سمعنا ..واذا انت ملزم على الأرمادا فأذكر ان احد الأخوة ذكر موضوع في مكشات عن الأرمادا وانه جربه في الطعوس وطفشه من ثقله في الطعوس وكذلك مقدمة السيارة قريبة من الأرض جدا بسبب الدقن الأسود اللي يجي تحت الصدام الأمامي وطبعاً لأن الأرمادا صناعة امريكية فهو ثقيل جدا ومكينته قوية في الطرق...والأفضل انك تستأجر واحد قبل ما تشتري وجربه في الطعوس وقلنا بعدها كيف وجدته ..آسف على الإطالة .

[الكونترولCONTROL]

آرمادا سيارة اقرب ما تكون للسيارات الأمريكية و مشاكلها و قلة تحملها
---------------------------------------------------
و انا ما استبعد انها صناعة امريكية ,,,
مثل الالتيما اللي ضحكوا على الناس فيها و قالوا
رجعت موديل جديد 2005 !!!!!!
و انا و الله الذي لا اله الا هو اني شفتها في امريكا
نفسها 100 % عام 2003 شهر 5 !!!!
--------------
كلها لعب في لعب !!!
خلك على موترك لا تتحسف مثل قال اخوي قبلي !!!!
ترى اللاند كروزر موتر و غيره (( سياكل ))
---------------------------------

[راعي الحميّة]

الاخوان
أبو الحجازي سلمت يمينك على القصيدة
منتعش هذا الي أنا خايف منة بس يقال انة وسيع بالنسبة للاند
فتى البران ياخوك أنا احرص على الاتوماتيك لأن أغلب استعمالي الخط وداخل المدينة
أنس والله وانا أخوك ماهي الدعوة ملل بس مثل ماقلت لمتعش يقولون أوسع كنت ناوي أستأجرة من أبو هيف الي على طريق خريص
بس بعد شور الشباب هونت
الكنترول وأضف على الامريكية مشكلة المكيف في عز القايلة ما يبرد مثل التايوتا

والله لا يهينكم جميعا على مروركم وشوركم