الحراره في السياره

[ابو بريك]

اخوني الآعزاء عندي جيب قراند شيروكي وكانت حرارته النص دائما وتلقفت وغيرت ماء الرديتر من اسبوعين وقامت الحراره ترتفع الى فوق النص اذا كنت واقف علما ان السياره لها سنه عندي وماقد ارتفعت الحراره الى هذا الحد الى بعد تغير الماء. ابي المساعده في الحل وجزاكم الله خير

[GMC79]

اذا كانت الموية تنقص بشكل مستمر ولو كل شهر نصف لتر شف الرديتر وافحصة يمكن في تنسيم واذا كان سليم

شف الليات واذا كانت سليمة

شف الطبات الخارجية واذا كانت سليمة

عاير الزيت واذا كان لون الزيت مائلا الى لون الرماد او الفضي فترى الطبات الداخلية تهرب او الراس منظرب

واذا كانت الموية ما تنقص

شف المروحة واذاكانت سليمة

شف البلف يمكنه يقفل اكثر من اللازم واذا كان سليم

شف طرنبة الما يمكنا ما تدفع الما داخل المكينة واذا كانت سليمة

واذا كان لون الموية في الرديتر بني او احمر فترى يمكن فيه طين ساد مجرى الما ويحتاج تصييخ

اسباب حرارة السيارة لاتخرج عن ما ذكر اعلاه وشكرا

[منتعش]

ربما يكون الله يحفظك
تنسيم في غطاء الأديتر .

[المشراق]

أخي البكريم الموية التي غيرت غير اصلية استبدلها بموية اصلية وجرب قبل ماتتعبث بالسيارة وأتمنى لك التوفيق 0

[برنس777]

أخوي أبو بريك السلام عليكم ورحمة الله وبركاته والسلام موصول لباقي الشباب :
الحقيقه الاخ Gmc79 كفى ووفى ولكن عندي بعض الزيادات وهي عليك بتغير الماء إلى ماء الماني لأنه فيه خاصية التبريد أقوى من غيره , وتكون نسبته في الرديتر 30%والباقي يكون ماء مقطر وكذلك تغير بلف الحراره إلى بلف مقاس 65 لأن شد البلد يكون مقاس 95 درجه مئويه هذا مالدي والله أعلم .

[مهراس]

السلام عليكم ورحمة الله وبركاته:



أبو بريك مرحبا بك / ماهو نوع الماء اللي غيرته وماهو نوع الماء الأول وممكن سنة الصنع للسياره وكم سلندر ان شاء الله أفيدك والأخوان.





أبو فهد

[ابو بريك]

المويه أصليه ماخذها من وكالته وتاريخاها جديد.والرديتر نضيف أخضر .

[رقبة حاشي]

صيخ الراديتر

[مهراس]

ياخوي السياره موديلها كم وكم سلندر

[راعي الجمس454]

أبو بريك السلام عليكم ورحمة الله وبركاته

أفحص لي الرايح لبلف إذا كان مضغوط يكون البلف يحتاج تغييرز

أفتح غطاء الرديتر وشغل السياره وخل واحد معاك ودعس إذا نزل الماء وطلع تكون الطرمبه سليمه

تأكد أن الرديتر يكون أربع رصات

أنصحك يالغالي تركب مروحه كهرباء من قدام وتمد سلك لداخل السياره إذا طلعت الحراره شغلها

وأنشاء الله اكون أفدك

[البيـرق]

الحل انك تدبل المراوح............

[خير المزن]

السلام عليكم

إلحق على المويه الحمراء الاصلية

لأانه باردة على الموتر

قد صارت لي قصه معها..........

السالفة مرة جاي مع الدايري الشرقي بالرياض وقت القيض الحمر وانقطع سير مكينة الجمس حقي وانا ما دريت وعيا يدوس الموتر

وقفت وادور بالموتر إيش الخربان والحرارة مولعة عندي قلت أكيد إن الموية ناقصة وافتح القربة ويوم فتحت وإلا يطير الماء وبفتح باقي الكبوت من قوته ويسبحن وألمس نفسي إلا المويه دافيه...................... وما جاني شيء الله سلم.

[شبح الصحراء]

أشوى انك ما رحت فيها يا خير المزن واللي سويته غلط لأنه لازم تنتظر لين يبرد الموتر قبل لا تفتح الرديتر او انك تنسم لغطى الرديتر وبعدين تفتحه وزين ما جاك مكروه .

وبالنسبة للشروكي يا راعي الشروكي انصحك بتركيب ماء رديتر من نوع آي سي ديلكو الأصلي وسعر الجركل 35 ريال ولونه اخضر ولكن ضع جركل واحد والباقي ماء مقطر .

[rhhn]

شكرا للجميع اخي راعي الجمس
عندي جمس غماره ونص موديل 2002 امريكي في الزحمه مثل طريق الملك فهد ترتفع الحراره الى قرب الحمر عملت تبديل الكوع مع البلف لانهم يجي كامل وصيخت الرديتر دون فائده يقولون فيه ورش تركب مروحة سبارو اضافيه تدل لوسمحتورشه ممتازه بالرياض وكم تكلف
شاكرا للجميع تواصلهم ولك شخصيا
rhhn

[rhhn]

شباب وينكم جزاكم الله خير ومشكورين مقدما

[الطير المهاجر]

السلام عليكم
أنا عن نفسي
غيرت الرديتر حطيت سعودي
وكوع الحرارة فكيته والسيارة واقفة وخلها تشتغل ساعة ماتزيد عن النص
أما اذا زادت معناها شي ثاني
تحياتي لك