استشاره اكستيرا ولا فورتشنر

[جي تي]

السلام عليكم

انا مسجل من زمان على ما اعتقد حول السنه ولا اذكر قوانين المنتدى زين فاذا كان موضوع ممنوع علموني :good2:

المهم انا ناوي على احد هل موترين ان شاء الله :) ومحتار بينهم وابي نصيحتكم وتجاربكم طبعا بدون عنصريه هذا نيسان ولا تيوتا اعتبروها كلها من شركه وحده

طبعن استعمالي للموتر رجل حاره شوي ادعس عليه :p وابي موتر يصبر علي وراعي تطعيس على خفيف يعني طعس قدامي ارقاه ابي موتر صبور ما همني سعر البيعه لاني شاري الموتر عاشن استخدم ومب ابيع طبعا الاسعار مقربه لبعض نوعا ما ابيه قير عادي المهم عرفتوا ميولي للموتر ونصحوني

بالاكستيرا مع انه ممتاز وقوي ونشييييط :good2: وشكله عاجبنب ( بالنسبه لي ) بس فيه هدفرنس مدري وش قصته اعرف ناس يعرفون ناس :looney: يقول اعرف 5 طق عليهم الدفرنس وشي مشكلته واذا فيها حل


الفورتشنر نشيط صبور مريح مقارب لموتري حاليا (هايلكس ) شكه حلو قطع غياره متوفره دبله قير وفيه دفلك وموتر ممتاز يعيبه سعره مرتفع شوي

طبعا اذا احد عنده خلفيه عن الاسعار

اكستيرا : 2010 سياحي قير عادي _ مستعمل نظيف
فورتشنر : 2009 فل قير عادي _ مستعمل نظيف ولا مانع اذا فيه حكات بسيطه
كم تجي اسعاره :)

معليش بربرتي واجده بس مالي الا الله ثم انتم :(

[N أبورغد N]

بالنسبه لتخوفك من الاكستيرا غير مبرر
لان اغلب الي طقت عليهم الدفرنس الخلفي بسبب الجلد والمقاوم والدرفته مع رفع هوى الكفرات
وفوق كل هذا ماغيروا زيت الدفرنس
الاكستيرا معي معدي المية الف تماتيك غيرت زيت الدفرنس وانا ماشي فوق 80 الف ولا شكى
وانا مبرمج وهدرز وفلتر وجلد لا باس به
اذا نويت عليه وهو من وجهة نظري افضل
واذا خايف من الدفرنس شيك على زيته كل 20 الف وغيره كل 40 الف وانت بخير
واذا بتاخذ قير عادي خل عيار زيت الدفرنس الخلفي 140 بدال 90
والله يسهلك الافضل منها

واذا محتاج تفاصيل اكثر اعطيك رابط منتدى الاكستيرا

[جي تي]

وزيت الدفرنس يغير ؟؟!!:confused:

ووش النوع الي احطه ؟

وسألت وحدمن الربع كان معه اكستيرا قير عادي والحين مع فورتشنر يقول انصحك بالفشفش وبقوه طبعن هو طق معه الدفرنس

وعلى استعمالي تراني راعي جلد :j

ويعني خمس اشخاص يعرفون بعظ تقريبا معقوله ما احد يعرف الحل !!!

ايه صح وحل تغيير الزيت حل جذري يعني غير ودوس اول ثاني ولا لا

[جي تي]

قصدك عشان المشكله في الفشفش هذا ثنين اعرفهم معهم 10 و 11 وما اشتكوا منه

[PHANTOOM]

اكستيرا وبقوة
اقوى عزم
اخف وزن
احسن شكل
دبل النيسان ما يحتاج
افضل سعر وفرق كبير


الفورشنر هايلوكس بدون حوض
موتر اسرع من قلبته ما فيه

اذا تبي تقارن قارن اﻹكستيرا مع البرادو ممكن

[جي تي]

بس لا تنسى ان الاكستيرا دبله فرار والفورتشنر قير

[ذيب زلفاوي]

اذا كان شكل الاكستيرا عاجبك لا تتردد
مع اني ماجربته بس احسه موتر مايعيبه الا شكله فيه قوه بس مستغرب من المشكله الي ذكرتها الدفرنس ماتوقع يخرب الا من سبب

[جي تي]

هو مشكلته دفرنسه ضعيف لمكينتة وهو ما يخرب الا للي يقاوم ونوفر اما الي استخدامه عادي ممتاز طبعا لقيتله حل من وحد من الربع يقول بغظهم يركبون كارونة ار بي تقريبا تكلف مع التركيب 3500 ريال وما دام فيه حل كن قلبي مال للكستيرا بس اشاور واجزم واستخير بس ناقصني بعض النصايح والاستشارات منكم

[ابونبيل]

الفورتشنر ولا تفكر بالاكستيرا

شكل الفورتشنر افضل بكثير وأهم شي تاخذ 6 سلندر لان الـ4 مايصلح

والصراحه المفروض ماتفكر في الاكستيرا والسبب انه نادر حتى بالوكاله اخبر واحد يقول بعد ثلاث شهور بيجيبون منه لانه مخلص عندهم وصعب تحصل له قطع انا كان معي باثفندر 2005 وتعرف شلون انتشار الباثفندر صدقني القطع كلها طلبيه حتى صرة الدفرنس طلبيه!!! اذا غيرو الحمراني بتزين امو النيسان

[المميـز]

:

الاختيار صعب بين الاكستيرا والفورتشنر

والاخوان وضحوا اهم نقطه وانت ذكرتها في بداية موضوعك اللي هي ( قطع الغيار )
من ناحية توفرها ومن ناحية اسعارها وقطع الترهيم مثل المساعدات واليايات الاستراليه

بالنسبه لقوة السيارتين فهم متقاربين من بعض جدا عشان كذا يكون الاختيار صعب

بالنسبه للراحه ... اتوقع الفورتشنر اريح لانه يايات خلفيه والاكستيرا سست

الفورتشنر تكييف مركزي وثلاث مراتب والاكستيرا مرتبتين ومكيف واحد قدام اذا ماني غلطان

بالنسبه للرساوه ... الرباعي المستمر بالفورتشنر ممتاز ويساعد كثير على رساوة السيارة بعد الله سبحانه وتعالى

كل الموترين مايردهم شي بالبر وبالنفود واهم شي لاصار اللي يسوق عنده خبره بالتعامل مع النفود وغيره

الفورتشنر لاتاخذ الا من ٢٠٠٩ وفوق واحرص على ٦ سلندر

*** الاكستيرا .. يمدحون الاف رود اللي يجي فيه ( دف لوك ) ومجهز للطلعات والبر ووكيل الكويت هو اللي يجيبه
احد الزملاء راح اشتراه من الكويت ويمدحه

سعر الفورتشنر ٢٠٠٩ القير العادي ٦ سلندر النظيف مايقل عن الـ ٨٥٠٠٠ ريال

بالاخير .. نصيحتي لك

عليك بالاستخاره بعد الاستشاره
والله يكتب لك اللي فيه الخير

واي استفسار حاضرين


:

[يزيد 999]

شف اخوي الفورتشنز هايلكس مصندق والله لاقوة ولا راحة ولارساوة بس الشكل حليل
الاكستيرا مايجي دفرنس يسمى فريول وواحد اعرفه معه 2008 غير الفريول بسبب انه مشى بمنقع ماء والفريول ضرب بحصاة وانكسر بس الصراحه قوة ونشاط لاتدور غيره يعيبه الشكل فيه غباء ملحوض

[التعـ King ـديل]

اكستيرا سياحي قير عادي واهم شي لاتجلده وتقول خرب

الفشفش مع ابوي 2011 سافرنا عليه مره للشرقيه والكويت من الرياض صرفيه بنزين على الفاضي غير انه غير مريح بالخط

اكستيرا طال عمرك وتذكر كلمتي لجميع السيارات

حافظ على موترك يحافظ عليك تجلده يجلدك

[جي تي]

الفورتشنر ولا تفكر بالاكستيرا

شكل الفورتشنر افضل بكثير وأهم شي تاخذ 6 سلندر لان الـ4 مايصلح

والصراحه المفروض ماتفكر في الاكستيرا والسبب انه نادر حتى بالوكاله اخبر واحد يقول بعد ثلاث شهور بيجيبون منه لانه مخلص عندهم وصعب تحصل له قطع انا كان معي باثفندر 2005 وتعرف شلون انتشار الباثفندر صدقني القطع كلها طلبيه حتى صرة الدفرنس طلبيه!!! اذا غيرو الحمراني بتزين امو النيسان

من ناحيت الشكل الناس اذواق وانا بصراحه عاجبني شكل الاكستيرا ومنب ماخذ وكاله اباخذ 10 مستعمل الجديد غالي حول 100 الف ومن ناحيت القطع موب شرط وكاله فيه موزعين واذا كان مافيه الا طلبيه نطلب مافيه مشاكل

[جي تي]

:

الاختيار صعب بين الاكستيرا والفورتشنر

والاخوان وضحوا اهم نقطه وانت ذكرتها في بداية موضوعك اللي هي ( قطع الغيار )
من ناحية توفرها ومن ناحية اسعارها وقطع الترهيم مثل المساعدات واليايات الاستراليه

بالنسبه لقوة السيارتين فهم متقاربين من بعض جدا عشان كذا يكون الاختيار صعب

بالنسبه للراحه ... اتوقع الفورتشنر اريح لانه يايات خلفيه والاكستيرا سست

الفورتشنر تكييف مركزي وثلاث مراتب والاكستيرا مرتبتين ومكيف واحد قدام اذا ماني غلطان

بالنسبه للرساوه ... الرباعي المستمر بالفورتشنر ممتاز ويساعد كثير على رساوة السيارة بعد الله سبحانه وتعالى

كل الموترين مايردهم شي بالبر وبالنفود واهم شي لاصار اللي يسوق عنده خبره بالتعامل مع النفود وغيره

الفورتشنر لاتاخذ الا من 2009 وفوق واحرص على 6 سلندر

*** الاكستيرا .. يمدحون الاف رود اللي يجي فيه ( دف لوك ) ومجهز للطلعات والبر ووكيل الكويت هو اللي يجيبه
احد الزملاء راح اشتراه من الكويت ويمدحه

سعر الفورتشنر 2009 القير العادي 6 سلندر النظيف مايقل عن الـ 85000 ريال

بالاخير .. نصيحتي لك

عليك بالاستخاره بعد الاستشاره
والله يكتب لك اللي فيه الخير

واي استفسار حاضرين


:


مشكور وما قصرت وذا كان القياس على الراحه والوسع انا معي هايلكس دبل ومرتاح فيه من ناحيت الوسع طبعنا انا توني شباب وقليل مايركبون اهلي معي وخصوصا اننا قليلين ما همني الدفلك والمواصفات العاليه ولا الرفاهيه بخصوص معي هايلكس معدوم المواصفات والراحه وللمعلوميه الاكس في 2010 نزل مكيفين وبخصوص الرساوه على كلام واحد مجرب الاثنين يمدح الاكستيرا في الرساوه

شكلي جزمت على الاكستيرا وانا مدري:D:D

[جي تي]

شف اخوي الفورتشنز هايلكس مصندق والله لاقوة ولا راحة ولارساوة بس الشكل حليل
الاكستيرا مايجي دفرنس يسمى فريول وواحد اعرفه معه 2008 غير الفريول بسبب انه مشى بمنقع ماء والفريول ضرب بحصاة وانكسر بس الصراحه قوة ونشاط لاتدور غيره يعيبه الشكل فيه غباء ملحوض

تأكد من معلومتك الله يحفظك الاكستير والفورتشنر ورا دفرنس وقدام فليور :) الباث هو الي ورا وقدام فليور

[قناص الأشهب]

أرشح الاكستيرا
والله لا أملك ولا أملك الفورتشنر
ولكن من كلام الشباب ومواصفاتة وتحملة وقلة صرفيتة ورخص القطع أقولك أكستتتتتتيييييييييييييييييررررررررررررررااااااا
ولا تشاور بل أستخر

[ددسن دفرنسين]

والله بعلمك يخوي
اولاً انصحك بالاكستيرا موتر نشييط وشبابي وحق كرف درجه اولى وبه مميزاته

والفورتشنر ماش معنا واحد مهنا رسااوه ابد يلعب فيه الهوا لعب صح انه 6 سلندر وقوي لاكنه يابس ومهنا راحة في المركب ورفيع على غير يمه


اتمنى اني افدتك ولو بالقليل ولاكن هذا رأيي والزم معليك هوا نفسك
والاستخاااره

[باترول 4500]

فيه حل للكارونه وهي تركيب كارونة فتك تماتيك تجي نفس الحجم عاد معروفه كارونة الباترول قويه تتحمل
واحد من الشباب مركبه بموتره وماشاء الله مضبوطه

وهذي مقاطع له
http://www.youtube.com/watch?v=EHDB_aH41Ws

http://www.youtube.com/watch?v=dJc5kOjgjHs

[أبو معاذ 2]

أرشح الفورشنر للأسباب التالية
1- توفر القطع وتنوع درجاتها.
2-الدبل عصا وليس زر.
3-المحافظة على السعر وتوفر الزبون عند البيع
4-توفر الدفلك في فئة 6سلندر
5- المرتبة الوسطى قابلة للانزلاق مما يوفر مساحة للركاب وللعفش حسب الحاجة.
6-مكيفين وثلاث مراتب.والمرتبة الخلفة تسفط مثل مراتب الاندكروزربصورة جميلة.
7-قلة الهربدة وجودة القطع الداخلية والخارجية.
8-دفع رباعي مستمر يوفر رساوة وتماسك على الأرضية الزلقة.
9-الأنوار الأمامية عدسات قوية بخط منفصل العالي عن الواطي.
10-ارتفاع ممتاز عن سطح الأرض مما يوفر خلوص ممتاز في البر ويقل ان تعلق السيارة ويسهل تركيب كفرات بالون.
وتذكر دائما جودة التويوتا وهربدة النيسان الذ اعتبره صفقة خاسرة . أما من يقول أن الفورشنر هايلكس فهذا ليس عيبا لأن الهايلكس سيارة أثبتت جدارتها . والإكستيرا هيكل نفارا.

[اسبيدر مان]

بحكم اني املك اكستيرا فأنا ارشحه لك وبقوة
موتري 2008 فل ماخليت مكان مارحت له عليه سفريات تطعيس قلص
الموتر جبار فيه قوة تماسك عجيبه سواء بالعضلات او بديكور الموتر متماسك
ايضا رغم صغر حجمه الا انه راسي على السرعات العاليه ومشكله الدفع الرباعي المستمر ثقيل بالقومه ايضا راعي التطعيس والمنوفر مايصلح له وشف المواضيع في هذا المنتدى وغيره يستفسرون عن فصل الدفع الرباعي المستمر ايضا الفورتشر سياره عائليه بحته
لكن دامك عزوبي ومن واقع تجربه انصحك بالاكستيرا لكن الله يعينك على تدوير النضيف
والاكستيرا من موديل 2009 جاء مكيفين خلفي وامامي عكس مديل 2008 وتحت مكيف واحد
وبالاخير الله يكتب لك الى فيه الخير

[المنيعي1]

أنا جربت الثنين
الأكستيرا أقوا وأريح بواجد من الفورتشنر
الشكل كل الثنين مادخلن مزاجي
قطع الغيار و القيمة الاكستيرا أرخص تحصله موديل 2010 بـ 70
الفورتشنر قطع غيارة غالية وقيمته موديل 2009 بحدود الـ 80

بنسبة لصبر كل الثنين صبورات ولا يطلبن لادفرنس ولاغيره الفورتشنر والأكستيرا والي عندنا كلهن 2008 وماشيات فوق الـ 200000 كلم
أقتصاد البنزين الفورتشنر يصرف أكثر. الأكستيرا فيه الباب الخلفي ضيق شوي عند الركوب.

[المنيعي1]

:



بالنسبه للراحه ... اتوقع الفورتشنر اريح لانه يايات خلفيه والاكستيرا سست


الفورتشنر تكييف مركزي وثلاث مراتب والاكستيرا مرتبتين ومكيف واحد قدام اذا ماني غلطان

حبيت أعقب على الجملتين السابقتين
بنسبة لراحة الكستيرا أريح مع أنه سست.والمكيف الـ 2009 الأكستيرا يجي مكيف خلفي

[جي تي]

فيه حل للكارونه وهي تركيب كارونة فتك تماتيك تجي نفس الحجم عاد معروفه كارونة الباترول قويه تتحمل
واحد من الشباب مركبه بموتره وماشاء الله مضبوطه

وهذي مقاطع له
http://www.youtube.com/watch?v=EHDB_aH41Ws

http://www.youtube.com/watch?v=dJc5kOjgjHs


طيب اذا ما عليك امر اذا تقدر سألي راعي الموتر بكم ركب دفرنس الفتك كم كلفه كل الشغل تركيب وقطع وهل اقدر اركب الكارونه بس مكان كارونة البلد ولا لازم دفرنس كامل اذ ما عليك كلافه