عروض لمشغلات Dvd وشاشات العرض للسيارات

[راعي الجندلية]

اخواني اعضاء ومتصفحي منتدى مكشات
السلام عليكم ورحمة الله وبركاتة ، ، ،

فبيما انا في رحلة الى المنطقة الشرقيه ونظرا لبعد المسافة من القصيم الى الدمام فكرت بتركيب جهاز DVD مع شاشة للصغار علشان نسلم من حواقينهم . المهم سيرت على محل بالخبر متخصص بهذه الشغلات ولكن احترت كثيرا وقلت لازم اشاور الوجيه السمحه فيما عرضه علي طبعا السيارة باث فاندر 2002 والعرض كالتالي :
1- تركيب قطعه للصوره على السي دي حق السياره بمبلغ 150 ريال وليست كل المسجلات حيث ان بعضها يطلع الصوره بس الصوت لا وتراة ماهو DVD ولكن VCD وتركب معها شاشة بسقف السيارة وهذي انواعها واحجامها واسعارها كثيره .
2- تركب جهاز مشغل DVD مع شاشة بسقف السياره وشفت عندهم ارمادا يركبون لها وحده الصراحه حلوه بس انه يقول بـ 3200 ريال .
3- فيه عنده مشغل DVD مع شاشة 10 بوصات متنقل يعني ماله مكان معين وعنده حوامل تركب لها تثبت بمقعد السائق وتكون بين المقعدين وتتحكم بها واذا خلصت ممكن تنزلها معك للشقه او للشاطي ومعها بطارية ليثيوم تشحن وتشغل 3 ساعات ومعها قاعه اخرى تلصق بالزجاج الامامي اذا ما معك احد بالخلف وهذي سعرها 1700 والحامل هو يجيبه من ساكو 149 ريال وهذي الصراحه اعجبتني بس يقول كوري وانا خفت اخذها ولو يصير اي شيء وينك والدمام .
4- تغير المسجل لمسجل ومشغل DVD وتركب معه شاشة واللي يعرف مسجل يركب على الباث ويشغل DVD يعطينا خبر .

وش رايكم
والرجاء من لدية اي معلومه سواء النوع الجيد من المشغلات او الشاشات او الفنيين للتركيب يفيدنا ان حصل بالقصيم او الشكوى لله نروح للرياض

نريد معلومات قيمه للاستفاده منها خاصة ان الاجازه بدت والروحات والجيات كثرت .

وشكرا . . .

[قناص شقراء]

والله العروض عادية وأنا أقولك فيه مسجل حلو مرة من jvc الصراحة أكثر من رائع وقيمته بحدود 650 ريال وترا فيه أخوه والله ما تفرق بينهن نفس الماركة بس انه ما يشغل dvd ولا vcd يعني صوت بس وقيمته 450 ريال تقريباً و أنا أنصحك بالأول وبالنسبة للشاشات أحسن شي تاخذ منهم بس عاد كل شي بقيمته وترى عندهم بالوكالة أنواع القواعد وأشكالها المتعددة ,,,,, على فكرة ترى المسجل لونه فضي
اوه نسيت أقوك فيه عندهم مسجل خطيير بمعنى الكلمة بس له شاشات خاصة فيه لحاله لونه أسود الشاشة طريقة تركيبها الكتروني تدخلها وسط المسجل ويسحبها الدينمو حق المسجل بس أنا أقول انها ما تصلح لك اذا كان عندك عيال صغار والا اذا انت راعي بر وتطامر هالمطبات وغيرها لأنه حسااس جداً جداً
هذا الي انا أعرفه ,,,, أتمنى أكون أفدتك والسلام عليكم و رحمة الله و بركاته ,,,,

[أبو مسفر]

السلام عليكم
ياخي ليه تطولها وهي قصيرة
مر الغرابي وتلقى ابو يمن يركب لك شاشة تعرض DVD و AV و TV كلها نع التركيب بـ 1350 ريال معلق بالسقف التلفزيون ما يصفى في كل مكان لكن في الشرقية على كيف كيفك وبالنسبة للصوت على رادو السيارة FM ولا اصفى منه ومن نفس سماعات السيارة يعني لا تفكيك ولا اي اضافات مجرد يفكون لنبة السقف ويحطون التلفزيون محلها علماً ان الشاشة فيها لنبة يعني ما تغير عليك شي علماً ان الصناعة صيني ومعه ضمان سنة ولا ازين منه .
ترى الصين اكتسحت العالم
والدليل تلفزيونات هاير

[منتعش]

حي الله أخوي الغالي
أنصحك بجهاز توه طالع - أتوقع -
ويتكون من مشغل السي دي والشاشة معن
ونوعه ( سوني ) ما يحتاج
ومقاس الشاشة ( 6.5 )
وتشغل أي سي دي
وتشتغل في البيت وفي السيارة ومعها ريموت ومعداتها من ( شنطه - وتعليقة سقف - ورباط لربطها في المراتب )
وسعرها ( 1099 )
وأنصحك فيه وتراها جيدة جداً - إذا كان المقاس مناسب لك -

وأي استفسار أنا موجود الله يحفظك .
وأنا مجربها معي

[المنبسط]

السلام عليكم ورحمة الله وبركاته
مساكم الله بالخير يالربع فيه احد ركبها على الباث فندر ؟

[jaber280]

انا عندي ارمادا وركبت جهاز مع شاشته بسعر 165 دينار كويتي وصناعة الجهاز صيني مع كفالة 6 شهور وعرض الشاشة 10 بوصة ويشغل دي في دي + في سي دي
وإذا احد بركب أنصحه يحرص على اللي صناعته تايوان لأن حسب ما عرفت إنها أحسن الصناعات في هذا المجال طبعا بعد الياباني
وفي نوعية ممتازة ومعروفة اسمها Xm وهذه جيدة
وشكرا

[الرهدن]

السلام عليكم / أخواني00


واصلوا لنستفيد00


خصوصآ غير هذه الأنواع00 ولابد من ذكر العيوب أيضآ00




أخوكم / أبومحمد00

[امزرعينك]

http://motors.listings.ebay.com/Parts-Accessories_Car-Audio-Video_W0QQfclZ3QQfromZR13QQsacatZ38635QQsocmdZList ingItemList
السلام عليكم
هذا موقع فيه الانواع كلها عسى تنال اعجابكم

[aziz2727]

ان يا اخوان توني مركب جهاز dvd في سيارتي
طبعا" في اشياء مهمه لازم تنتبهلها قبل لا تركيب الجهاز وكلام الاخوان على متمه
الاخ ابو مسفر جاب المفيد
_ اهم شي تحرص على ان تكون الشارشه مقاسها معقول لان اذا كانت كبيرة تكون مزعجة وقد تتعرض للكسر من حركة العيال الله يصلحهم واعتقد ان مقاس 8.5 مناسب جدا"
_ وتحصر ان تكون الشاشة متحركه يعني يمين ويسار علشان ما تنكسر .
_ فيه اجهزة dvd المشغل حقها مدمج مع نفس الشاشة واعتقد هذا افضل ان يركب القعطة على جهاز السيارة .
_ تأكد ان المشغل يعمل على جميع الانظمة ( dvd - vcd - cd وباقي الانظمة ) لان في بعض الاقراص المنسوخه او المضغوطه تحتاج الى انظمة مشغله ليتم تشغيلها وعادة هذه السي ديات تكون اسعارها بحدود 10 ريال منسوخ . يعني اذا مريت الرياض لا تنسى تمر شارع الشميسي عند محلات بيع اشرطة الفيديوا وتظف لك كومه ..

[عريدان]

والله وجوده بالسيارة مو شي ضروري ولكن السفرات الطويله على سياره كبيره مثل الصوالين مع العائله تجعل وجوده أمر مساعد على تقليل الصجه والتسريع بنومهم أو تخديرهم ولكن أرجو أن لا يعرض فيه إلا ما يفيد من الأمور المباحة مثل أفلام الكرتون النظيفه والأناشيد الجذابه والأفلام الوثائقية المفيده ويمكن بعض الأشعار المشهورة وليست لمطربين ومطربات "الهوى" وخاصة الخالعين حسبي الله عليهم. الله يكفينا وياكم الشر.

[الرهدن]

السلام عليكم / اخواني 00


جزاكم الله خيرجميعآ00

وكلام أخينا عريدان عين الصواب00

لأن المسألة ماهوب نسكت الرضاعين وبس بل لابد من اختيار المناسب اللي يفيدهم00وهناك برامج وثائقية رائعة ومتعوب عليهاأو حتى حيوانات أما الكرتون ففيه نظر00لأن ليس كل مايعرض من الكرتون مناسب00


وأذكر قصة مختصرة /
في أحد المدارس الخاصة في مدينة خليجية وفي المرحلة قبل الإبتدائي00
عرضت المعلمة للأطفال فيلم كرتوني من قناة space stone
سبيس ستون00 أظنها كذا00


المهم / خرجت المعلمة لحاجتها00 وفي هذه الأثناء تغير البث
إلى فلم جنسي 100 %00 ومدة عرضه قارب 12 دقيقة
وبعد رجوع المعلمة صعقت حيث شاهدت مالم يكن بالحسبان00
وظنت أو هكذا يخيل لها بأنهم أطفال صغار قد لايستوعبون ماشاهدوه00
وحصلت الكارثة00 كيف !!

حضر في الغد الكثير من أولياء الأمور متسائلين عن ماحدث
لأن أطفالهم الصغار!! قصوا لهم ماشاهدوه00
وقد وصل الأمر إلى المسؤلين في هذا البلد00وتم فتح تحقيق بذلك00
لكن هذا التحقيق هل ينسي الأطفال ماشاهدوه00
فاأسألكم بالله ماحال الأطفال ولوبعد حين ومعروف بأن الطفل لايمكن نسيان ماشاهده بسهولة00 انتهت00

غفر الله للجميع00


أخوكم / أبومحمد00

[المنبسط]

السلام عليكم ورحمة الله وبركاته
الأخ / امزر عينك
1000 شكر لك وماشاء الله عليك لكني ما فهمت شي لأن كل الكلام عنجليزي فياليتك تعطينا الخلاصة في هذا الرابط وهل هذي الأنواع موجودة عندنا .
المنبسط

[راعي الجندلية]

اولا اشكر كل اخواني الذين شاركوا بهذا الموضوع دون استثناء

ماشاء الله العدد كبير والمشاركات كثيره لكني لا زلت اقول انه فيه ناس لم يشاركونا الا الآن ولديهم الكثير
بس انا لاحظت شيء ان اللي بالسوق انواع كثيره والمحلات التي تركب بعد كثيره بالغرابي بس حنا نبي نركز شوي على اجود الانواع الموجوده ومن احسن فني يركبها .
بعدين لا زم ننتبه لموضوع ان السياره فيها نسبة اهتزاز وما كل الانوع مضادة للاهتزاز يعني ممكن يشتغل معك 6 شهور بعدين يخرب لانه لم يصنع اساسا لتحمل الاهتزازات .
صراحة الوقت يداهمني وانا ما ركبت شيء وانا عندي مشوار الاسبوع القادم للرياض وودي اشتري لي واحد مع اني افضل اني اشتري شيء متنقل للاستفاده منه في اي مكان واي سياره وفيه انواع ممكن تركب لها قاعده فقط .
نقطة اخيره اود ان اقولها بالنسبه لمقاس الشاشة اشوف ان انسب شيء 10 بوصات لاني شفت 8 بوصات صغير مره ويمكن تعمي العيون من التركيز فيها .
واشكر مره اخرى الجميع على المشاركة .

[منتعش]

حي الله الأخوان
توني منزل موضوع عن شاشة السيارة يمكن يفيد الجميع وهذا هو الرابط :
http://www.mekshat.com/vb/showthread.php?t=51877