سيدي الجمس لايشغل الــ Mp3 و يشغل الــ Wav

[arab]

السلام عليكم ورحمة الله وبركاته

أخواني أعضاء هذا المنتدى,,,

ماهو الحل في الجمس لان السيدي لايشغل إلى الـــ Wav ...

أرج المشورة,,,

[FAHAMAN]

انت جربت سي دي الجمس ولقيته يشغل الويف لن اللي اعرفه انو ما يشغل الا الساوند تراك

[الكاسر23]

اخوي arab
ملفات mp3 ما تشتغل على كل جهاز CD ، إلا في حالة أنك تختار معدل التردد الصوتي للاغاني 44100HZ وغير كذا ما راح يشتغل، لان إبرة الليزر اللي تقرأ السي دي ما تقرأ إلا الترددات العالية فقط، هناك مشغلات سي دي مثل بايونير وغيرها يجي معاها بوكس (صندوق) يوضع تحت المرتبة او في شنطة السيارة يكون السي دي رقم 1 فقط هو اللي يشغل ملفات mp3 والباقي لازم تكون ذات امتداد 44100HZ سواء كانت WAV أو MP3.
انت بالتأكيد تبغى ملفات MP3 ذات التردد 32000HZ لان حجمها صغير والسي دي ياخذ حوالي 100 أغنية. صح!
اذا كان كذا خذ لك مشغلات mp3 على الولاعة واستخدم الفلاش ميموري اللي تقدر تسمعها على موجة FM وتراها رخيصة ما تكلفك كلها 180 ريال (فلاش ومشغل ام بي 3) وتراها متوفرة في اسواق الكمبيوتر ومحلات الجوالات.

[arab]

مشكرو أخوي فهمان,,,

لاكن ماهو الساوند تراك

ماذا تقصد فيه

جزاك الله خيراًً...

[arab]

الكــــــــــــــاسر 23:


جزاك الله خير على هذا التوضيح


فعلاً قبل قليل جربت 44100hz لاكن؟؟؟ نفس الكلام لم يشتغل...


ماهو الحل
جزاك الله خير,,,

[FAHAMAN]

كم موديل الجمس
وبعدين اخوي انت قلت ان مسجلك يشغل الويف وسألتك وما رديت على هذي النقطة

[قناص شقراء]

أخوووووووووووي الظاهر الحل عندي
أولاً السي دي اذا حطيت عليه ملفات صوتية( ساوند تراك ) يعني mp3-wav-acc هذي هي الساوند تراك
المفروض انك ما تحط أكثر من ما يعادل 80 دقيقة بعدين تصلح السيدي عن طريق بنرنامج مثل النيرو وغيرة من برامج الكتابة على السيديات وبد هذا كله جرب السيدي اللي سويته وبيشتغل معك بإذن الله وترا مشغلات الإم بي 3 أنا عندي واحد نووووع أبل ماكنتوووش زيبث على الإف ام اسمه i pod ميني وزي الحلاوة بس انه غالي والا شغال معي لي سنتين ولا خالف
وأتمنى أكون أفدتك أخووووووي arab والسلام عليكم و رحمة الله و بركاته ,,,,,,,,,,,,,

[FAHAMAN]

لا اخوي قناص الساوند تراك ليس كما ذكرت
الساوند تراك سي دي صوتي طوله 80 دقيقة يعني ينحسب بالزمن مو بحجم الملف

[الكاسر23]

اخوي arab
وش البرنامج اللي تستخدمة في تحويل الملفات الى wav أو mp3 عشان اشرح لك عليه أكثر ونصل للنتيجة ونشوف وين المشكلة.
بانتظار ردك!

[arab]

السلام عليكم ورحمة الله وبركاته

[arab]

أخوي العزيز فــهــمــان :

الموديل 2005

نعم يشغل صيغة wav لأني جبت شريط قرآن من التسجيلات وعندما فحصته لقيت صيغته wav ولايحمل إلى سورتين فقط يوسف والعنكبوت

مع العلم أن لدي إسطوانة mp3 فيها القرآن كاملاً ولم تشتغل لدي؟؟؟,,,

[arab]

قـــناص شقراْ , فهمان "" مساكم الله بالخير والرضاء

80 دقيقة فقط لــmp3 & wav يعني مافيه فائدة ؟؟؟ مع العلم أن المسجلات الي تشغل mp3 تشعل الي بالأسطوانة كله بغض النضر

عن الوقت ... واحد من الزملاء عنده إسطوانه mp3 فياه مقاطع صوتيه بالهبل...

قناص شقراء وش قصدك بالعملية الي عن طريق النيرو مفهمت بالضبط؟؟؟

ممكن توضح لنا الجهاز mp3 الي عندك وش طريقت عمله كم الحجم الي يشيل كم سعره يشتغل عن طريق الولاعة وإلا أيش؟؟؟

[قناص القصيم]

مالك الا الوكاله أخوي

[arab]

الكـــــــــــــاسر""مساء الخير,,,

البرنامج هو محول الصوتيات 5.9 المعروف حق أكرم...

والأن المشكلة ماهي في التحويل المشكلة في المسجل عندي مايشغل mp3 مأدري فيه مشكلة في الجهاز أو من المصنع جاي كذا أنا ودي

أستفسر إذا فيه أحد من الأخوان في المنتدى عنده جمس ممكن يعلمنا إذا الجهاز عنده يشغل mp3 وإلا لا ومـــــــــــا هو الحل...

مع العلم أن السيارات من موديل 2003 وجاي أغلبها تشغل mp3...

[قناص شقراء]

السلام عليكم و رحمة الله و بركاته

أولاً : ماله دخل mp3 أو wav المهم الميديا بلير بعدين السيدي اللي تقول حق القرآن اللي عندك هذا يا انه صيغة ram أو rm أو أي صيغة ريل بلير أو انه يصير بس كتابة مو صوت .

ثانيا: اللي تقول انه يشغل مقاطع بالهبل هذا طال عمرك يجيب الصوت و يحطه على شكل فيديو بس بدون صورة علشان يشغله بس طبعاً لازم يكون عنده مشغل ديفيدي بس لازم السيدي الصوتي 80 دقيقة .

ثالثا: عن طريق النيررو يعني ببرنامج النيرو اكسبريس مثلاً أو السونيك أو غيره من برامج الكتابة على السيدي وتختار التبويب حق عمل السيديات الصوتية .

رابعاً : الجهاز اللي عندي سعته 4 جيجا بايت ويصل الى 60 جيجا
وطريقة عمله اني يا أشبكة بسماعة راس والا سماعة كبيرة
أو اني أحط عليه القطعه اللي تبث مو جات FM وتختار انت الموجة اللي تبي عن طريق الجهاز
أما بالنسبة للتشغيل فهو يعتمد على الشحن فيا انك تشحنه بالبيت وتاخذه والا انك تشريله شاحن سيارة.

أمنى أكون أفدتك يا أخي الكريم والسلام عليكم ورحمة الله و بركاته ,,,,,,,,,,,,,,,

[الكاسر23]

يا اخي arab المشكلة عندك ما هي في الجمس .. المشكلة عندك ان عندما تحول الصوتيات الى السي دي لازم تحولها على امتداد 44100 هيرتز واختار نوع الملف wav وبكذا انا اضمن لك انها تشتغل.
بالنسبة للسيديات اللي عند ربعك وفيها ملفات بالهبل، فهي تشتغل على الكمبيوتر فقط وبعض مشغلات mp3 المطورة حديثا لان حجم الملفات فيها صغير وبالتالي عدد الملفات كبير لانها محولة على امتداد 32000 هيرتز من نوع mp3.
جرب ورد علي انا في انتظارك

[arab]

أخواني الأعزاء " مـشـــــكــورين على الردود السريعة

لاكن أمل منكم إذا أنتم لم تجربو الـ mp3 في المسجلات الداعمه له أنت تجربوه لأن صيغة الــ mp3 لاتعتمد على الوقت أبداً أبداً... بل تعتمد على حجم الأسطوانة وحجم الملف

أنا الـــ wav يشتغل عندي على أي إمتداد و مافيه أي مشكله لاكن 80 دقيقة فقط و الـ mp3 مايشتغل أبداً أبداً حتى عند تغيير الإمتداد,,, لاكن أنا أريد الــ mp3 هل يعمل أساساً في الجمس و إن لم يعمل ماهو الحل هل هناك قطعة تركب في نفس الجهاز أو إعادة برمجة,,,

**هذه المعلومات أتت بعد نسخ أكثر من 20 سيدي للتجربة و سوأل زميلين عندهم أجهزة تدعم الــــ mp3 & wav & wma وقالو لي الـــ mp3 قمة لحــــــــالــــــــة ولا يقارن أبداً بالصيغ الأخرى ,,,

[FAHAMAN]

مدري كيف اخوي كيف شغلت ملفات ويف
سيديات الساوند تراك ماهي ملفات عادية
اكيد عندك سي دي فيه ملفات ساوند تراك وملفات ويف عادية واللي يشتغل هو ملفات التراك مو الملفات
ليتك تجرب تنسخ اي ملف ويف في سي دي جديد وروح للسيارة وحاول تشغله
100% ما راح يشتغل

[الكاسر23]

اخواني
كل مشغلات الساوند تراك تشغل ملفات الويف وأيضا ملفات الام بي 3 ذات الامتداد 44100 هيرتز. المشكلة عند اخونا arab انه يبي يشغل ملفات الام بي 3 الصغيرة الحجم 32000 هيرتز. اقولك انه ما فيه الا اجهزة الكمبيوتر وقليل جدا من الاجهزة اللي يمكن تشغلها في السيارات ومنها بايونير وكينوود وغيرها من الماركات العالمية بس لازم تتأكد من المواصفات اذا ان لك نية ، لانه يمكن تركب صندوق خلفي للسيديات يشيل 10 او 12 سيدي واحد منها (اللي هو الأول) يقدر يشغل ملفات الام بي 3.
وريح نفسك اخوي arab من دوخة الراس اللي انت فيها، واذا انت في الرياض وودك نجرب كل طرق تحويل الملفات لتشغيلها على السيارة، فلدي الاستعداد لمساعدتك عشان اريحك واقنعك ان المشكلة ما هي في مشغل الجمس، بل في كل السيارات، واللي يشغلونها في سياراتهم تلقاهم مغيرين المسجل اصلا او مركبين صندوق في الخلف.
اذا رغبت ان نتقابل راسلني على البريد.
وتقبل تحياتي
اخوك
الكاسر

[FAHAMAN]

ترى فيه طريقة انك تشغل ام بي 3 ملفات القران على مسجل الجمس
تحطه على فلاش ديسك وتروح تجيب قطعة تنشبك في الولاعة والقطعة راح تشتغل على موجة راديو في الاف ام زي ما يقول الكاسر

فيه طريقة ثانية انك تجيب جهاز اي بود زي ذا
http://halloween.hiptophunt.com/img/posts/2660.jpg
ممكن تاخذه 512 ميقا او واحد قيقا او اثنين براحتك وتحط فيه ملفات القران ام بي ثري
بعدين تروح تشتري هذا الجهاز
http://www.mp3yourcar.com/animation/finally-box.jpg
اللي راح تسويه توصل الكيبل لفتحة ورا المسجل حق السي دي تشانجر ابو 6 ديسك اللي راح تلغيه
بعد كذا تروح تدس الاي بود في اي مكان اللي حيكون مشحون طوالي
واللي رايح يسير انك راح تتحكم في الايبود من المسجل حق السيارة ومن الدريكسون لو كان فيه مفاتيح
اهم شي انو الصوت راح يكون صافي بدون تشويش كنه سيدي يعني ما راح يكون على الاف ام اللي فيها تشويش
المشكلة اني ما اعرف احد يبيع الجهاز هذا هنا في السعودية بس ممكن تطلبه من امريكا وبيجيك سعره ممكن يوصل 800 ريال
وتراه يركب على الجمس 2005
ارعص هنا للموقع (http://www.mp3yourcar.com/productdetails.asp?type=FACTORY&make=GMC&model=Yukon&carYear=2005&productID=904)
كمان فيه ملف فيديو يوريك كيف يتركب تلقاه في الموقع ذا
http://www.mp3yourcar.com/default.asp

ابغا اقول شي ترى الاغاني حرام احسن شي تنزل ملفات القران والخطب والاناشيد وانا مالي علاقة باي واحد ممكن يستفيد من هذا الرد ويروح يشغل اغاني كل واحد ذنبه على جنبه

[arab]

أشكر الجميع على حسن التجاوب,,,

الكاسر23 حطيت الأمتداد 44100 لاكن مافيه فائده

وأشكر على العرض الذي قدمته لي وأنا لست من الرياض أنا من القصيم...

فهمان هذا الجهاز رائع جداً لاكن تخاف عليه بالسيارة لازم تنزله كل ماجيت تنزل


جـــــــــزاكـــــــــــــما الله خيراً...

[الكاسر23]

غريبة والله
لكن عند ولد عم عندة جمس راح اجرب هالطريقة وابلغك.

[arab]

مشكور وماقصرت لاتأخر علينا

[الكاسر23]

أخوي arab
عرفت المشكلة وحلها سهل جدا
المشكلة ان ابرة مشغل السيديات في الجمس ما تقرأ ملفات السيديات المنسوخة من الكمبيوتر ، لانها تقرأ فقط سيديات cda و cdi اللي تعرف باسم ساوند تراك sound track فقط. وعليه فان الحل يتطلب الذهاب لمحلات المسجلات بالغرابي يفكون مسجلك ويغيرون أبرة الليزر اللي تقرأ السيديات بأخرى تقرأ ملفات الكمبيوتر wav ذات الامتداد 44100 هيرتز وتشغل ملفات الفيديو VCD يعني تقدر تضيف عليها شاشة وتتفرج على أفلام.
وبالله التوفيق.
قلنا بعدين وش يصير معاك.
اخوك
الكاسر

[arab]

مساء الخير :

أنـــــــــــــــا ماعندي أي مشكلة أبد بالــــ Wav في كل إمتداداته نسخت من الكمبيوت أكثر من سيدي Wav على أغلب الإمتدادات من

ضمنها 44100 لاكن المده محدده ماتقدر تجاوز 80 دقيقة

المشكلة فقط في Mp3 في كل إمتداداته مايشتغل

[الكاسر23]

mp3 ما يشتغل الا بنفس امتداد wav وكلاهما 44100 هيرتز
اذا بكذا بيصير عندك نفس الوقت 80 دقيقة ولا تقدر تتجاوزها ابدا.
لان ملفات mp3 اللي انت تقصدها وتبي تشغلها على المسجل هي بامتداد 32000 هيرتز. ولكن هذه ما تقدر تشغلها أبدا ولا أحد يقدر يحول المسجل الى قارئ لهذه الملفات. لكن هناك مسجلات تجي جاهزة من بلدها مثل ما قلت لك اول، مثل بايونير وكينوود ، وتقدر تضيف بوكس يأخذ 10 او 12 سي دي الأول منها يشغل mp3 بامتداد 32000 هيرتز.
وغير كذا ما تقدر تسوي أي شي اخوي arab ولا تتعب نفسك بالمره لان الملفات الصغيرة اللي يجي عددها ما يقارب 100 في السي دي الواحد قليلة المشغلات اللي له في مسجلات السيارات.
وصلى الله على محمد.

[نمر بن حثلين]

اخوي بدون ذي الدوخه كلها

ركب القطعه الصغيره الي تركب على الولاعه fm وتحصلها بمحلات الكمبيوتر مابين 90 - 100 ريال
وفلاش حسب الحجم الي تبي

يعني الشغله كلها 150 او 200 ريال